別人貪婪時我保守。留意星期三。顛覆大公司？冇咁易。全球負利率債券史上最多。希特拉都出書點解我唔得？捧韓星一年要用一皮嘢。Network鯨 (Patreon)

快評兩句—別人貪婪時我保守。留意星期三

每日一圖—顛覆大公司？冇咁易。全球負利率債券史上最多

Good Read—希特拉都出書點解我唔得？捧韓星一年要用一皮嘢

FB Post Summary—Network鯨

1. 點解咁快又兩日又要交文？哈哈，可能證明真係差不多到極限。當然亦因為Patreon出咗兩篇長文。週末專題出咗Tesla，記住星期一晚（香港時間）就會知道點樣納入。自己上官網F5，我應該同讀者打緊邊爐。

2. 另外，出多咗篇號外，唔係講金融，講職場，講Networking。係人都知識人好過識字，但有冇諗過，點解人地要畀你Network？你係小薯人地係勁人嘅，點解要花時間應酬你？咁就要你將自己成為一個有趣嘅人，有意思嘅人。但仲有樣嘢，你有趣，都未必有人知，所以建立個人名牌都係重要的。唔好講到好大件事咁，其實搞個 Facebook Page已經係。

3. 呢類職場文有人叫我寫，但暫時唔會係定期。實在冇時間，而且同其他文定位唔多同。真係寫嘅，可能另外收費了。遲下再諗。

4. 新加入嘅朋友，記住呢幾日新加嘅月費會員，我都回返水了。之前個個月都係咁，但我好少高調講，免得24號入嘅又問我點解冇，回一半得唔得，很煩。

快評兩句—別人貪婪時我保守。留意星期三

5. 今次快評得寫得好長，不過我估大家唔介意。

6. 同好多人想像唔同，埃汾並唔係成日睇股票機。我甚至連real time 報價機都冇！仲要係公司有戶口我都冇用。我最多係早午晚望一望咁。但，即使唔望市，我都感受到市況幾熾熱，特別係美股。點知？因為，又開始一街股神了。

7. 當然講過多次，當局者迷，事後睇就易，身處其中就唔係咁簡單。正如3月中同尾，都真係好多人真心知道人地恐懼時我要貪婪，但做落唔係咁易。首先可能人地恐懼時你冇錢。另外，買完即跌多兩千點，你都咪話唔驚。但又為咗怕呢樣嘢，想捉到個底，但點知一下又反彈兩千，又想跌返。呢啲心路都係好正常嘅

8. 所以比較好（但唔係完美）嘅方法，咪整啲量化指標。唔少文都有講，但明報週末呢篇寫得不錯。

9. 最簡單嘅，CNN嘅Greed and Fear Index ，點計你自己上官網睇。呢個月係急升的。

10. 另外，美金創幾年低位，金價又跌（8月跟咗買嘅朋友當然輸錢，但一早講過係用嚟分散風險，冇叫你買晒）。全部都係市場貪婪嘅量度。

11. 咁的確，呢啲時間要小心啲。但，很很很很重要：絶對唔係等於叫你清倉。所以真係同一句嘢都要有唔同嘅演繹，「實不相瞞我都仲加咗倉」「然後先見到呢啲」「所以有時都係亂嚟」

12. 實務上可以點做？真係各思各法。但我比三個讀者嘅例子你：

13. 第一個，同埃汾一樣都係有錢身痕嘅，堅持要滿倉嘅，冇問題。但，原本想買啲波動大嘅新經濟股，咪可能轉為買啲落後啲嘅舊經濟股。雖然唔保證跌落嚟後者會跌少過前者，邊有得保證。

14. 第二個讀者，原來係做孖展嘅—咁我一向都唔鼓勵人做，但過去幾個月當然你越敢孖越掂，爭在唔知個浪幾時打埋嚟。既然個讀者都覺得有啲危險嘅，簡單，咪減晒啲孖展先，變返100%倉位，唔好 120% 甚至150%。

