大輪換繼續，LVMH新高。科企咁快見底？大市分化好明顯。大輪換。人人都買被動基金。我地係咪越嚟越冇記性？Whole Foods店長冇學位都八十萬年薪。Patreon文化嘅問題。有疫苗！麥當勞McPlant。法國大餐。開得高收Day Low．如此鹿兒島飛行體驗。 (Patreon)

大師冇點你 — 大輪換繼續，LVMH再創新高

快評兩句　— 科企咁快見底？

每日一圖—大市分化好明顯。大輪換。人人都買被動基金

Good Read—我地係咪越嚟越冇記性？Whole Foods店長冇學位都八十萬年薪。Patreon文化嘅問題

FB Post Summary—有疫苗！麥當勞McPlant。法國大餐。開得高收Day Low．如此鹿兒島飛行體驗。

1. 星期四嗰篇，希望早少少出到，星期四黃昏甚至星期四日頭出到。因為會講星期五恒指季檢，留意仲有埋「港版納指」季檢。有冇王維基？睇文就知。咁費事星期五凌晨先出，令你冇乜時間消化。

大師冇點你 — 大輪換繼續。LVMH再創新高

2. 舖排關係（陣間你就明），今次講咗「大師冇點你先」

大輪換繼續

3. Quite simply，去到星期三，都仲見到香港啲大陸科企跌到七彩，雙十一大減價。連跌兩日，咁就十幾巴仙。而見到我地講嘅收租股之類都普遍繼續彈（但就唔知做乜九倉一隻唔掂）

4. 當然仲有我最鍾意嘅KS，同埋殘到不堪嘅石油股。石油股應該差不多了？

LVMH再創新高

5. 咁同時間，啲奢侈品股，都係創晒新高嘅。包括我地成日講嘅LVMH。

快評兩句　— 科企咁快見底？

6. 好啦，真係快評兩句（因為其他嘢都寫咗好多！）。你見呢兩日嘅大輪換好勁，記者問我或者朋友問我要跌幾耐，實在好難估，反而睇跌幾多好啲。咁呢兩日啲科技股洗倉速度好驚人（請睇上一段「大師冇點你」，或者下面「每日一圖」）。但，會唔會已有初步支持？樓上呢個圖，係星期三晚美股，香港時間一點左右，見到啲科企全線企穩，而啲郵輪同航空公司就再跌了。所以，係咪科企已見初步支持？可以望埋星期四嘅港股。

每日一圖—大市分化好明顯。大輪換。人人都買被動基金

7. 大市分化好明顯—標普指數成份股嘅離散程度，你見好多時都係成堆成份股齊上齊落。唯獨三四月大升大跌市時就分化—但，疫苗事件嗰晚，先係近幾年分嘢最明顯。

8. 大輪換—個圖小小難睇，但睇佢啲字就明。見到星期一疫苗大升市，基本上年初至今升得最勁嘅，全部大插。年初跌得最勁嘅，大升。超級追落後。

9. 人人都買被動基金—見到啦，主動基金近十年節節敗退，由十年前八成孖劇些牙，變到而家得一半。應該好快會係被動基金過頭。又，所以叫你買BlackRock．

Good Read—我地係咪越嚟越冇記性？Whole Foods店長冇學位都八十萬年薪。Patreon文化嘅問題

10. 我地係咪越嚟越冇記性？—當然係同科技有關。人係咪普遍越嚟越冇記性？簡單嚟講係。但，因為冇必要。智能電話等於你第二個腦了。

11. Whole Foods店長冇學位都八十萬年薪—係喎，但重點更加係，佢地公開晒所有級別嘅人工（雖然都只係平均，即係仲有走箋）。我想討論呢種人工透明化嘅作風。得唔得？其實好難。公務員當然得，教書嘅應該全部知同事幾錢人工。但商業機構好少。去到邊啲商業機構會？球會就會，球星啲人工人人知。仲有NetFlix—因為佢地就當公司好似專業運動員球會咁。

12. Patreon文化嘅問題—哈哈，是日針對。其實佢係講互聯網嘅碎片化，Patreon呢類東西，令到某啲人（例如埃汾）可能有1000個粉絲付費（我未夠，但應該有機會做到），就夠過活。佢話會令到啲人更加偏更加激喎。有咩？我又唔覺。又，呢篇文係The Information 嘅文，我有訂。佢呢條應該係Free Link，講明可以share的。

FB Post Summary—有疫苗！麥當勞McPlant。法國大餐。開得高收Day Low．如此鹿兒島飛行體驗。

13. 有疫苗！—Alert post一個，但可見埃汾做嘢幾咁快手。同埃汾太食住飯都照出個快post

14. 麥當勞McPlant—麥當勞同Beyond Meat 同一日出業績，麥當勞就話會自己出McPlant，咁即係飛起之前有合作嘅Beyond Meat？又唔係喎，之後好似有報導話都係Beyond Meat代工。但我估係莊閒問題吧。開頭Beyond Meat股價重創，但到知道係佢地做返，都冇反彈。

15. 法國大餐—Patreon 讀者請食飯，山光道賽馬會會所法國餐喔。揩卡士又好食。不過真的，你請我去食麥當勞都得，但我唔食McPlant

16. 開得高收Day Low—回應返篇Patreon號外，都算估中，出完疫苗美股喪升之後，港股果然高位冇力。但我地推介啲板塊都OK的。

17. 如此鹿兒島飛行體驗—快運又玩香港去香港航班，玩到爛。不過今次新意係鹿兒島體驗—我以為至少在機度播片或者笠個VR頭罩—原來係叫你自己上機前上Facebook睇。咁都得。