20/40會員各剩十件。Tesla繼續升。NVIDIA 及其他二線科企。維他奶進一步拋離皇馬巴塞拜仁曼聯。講返隻維他奶本身。埃汾一個月endorse一個Patreon，今期係陳公陳祉俊 (Patreon)

小版務—可能節目調動，20/40會員各剩十件

大師冇點你—Tesla繼續升

NVIDIA 以及其他二線科技股

維他奶進一步拋離皇馬巴塞拜仁曼聯

講返隻維他奶本身

小廣告—埃汾一個月endorse一個Patreon，今期係陳公陳祉俊

小版務—可能節目調動，20/40會員各剩十件

1. 退款嘅退晒了，不過大家仍然隨時可以加入年費的，85折其實抵，埃汾賣大包，因為我估轉年費嘅根本係比較忠心，唔會流失。

2. 另外，加推咗20蚊同40蚊會員後，仲有名額，各有大約10個。提返大家，你由12蚊月費轉20/40月費呢，都只係補個差價，唔會收多咗。同樣地，12蚊年費轉20/40年費，一樣只係收差價，唔會收多，而當然20/40畀年費都係有85折的。

3. 埃汾對自己嘅要求都高，都唔輕易咁講，但覺得最近呢兩篇真係寫得好（呢篇，同埋呢篇）。覺得唱得好，荷包又鬆動嘅，咪額外打賞下咯。另外，最初係一個星期三篇，而家變咗六篇，內容仲多咗好多添。但初級版係冇加過價的。對得住天地良心啦。

20蚊嘅呢度

40蚊嘅呢度

4. 講返，一星期六篇會繼續，星期二到星期日，日日你都會有文。但我可能會將啲節目調動下，因為市場嘅嘢好難講，多嘢寫時咪寫市場同股票，少嘅咪寫Good Read 每日一圖之類。未係最終決定，但有機會行。

大師冇點你—Tesla繼續升

5. 真係冇點你，升極都有。即使公佈咗入標普指數後，亦即係我寫嗰時你去追，兩日都執15%，pretty good．未買嘅？咁當然早兩日買更好，但我覺得仲賭得過。買咗嘅？坐定定。但留意，真係未必可以長渣，甚至我估最遲12月中就散水。買少少，感受下個市場。

NVIDIA 以及其他二線科技股

6. 半導體/晶片 股之中，提得比較多係ASML，同埋NVIDIA。前者早排創新高，NVIDIA就剛出業績，其實個業績相當強勁，收入同純利都勝預期，但公司對第四季展望相當保守，股價要跌，但低位都好快彈返上嚟。

7. 亦都唔止講過一次，中美都好，一線科企開始不停畀人搞，必然結局。近期可能睇啲二線科企。TESLA暫時都仲係，NVIDIA當然都係，ASML可能二線都未到。仲有唔止美國，中資都係，你見B站（嗶哩嗶哩）同網易，出完業績都升到癲，說好了的強制除牌呢又？（又，網易一早返咗香港上，真係冇驚過）

維他奶進一步拋離皇馬巴塞拜仁曼聯

8. 埃汾有一期鍾意飲維他奶，而家已經唔飲。但真係對間公司情有獨鍾—甚至唔係間公司本身，而係拎佢嚟做benchmark，同另一個行業比 — 就係球會（主要係歐洲足球，但亦有時講埋美式足球 冰球 棒球 籃球）。

9. 成名作係呢句：皇家馬德里，收入仲少過維他奶。實情係應該所有足球會嘅收入，都少過一間維他奶，覺唔覺得有啲違反你常識？

10. 咁啱維他奶又出半年業績，我地又可以重溫下。你只需要知3個數字：維他奶半年收入44億港紙，半年純利6.7億港紙，市值320億港紙。留意公司3月年結，呢次業績係2020年4-9月，照計未來6個月唔會差過之前6個月。咁所以，姑姐將佢double，變埋美金。講多次

11. 維他奶，一年收入11億美金，純利1.7億美金，市值40億美金（呢個唔使double啦大佬）。

12. 係咩概念？留意講球會富唔富有，一般都係計收入，因為，「講純利就傷感情」。咁你睇到，上年根本冇一隊球會有10億美金，維他奶係11億，講完。今年？稍為用下腦都知球會收入只會跌。

13. 純利？更加唔好討論。絶大多數球會都輸錢，偶然有一兩隊偶然有一兩年可能純利多過維他奶，但拉勻，唔會。

14. 市值？球會上市唔太多，但上市中曼聯最大，25億美金市值，半間維他奶多啲。其他更不用講。

15. 以上種種，長期讀者應該都聽過。但除咗要知道呢啲嘢外，仲要問，點解？點解咁有影響力，咁出名，咁多客源（你入場又好，睇電視又好，買波衫又好），做全世界生意嘅公司，收入，純利同市值都不如一間丁屎咁大嘅維他奶？（其實維他奶都唔算細，一度同隻國泰差不多大，但名氣爭好遠，大中華以外邊有人識維他奶？但去到非洲最窮嘅地方都有人識曼聯）

16. 先講純利，我覺得係最合理嘅。球會並唔係一種以搵錢為最大目的嘅東西（所以投資嘅人都另外有盤算，有其他考慮）。球會太搵錢（不思進取，加價太多）自然就會畀球迷捨棄。況且球會有唔少對手根本係中東佬燒錢，佢無限金錢咁以本傷人，你點賺錢？所以球會好多都輸錢。