15. 咁最後一個，周處除三害一樣，梗係埃汾自己。大家一路轉年費呢，我就係一路預先拎咗錢。咁但，我講過我都係見現錢會身痕的，一係投資，一係用咗佢。咁我而家嘅做法，就係索性用晒啲錢佢—例如一路想買電腦嘅，而家買，唔分期。想畀錢屋企人嘅，而家畀，唔好煩。變相就係改善咗將來嘅現金流的。

16. 所以記住，同一句嘢，在唔同人身上，有唔同嘅做法。不能只記口訣。

17. 另外想講，留意星期三。之前話可能迫部份美國上市中資公司除牌嘅法案，星期三會表決。過唔過到？唔知，似乎機會大，兩手準備。我的確覺得係買入機會，問題係好多根本冇乜點跌（中海外688就跌得勁，但都開始反彈，亦唔係美國上市）。今次法案過到，再加埋市場氣氛太貪婪，可能有個大啲嘅調整。

18. 另外留意，議案在眾議院投票，民主黨控制，要三份二票數。望落過嘅機會似乎幾大。亦可以粉碎出面講拜登或民主黨親華嘅睇法。

每日一圖—顛覆大公司？冇咁易。全球負利率債券史上最多

19. 顛覆大公司？冇咁易—有機會寫長文（永遠都好多嘢想寫）。而家啲小朋友，好多以為科企改變世界，打倒舊霸權，disruption．但真的嗎？樓上個圖話你知，displacement rate 90年代先新高，近N年都係低。佢呢度嘅定義係：原本行業收入頭四，跌出行業頭四位。點解而家低？其實合理。首先，90年代時科技真係新嘢，而家老牌公司都識應對啦，都會用科技（例如Walmart）。另外，好多顛覆者，自己咪變咗霸權咯。

20. 全球負利率債券史上最多—不用多解，史上最多，係指銀碼。又，咁情況下，股票點會唔升？點可能大跌？錢又印咗咁多，買樓又普遍多限制，咁唔買股，唔通買債？

Good Read—希特拉都出書點解我唔得？捧韓星一年要用一皮嘢

21. 周末輕鬆啲，唔推金融文。

22. 希特拉都出書點解我唔得？—呢篇全不輕鬆，講言論自由，我認為現今世界（特別在香港）浪費最多時間九拗嘅嘢，拗嘅兩方十居其九根本係講唔同嘅嘢。但講返呢個故事，有條加拿大鬼佬，言論好爭議，出書。出版社（Penguin Random House，冇錯係嗰間Penguin）員工抗議，搞錯，呢條人白人至上主義又恐同，做乜幫啲咁嘅人渣出書。問題係，Penguin連希特拉嘅《我的奮鬥》都出，於是有人話啲員工偽善。自己判斷下，未必有對錯。延伸閱讀呢度，「呢本都唔出得，好多書要下架喎」。其實呢啲爭議近來越嚟越多，一方面啲人言論越嚟越激，但另一方面絶大多數人都唔包容其他意見，佢地心中嘅「言論自由」就係圍爐打飛機，唔啱聽嘅仆街言論當然要禁。殊不知埃汾成日講：Freedom of Speech doesn't protect speech you like; it protects speech you don't like

23. 捧韓星一年要用一皮嘢 — 反而個網站都值得講，比較唔同地方價格。咁韓星呢個，講話買官方商品，隻隻碟都買，同埋去一次演唱會。一年就成皮嘢。「濕濕碎啦，睇埃汾都一舊水一個月」。但，介紹返，個網站係……ph。主要係比較東南亞國家。咁對佢地嚟講，一年一皮嘢就好係嘢了。

FB Post Summary—Network鯨

24. Network鯨—就只係貼返樓上有提過，呢度篇號外。破紀錄呀喂，我差不多兩日冇出過Facebook Page Post，但當然時間慢慢地放咗在Patreon．但又話說回頭，呢篇嘅題材原本應係Facebook Page文。而即使係多圖多link嘅，我都只係會放medium—而家就索性放Patreon 了，呢篇文係Public的，所以人都睇到，順手畀啲未join嘅讀者熟習下Patreon嘅界面咁咯。所以都計入Facebook Page Post