ivanliresearch

美國中概股小股災，阿里巴巴京東又如何？Tesla卒之入標普指數！領展3個月新高。疫苗鬧劇，雪櫃股。RCEP，航運股。Amazon賣藥，對手股價即插。預告—香港會變「新興市場」？ (Patreon)

Published:

2020-11-18 00:42:41

Imported:

2021-07

Content

美國中概股小股災，阿里巴巴京東又如何？

Tesla卒之入標普指數！

領展823繼續強勢，3個月新高

疫苗鬧劇，雪櫃股

RCEP，航運股

Amazon賣埋藥，對手股價即插

預告—香港會變「新興市場」？

1. 今篇比以前更晏，因為要早返工，索性一早起身寫埋。應該唔會係常態，第時你都應該係會半夜三四點收到。今日故事較多，訊息量好大，會比較似我原本心目中嘅形式

2. 另外，「好似完全冇人關心我上篇文講畀公司照肺」。咁結果係冇乜事嘅，繼續有工開，完全係我過慮，但有啲危機感係好的。聽聞唔少人都想我寫職場嘢，但我有時懷疑我有乜新鮮羅白皮可以教人。況且人在江湖又有啲嘢唔方便寫（不過to be fair而家公司冇乜嘢好寫）。可能真係等我冇得撈嗰時寫

3. 呀仲有，有啲讀者話想月尾cut走，下個月頭join年費，甚至有啲已經做咗。我係唔建議咁做的。因為我見到有人cut會唔開心（雖然不能避免，但都會唔開心），又怕你唔記得訂返。實情真係唔使擔心，任何人月頭join年費我都會回返一個月的—事實係即使呢幾日join嘅我都有回水，雖然上次講明截咗。

4. 去片

美國中概股小股災，阿里巴巴京東又如何？

5. 新鮮滾熱辣，長話短說，話唔用美國審計標準嘅中概股，可能除牌。政治嘢唔寫咁多，但呢樣嘢當然唔係第一次講，你見有堆中概股股價即散。

6. 但另一方面，講真，對啲中資公司「本身」未必好大影響。生意依然係咁做，固然上市地位呢樣嘢已經值錢，咁但有啲已經香港第二上市嘅，真係未必咁驚。

7. 理論上會睇阿里巴巴9988，你見ADR股價反應不大，甚至話畀人集體訴訟都應該反映咗。但反而係擔心可能中國政府都搞佢。所以我可能寧願睇京東9618，之前業績OK股價都大插，又一早在香港有上市。況且啲業務似乎冇咁假。

8. 另外講遠少少，呢幾日都有同同事傾（公司兩個後生同事幾好的，有機會介紹下出場，甚至畀佢地自己搞個欄目？），中資美資都好，可能應該睇啲二線科技股。一線科股技有啲已經太大，開始不停會畀人針對，一搞著政府就比較麻煩。死就唔會嘅，但唔會好似以前咁橫行無忌。

Tesla卒之入標普指數！

9. 長期讀者應該知道我一向唔係好鍾意Tesla呢隻股票，原因只有一個，貴。當然亦可能因為我買過仲要沽咗（兩百幾蚊，但講緊拆股之前喎！不要提了）。咁，當然係睇錯咗，次次中咩。況且我冇叫你去沽空。

10. 不過一單還一單，Tesla嘅盈利雖則質量低（主要係賣碳排放！唔係賣車），但始終連續已經連續5季有盈利。上一次落選標普指數（留意佢地個機制同恒指唔同，唔會有一日宣佈的），已經唔少人質疑，標普指數亦冇講點解。

11. 表面上，所有標準都符合。市值夠晒大，係美國公司，美國上市。不過當然標普仲有最重要嘅酌情權。有話係因為股價太波動，有話係因為盈利質素比較低，亦有陰謀論話唔想基金要高位追。

