ivanliresearch

［101+深度文］香港有機會被downgrade做「新興市場」，有乜後果？機會有幾大？「新興市場」係乜？誰說了算？ (Patreon)

Published:

2020-11-21 23:55:30

Edited:

2020-11-22 01:55:56

Imported:

2021-07

Content

香港有機會被downgrade做「新興市場」，完全冇人講！

Downgrade香港落「新興市場」，理據何在？

成日聽日人講，但到底乜嘢係「新興市場」先？

邊個有資格定義「新興市場」？

南韓都新興市場？冇嘢下話？

邊類公司定義邊個係「新興市場」？有乜利益衝突？

香港大唔大機會被Downgrade做「新興市場」？

Downgrade咗變「新興市場」有乜後果？

Downgrade咗做「新興市場」係咪一定壞事？

「新興市場」有好多種，你係南韓台灣，定巴西俄羅斯？

呢篇真係訊息量極大，但又101講起。星期六有時間就會寫呢啲專題。真係睇一篇都值回票價啦？循例講多次，覺得寫得好嘅，咪increase pledge，當拍手支持。當然介紹朋友睇更加好。

想入20蚊VIP嘅呢度

想入40蚊VIP嘅呢度

另外，認真，可能下個月想搞referral，即係你介紹個朋友嚟，佢訂時PM我講你個名，咁我回返一個月畀你咁。大家覺得點？

香港有機會被downgrade做「新興市場」，完全冇人講！

1. 首先講下個故事緣起，就係Sky news有報導講，香港「有機會」被downgrade做「新興市場」（Emerging market，EM）。而家香港係「成熟市場」或叫「已發展市場」（Developed Market，DM）。原因當然係提到中國。downgrade有乜後果？會引致幾百億美金流出云云（tens of billions of dollars being withdrawn）。

2. 固然，你都「有機會」變美斯，我都「有機會」發達，但畢竟報嘅都係有啲公信力嘅媒體，講嗰個亦係有頭有面嘅人，係富時羅素（FTSE Russell）以前CEO，Mark Makepeace（舊年離開），在佢新書發佈時講（本書正係講富時指數）。

3. 我相當奇怪，平日港匯跌幾點子，某啲傳媒或KOL已經如獲至寶，嘩走資啦嘩外資切尼啦嘩爆煲啦，放到幾萬倍咁大。反而呢單咁sexy嘅嘢，好似冇人報？我搵過Wisenews同Google過，香港中文媒體近乎冇，英文亦只有The Standard報（而差不多全篇照copy Sky News）。咁本人呢篇文，真係獨家，抵你訂。

Downgrade香港落「新興市場」，理據何在？

4. Mark Makepeace理據何在？首先，佢已經離開富時，只係個人身份講嘢。報導無論如何有啲標題黨，佢其實係話指數公司會「睇得好緊香港」，當然特別提到中國。

5. 留意因為追蹤指數嘅被動基金不停受追捧（呢個就因為主動基金唔爭氣），所以近年指數公司嘅影響力更加大。被動基金就固然就咁買落去，但主動基金亦以呢個為指標，benchmark，量度隻基金同基金經理表現點，佢有冇花紅出。成日講「跑贏／跑輸大市」，甚麼是「大市」？就係睇最初揀乜benchmark。容許我煩氣再講多次，搞清定義好重要，而平時我寫啲文係環環相扣嘅，因為世界就係咁。

6. 講返Mark Makepeace嘅講法，佢特別強調，指數公司唔係睇政治，係睇返金融市場嘅嘢。固然你可以話「乜都係政治」，但應該識分廣義同狹義嘅分別。

7. 佢提到，如果中國太多干預，指數公司就可能將香港downgrade做「新興市場」．講嘅干預，係指金融同市場上。如果仲係兩套唔同嘅規則同玩法（再講一次，講金融同市場），就應冇乜事，如果冇乜分別，就可能被downgrade。仲有，佢特別提到監管機構，係咪獨立於中國，亦係一個關鍵，咁咯。

