ivanliresearch

港股抽水潮，Tesla沽空。有錢人投資回報都高啲！高低學歷失業率進一步拉開。增長股價值股表現同2008年後唔同。報復性熬夜的心理。流氓交易員去晒邊？強姦在英國係咪變咗完美罪行？同讀者食飯 (Patreon)

Published:

2020-12-02 20:29:59

Edited:

2020-12-03 18:52:34

Imported:

2021-07

Content

快評兩句—港股抽水潮，Tesla沽空。

每日一圖—有錢人投資回報都高啲！高低學歷失業率進一步拉開。增長股價值股表現同2008年後唔同。

Good Read— 報復性熬夜的心理。流氓交易員去晒邊？強姦在英國係咪變咗完美罪行？

FB Post Summary—同讀者食飯

1. 今天應該很高興。首先係埃汾太生日！噢耶！另外，埃汾亦都達到800個Patreon．都係一個里程碑，多謝晒大家支持。仲有……好似都冇啦，但整裝待發，準備出發去台北。如無意外仲會在嗰邊寫書，希望至少寫好一本（？！）

2. 今日嘅快評兩句都寫得好長，分分鐘等於平時星期二四嗰啲，我會積極地諗下點重新編排，但一個星期六篇，同埋個形式都應該唔會變。可能係嗰日市場多嘢講（例如今日）我就專講市場，冇咁多嘢講就貼下good read，FB Post Summary，Chart of the day咁。再諗

快評兩句—港股抽水潮，Tesla沽空

3. 關於大市，都仲係覺得會有個調整，如果睇CNN個 Greed and Fear Index（唔貼圖了），都只係回咗少少，幾大指數亦冇乜力。

4. 當然仲有，香港都有兩單大嘅抽水活動。小米集資，同埋龍湖地產都係。兩間都係發新股（即係唔係現有股東減持），有錢入到公司。咁其實唔係壞事，企業上市就係為咗集資（同埋套現）。小米個情況仲有趣，今次拎嗰舊錢，300億，仲多過佢IPO集嘅錢。但梗係咁玩，亦因為股價升咗嘛。

5. 好得閒嘅可以做下實證研究，但不一定係因為抽水活動多，大市就跌。往往係掉轉，因為啲股票炒得癲，連管理層自己都覺得癲，唔呢啲位拎錢對自己唔住，就會多呢啲活動。

6. 但，市況冇力，亦都唔影響個別股票繼續創新高。ASML我就常講，應該真係比較少人講呢隻嘢，日日升啲升啲咁，日日新高。反而Google就有趣，其實早一排想公司嘅中年危機，譯（當然我獨特方法譯）Economist篇文，但反而係而家Google創新高—懶查，但我估其實股價好似仲係跑輸另外幾間Big Tech，只係人地一早破晒頂回返啲，佢就而家先破。

7. 呀仲有，Tesla急跌。原因？其中有人講，Mike Burry沽空Tesla．邊個Mike Burry？The Big Short 入面個醫生，Christian Bale，2008年前估次按爆煲沽空搵大錢嗰個。

8. 不過佢沽空Tesla並唔係第一日嘅事，佢貼咗張圖，講啲估值呀，賣車呀咁，亦冇乜新意—唔代表佢錯或我不認同，但一路都咁講，股價一路升。唔知幾時先死。

9. 而我推Tesla只係因為入標普指數一樣嘢，並無其他。都唔少讀者有買—唔係我影響力大，係呢隻股票夠晒cult．有啲已經早沽咗嘅，OK。未嘅話，我覺得係咩都唔使做住的。

每日一圖—有錢人投資回報都高啲！高低學歷失業率進一步拉開。增長股價值股表現同2008年後好唔同。

11. 有錢人投資回報都高啲！—呢個IMF嘅圖夠晒令人沮喪。有錢人本身已經好多優勢，但原來佢地投資回報仲高過你。即係今日同你爭10倍，十年後可能爭30倍。但留意，係risk adjusted．呢個概念好重要。即係有啲人嘅回報係通過高風險拎返嚟嘅。

12. 高低學歷失業率進一步拉開—更令人沮喪。留意高學歷嘅失業率當然一早係低過低學歷嘅，疫情中當然大家都升，但低學歷嘅升得多好多。然後到經濟反彈，大家都跌，但高學歷嘅跌得多啲。一來一回，就拉得更開了。

13. 增長股價值股表現同2008年後好唔同—解下個圖，打橫係各個熊市一年前同一年後。打棟係價值股同增長股嘅相對表現，大過100就價值股跑贏，細過100就增長股跑贏。亦即係升就價值股得勢，跌就增長股得勢。好啦，首先睇藍色，咁多個熊市平均，其實兩類股表現應差不多。紅色，金融海嘯嗰次，見底前都係增長股跑贏，但見底後就掉轉。今次呢？橙色，你見一都係增長股跑贏。科技股係好關鍵嘅因素。