港股出奇冷靜，拜登Trade落空．民調都好信？選舉日走勢不代表將來。股票多數升。佛教徒快絶種。國激辯BTS服兵役。亞馬遜唔及Walmart有效率。啤牌高手教你幾時要退。假裝在河內。港女挽救酒店業。螞蟻撻Q FAQ。拜登97%機會當選。愛情回水一日遊。特朗登 (Patreon)

快評兩句—港股出奇冷靜，拜登Trade落空

大師老點你 —民調都好信？！？

每日一圖—選舉日走勢不代表將來。股票多數都升。佛教徒快絶種。

Good Read—韓國激辯BTS服兵役。亞馬遜唔及Walmart有效率。啤牌高手教你幾時要退

FB Post Summary—假裝在河內。港女挽救酒店業。螞蟻撻Q FAQ。拜登97%機會當選。愛情回水一日遊。特朗登

1. 分層收費玩咗幾日，近乎冇人只訂$8，應該都係覺得唔爭在畀多$4。可以話我定錯價，但亦可能係吸咗啲人，覺得$12好抵。社會實驗，呢檔嘢我當自己生意咁玩，都學到好多嘢，總不能永遠紙上談兵自己唔run．無論如何，多謝大家。

2. 另外，都提返下，$20會員，反應相當好，20個名額賣剩2個，不如搵人掃埋佢。好處當然係可以搵我食飯，都係嗰句，我知無不言，你問乜都得，你可以搵多個朋友。

3. 至於$40嘅土豪會員，都有4個。小弟特別感謝。仲有6個剩，10個滿額，福利同$20係一樣的！就只係特別支持我，或者錢多任性！正路我會寫篇文鳴謝你。

4. 最後，而家推咗年費計劃。唔係我預計內，而係今個月玩玩下佢開放畀我，我set完就話咁快有唔少人加入。咁都講下，年費就85折。正常中途冇得退，不過如果touchwood 我之後寫唔到，就按比例退返畀你。所有Tier都適用。你join咗年費可以叫PM我叫我退返今個月嘅錢畀你。

5. 版務講得太多，去片。結果越寫越長，我估好快呢個二四六Side Dish快評兩句都會變咗好多句講Market，但可能隨意啲冇咁嚴謹。

快評兩句—港股出奇冷靜，拜登Trade落空

6. 當然係講美國大選，留意返個圖係美國時間，即日走地賠率。互有攻守。普遍主流，先係覺得拜登大機會贏，到一路開票見到優勢遠比預期中細，然後開始見侵侵在搖擺州領先，又一度覺得侵侵會贏。但到香港時間夜晚，又見拜登啲票開始出現。有人話做馬，但事實一早預咗拜登嘅票會遲出現，因為郵寄票嘅多數係民主黨票。

7. 到呢刻似乎拜登又再熱啲，但都係too close to call．到你睇到篇文時可能有初步結果，所以我唔寫太多。但留意下，股市方面，出奇地冷靜，你見港股時段波幅比平時仲細。只能講句虛虛實實，人人做好晒放風措施咪安全。2016年就人人覺得侵侵只係出嚟做小丑陪跑，就出事。

8. 不過睇其他資產，都大約睇到香港時段拜登被看淡。例如你睇啲新能源股（信義968之類）都好弱，墨西哥披索同人民幣都急跌，呢啲全部都係 Biden Trade落空嘅反應

大師老點你 —民調都好信？！？

9. 又由冇點你變咗老點你，遲早變燈神。不如講返我明報篇文。就呢一刻（香港時間半夜），似乎拜登略為看好。我篇文都講拜登贏，但必須要講，成件事錯晒。啲民調同Stat Model寫到好輕鬆，結果絶對唔係。拜登在幾個搖擺洲份都冇明顯佔優，特別係事前看好拜登可以拿下Florida（然後可以完場），結果冇。我未仔細睇（仔細睇好重要），但初步印象覺得啲民調同Stat Model今次嘅error都幾大[IL1] ，甚至比2016仲要大。即使拜登當選，都掩飾唔到呢樣嘢（但未必好多人關心，好多人只係理結果）。如果侵侵當選，更加會畀人鞭屍。我期待睇民調同統計學者點解釋，明明仲話改善咗

10. 至於其他東西，特別想講係，似乎共和黨保住參議院（Senate）機會幾大。咁即係相當可能係拜登總統，但受制於共和黨嘅參議院。對股市未必太好，刺激方案應冇咁易推。但美股照樣大升，而家就唔多值搏，我都係期望正式有結果後有一波調整。當然，如果係侵侵連任，而共和黨保住參議院，就對刺激方案係好事。

每日一圖—選舉日走勢不代表將來。股票多數都升。佛教徒快絶種。

11. 選舉日走勢不代表將來—十分簡單，你見到選舉日後嘅股市表現，甚至一星期後表現，同一年後相比，係冇乜關係。一路都話，嗰一刻你就無限放大，到頭嚟根本唔係你想像中咁大件事。

12. 股票多數都升—類似嘅圖貼過好多次。股票多數都係升嘅，無論係民主黨定共和黨。Why bother？你支持侵侵如果拜登當選就美國已死你清倉？定你支持民主黨侵侵再做四年就美國玩完？真係咁咩？

13. 佛教徒快絶種—2015至2060年各種宗教人口改變。一般預計去到咁長都係多餘，但人口預測例外，會幾準。回教徒跑贏晒大市就大家知，但佛教徒要縮，so sad．點解呢？泰國日本人口老化？或者計埋中國？中國嗰啲當唔當佛教徒？只靠越南緬甸（年青！）係補唔返的。

Good Read—韓國激辯BTS服兵役。亞馬遜唔及Walmart有效率。啤牌高手教你幾時要退

14. 韓國激辯BTS服兵役—真係嗰隊BTS！防彈少年團。服兵役嘅爭拗，去到近年高峰。大家知韓國服兵役幾嚴，但個別好有貢獻嘅人可以豁免，例如奧運金牌選手。但暫時冇流行歌手可以，咁點解BTS貢獻唔大過奧運金牌？但畀得BTS又會有人問點解邊個又唔得？就社會大辯論了。

15. 亞馬遜唔及Walmart有效率—唔長亦唔深，用數字說話，話你知Walmart使用資本，同埋營運，甚至比Amazon更有效率。

16. 啤牌高手教你幾時要退—職業 Poker手教你，唔好死頂，適當時間要放棄。教你如何quit得更好。

FB Post Summary—假裝在河內。港女挽救酒店業。螞蟻撻Q FAQ。拜登97%機會當選。愛情回水一日遊。特朗登

17. 假裝在河內—食評一篇，屯門越南人小店，兼講細個同越南人嘅淵源

18. 港女挽救酒店業—半島酒店入住率反彈一個開，房價仲要唔使減，當然多得Staycation

19. 螞蟻撻Q FAQ—呢篇幾好，夠快。話畀你知螞蟻撻Q後會點，有冇得回水。

20. 拜登97%機會當選—Economist文，講到「民調大錯都食硬你」

21. 愛情回水一日遊—講返螞蟻回水安排，同埋孖展息嘅處理

22. 特朗登—蘋果日報嘅小錯誤，嘻嘻。特朗普寫咗特朗登，變咗合體，悟天格斯華月雪花。

[IL1]