17. 咁既然輸錢，市值細過一隻維他奶，都唔係好出奇。

18. 最奇怪係，點解連收入都不及維他奶？成件事係咪邊度計錯咗？維他奶做極，都係香港，頂多加埋小量大陸生意。球會，全世界喎！

19. 呢度有幾個方向諗。首先，我故意誤導咗你，同你想像中唔同，其實維他奶大陸生意幾大—同大陸品牌冇得比，但大陸真係太多人。大陸貢獻佢60%收入，香港係30%

20. 另外，其實球迷，有冇你想像咁多？球迷係一種好圍爐嘅生物，但你諗真啲，就當只計香港，睇波嘅人多，定會幫襯維他奶嘅人多？應該有好多人，球會完全搵唔到佢錢，但你總會飲維他奶之類。球迷差不多實會飲維他奶，但飲維他奶嘅未必睇波。

21. 咁你亦可以質疑，喂，仲有世界各地喎，你英國印尼意大利，冇人飲維他奶啦掛，但總有人睇波。

22. 然後你可以諗下，一個「球迷」，到底一年，有幾多錢真係落咗去球會度？你訂收費電視，兩三百蚊個月，但分咗去幾十個台，就當落體育，都幾個聯賽。一個聯賽仲有十幾廿隊。你一個月嗰兩三百蚊，有冇十蚊落咗去曼聯度？但你買盒維他奶幾錢？

23. 至於，買波衫，又一天大嘅誤會。你買件波衫，一千蚊（其實而家幾錢一件？），有冇一舊水落咗間球會度？多數都冇。因為賣衫畀你嘅係Nike Adidas，球會只係收licensing fee．

24. 咁，你飛去歐洲睇波，就真係啲錢落球會度—如果你買正價飛的話。炒黃牛嘅，三舊水炒上三千，嗰個溢價，就唔係你間球會拎到嘅。況且你睇得幾多場？又有幾多球迷真係飛去睇？

25. 以上種種講嘅，都只係收入，甚至都唔好講成本。

26. 所以結論都係，球迷可能冇你想像中咁多（你四年先睇一次嗰啲，對球會有何幫助？），同埋，用咗落球會嘅錢，又冇你想像中咁多。

27. 希望大家唔會嫌太悶。

講返隻維他奶本身

28. 又都真係再講返隻維他奶本身。我冇睇市場預期幾多，但就咁睇，話純利按年升26%，仲要有息派，但做乜業績後都大插？齋快手計，半年純利6.7億，全年13.4億，24倍市盈率，以一隻大陸消費股（都話六成收入嚟自大陸），好似唔太貴（雖然，低位都彈咗三成）？

29. 市場解釋話係純利升咗，但派息冇加。不過，中期咋喎，目測中期息過去幾年都係呢個水平，唔變，到末期息先因應業績派多派少。

30. 比較似樣嘅解釋，睇收入。收入係按年跌4%嘅，就唔多靚仔，純利升係嚟自成本低咗。固然只睇一樣嘢就係利潤最緊要，但有得揀嘅，最好利潤由收入帶動，由減成本嘅，「質量」低啲。都正常，因為收入理論上可以不停升，但減成本總有個譜，不能持續。

31. 無論如何，現價，似乎唔算好抵買？並非好熟呢個板塊，望多少少先。「如果23蚊我就好放心」。

小廣告—埃汾一個月endorse一個Patreon，今期係陳公陳祉俊

32. 另外，小廣告，幫人賣，所以放到最後。NOW台講波嘅陳公陳祉俊Christopher，開咗個Patreon。舊文寫過，我同佢係廿幾年嘅網友。所以，去訂吧。

33. 我呢度開三個月，只係endorse過兩檔嘢，賴叔，同埋體嘢。陳公就係第三檔。睇波嘅記住訂，唔睇波嘅，都可以訂。其實我一路期待佢可以寫啲足球以外嘅嘢，我在佢身上都學唔少嘢，你見我有幾可讚人（仲要係本地人）？

34. 唔敢話好愛惜羽毛，但我endorse嘅，有最基本嘅原則。首先，要我真係識嘅，唔係見過面都至少網上成日傾計（而暫時呢三檔我都見過幾次）。另外，最重要嘅：我自己有訂—自己唔訂但叫你地去訂，就太不知所謂了。仲有，唔好太濫，我一個月endorse一個，覺得夠了。所以仲有一件，下個月先推。

35. 大家訂時最好PM佢話佢知，係我介紹。絶對唔會有折的！不過等陳公（以及其他人）知道呢度廣告效力有幾強大嘛，或者知道原來唔強大。

36. 正經，Patreon令我知道讀者願意支持啲有才華（我唔會妄自菲薄，自己都覺得自己冇才華嘅，仲好意思叫人支持？）嘅人，某程度上星期一被公司照肺（結果只係偱例年尾傾下計，冇事），我都唔係好驚，寫Patreon都夠我同埃汾太生活（又，埃汾太就快生日！留個言等我知你地有人睇到呢度！），肉麻講句就係你地令我「可以唔使擔心冇飯開，專心創作」。咁我都希望大家會支持我心目中有才華嘅人。

37. 連結在此