埃汾冇走數！而家先買美股有點遲。LVMH 同 Square創新高。侵拜登提過乜國家？歷任美國總統任內股市。CEO拒絶再玩。簡單主義之禍。夢幻共演。李寧買Clarks．提早派彩拜登。賣飛佛 (Patreon)

小版務—冇走數！我仲在！

快評兩句—而家先買美股就有點遲了

大師冇點你 —LVMH 同 Square創新高

每日一圖—侵侵拜登提過乜國家？歷任美國總統任內股市

Good Read—CEO拒絶再玩。簡單主義之禍。

FB Post Summary—夢幻共演。李寧買Clarks．提早派彩拜登。賣飛佛

小版務—冇走數！我仲在！

1. 空前咁多人轉咗去年費plan，果然唔怕我著草。我估主要因為我話回一個月水（咁因為你地11月1號已經扣咗錢嘛！）仲再有85折。咁呢幾日已經忙到癲（主要係大選以及同讀者食飯），所以唔好話搞refund，我連你地啲message都冇覆。但我週末會搞的了，應該會逐個send message，放心

2. 另外，唔係講笑的，20蚊會員係滿咗20個，而已經幾個人話想加入。「首先你係可以做40蚊會員的，仲有3個位，搵人掃埋佢齊頭10個封盤」，我仲多數會寫篇文講你。

3. 理論上我可以加推20蚊會員額嘅，但唔想好似呃讀者或者唧牙膏賣樓咁加推。仲有，同賣Facial 券一樣，我希望讀者係真係搵到我食飯傾計嘅。所以，今個月尾或者下個月先加推啦，咁先保證到我真係履行到我承諾。都係嗰句，等唔切嘅，「可以join 40蚊」

4. 仲有，有機會詳寫，但埃汾真係12月中去台北了！機票都訂埋！放心，唔係移民，搞居留證啫，過埋聖誕就返。亦因為咁所以唔想加推太多20蚊會員—我在台北，文當然照出，但食唔到飯嘛，當然理論上如果讀者在台灣都可以照食（而答案係有的！至少有兩三個！）。

快評兩句—而家先買美股就有點遲了

5. 正路係拜登選到，但之後有點難玩。固然啲拜登Trade升唔少（太陽能，中資），Trump Trade就唔少都勁瀉（美國監獄股）。但真係不能一本通書睇到老。首先你見大麻股係冇乜反應—因為好可能預啲法案會畀共和黨在參議院拖後腳。諷刺地，亦因為咁所以科技股狂升（拜登搞唔到佢地反競爭，又加唔到稅）。

6. 講到尾，明明而家就應該出現有人唔認數，傳說中嘅「股市最怕唔明朗」。但，偏偏呢幾日美股升極都有。去到呢啲位，我係寧願買香港股票啦。而我亦覺得美股有機會有啲調整，值博率唔高，但當然唔使減持，只係叫你唔好訓身飛入去（但偏偏我就因為你地轉年費而多咗舊錢）

大師冇點你 —LVMH 同 Square都破頂

7. 昨日寫咗LVMH，BlackRock，任天堂，SONY，全部破頂！不再重複，不過LVMH再破頂，亦係真正我多次寫嘅股票，Homeblogger嘅片都專題提過。

8. 另外，Square我都有之前提過，但只係幾句，唔算好落力推。所以功勞主要係話畀我知嘅網友。

每日一圖—侵侵拜登提過乜國家？歷任美國總統任內股市

9. 侵侵拜登提過乜國家？—呢啲就大數據啦，兩位提過嘅國家。咁當然中國美國兩位都有提。只係得拜登提嘅國家好少，匈牙利，羅馬利亞，巴基斯坦。只得侵侵提嘅大把，好多係大國。可能拜登國際觀差啲，亦可能因為佢唔係在位。但最好玩係：兩個都冇提嘅。當中最「唔抵」嘅，應該係成三億人口嘅印尼。

10. 歷任美國總統任內股市—侵侵及其支持者經常會講佢任內股市表現好好，即使登粉都唔少有咁嘅印象。咁事實呢？還好。四年計，佢排在中間偏上少少。有人話疫情拖累，可能吧，但就算計今年高位，佢都只係會升多一位，好過布殊，差過艾森豪威爾。另外，記唔記得之前我寫過係奧巴馬任內好啲？點解呢個圖變咗奧巴馬差過佢？答案都係睇日期，平時我用開嘅數據係由上任先計，呢個圖計大選日。

Good Read—CEO拒絶再玩。簡單主義之禍。

11. CEO拒絶再玩—CircleUp（我唔識呢間嘢）嘅創辦人兼CEO寫嘅文，講佢離職嘅心路歷程。並唔係炒大鑊或者搵咗第份工，係Burn out．教大家唔好死頂（但又有人教你堅持，世界係矛盾的）。呢篇文有啲長，但唔深。我見到有人介紹，用一個字：Candid．應該感受到。仲有圖有真相，連啲辭職email都一字不改貼出嚟（包括打錯字）

12. 簡單主義之禍—原文講侵侵同美國，政治嘢，但適用於好多嘢。講將一切「簡化」嘅問題同危險。簡單主義有乜特色？你應該覺得好熟悉，包括：解決方法好簡單仲邊使辯論！反對嘅人一係笨到極一係賤到極，講嚟嘥時間。反對嘅就係敵人，沒有中立。最後，唔好同我講唔可行，我地就係要打破現行制度。

FB Post Summary—夢幻共演。李寧買Clarks．提早派彩拜登。賣飛佛

13. 雖然仲keep住有FB Post，但你見有啲簡單兩句，刷下存在感算。主力當然係寫呢邊嘅東西。親疏有別嘛。

14. 夢幻共演—同讀者食飯，今次係隔離台陳祉俊Christopher Chan，大家睇波會見到佢。實情我識咗佢廿年，佢亦係呢度讀者。佢會開Patreon，大家支持下，唔支持Patreon都去like佢FB Page．但唔止係幫佢賣廣告，你有心機睇嘅，篇文最尾嗰部份，幾具啟發性。陳生唔寫股票金融政治，但都係我心目中嘅叻人，我在佢身上學唔少嘢。

15. 李寧買Clarks—不用多解釋。留意中資買外國嘢好多時都中伏，例子太多。Club Med呀，Pizza Express呀之類。睇下今次會唔會在Bossini 入面賣Clarks

16. 提早派彩拜登—呢期比較好嘅文。有博彩公司提早派彩畀買拜登嘅人，留意係香港時間星期四早上。肯定連十拿九穩都未到，更不用講話已無懸念。以前有冇試過炒車，即係派錯咗但拎唔返？當然有！但點解咁笨？答案當然係宣傳。你以為佢笨？你畀佢吸引到去賭先笨。

17. 賣飛佛—得一句，就係泰國航空搞嘅飛機河，飛去佛教聖地上空，仲搵人在班機上念經。不如叫「賣飛佛」