8. 稍後會試下講，「有機會」downgrade嘅機會有幾大，會有乜影響，同埋要點應對。

9. 不過，舊文講過，搞清定義好重要。首先，講返更重要嘅問題，到底乜嘢係「新興市場」？有乜準則？邊個說了算？

成日聽日人講，但到底乜嘢係「新興市場」先？

10. 最簡單，係一個相對概念，唔係「成熟市場」，咪叫「新興市場」。如果睇中文維基，係下面咁嘅講法：

11. 其實，講咗等於冇講。如果只依呢度定義，香港冇可能變「新興市場」。人均收入世界前列，資本市場發達到街市阿嬸都識講引伸波幅，股市佔GDP差不多全世界最大。

12. 不過，實際梗係唔係咁簡單。舉個最簡單嘅例子，中國，差不多任何定義下都當新興市場，冇乜人異議。但，頂多你話人均收入係中下（其實係中間）喯。另一方面，資本市場都相當發達，股市佔GDP又重，工業化程度又高喎。又點計？

13. 如果你睇英文維基，睇Developed Market，就清楚啲。

14. 有講開放畀外資持股（但歐美而家越嚟越多限制），有講資本進出難度（所以好多有外匯管制嘅都當「新興市場」）。咁用呢啲標準，就大約明白中國點解係「新興市場」（有外資管制），香港唔係。

15. 但係咪只要香港唔行外匯管制，就唔會變「新興市場」？答案唔係。留意下，台灣多數都係新興市場，南韓亦有時係「新興市場」（點解「有時」？陣間解）。台灣固然有外匯管制，但南韓明明冇乜喎！

邊個有資格定義「新興市場」？

16. 答案係，冇乜所謂，各師各法，任你講，有人信咪得。真的。

17. 以上呢個表，英文維基嘅Developed Market．大致有個譜，但見到南韓塞浦路斯呢？有人話係有人話唔係。任你講，亦證明真係幾主觀。台灣呢？上面個表冇，但英文維基講Emerging Market有個表話你知，多數定義下，台灣都係「新興市場」。

18. 真的，我夠膽講，「新興市場」呢套定義，已經幾過期。過去二三十年，你見到全球政經平衡，係轉晒嘅。唔使上綱上線到講咩中美邊個贏，但我就當你覺得中國好雞美國好勁都好，其他呢？以前仲係咩意大利西班牙（哈哈哈），而家係印度巴西韓國吧，等於以前G7，都要變G20啦。同樣道理，有一期堆「歐豬」，啲債息上到10厘以上，根本高過晒咩印尼印度，但仲叫人地「新興市場」，十分搞笑。

19. 以前，「新興市場」係叫LDM，Less Developed Market．但聽落好落後。有位天才就發明咗「新興市場」呢個名，英文仲勁，Emerging，up and rising咁。再後來更加有金磚四/五國，BRICS，巴西俄羅斯印度中國（南非）。都係marketing

20. 而再講一次，呢啲分法，其實係好主觀的。同你睇個好簡單嘅案例：南韓。

南韓都新興市場？冇嘢下話你？

21. 先講講台灣，都已經夠神奇。台灣近年備受歐美拉攏，當然有牽制中國嘅原因。但，台灣人均收入一早夠晒高，股市亦算成熟，又有民主有自由之類，又歡迎外國投資（主要係唔歡迎大陸，但當然「外國」in this context係指歐美），照計符合晒「成熟市場」條件？但偏偏唔得。好可能因為「外匯管制」

22. 但，去到南韓，就真係完全唔明了。

23. 南韓，在唔少公司定義下，都仲係「新興市場」。黑人問號。我舊文有講過，呢度略講。喂大佬，你講政治，南韓係美國忠實盟友，肯定有民主，分分鐘民主過美國，而新聞自由好過日本。講經濟更加唔使講，GDP大過俄羅斯西班牙，好快大過加拿大意大利，世界頭十位咁滯。計人均GDP，30000美金，都在世界頭三十位。咁都「新興市場」？

