又嚟「一個時代的終結」？悶唔悶？　恒指成份股種種迷思，加埋最新攻略，仲有Excel． (Patreon)

恒指成份股種種迷思

最新攻略

小版務

年費回水已搞掂，自己check信用卡吧，未來幾日有。

另外，加推咗20蚊同40蚊VIP了。20嘅呢度加入，40嘅呢度。

恒指成份股種種迷思

1. 恒指季檢，星期五篇文約略咁講過下，今篇詳細講。今次變動係比較大嘅。百威1876，安踏2020，美團3690會成為新成員。太古19就會畀人踢走

2. 想講嘅係：太古踢走，永遠有一大輪人講「一個時代的終結」之類，但於我而言係濫情。根本隻隻踢走都係一個時代終結，難道又對太古特別有感情？照計國泰踢出嗰時已經哭過一次喪啦。

3. 實情係，在中長線角度，踢出加入恒指，對股價嘅影響，近乎冇。信不信由你。之後講制裁股都會講，你呢啲東西完全唔影響公司營運或基本因素。如果因為呢啲嘢短期跌，更加應該係買入機會。

4. 記住，一般嚟講，如果有人焗住要沽，就係你買入嘅好機會。誇張講句，你當有條傻佬走去不停60蚊沽騰訊，梗係買啦。或者佢係市價沽，但要一日沽幾百億，當然會推低股價，咁一樣應該係買入機會。例子有乜？例如多年前啲美資銀行減持內銀股，純係套現，有啲甚至係自己唔掂要減持，對公司根本係零影響。

5. 當然，有時事情唔係咁簡單，有時啲大股東忽然大手減持，就可能係壞事—件事本身冇問題，但你會估，係咪佢知道啲嘢先會減持？但負面嘅原因，係覺得減持個動作似乎帶到啲訊息，而唔係佢減持本身嘛。極端講，當有個大股東（最好係冇參加營運嘅）忽然死咗，後人唔想掂呢盤生意，沽晒啲貨，就會係機會。但如果生勾勾咁沽，就驚啲。

6. 咁你可以諗下，呢啲因為恒指加入踢出嘅郁動，會係以上邊種？梗係唔係預示公司有乜問題啦。

7. 至於話藍籌有「地位」等等，完全唔明。首先，唔通銀行會平啲借錢畀你？定融資易啲？唔覺喎。當然有啲公司可能有規定只能買恒指成份股，但唔會係主流。

8. 亦都帶到去另一個問題：恒指本身已經唔係太科學（但好過道指），基金經理都睇MSCI。基金經埋總唔會低能到「因為」佢係指數成份股就買，「因為」佢唔係指數成份股就唔買。

9. 例子？國泰踢出恒指前，你估又有好多基金會買？頂多短炒下。而另外，Facebook Amazon之類，根本唔係道指成份股，冇光環冇地位有冇問題？有冇融資成本貴咗？有冇基金經理唔買？哦你話，道指冇代表性，睇標普500指數。扯！咁所以恒指咪冇代表性咯，睇就睇MSCI香港嘛。

10. 而我就當你講標普500，Tesla到而家都冇入到指數，又有冇令佢冇地位？美團3690阿里巴巴9988之前夠唔係成份股，咪又係炒到癲，唔通基金基理就唔買？

11. 另外，仲有一個迷思。的確你見啲公司，一般被踢出恒指後，好少會再入返（當然有例外，聯想，德昌電機，同埋長江基建都兩度入選，十分神奇）。呢度涉及兩種情況。

12. 第一種係：根本啲業務越做越差（例如國泰同東亞），可能因為行業唔再好景，可能因為管理層廢，總之股價當然一路跌—跌到某個位就踢出恒指。但因為行業同廢嘅管理層冇改善過，所以咪踢出完恒指都仲繼續跌。即係，佢踢走咗都繼續跌，係因為本身業務，而唔係「被踢走」。掉轉講，騰訊入恒指後不停咁升，但唔係「因為」佢入咗恒指所以升。我好肯定，就算間公司由頭到尾冇入恒指，都係會升得咁勁的。

13. 第二種情況仲有趣，就正如之前講王維基1137入唔到「港版納指」（恒生科技指數）情況一樣（結果都係入唔到）。有時，唔係你股價唔好，而係就算你升好多都好，都入唔到。因為一路有新公司上市，指數門檻往往越嚟越高。特別係中資公司嚟香港上市後更加見到（即係，都好多年了）。佢地因為太大，必然好快入到指數。就當可能原本入恒指門檻係500億市值，我係間100億市值嘅公司，好勁咁做到股價幾年升到上500億—但當中可能有十間八間5000億市值嘅巨無霸嚟上—甚至佢地上市後跌一半都好，都仲係穩坐呢個成份股嘅位。咁呢啲情況，根本你做得好過佢，但佢入指數，你就被踢出。

