ivanliresearch

快講大選．LVMH，BlackRock，任天堂，SONY，全部破頂！iBond你冇抽？點解呢？王維基1137，下個星期入科技指數？ (Patreon)

Published:

2020-11-05 21:25:34

Imported:

2021-07

Content

小版務之自作業

無聊分享—順周期投資的陷阱

快講幾句大選

LVMH，BlackRock，任天堂，SONY，全部破頂！

iBond你冇抽？點解呢？

王維基1137，下個星期入科技指數？

小版務之自作業

1. 早幾日Patreon開放咗年費功能畀我，全年訂85折，然後上篇文同大家講你訂全年嘅，85折外我再回一個月水畀你。理據係因為你地月頭先畀咗一次，而家轉年費，咪即係畀13個月？我諗回返一個月畀你公道啲。

2. 咁點解話自作業？因為，反應極之激烈！果然大家唔驚我著草！亦都好有信心自己唔會cut。我應該開心先係（雖然收平咗15%，但我免除咗你cut嘅風險。實不相瞞，我係計過有幾多人每個月走的）。

3. 咁做乜話自作業？因為，太多message，太多人轉！令我完全未搞得切。況且我想一次過，否則會好易漏。所以大家畀少少耐性，放心，我話過回水嘅梗係回，講信用嘛。應該週末會做到，直接回落你信用卡的。

無聊分享—順周期投資的陷阱

4. 又，變相今個月我將唔少之後嘅錢收咗—未必係好事—因為而家美股正在高位。真係happy problem，但都想分享多啲：我做耆英證券時，出花紅幾和味，但拎去買股票然後多數出事（所以而家仲係唔多富有，如果當年拎去買樓呢……唔好如果了）。點解？因為分析員係順周期嘅行業—必定係升市時，你公司業績好，派花紅派得大份—然後你就在個市最貴時將啲花紅拎晒去買，就摸頂—Even worse，往往就到個市最唔掂時，你零花紅，想撈底都冇錢，甚至更大劑係減人工畀人炒，被迫低位沽貨。呢類風險，大家可以留意下，幾有趣。點解成日係啲教書佬買股票或買樓賺到好多錢？有原因的。

快講幾句大選

5. 我估大家都相當累。有人話又冇你份，做乜咁肉緊，咁但睇波睇戲都係咁。咁反正仲未有最後結果（我估到你睇呢篇文時有了，有冇人唔服上訴後話），我快寫幾句算。

6. 都係畀返呢個走地即時賠率你，留意係美國時間。而家拜登機會似乎相當大，會睇埋Nevada—佢拎到應該即時夠數。當然如果之後甚麼賓州北卡喬治亞之類佢拎埋就直頭釘蓋。但另一方面，阿里桑拿個結果，仲有少數媒體未敢話實拜登拎咗（但多數當拎咗）。

7. 美股方面呢，左圖係星期三晚，右圖星期四晚（有啲技術問題所以冧把唔完全一樣），你見科技股都係勁升。但留意下，拜登而家係熱門，但似乎共和黨會控制參議院（Senate）—記得之前話一黨控制就推刺激方案冇問題嘛，而家好難，咁點解仲升科技股？

8. 因為個講法話，拜登嘅加稅，或者想告呢啲科技反競爭嘅「左翼」行為，在共和黨扯後腳下，就冇咁易進行了。個解釋好似幾夾硬。但似乎普遍係咁講。

9. 仲有留意一樣嘢，Split Congress已差不多成定局，但歷史上，呢樣嘢係利好股市的。你會話，好屈機喎，一黨玩晒又話易過刺激方案，分開又話歷史好—我諗，係短期同中長期嘅分別。

10. 港股呢？留意，拜登拿下Michigan呢個消息，係香港星期四開市前公佈的。即時拜登行情再看漲好多。所以成堆嘢嘅走勢，就同星期三（侵登下風）相反。

11. 內房股當然升個不停，因為人民幣強。呢個肯定之前講過係拜登Trade

12. 另外，之前一路被各式制裁嘅中興（763）大幅反彈，呢隻肯定有寫，因為有人提我我打錯冧把。咁當然仲有騰訊破頂，主要係跟美國科技股強勢。而啲新能源股亦全部反彈。

13. 至少見到，呢堆嘢嘅表現，同預期中拜登當選反應差不多。但當然你要趁快手買到就唔係咁易。

LVMH，BlackRock，任天堂，SONY，全部破頂！

14. 完全係錯配，呢啲應該在「大師冇點你」度寫。但是但了。

15. 首先講返，呢度肯定講過，仲要唔止一次嘅LVMH，同埋BlackRock．今日再創新高了。故事完全唔特別，甚至大家都好清楚兩間公司做乜，你要嘅就只係買完坐定定。而你見都好一排我都係推返呢啲舊經濟股，純係覺得科企比較貴，況且講得太多，好多讀者自己亦已渣到成手係，平衡下。結果呢兩隻舊經濟股反而比起科企更快破頂。但樓上都講咗，呢期又到科企追返上嚟，所以講到尾都係平衡。

16. 咁亦都留意埋，連SONY同任天堂都破頂。呢度貼嘅係美股，SONY直接上，任天堂就ADR之類，亦都有讀者有本事直接買日本股票。呢兩隻都某程度係疫情受惠股。SONY就因為上星期業績會話預PlayStation 會相當好賣，任天堂就剛剛出業績，仲調高埋盈利指引。

17. 想講嘅係：呢兩隻嘢係我在Homeblogger嘅收費片度推過的！所以真係訂埋有著數，咁當然大家隨緣樂助啦，講真有時啲嘢會有啲重覆。我亦都積極考慮有機會直頭在呢邊拍片（之前唔做因為同Homeblogger有口頭協議，畢竟佢地於我有恩），但如果真係呢邊都拍片，就會係新收費了。唔鍾意睇片嘅可以不理，但我發現睇片同睇字嘅兩班人，重叠好少，而大家支持我應該都係因為鍾意我寫文。但始終世界會變，新一代係鍾意睇片多啲。再研究。

iBond你冇抽？點解呢？

18. Ibond截止，結果我都唔得閒另外再寫一篇專題文，但之前嘅文有提過。而家截晒，但我覺得都可以檢討下。

19. 唔知讀者有冇抽，冇嘅，我估可能真係幾舊水回報睇唔上眼吧？咁幾舊水多唔多錢，真係有啲主觀。但分享我朋友嘅情況：佢就一家四口一分四，每人抽五皮嘢（5手）。

20. 個重點係，留意遊戲玩法。iBond總共有100萬手，後來因為超額認購仲加碼去到150萬手。結果抽嘅有46萬人。重點係分配方法，好似啤牌派牌咁，一個一個咁分，到人人有份就再嚟過，有剩再抽獎。咁你睇到了，每人係至少中3手。另外好好彩嘅可以去到4手。一手講緊執幾百蚊，3手就分分鐘成千銀，咁一家四回都四千銀。「如果你都覺得係雞碎咁多，咁好應該支持下我嘅40蚊月費VIP計劃，一年都唔使四千」。仲有六個剩！反而20蚊就賣晒了。「要唔要加推？」

21. 無論如何，下次再有嘅，還是應該抽。按幾個掣，冇風險，有一千幾百甚至幾千蚊執，真係冇幾多活動有咁高生產力。我就覺得長江不擇細流，而且有錢唔執怕有報應。