24. 答案係因為貨幣，但留意，南韓同台灣唔同，南韓甚至冇乜外匯管制。只係韓圜嘅交易比較多限制咁解。當中有歷史原因，我篇文有講（拿，都話環環相扣）

邊類公司定義邊個係「新興市場」？有乜利益衝突？

25. 經濟學人早排先有篇文講（要訂戶先睇到，等我解啦）。首先個引子係，

沙地阿拉伯，人均GDP 23000美金，福利好，大量石油。非洲嘅贊比亞呢？人均GDP十份一都冇，就快爆煲。但在JP Morgan定義下，兩個國家都係「新興市場」，可見「新興市場」有好多種。

26. 有乜公司可以定義「新興市場」？都係嗰句，差不多人人都得，言論自由嘛，有人信你咪得。實務上，亦有不同嘅公司。最常見就係指數公司本身。

27. 例如文首提過嘅富時FTSE，大家都聽過富時指數。但，富時係乜東東？FT就真係代表Financial Times，SE係LSE，倫敦交易所。最初係Pearson（FT以前股東）同倫交所合作，但後來已經係LSE渣返晒，所以富時係LSE集團嘅公司。後來仲要買埋Russell ，變成FTSE Russell。Russell係乜？正係羅素2000指數（細股價指數）嗰個Russell。

28. 除咗FTSE，仲有你聽過嘅MSCI（留意，已經同摩根士丹利冇關），甚至係交易所，或者係投行本身，甚至係自己做ETF嘅公司。見到問題未？當中有幾咁多嘅利益衝突？仲要指數公司有「酌情權」喎，就大把古惑可以出啦。記住，「酌情權」就係用嚟咁用的。年尾花紅坐頭等食大餐去夜總會都靠呢啲。

29. 例如加咗沙地阿拉伯去「新興市場」，然後JP Morgan就「咁啱」贏到幫佢發債嘅Deal．你話呢？同樣地，之前中美交惡，向來相當反華嘅Marco Rubio就向MSCI開火（華盛頓郵報，又係要訂戶，又係我幫你睇埋），講MSCI只顧賺錢，賣國，將美國人啲血汗錢去投資中資云云。呢度唔講政治誰是誰非，但你見到，當中係幾咁大嘅生意。

30. 亦因為呢種利益衝突，好多時指數公司會「獨立」，例如MSCI理論上同摩根士丹利已無直接關係，但實際上呢？仲有，LSE咁，自己做交易所但FTSE又係佢一部份，又點計？或者好似State Street （道富，盈富基金正係佢管理）咁，自己整隻ETF，但又自己整埋Index，對手用你個指數就要收錢，你玩晒啦（如果隻指數整得好的話）。係喎，指數要收錢的，你唔發現MSCI嘅成份股，你唔會知有乜？因為要畀錢。

31. 亦因為咁，唔少細嘅基金，都認為指數公司搵笨，只係聽最大基金意見，甚至覺得係同政府眉來眼去。但，隨住越嚟越多人買追蹤指數嘅被動基金，問題只會越大。

香港大唔大機會被Downgrade做「新興市場」？

32. 答案？好難講。如果你以比較客觀嘅條件，我唔覺得在foreseeable future有咁嘅一日（foreseeable future呢個字就夠晒主觀，咁我估，幾年啦）。政治一回事，但如果只講金融上，除非你覺得香港忽然行外匯管制，或者廢除港紙之類。否則，好多提到嘅標準，都冇乜理由可以將香港忽然downgrade．做樣又好真又好咩都好，但香港證監同金管局，都似乎仲幾高度獨立，亦都未敢放件大陸人，更加未去到話跟埋大陸嗰套。

33. 當然啦，幾時都話，係咪完全客觀呢？就梗係唔係。咁但背後有乜勾當，政府會唔會畀壓力（無論係美國定中國定香港，唔好笑，政府係真係會的，之後會講），就好難評估了。