14. 唔知係咪為咗解決呢個問題，恒指公司係增加咗成份股數目。實情從來都冇話要限定50隻，最初（半世紀前）係30隻，我入行做股票時（2006）都只係33隻，然後2012年慢慢加到50隻。多年冇改，而家咪再加。Sky is the limit，標普500隻都得啦，羅素2000都得啦，日經一早已經225。

15. 但另一方面，既然恒指成份股可以一路加上去，亦即係呢啲「地位」可以好似量化寬鬆咁一路變出嚟。既然係咁，又點會特別值錢？

16. 同時間，指數同埋指數基金，仲有一個問題—佢地係會買貴貨的。如果唔計啲巨企新上市嘅因素呢，一般你公司升得多，咪會市值大增，然後入到指數咯。例如今次安踏同百威都係咁例子。但，亦即係佢地最貴嗰時，就會入指數，就會被動基金焗買。

17. 更加加大呢個效應嘅，係有時啲「指數」本身都係咁。點解會搞「港版納指」（恒生科技指數）？咪就因為大家有興趣。咁但點解你忽然有興趣？因為升咗好多。正是如此，往往升咗好多嘅行業或概念，就有人搞指數，有時就係搞完就好快見頂。例子我都寫過，以前有「五行三保指數」（中資金融股指數），正係啲內銀內險炒到喪嗰時，金融海嘯後啲公司死氣沉沉，就近乎冇人再提呢個指數。

18. 你睇「港版納指」（恒生科技指數）推出後，表現還好，但搞完冇耐就見好多不利科企嘅新聞。最明顯就係全世界都開始嚴管呢啲公司—而呢幾件事係有關嘅，唔係巧合。點解有呢啲指數？當炒咯。點解當炒？因為市值升咗好多。咁點解可以升咁多？因為好大影響力好霸道咯。咁自然就會畀人搞。

最新攻略

19. 講咗一大輪理論性啲嘅嘢，講返操作上，但都同上面有關。樓上提咗啦，根本基金經理就唔會因為你係咪恒指而決定買唔買。相反，有啲基金靠呢啲機會搵食添。

20. 點解？頭先講話基金唔會因為出入恒指而去決定買唔買，但有個別基金會咁做：就係啲追蹤指數嘅被動基金，例如最出名嘅盈富基金2800。佢地就係複製個指數，所以必定係跟返個指數買。加入美團，佢咪買美團。踢出太古，佢咪要沽太古。仲往往要最後一日先做

21. 於是乎，就衍生咗啲打劫被動基金嘅玩法。你焗沽，我咪執平貨。你焗買，我咪掃高質畀你，反正你咩位都要買。上次講恒指踢走信和83，都解過類似嘅嘢．留意個Excel可以download

22. 呢個Excel畀埋你，A-D呢堆嘢，恒指公司份稿有。G呢？可以用Bloomberg之類，或者自己拎過五日亦得，甚至你拎一日都未必唔得（當然最好嗰日唔好係咩好大件事發生嘅日子）。E呢？點知追蹤恒指嘅被動基金有幾多？煩但準啲嘅方法，自己搵晒堆ETF出嚟（唔止2800一隻），然後佢地會講有幾多資產嘛，咪計到。簡單啲嘅，恒指公司啲每月報告往往都有講，因為呢個係佢地嘅「成績」，有幾多被動基金追蹤佢隻指數。如果冇人追蹤嘅，即係隻指數比較失敗。

23. 咁根據恒指公司，追蹤恒指嘅被動基金，加埋大約206億美金，近1600億港紙。咁例如安踏佔1%，即係有16億港紙要買。但隻嘢平時6億成交，咁大約啲買盤等於平時兩日半成交。就係睇H呢行大唔大，大嘅數字，影響就大。

24. 所以你見到，影響最大嘅，係新貴中佔最細比重嘅百威，唔係最大嘅美團。美團日日都咁多人買架啦，你被動基金要掃到自己5%，其實等於佢一日成交咁滯。相反百威平時冇乜成交，你掃到自己0.49%，都等於佢幾日成交。

25. 咁踢出方面，太古亦都係咁玩法，理論上沽盤都幾勁。但實制上呢？上次都有信和，沽壓應該極大—但結果冇跌到，奇怪地好多都盤後成交，唔知係咪啲被動基金一早叫人cross畀佢。BTW，信和被踢走後，股價表現一樣不錯，跑贏大市添。

26. 最後，國企指數呢？原理一樣。問題係，追蹤國指嘅資金係追恒指嘅四份一左右，得54億美金，420億港紙。咁你見，出出入入啲影響好細，討論都慳返。況且，恒指就52隻，國指又50隻，根本都記唔到邊隻係成份股，邊隻兩者都係？邊隻兩者都唔係？都幾難記。

27. 真係最後，你見「港版納指」，恒生科技指數，都執位。一如舊文所料踢走咗網龍，但另一隻係踢走恒騰，市值離尾二都幾遠，原因唔知。但踢走埋網龍後，而家指數入面最細市值嗰種係丘鈦，都110億市值-個門檻又高咗了，而1137而家100億市值唔夠。唔好忘記下次可能又整兩隻巨企。今次隻明源雲，成700億市值