制裁股。恒指季檢。ASML新高。恒指擴容．美股好快回復盈利增長。全球股市市值創新高．莫信懷疑者。日本人卒之唔買CD．祝君好。村上春樹下年拎諾貝爾獎 (Patreon)

快評兩句　— 制裁股。恒指季檢。

大師冇點你 — ASML新高。恒指擴容

每日一圖—美股好快回復盈利增長。全球股市市值創新高

Good Read—莫信懷疑者。日本人卒之唔買CD

FB Post Summary—祝君好。村上春樹下年拎諾貝爾獎

快評兩句　— 制裁股。恒指季檢。

1. 制裁股—之後可能詳細講，但樓上呢堆就係蘋果話美國限制美國人買嘅東西（留意美國本身嘅官方文件冇提任何股票！）。你見個別跌幅幾明顯。正路，就係買落去嘅，因為對公司基本因素全無影響。我唔係罰你公司或唔畀人同你做生意，只係唔畀人買股票，照計有人焗沽，就係買入好機會。

2. 恒指季檢—亦係應該星期六再詳講。但正如之前篇文估，美團3690，百威1876同安踏2020入到。咁本身冇乜特別，好多人都估，我仲要大包圍咗幾隻。而美團就炒咗上去，但不見得一定因為有人估入恒指，因為另外兩隻係冇升的。咁另外，當然一如所料，王維基1137係入唔到「港版納指」「恒生科技指數」。

大師冇點你 — ASML新高。恒指擴容

3. ASML新高—呢隻在之前講座或者Homeblogger啲片推過。荷蘭公司（但美股買到），光刻機。極高門檻，差不多壟斷咗個技術，八九成market share，啲機賣到幾億一部，整晶片/芯片必要。呢啲就真係護城河啦。

4. 恒指擴容—咁都話，估中美團入太古出呢啲冇乜特別。但埃汾倒係相當早已經估恒指公司會將成份股數目加大。又，有冇人留意到我個梯圖唔同咗？公司改咗名者，唔係我又轉工。

每日一圖—美股好快回復盈利增長。全球股市市值創新高

5. 美股好快回復盈利增長—樓上個圖，標普500成份股季度盈利嘅按年增長（即係1Q20 vs 1Q19咁，如此類推）。今年當然好難睇，但去到下一季，即係2021第一季，已經回復正增長。固然係低基數，但股市有時就咁玩。另外留意，絶對唔會去到2021第一季先炒，更加唔使去到出埋第一季業績先。記住股票一定炒前景，好難講幾遠，但very roughly，好多時都睇遠半年至一年起碼。所以你見四月頭已經炒復蘇。

6. 全球股市市值創新高—唔使解啦。亦所以，你見有啲人不停咁經濟差，失業高，企業盈利倒退，破產，好多人死等等—呢啲人係唔了解個世界點運作的。首先，睇多次對上一段，炒將來。所以2/3月跌到七彩，就反映緊打後（即係呢排）嘅大鑊。而家就睇未來幾季了。另外仲有，印錢嘛。再講一次，市場絶大多數都係啱，存在即合理，唔好死牛一面頸係都覺得「股市脫離實體經濟」。講過好多次，I don’t know what the fuck he’s talking about．之前咪有舊FB Post講「理性邊緣的哲學」，記住，搞清咗定義。我諗講嗰個自己都唔知，「股市脫離實體經濟」其實即係想表達乜。

Good Read—莫信懷疑者。日本人卒之唔買CD

7. 莫信懷疑者—原文係信報，但要訂戶先睇到，我費事貼成篇。但我搵到作者Ken Fisher嘅另一篇文，都係差不多嘅嘢。講好簡單嘅人性弱點，confirmation bias，冇投資嘅，只會覺得「股市脫離實體經濟」，覺得必定股災，任何新聞佢都可以fit入去—否則等於承認自己錯誤。而留意，非官方統計，日日講股災嘅人，多數都係窮人。咁點解我要聽啲玩呢個遊戲失敗嘅人講嘢？我減肥都唔會搵個越食越肥嘅教我啦下話

8. 日本人卒之唔買CD—一路都話日本「傳統」，或者係「落後」。任你點睇。客觀地，日本四寶：現金，印仔，FAX機，CD舖。以前好似寫過，好多第度死晒嘅牌子，在日本都未死。例如賣CD嘅Tower Record．但而家都開始改變了，某程度亦多得疫情，冇握手會抱抱會發佈會，所以日本人開始串流聽歌了。

FB Post Summary—祝君好。村上春樹下年拎諾貝爾獎

9. 祝君好—呢排啲文鍾意改啲怪題，呢篇食張竹君個名，其實係講王維基1137．一傳確診數字急跌，隻嘢即時炒起。寫過幾次，留意下啲親建制媒體，朝早會放風。

10. 村上春樹下年拎諾貝爾獎—另外一怪題，其實係寫安踏2020入恒指。而上篇文我已經用過呢個比喻，安踏次次都話入恒指，但次次都入唔到，同年年話村上春樹拎諾貝爾文學獎一樣。而家安踏修成正果，村上春樹還會遠嗎？訂定機票去神戶吧（點解神戶？個Post有講）。題外話村上春樹對我影響幾深，唔係文字上，而係「做作家好似好型」呢件事上面。所以我唔止去咗神戶，仲去埋東京嘅明治神宮野球場，因為佢就係在嗰度決定不如試下寫小說的。