34. 仲有，有啲賴皮，但，由你見到根本市場上冇乜人討論呢件事，就知道，冇乜人覺得真係會發生。你見講足咁多年嘅聯匯脫勾，次次都仲咁多人討論。但呢單嘢嘅討論，近乎零。

Downgrade咗變「新興市場」有乜後果？

35. 好難講，但相當肯定，第一個反應當然係大跌。我未搵到好準確嘅數字，但文首講到，tens of billions of dollars being withdrawn，聽落係正路嘅。因為指數基金都係睇指數投資，咁你個指數冇咗香港，咪要沽走佢咯。正路唔會一次減到零，但消息已經夠震憾，指數跟沽嘅幾百億，但另外嚇走嘅更加多。點會唔大跌？

36. 彭博有個舊故事（又係要訂戶，又係我幫你出錢兼出時間睇埋），講秘魯，個財長要飛去美國緊急會議，好大鑊。點解？因為MSCI要將秘魯Downgrade．不過秘魯當然唔係「成熟市場」，本身就係「新興市場」啦。但仲有得再降班的，有一個更低級嘅叫Frontier Market，包括越南孟加拉之類（而最好笑係，科威特佔咗19%，但買嘅都係想要越南孟加拉，唔係科威特）。秘魯財長咁緊張「護級」，當然因為「新興市場」都仲有啲人買，去到Frontier Market就真係好少資金買了，畀人downgrade咗，肯定股市大打擊。香港如果downgrade，情況都類似，但應該冇咁嚴重，「成熟市場」跌落去「新興市場」，冇「新興市場」跌落Frontier咁大鑊。

37. 不過長遠少少，就難講。你問我，就應該實係買入機會。如同美國禁止該國嘅基金買若干中資股一樣（咪即係俄鋁翻版。咁結果證明當時買俄鋁就賺到笑），亦等於美國話將啲美國上市中資股強制除牌一樣，第一反應實跌，但會係買入機會。

Downgrade咗做「新興市場」係咪一定壞事？

38. 想講嘅係，Downgrade咗落「新興市場」，係咪一定壞事？固然必然有一大堆資金流出，但之後呢？對個經濟或啲公司本身，有何真實影響？

39. 而根本，發明「新興市場」嘅，從來都冇話「新興市場」就差啲。係正好相反，點解原本叫 Less Developed Market，要改個名做Emerging market？係話潛力大啲，不過風險高啲咁解。

40. 的確，你話新興市場啲乜乜機制不完善呀，限制外資持股呀（但真係再講一次，而家到歐美限制外資入股咯，相當雙重標準的，只係以前佢地有錢入股人地，人地冇錢入股佢咁解），外匯管制呀咁。但係咪代表回報就差？唔係喎。你睇今年，「新興市場」表現相當好。已經收復晒失地，好過歐洲日本英國添。

「新興市場」有好多種，你係南韓台灣，定巴西俄羅斯？

41. 仲有，一樣好重要嘅嘢。「新興市場」都有好多種。頭先都講過沙特阿拉伯同贊比亞係兩回事。上面個圖呢，係畀你睇「新興市場」嘅兩個sub set．「新興市場亞洲」，同「新興市場ex亞洲」嘅分別。

42. 你見到今年，分野極大。「新興市場亞洲」年初至今升17.5%（美金計價），「新興市場ex亞洲」就跌20%，真係天同地，結果「新興市場亞洲」跑贏「新興市場ex亞洲」40%。咁，100萬嘅問題，一個唔該變「新興市場」，香港係邊種？

43. 新興市場啲貨幣，的確一般波動大啲。所以講回報，都會講計本幣（你當係當地人買，只睇指數），定係外幣（一般美金，你當美國人買）。有乜分別？就係要計埋匯水。咁你見到了，表現最好嘅「新興市場」股市，正係中國韓國台灣，亦係因為匯價強。相反，非亞洲嘅墨西哥俄羅斯巴西，就另一回事，股價齊跌。當中分野係乜？固然係經濟表現，亦都係企業盈利，又同國家財政狀況，以及控制疫情有關。