恒指季檢—美團安踏？教你點睇邊隻郁（初步）。王維基1137應該入唔到「港版納指」 (Patreon)

恒指季檢—美團3690 安踏 2020？教你點睇邊隻郁（初步）

王維基香港電視HKTV Mall 1137應該入唔到「港版納指」

恒指季檢—美團3690 安踏 2020？教你點睇邊隻郁（初步）

1. 今日（星期五）係恒指季檢，星期二原本話希望呢篇日頭或黃昏出到，可惜都係事與願違。不過總比平時早出，希望幫到大家。我就未得閒，亦都唔值得花時間自己計數貼邊隻入（以前在星展就有做呢啲嘢），所以都係睇其他報告。

2. 上次美團3690撻Q，原因不明，呢個係恒指公司一大特色，好多時你計數都未必計到（我陰謀論覺得佢地靠呢啲酌情嘢搵著數）。今次依然大家估佢入到

3. 其他街度有人估嘅，包括安踏2020，李寧2331，比亞迪1211等等。安踏入恒指呢味嘢呢，好似村上春樹拎諾貝爾文學獎咁，年年都講，但次次都唔中。又睇下今次點。甚至有人貼中芯981，華潤啤291，融創1918或者百威亞太1876

4. 踢走嘅熱門，亦係嗰幾隻，包括恒隆101，太古19（到時又可以寫文傷春悲秋），長江基建1038，恒安1044，甚至交行3328，聯通762，瑞聲2018都有人估。

5. 一般嚟講，宣佈之後，都係新貴升，踢走嘅跌。但到正式生效又唔同玩法了。

6. 由於在屋企，冇公司的Bloomberg Data，只能大約講。但記住個原理：鬼唔知美團大咩，但入恒指反應最大嘅公司，唔係只睇市值大唔大，係睇成交相對於市值大唔大—如果成交相對於市值細嘅，一個唔該入到恒指，股價反應就會勁。

7. 原理不難理解，同樣係500億嘅公司，你如果平時好旺成交，一日50億嘅，被動基金追貨嘅資金，都好快消化晒。但如果同樣係500億，你平時一日得1億成交嘅，同樣指數比重，一樣咁多金額嘅被動資金，就要搞好耐先消化晒，就會推郁股價。大約係咁

8. 所以睇上面個圖，約數，亦唔係每一隻都有。但介紹返，最緊要睇D/C嘅比率，即係E嗰個column。同樣係700億市值，你見中芯係好多成交嘅，一日30億，萬一入指數，其實對股價影響唔太大。但華潤啤，一樣700億市值，但得3億成交，爆冷入到（當然我估唔會），對股價影響大。踢走嘅，亦都係。聯通畀人踢走嘅（但我估唔會），有排消化。

9. 我已經將成交相對於市值細嘅highlight晒。真係搏……我會搏隻……融創。因為安踏已經炒到飛天，華潤啤都差不多，另外美團中芯本身好大成交，但融創唔係，就算冇恒指呢個因素我都覺得有得玩。

10. 當然正式出咗，而我又得閒嘅（照計星期五冇咁忙），我會再整一個新的。呢個Excel都有畀埋你，雖則得幾行。

王維基香港電視HKTV Mall 1137應該入唔到「港版納指」

11. 咁恒指季檢同時，亦都會有「港版納指」恒生科技指數嘅季檢。由於本人差不多係第一個公開講1137會入「港版納指」，所以跟進下。仲有Excel玩，數字去到上星期五，但對結論影響不大。

12. 簡單嚟講，由呢個指數推出以嚟，1137表現，差不多好過晒入面嘅成份股。市值呢，高過包尾嘅網龍。問題係，都係應該入唔到。原因有幾個。

13. 首先，未必完全只係睇市值，上面講恒指時已經提過。但第二，幾明顯地，就算睇市值亦未必係計某一日嘅市值，好可能係計幾個月，咁你見1137係後期先發力嘅。計平均市值，應該大唔過隻網龍。

14. 不過仲有第三點先最重要，正如我篇文講：

15. 指數的門檻往往愈來愈高。巨無霸如螞蟻集團、字節跳動、滴滴等等來香港上市後，必然會踢走榜末的公司。所以就看看是港視升得快，還是巨企上得快。

16. 咁大家知道，螞蟻撻咗Q，字節跳動同滴滴未上。但，近幾個月上市，仲有咩萬國數據呀，明源雲呀，寶尊電商呀咁，隻隻都大過晒1137。咁好大機會食咗啲位。今次可能上市時間未夠耐未ready—但1137一樣平均市值未過網龍頭—然後到下一次1137 ready，呢幾間又會霸住位了。So sad

17. 當然理論上，科技指數可以多啲成員嘅，又睇佢點玩。但老實，真係純學術討論多，未必對股價好大影響。