ivanliresearch

「話咗跌市」— 一日咁多。Tesla一炮過入標普指數！。今年最大刁 — S&P Global 買 IHS Markit。教你睇股票：Zoom業績後急跌。大麻股強勢。ASML，PayPal，Nike 新高 (Patreon)

Published:

2020-12-01 19:14:43

Edited:

2020-12-03 18:54:21

Imported:

2021-07

Content

「話咗跌市」— 一日咁多

Tesla一炮過入標普指數！

今年最大刁 — S&P Global 買 IHS Markit

教你睇股票：Zoom業績後急跌

大麻股強勢

ASML，PayPal，Nike 新高

1. 歡迎新讀者，今日多嘢寫（邊日唔多？），客套話少講。留意月頭Patreon往往有啲混亂，容忍下（況且我都做到乜）。另外，有啲12月1日朝早join嘅，「恭喜你，你會畀人扣兩次錢」，因為係計美國時間。但埃汾作為良心作者，係會回返一個月畀你的，不過等下。要我得閒去襟制，仲要襟完等一兩星期。

2. 另外，抄隔離台陳祉俊（未訂記得訂，記得話我介紹，冇折，但等佢等我知道呢度宣傳效力宏大），我好大可能每個月會放一兩篇文免費，咁當然係至少隔一兩日先，希望大家唔好介意。主要都係吸下客，同埋有個辦畀人地睇。

「話咗跌市」— 一日咁多

4. 上篇星期日寫，提到「別人貪婪時我保守」，而家諗法仲冇變。結果一寫完，哈哈，星期一恒指就跌成500點，美國都大跌！我仲唔係先知？

5. 可惜唔係

6. 個跌市，就係一日咁大把。「恒指星期二幾硬淨我都知大件事」，寫文之時（星期二晚）道指直頭上返三萬點，有幾隻一路推嘅股票又新高。「跌乜市」？

7. 不過天地良心，上次真係寫到明，最多只係叫你減孖展，或者原本想買增長股變為買悶啲嘅股，或者學埃汾提早交定啲要交嘅錢（例如換電腦）。從冇叫你清倉，甚至減倉都唔使。差不多任何時間我都係100% invested嘅，都話戶口有錢會畀蟻咬的（唔計我層樓爭按揭啦下，另一回事）。

8. 你睇返個Greed and Fear Index，仲係在極高位。咁睇呢舊嘢有冇用？總有。但當然投資冇咁簡單，否則你望住個錶紅色時買綠色時沽就發達。實際上有乜問題？有機會再講。但正所謂the market can stay irrational longer than you can stay solvent．3月嗰時，由好恐懼，變做好好恐懼，好好好恐懼，你一買完又插多十幾巴仙，你唔驚就假。如果沽空嘅（散戶好少），做孖展嘅，或者啲錢係有用嘅（下個月個仔交學費），更加必死。

9. 另一問題？可能真係大調整在即，但可能係升多15%先跌5%呢？況且，跌完你又唔知幾時買返。所以有時真係less is more，特別係冇槓杆份工又穩陣嘅，根本就可以個個月合埋眼買。唔一定月供股票咁悶（雖然有用），可以係例如我一個月有兩皮嘢閒錢，又有幾隻股票想買，咪定死自己嗰日要買—價都唔使睇。

Tesla一炮過入標普指數！

10. For some reason，其實埃汾唔係好鍾意send PM畀大家，總覺得有啲打搞（同埋之前有次私下覆個讀者變咗send晒畀所有人）。但，上次星期六寫Tesla，真係提晒大家架啦，叫埋你星期一上去reload．時間同link都畀埋你，「有讀者問我會幾點出」，真係當我神仙咩。

11. 但結果，就出咗啦，Tesla一炮過入21號入標普指數，都令我有啲意外。詳情可以睇CNBC報導。另外幾好笑嘅係，被踢出嗰間呢，係12月11號先宣佈。

12. 仲有，留意返，CNBC篇文有引返標普指數嘅分析員講，流入資金應該係727億左右。舊文有提，「明明官方之前話510億」（上圖）。做乜多咗？因為係動態的，positive feedback，你隻嘢越炒越高，市值越大，咁佔指數比重又會更大，吸嘅資金就更多。但睇下highlight呢句，埃汾嘅quick and dirty estimate 都OK準的。

13. （打到呢度我先發現，CNBC篇文好似Pro member先睇到，唔改了，信我吧。或者你搵免費news都差不多的）

今年最大刁 — S&P Global 買 IHS Markit

14. 講開標普，剛公佈做收購，呢單嘢應該會係星期六專題（寫完上飛機！），但留意返，呢單嘢係2020暫時最大單嘅刁！估唔到呢。

15. 唔知大家有幾熟，但被收購嘅，IHS Markit，請問有幾多人之前聽過呢間公司？做金融嘅可能聽過，但未必知做乜，亦唔知咁Q大間。如果唔係做金融嘅，幾大機會係聽都冇聽過。

16. 但呢間嘢，440億美金呀大佬！而我都係剛剛先知原來有上市！

17. 買家，就應該大家都知，S&P Global，標準普爾環球，正係標普指數嘅標普，亦係信貸評級嘅標普。

18. 周末我會寫，但預告定，之前有推介過穆迪（Moody’s），只係順手。睇落，似乎係S&P Global好啲。係喎，S&P Global都係上市的。800億美金市值！

Zoom業績後急跌

19. Zoom 業績之後狂瀉。冇乜特別，但快寫兩句，活學活用。講過N次，股票（其實所有投資都係）一定炒將來，炒前景。亦所以，冇好嘅業績同差嘅業績，只有勝過預期同差過預期。呢樣都未搞清嘅，就會好似出面啲麻瓜咁，「做乜業績增長咁勁股價都跌」「做乜盈利升兩倍股價唔係升兩倍」「脫離基本因素呀」。此乃第一層次

20. 但比較有趣嘅係，Zoom今次業績，係好過預期嘅！每股盈利99仙，預期係46仙。收入7.8億美金，預期6.9億。喂，好過晒預期喎，做乜仲跌？

21. 業績好過預期，股價照插，好多原因。最常見，就梗係個市都唔掂啦。但明明今次個市幾好，

22. 咁，再對下嘅原因，都常見嘅。就係管理層嘅guidance保守，令人失望。即係佢嘅展望未及分析員嘅期望，或者佢展望差過佢上一季嘅展望。由於美股多數公司，官方都會每季畀展望，所以調高調低呢啲東西都會幾大影響。

23. 嚟啦喎，最新一季（上一季），收入增長367%，再對上一季係355% ，再對上一季係169%，一路加速。但下一季呢？公司指引係329%，減速喎，仲慢過之前兩季，死唔死？公司未必死，但股價咁反應好合理。

24. 以上種種係馬後炮？當然係！但好多時你唔使知聽日發生咩事。你知今日同昨日發生咩事就夠了，因為好多人連呢啲嘢都唔知！

25. 講到尾，市場嘅嘢，既係藝術又係科學。市場有時喜怒無常，唔講道理—應該話自有佢一套道理。我就覺得好似對女人咁（絶無冒犯之意），你去感受佢，順勢而行。亦好似路蘭咁話，Don’t understand it, feel it。有時就係矛盾的，唔好作對，唔好鬧雙重標準—因為大多數時間佢都仲係講道理嘅，而講道理時你順勢而行是十分歡樂的—問題係佢唔多講道理時你點應對，點減低傷害。