拜登上場然後又點？領展星期一業績．畢菲特都係靠回購 (Patreon)

拜登上場然後又點？

領展星期一業績

畢菲特都係靠回購

1. 繼續收到好多人轉年費，放心，必定會退一個月畀你，應該呢兩日會搞得掂。留意唔會另外轉落你戶口（我根本冇你戶口），只會在你信用卡度回畀你。未見到嘅畀耐性，正路冇問題的。

拜登上場然後又點？

2. 都係講一講大選。拜登當選應該冇懸念，再講咩打上法院呀嗰類，應該唔會點有人理。但股市又如何？一早炒定先了。我始終認為而家值博率唔太高，甚至估不久再有一個調整。到時再睇機會入市。而明明就話民主黨控制唔到國會，刺激方案無望，做乜仲係咁升？

3. 呢個圖好似貼過，話分裂嘅國會，傳統上係對股市最好的。原因？因為種種針對企業嘅措拖應該過唔到喎，越少干預越好。今次可能包括拜登想加稅，或者想整治科企反競爭，都會被扯後腿云云。

4. 亦都真係信不信由你，但的確咁多種情況下，民主黨總統拍Split Congress，係最強組合。信者得救。

5. 當然而家呢刻想玩嘅，可能都係睇個別行業，應該仲有一轉炒下，例如大麻股升到癲（真係有寫過的！但唔算太詳細）。新能源應該都仲有得玩。

6. 無論如何，大選年呢，美股年尾一般都強，今年應該都唔例外。所以唔高追都唔好沽貨，有錢等調整買。我睇唔到拜登上場後美國會忽然走樣，企業會大受打擊（最多加一加稅）。所以美股應該都係逢低買入。

領展星期一業績

7. 話說你地轉晒年費，我就變咗多咗舊錢，有幸福嘅煩惱。都有諗過點處理好呢？正常嘅方法最好當然係忍住，未來一年設定好時間分段入市，唔理升跌。但大家都知人嘅自制力好低，特別係我呢啲，戶口有錢會身痕的，點都要搵啲嘢買。同朋友講起，就又講返近期隻領展823幾強。10日新高了，當然同年頭比仲爭好遠，但照計冇乜downside？

8. 話說公司係3月年結嘅，所以9月半年，星期一就會出半年業績。望過下出面嘅行，估個分派會跌8%，因為一次嘅租金優惠（留意，冇減到租！）。睇返，舊年嘅中期派息，係1.4147。跌8%，即係1.30。話會派返0.07特別息，加埋計落都係減派息，應該上市以嚟第一次。但照計呢啲市場一早預咗。

9. 都係嗰句，租金再下跌嘅空間應該有乜。話2021/2022年有 4/5%股息率，其實相當不錯，最重要係可見度高，派唔到嘅機會低。公司多數出完業績會請食餐飯，又睇有冇咩特別嘢聽到（不過以前都係冇乜特別聽，都係八掛料多）

畢菲特都係靠回購

10. 仲有快手講埋，畢菲特嘅巴郡業績。應該冇乜人買，但總係值得講下。想睇英文版亦得，但當然聽我解傳神好多。

11. 話說年初至今，巴郡股價，係跑輸大市嘅。標普指數升10%，巴郡仲要跌8%。但第三季係收復唔少失地，跑贏返大市（樓上個圖）。如果只計第三季，巴郡升差不多20%，標普指數「只係」升 8%。

12. 但，係靠乜呢？之前啲日本商社？如果由佢宣佈嗰時計到而家，應該全部潛緊水，跑輸大市。當然佢可能更早買定，反正冇講平均價，但照計唔會有好多錢賺到。

13. 定係靠9月上市嘅科股Snowflake？近期表現麻麻，但畢菲特120蚊入股，就梗係賺唔少。不過金額唔大，而巴郡實在太大，所以照計Snowflake表現好都幫唔到股價幾多。

14. 咁你估到了，標題都講明，當然係靠回購！實情畢菲特以前雖然抗拒回購，但己經破戒多時。之前兩季都已經用咗67億美金。而瑞銀係估第三季會用32億回購—結果，第三季巴郡用咗90億！一季多過晒之前任何一年。

15. 今年到而家，巴郡已經用咗157億去回購，係美股第二大金額。最多嘅？就當然係蘋果（無獨有偶，蘋果就成為最值錢嘅企業）。街估第四季巴郡仲會用至少24億去回購。

16. 更好玩嘅係，畢菲特雖然落力回購，但第三季尾拎住1457億現金—同上季嘅1466億差不多。因為gen錢嘅速度太快，結果掉咗90億去回購都冇令現金水平大幅度跌。

17. 一次小小業績都見到巴郡比較尷尬嘅情況：太大，但又唔想買落啲巨型科企。變咗不停做投資，啲錢都係用唔使！就連做回購啲錢都係不停咁變返出嚟。所以得兩個選擇：一係做極大手嘅收購（就係入股啲巨型科企），一係就極大手嘅回購。你估佢會揀邊樣？我估都係後者。所以低息環境點會冇助股市？