12. 無論如何，Tesla鐵定12月21日會入標普指數。我幾奇怪，股價居然只係升8%，照計有得短炒下，自己睇路。

13. Tesla市值太大，一入就會係標普指數第十大市值，以往好少咁嘅例子，往往係間公司去到市值排四五百已經入啦。點解今次咁神奇？係因為Tesla之前冇錢賺，否則計市值一早入咗。而以前呢，冇錢賺嘅公司係唔會咁大市值嘅，時代唔同

14. 點講都好，咁大市值嘅嘢入標普指數，啲指數基金應該追貨追到氣咳。定好似恒指咁有同其他基金安排一早交叉盤畀佢地？可以留意下。

領展823繼續強勢，3個月新高

15. 實情冇乜特別，應該留返第二日嘅「大師冇點你」先講。但第二日又唔知咩世界了。呢隻真係值得威水，低位時已經係咁叫賣，都唔係馬後炮，60蚊嗰啲位邊有得輸。

疫苗鬧劇，雪櫃股

16. 呢個疫苗鬧劇，Facebook已寫過。當然我唔係科學家，但夠晒搞笑，又係星期一，上星期一就輝瑞出隻疫苗話90%有效，今次仲好笑，又係星期一，到Moderna話佢嗰隻94.5%有效。係咪架？留名睇藥廠CEO減持。

17. 不過正經，咁大間藥廠，總不能無中生有。其中一個重點，係個儲存條件。輝瑞嗰隻要零下70度，唔係一般診所甚至細醫院做得到，就要特殊嘅冷凍櫃了。然後Moderna，零下20度六個月，甚至普通雪櫃（！）都放到一個月，即時就勝過輝瑞嗰隻。

18. 咁見到，輝瑞股價當然即插（不過亦都有話公司除權，分拆另隻嘢出嚟）。

19. 但更好玩嘅，係堆雪櫃（！）股！梗係唔係三星嗰啲雪櫃，高端嗰啲，居然都有得炒。其實一出輝瑞單新聞我已經諗有乜雪櫃股，但搵得嚟都抄晒，不過下次可以留意下。

20. 留意，係日本同韓國股，上面個圖係星期一，未爆Moderna單嘢。Twinbird（東京：6897），Daihan（Kosdaq 131220），ilShin BioBase（Kosdaq 068330）

21. 但去到星期二呢，日本嗰隻即時插兩成。好合理，Moderna嗰隻唔使用咁特殊嘅雪櫃。反而韓國嗰兩隻照升，十分奇怪。要我解釋，只能講今年韓股，特別係Kosdaq炒到痴線，而for some reason啲韓仔十分愛國或者十分狹隘，我接觸嘅唔少都唔會買外國股，就玩返Kosdaq，鬥傻。

22. 又，邊度買到日股韓股？我公司冇，所以唔使有利益衝突。咁正路啲朋友都話去IB開，講真的，早排有人搵我話可以幫大家爭取啲terms，可能有啲回贈之類，多唔多人有興趣？有嘅我同佢傾下，冇就算數

RCEP，航運股

23. 唔知有冇機會細寫，可能再下星期六專題，但，RCEP，的確係一單幾大嘅嘢。當然正如一切同中國有關嘅東西一樣，兩極化。某啲人講到係美國台灣同印度一大挫折（某程度上都係），中國多邊主義勝利（都不能話錯），但另一班人會認為只係新瓶舊酒假大空。而正如以往，真相往往係兩者之間：未必係翻天覆地嘅game changer，但絶對係你應該去留意下嘅東西。

24. 不過，首先炒起嘅，就係航運股。實在呢期都十分堅。除咗因為RCEP，以及中國經濟反彈力度好過其他地方，亦因為全球嘅運費一路高企，空運同海運都係。咁航空公司冇客坐當然都係大鑊，但船公司唔同，一向都唔載客（我地唔係講郵輪）。但你貨依然要運，甚至更加緊張，因為好多飛機取消晒。

Amazon賣埋藥，對手股價即插

25. 講開一線科技股，以前提過有個term叫做Amazoned，或者Amazonised．Amazon表面上好似係一間賣書嘅舖頭起家，實際上係the Everything Store。佢踩入你嘅行業，你就好大鑊。佢做送外賣又得，化妝品又得，今次係玩埋藥舴做嘅嘢。對手股價就大插了。