中概股冇事，小小啟示．迪士尼歷史新高，小小啟示．銀行年尾減按揭息，小小啟示． (Patreon)

中概股冇事，小小啟示

迪士尼歷史新高，小小啟示

銀行年尾減按揭息，小小啟示

1. 因為外遊，星期五朝早要起身做核酸測試（講真的！），所以今日早少少出。

2. 呢個系列仲有 「領展70蚊，小小啟示」同埋「匯豐強勢，小小啟示」，因為寫得長，應該會在Facebook Page貼。大家可以留意，或者下期 呢度文嘅Facebook Page Summary我都會提

呀，仲有Tesla。之前因為Mike Burry高調話沽空（其實早前都講過一次，同埋應該唔只係講，真係做咗），股價跌咗。之前篇文已經叫你唔使驚，唔好沽，今日就即時反彈。點都見證埋入標指先—當然亦可能會提早散水，自己睇路。但我都係嗰個原則：你因為入標指呢件事追嘅，應該480蚊左右買，咁真係500蚊樓上絶對唔使沽住

中概股冇事，小小啟示

3. 之前寫過，叫大家留意今個星期三，美國眾議院投票，on呢個《外國公司問責法案》，劍指美國上市嘅中國公司。咁一如所料，當然係過咗，如果冇睇錯好似係全票通過添。參議院早早過咗，所以理論上侵侵畫隻龜就成為法律。

4. 其實咩回事？係要求啲外國公司要遵守美國審計標準云云。本身聽落幾合理，因為你去人地度上市，冇人迫你—但，當年你又畀咗佢上喎。咁當然，而家改例冇話唔得。

5. 關鍵嘅係，同之前對華為中興之類不同，呢壇嘢最大嘅風險唔係對於啲公司本身嘅業務，拼多多唔會做少咗生意。但即係可能隻股票要除牌啦，或者買咗嘅要沽啦。但輸錢點計呢？我係美國基金你夾硬搞到我輸錢，得唔得？ETF呢？呢啲法律問題就等佢地慢慢研究了。

6. 而實際上，係咪又唔可以遵守美國審計標準呢？又未必。唔少人會諗，唔畀得美國審計梗係假。但，都唔少中概股係大公司喎，真係全部假數？阿里巴巴 京東 網易之類嚟香港上市喎，而香港上市不見得比美國易。

7. 講咗一大輪呢啲口水嘢，都係股價最實際。有辦你睇，你見啲中概股，似乎反應不大。亦可以話之前已經跌晒。又一次示範「股價係炒將來」的。

8. 留意以上呢幾隻，共通點係乜？除咗係比較大（有啲細嘅公司真係相當假），上面呢四間，都係未在香港上市嘅。風險就大啲，一個唔該你冇咗美國上市地位，啲股票冇得交易—咁真係唔會令拼多多做少咗生意，但都係煩煩地。始終上市地位值錢，同埋現有啲股東會煩到你癲

9. 但掉轉，你見咩京東 阿里巴巴 網易之類，真係有先見之明。嗰時都唔少人（包括我，但冇乜特別）估係因為中美交惡，呢啲公司怕畀人搞，所以返嚟香港搵定個後備方案。而家證明係幾有用嘅，你咪除牌咯，我隻嘢仲在香港買賣，有乜問題？甚至你禁晒美資買，都真係唔怕的。

10. 所以，最大受惠，可能依然係港交所388。除非另外嗰啲公司嘅業務同數真係極大問題，嚟唔到香港上市（好出奇？況且，可能當年係真，而家係假呢）。否則，一定會跟阿里巴巴咁玩法。亦因為咁，你見港交所股價都幾硬凈的。雖然話說回頭，呢堆東西嘅市值，就同阿里巴巴爭好遠了，帶嚟嘅成交亦爭好多。

迪士尼歷史新高，小小啟示

11. 有機會我可能在Facebook 寫長文。呢隻先真係神奇頂級超卓。你諗真啲，成件事好匪而所思。科技股新高唔奇，但，喂，迪士尼喎，歷史新高喎，乜料？！

12. 事實係我舊年年尾力推嘅，揀咗做2020心水之一，當時因為舊年嘅電影票房，最賣座嘅片差不多全部係佢。但唔係馬後跑，真係揀完我都有啲後悔—因為啲強勁票房應該一早反映晒（再講一次，股票永遠炒將來！），而原本都預今年冇咁多超級英雄片收入。

13. 然後，大家知啦，世紀疫情。迪士尼係受三重打擊嘅！黑過墨斗。原本以為分散嘅三個業務，齊齊都受影響！戲院唔開，冇戲上。樂園又唔開，冇收入。仲要體育賽事都停埋，ESPN又大影響

14. 所以你見，公司股價，差不多跌咗一半，150蚊跌到85，呢度都好合理，但之後先令你估唔到。

15. 當然，你要做 haters嘅（事實有條友在FB Page不停 jer住我），扯，迪士尼而家先返返年頭嘅位之嘛，有幾巴閉？唔好話同Nasdaq比啦，同標普比都跑輸一條街（事實）。「我買Tesla升幾倍啦」（咁買咗未？）。

16. 但我就覺得，嘩，差不多係今年最失敗嘅call，都仲可以唔使輸錢喎，巧堅。啲業務咁三重打擊，而家都新高喎，低位升成個開喎 — 你可以睇到，市場對迪士尼幾咁好，幾咁有信心。無他，個「品牌」「軟實力」實在太強，加上財力都極強。之前做串流，都好似成績唔錯。而家體育賽事又有返，樂園又好似開返啲，戲又有得上返，更加不得了。

17. 教訓？唔好低估啲大企業嘅resilience。冇錯雷曼都爆煲，但迪士尼唔係金融公司，亦都唔係航空公司咁重負債。絶對可以等得到冬天過去—加上，仲有聯儲局印錢嘛。

銀行年尾減按揭息，小小啟示

18. 未必好多讀者關心，但都寫下。埃汾2013年買樓（其實遲了，但另一個故事），同唔少香港供樓嘅人一樣，都係玩3年轉按一次嘅遊戲，最初係永亨，然後轉咗去中銀香港。拎回贈都幾皮嘢，幾爽。但去到今年較早時間，就玩唔到了，都怪自己手腳慢。銀行早前已經減晒啲回贈，甚至加按息，根本唔想做你生意。不過個遊戲從來冇話可以一路玩落去，講真個供樓息仲係極低，只係冇咗轉按拎幾皮嘢呢回事

19. 但，又係柳暗花明，唔知因為乜原因，而家中銀香港又減返按息，又再推返啲回贈優惠了（連結係東方，但上面圖係信報，要訂戶先睇到），原因唔知，有話係年尾跑數（我就唔多信），有話係因為拆息低咗。似乎其他銀行都會跟，畢竟中銀香港都係市場份額大。供緊樓或會買樓嘅讀者可以留意下。

20. 又，梗係唔係廣告啦。係嘅我會講明（以前的確有做過轉按廣告的），講過呢度唔做植入廣告，真係做廣告會講明。對付費讀者嘅責任嘛。