高開低收，但回顧篇號外嘅表現都不錯，都有啲路捉。Tech 股短期應冇乜運行，希望我錯啦下 (Patreon)

高開低收，但回顧篇號外嘅表現都不錯，都有啲路捉

Tech 股短期應冇乜運行，希望我錯啦下

1. 拿，昨日原本休息，但出埋篇突發，連寫13日呀，對得你住啦，今日第8日。所以今日寫少啲。但兩段大嘢，一個回顧，一個展望。

2. 另外，小版務，「其實唔係好想主動提」，「因為太好反應玩死自己」但，轉年費回贈一個月嘅賣大包，星期日我就cut off，有買襯手。因為原意係唔想你地11月1扣咗月費，咁11月3轉年費又扣多咗，變咗畀多咗個月咁嘛。所以去到月中就停呢個優惠。實情真係好多人轉，恕我都未必個個可以覆，但肯定會全部退一個月—另外都留意返，今個月完全新join，一入就年費嗰啲，係冇得退的。一來違反咗上面嘅原意，二來根本Patreon冇得咁撳。

3. 另外，呢個星期找埋啲讀者飯數，月中應該會加推啲20/40蚊會員，因為真係供不應求，十分感動，但都係找埋啲數先推。呀仲有，有人見啲讀者請我去啲好貴嘅地方，其實真係冇所謂的，你同我去食麥當勞都得，講得出做得到。當然前題都係你請。

4. 好，去片。

高開低收，但回顧篇號外嘅表現都不錯，都有啲路捉

5. 昨日（星期一晚）整咗篇號外，因應輝瑞話有疫苗美股大升1600點，有讀者點唱，我先寫。但一早講過，我係唔多想的，因為自己都唔太keen，覺得有啲反應過度，覺得咁高追好易中伏。你見自從美國選總統間港股美股升到癲後，我呢排都已經保守啲。寫號外嗰時香港時間十二點幾一點，後來美股（香港時間星期一晚）臨近收市相當難睇，高追嘅全部都中招，科技股亦都倒跌。

6. 真係，都同我預測差不多啦？去到港股今日（星期二），亦係高開低收，恒指一度倒跌添，走勢極其核突。開市追指數嘅，中伏了。

7. 但又都認下叻，篇號外號分析，都大約幾中。市況就固然同預期差不多，高開低收。但仲有啲Sector都幾準。

8. 真的，你睇返，升得最多嗰啲，同我講嘅，都真係差不多。證明啲分析都仲有啲用，大家訂都真係有價值。仲有最正嘅係，呢堆嘢唔少係你開市飛入去都仲有得賺（咁點解指數會高開低收？因為啲科股技越插越有）

9. 例如提過殘到不堪嘅三桶油（其實同疫苗或開關之類冇直接關係），同埋始終信得過嘅KS

10. 當然仲有叫主力出擊嘅收租股同澳門股

11. 而真係，個個都估到國泰升啦，但應該開市追要輸錢。另外，估唔到中資嗰啲都仲升咁多。但都有啲邏輯，明顯見到國際線多嘅國航753就升多啲。

12. 贏錢輸錢唔緊要，幾時都係學下個分析嘅框架。大家一齊進步嘛。

Tech 股短期應冇乜運行，希望我錯啦下

13. 頭先講過，Tech股係昨日重災區。而家見美股Tech股同埋港股Tech股ADR都未止瀉。但道指仲有200點升。呢兩日嘅走勢，係有啲反常嘅—擺明唔係成個市嘅risk on and off（否則道指升乜？），而係rotation，板塊輪換。

14. 事實上，Tech股半個月前都仲係人人話打不死，話咁快就四面受敵。講真的：第一係疫苗令到啲人買舊經濟唔買科技，第二係歐洲查反壟斷，第三係中國都搞埋，第四當然其實美國都查！

15. 所以，見到呢啲真係比較大，系統性嘅大新聞，仲係全球一齊打，仲要見到以上啲輪換市況，係有啲驚嘅。

16. 咁會係買入機會定點？定直頭轉勢？難講，睇你睇幾耐。但如果睇一兩星期嘅，我估Tech股都仲係冇運行，似乎會係舊經濟股catch up 返。當然亦都要多啲時間畀我諗諗。但幾弔詭嘅係，如果疫苗遲遲冇，或者副作用大，或者疫情繼續不受控，就反而有利返Tech股。

17. 但都係，我又唔會叫你沽晒啲Tech股佢換去買舊經濟。講過無數次，雖然好似好廢，但平衡嘛。你例如一半一半，甚至七三，都訓得安樂。全部買晒一邊就危啲。當然升嗰時好過癮，但不妨問你自己，「對上呢浸升浪，搵夠退休未先？」。Most likely都係未，咁所以就要諗下如果跌嗰時點算啦。

18. Bloomberg 嘅 John Authers貼左一堆圖（其實我唔多鍾意睇佢啲嘢，都燈燈地。但要聽啲同自己意見不同嘅人嘛），講咗唔少嘢，但其實都係同一回事

19. 道指　vs NASDAQ

20. Momentum vs Value

21. 大企 vs small cap

22. 其實全部都即係 Tech vs non Tech

23. 遲下深入啲研究，但相信Tech股呢一兩星期都會差啲了。短期內個主調都係假設疫苗有進展（甚至唔使好快有），經濟呀旅遊呀重啟有望，大家會睇到舊經濟嘅盈利增長勁過Tech股，而估值真係爭太遠，就會換過去。況且唔好忘記，Tech股大把profit可以take，未必只係因為年尾，但跌得一浸，會觸發唔少人（大戶散戶都會）鎖定返啲利潤，似滾雪球咁。