刺激方案，中國海外688，富途．維他奶345，王維基1137． 美股Drawdown同回報．牛市確認？Chart Crime．Jamie Dimon 講成功人士特質。Airbnb不是UBER．數到三就有疫苗。教師射波邊個頂？每月Endorse一個Creator (Patreon)

快評兩句　— 刺激方案，中國海外688，富途

大師冇點你—維他奶345，王維基1137

每日一圖— 美股Drawdown同回報．牛市確認？Chart Crime

Good Read—Jamie Dimon 講成功人士特質。Airbnb不是UBER

FB Post Summary— 數到三就有疫苗。教師射波邊個頂？每月Endorse一個Creator

1. 20蚊會員又多幾個人加入，剩返6個，有買趁手。40蚊就仲剩9個，仍需努力（我）。不過都係提返，由12蚊月費轉去20/40唔會收兩次，只會交差價。同樣地，12蚊而畀年費嘅，轉去20/40畀年費，亦只係交差價，當然繼續有85折。今年內都不再加推了。

2. 另外，有人問20/40有乜分別。都真係唔係太大分別，但40蚊嘅我會寫篇文，畀你點唱，你決定題目，只要我識而又唔係完全冇公共性嘅，正路我都寫。

20蚊嘅呢度加入

40蚊嘅呢度加入

快評兩句　—刺激方案，中國海外688，富途

3. 真係快評。首先講，留意下美股啲舊經濟股，民主黨共和黨繼續拉扯，預咗，但開始有人鬧（其中一個就係Jamie Dimon，下面會再提佢），叫佢地唔好咁小學雞，唔好玩政治凌駕美國人嘅生計。鬧完後，兩黨似乎又坐低傾，有機會傾掂數的。咁可能又係睇返美股啲航空股，郵輪之類。

4. 另外，我會睇隻中海外688，但短線的。股價近排弱到不得了，跌到3年新低。但人民幣明明強，賣樓又唔差，負債又低。嚴重跑輸隻華潤置地1109。原因應該得一個，因為入咗美國名單，似乎有人要沽。但講過呢啲對公司零影響（你唔出口水泥定鋼筋畀我？），照計買入機會。你見中移動941都彈返。

5. 富途呢，其實美國上市（知架可？又，說好了的唔靠香港拎唔到美金）。出完業績後又彈兩成，今年強到不得了。固然美國啲中概股好似炒味極濃，但，至少公司係有錢賺的。我唔係叫你買，而係我想研究，到底佢點賺到錢架呢？有機會研究下。

大師冇點你—維他奶345，王維基1137

6. 不用多講啦，天地良心，呢排寫啲嘢命中率算高的（當然都有啲唔中嘅冇講）。1137固然寫咗好多次，但都有升有跌，而家都未上返今年高位。但，我寫過幾次，可以睇住確症數字嚟炒，而往往啲親建制傳媒，朝早就會話你知數字幾多。唔使等張竹君或陳肇始出嚟講先知。

7. 至於維他奶，算中一半啩。星期四嗰篇有講業績，有覺得反應過度，結果星期五就大反彈了。

每日一圖— 美股Drawdown同回報．牛市確認？Chart Crime

8. 美股Drawdown同回報—呢個係美股羅素2000指數，可以當係一個小企股指數。咩係Max Drawdown？就係嗰年之中，上上落落，由高位跌落嚟最多試過幾多。咁有乜特別？今年暫時Max Drawdown係34%（正係3月嗰時），當然算好高，但未高過金融海嘯時— 但特別在，個指數暫時年初至今有得升。在咁多次全年有得升嘅年份（藍色），冇一次好似今年咁大Max Drawdown。亦即係你好易畀人震走，飽食驚風散。

9. 牛市確認？—睇唔睇得明個圖？中間38%嗰條線係今次走勢，然後對返之前咁多個周期嘅走勢，而家似係真嘅牛市，而唔係熊市反彈。

10. Chart Crime—送多一個畀你，但我應該會Facebook出篇文講。留意下呢個圖有乜問題，非常之大問題。

Good Read—Jamie Dimon 講成功人士特質。Airbnb不是UBER

11. Jamie Dimon 講成功人士特質—而家由投資銀行家講嘢好似唔夠科企小朋友咁有說服力，但JP Morgan在Jamie Dimon帶領下，的確鶴立雞群。佢講，唔係最勤力或者最叻嗰個成功，而係Humility, openness, fairness and being authentic．埃汾冇資格加把口，但我細個以為係才華（好合理，我讀書時成績好好），到大啲以為係性格（職場好多人咁講），到而家我認為兩樣都唔係，而係另外兩樣嘢。第一同佢Jamie Dimon講嘅一樣，Authentic．第二係，以前啲文都寫過，persistence．

12. Airbnb不是UBER—曾幾何時兩間都係共享經濟典範，但企業文化其實好唔同。而家到Airbnb上市，我覺得值得留意的。呢間嘢居然係有錢賺！仲要疫情下都有錢賺。呢篇文係好簡單嘅介紹，可能我會寫詳細啲。

FB Post Summary— 數到三就有疫苗。教師射波邊個頂？每月Endorse一個Creator

13. 數到三就有疫苗—十分兒戲，最初上星期一輝瑞話自己隻疫苗90%有效，然後今星期一Moderna又話自己94.5%仲係普通疫苗雪櫃都得。然後又到輝瑞話自己嗰隻其實係95%先真，多你少少。爭在未講埋話室溫都得，細路仔玩泥沙咩。

14. 教師射波邊個頂？—全無公共性，講以前教書啲事，但當然呢啲文最多人睇。養份欠奉，不過我同讀者食咗咁多餐飯，佢地普遍都話我知，我嘅優點之一係寫啲嘢好笑—有啲有料嘅人寫嘢係好悶的。

15. 每月Endorse一個Creator—同昨日寫嘅差不多，埃汾推介，信心保證。以後可能每個月推介一個。呢個月係佢，陳公陳祉俊，Now台講波的。佢係我史上第一個見嘅網友，當時大家都讀緊書。我在佢身上學好多嘢。