兩類制裁股。Tesla勁升！新一代唔信民主。美國越嚟越多人支持最低工資。英鎊同英股變咗正相關？四天工作指日可待？百事重新設計兩公升膠樽。生仔改變個腦！西洋棋規則。西洋棋大數據。有疫苗。又有疫苗！大韓航空同韓亞合併。大灣區航空？海防樓盤。 (Patreon)

快評兩句　— 兩類制裁股

大師冇點你—Tesla勁升！

每日一圖—新一代唔信民主。美國越嚟越多人支持最低工資。英鎊同英股變咗正相關？

Good Read—四天工作指日可待？百事重新設計兩公升膠樽。生仔改變個腦！

FB Post Summary—西洋棋規則。西洋棋大數據。有疫苗。又有疫苗！大韓航空同韓亞合併。大灣區航空？海防樓盤。

唔係講笑，自從照肺（頂丫，仲係冇乜人關心）冇乜事之後，真係心情爽，寫文狀態都返返嚟。Facebook固然得多，Patreon文呢，星期三嗰篇我覺得真係寫得好。仲有，今日呢篇都好。圖又好，Good Read又好。

快評兩句　— 兩類制裁股

實情，都唔係太識評。話市況好好，又唔係，雖然道指差不多挑戰30000點，但多數讀者都渣唔少新經濟，科技股就冇咁好力。但話好差呢？又唔係，11月暫時都做得幾好。

我會留意嘅，就真係嗰堆制裁中資股。有兩大類，兩種都寫過。第一款係星期三提過嗰堆美國上市中概股，話唔跟美國會計制畀美國查數就除牌云云。你見堆中概股股價之前散晒，但星期三晚已回穩。首先，我都唔知點執行，係咪美國政府賠錢畀啲投資者？分分鐘會畀人告。另外，畢竟唔係行政命令，過唔過到都係一個問題。而講到尾，有幾間直頭在香港有第二上市嘅，百度京東網易之類，完全唔驚咯。愛奇藝之類就危險啲，而且一路都唔少人覺得佢啲數相當有問題。

第二類，再早啲，香港上市，話唔畀美國投資者買嘅。同樣地我亦想知點執行，我買盈富基金嗰啲點算？但，股價似乎都反映晒，你見中移動941跌足四日，但你呢個禁令對公司有乜影響？收少咗電話費？呢堆嘢都係有得睇嘅

有機會詳細，但幾時都係嗰個問題，idea太多，時間太少。

大師冇點你—Tesla勁升！

拿，真係大師冇點你。固然我係香港時間星期三朝早先寫，已經升咗一日，但嗰時都話仲有得升。你星期四晚美股開市飛入去，都仲有水位。我估應該仲有得升。記住，12月21日入標普500指數，應該到入嗰日就散水，甚至更早。自己睇路。

每日一圖—新一代唔信民主。美國越嚟越多人支持最低工資。英鎊同英股變咗正相關？

新一代唔信民主—唔係剩係講香港啦下，留意啲新一代（65年後出世都可以計！），係唔多再信民主是好東西，仲要係越老越唔信。原因唔知，但我估幾明顯都係同$有關，無得向上流，高人工嘅位冇晒，樓又貴。話時話FT呢篇文好似免費，你可以去睇。入面有個圖亦都講越嚟越多要同屋企住。

美國越嚟越多人支持最低工資—美國，8月同2月相比，咁好合理，疫情下人人自危。但有趣嘅係，你見共和黨係更加多人改變主意的—當然因為基數低，民主黨本身就多好多人支持最低工資。呢啲就左翼啦。

英鎊同英股變咗正相關？—有機會寫篇FB文（好多時都想，但邊有咁多時間）。希望我冇理解錯，但幾有趣。以前英國股市普遍係同英鎊負相關，弱鎊就有利股市—呢種東西在成熟成場一般係咁，例如美股都一般係。但你發現新興市場就多數掉轉，例如有乜咩大問題，韓圜土耳其里拉印尼盾之類實跌，而股市跟住跌的。咁英國，似乎係「新興市場化」中。亦好一排之前有人講過。主因？都係脫歐。

Good Read—四天工作指日可待？百事重新設計兩公升膠樽。生仔改變個腦！

今日Good Read啲點評可能冒犯到某啲人，大家take it easy就算

四天工作指日可待？—而家啲人講親左都加個膠字。咁埃汾點都唔係經濟左（做金融可以點左？），但一路覺得首先應該尊重下其他意見，同埋都係物極必反。金融海嘯後，見到全世界其實向左轉。不過做打工仔嘅未必唔歡迎（正如好多鬧左膠嘅又支持最低工資，更加差不多全部支持標準工時）。例如而家歐洲越嚟越多講「四天工作」。當然未成主流，但轉變嘅嘢不經不覺。埃汾初做嘢時呢，仲有唔少公司都係返長短週星期六，埃汾自己返蕉行都係。後來五天先係主流。

百事重新設計兩公升膠樽—似乎兩公升汽水膠樽係百事發明的，玩過就知好易甩手。而家卒之再設計。不過我想講。第一，飲百事落地獄。第二，飲膠樽落地獄。第三，退一萬步，我當你飲百事膠樽都好，兩公升係真係地獄，任何牌子汽水都係。成個設計係反人類的。

生仔改變個腦！—埃汾冇小朋友，亦冇乜打算生（中咗六合彩頭獎可能生）。咁但，大家知，網上有時攻擊啲港媽，就會話佢地生仔排埋個腦出嚟。咁事實媽媽生完之後，個腦真係會唔同（唔一定係變笨），好合理丫。不過呢篇文就話你知，老豆個腦都會變咗唔同！神奇！

FB Post Summary—西洋棋規則。西洋棋大數據。有疫苗。又有疫苗！大韓航空同韓亞合併。大灣區航空？海防樓盤。

拿，忽然又好有興緻，出咗好多post

西洋棋規則—原本係想寫「西洋棋大數據」（下面），結果先寫呢篇。講西洋棋／國際象棋種種唔少人誤解嘅規則。

西洋棋大數據—呢篇先係主菜，簡單嘅研究，證明兩樣嘢：棋手老咗就退步。同埋，新人勁過舊人。佢嘅methodology 幾有趣

有疫苗—又嚟星期一驚奇，上星期一係輝瑞出疫苗，今星期一到Moderna有。輝瑞嗰隻話90%有效，要用零下70度超凍雪櫃。Moderna嗰隻就話94.5%，普通雪櫃得了。

又有疫苗！—然後星期三仲好笑！輝瑞又出嚟話自己嗰隻有95%！玩死。

大韓航空同韓亞合併—以前都寫過下韓國航空公司，冇乜人睇。唔知點解呢篇就多人睇。

大灣區航空？—冇乜特別，國泰停飛Gatwick 同Newark，標題寫到好似停飛倫敦紐約咁。同場加映埃汾在倫敦不同機場嘅故事。

海防樓盤—亦冇乜特別，樓盤廣告。但除咗講越南城市，埃汾仲講埋香港地名，西貢街，河內道，海防道。