小心見光死。大麻股。全球半導體公司戰力圖。新車嚟嚟去去嗰幾隻色。見工必問呢個問題。2020年啦，點解printer 仲係咁垃圾？拜登當選。麗晶大賓館 (Patreon)

快評兩句—小心見光死

大師冇點你 —大麻股

每日一圖—全球半導體公司戰力圖。新車嚟嚟去去嗰幾隻色

Good Read—見工必問呢個問題。2020年啦，點解printer 仲係咁垃圾？

FB Post Summary—拜登當選。麗晶大賓館

首先講，退錢都係未得閒搞嘅，但真係公義只會遲來不會缺席，一定通知大家。另外，20蚊會員忽然騰出咗個位！有買趁手，但我好似冇見有人delete，可能係上咗40蚊。而40蚊亦都只係剩返一個，搵人掃埋佢！

暫時我都唔加推，費事好似無限量寬咁呃大家，明明話限量20個又越變越多。至少都等我找埋啲食飯數先（呢幾星期好多），唔好搞到facial 券咁永世訂唔到，月尾先加推吧。當然我估大家唔會食完飯就即時變返普通會員，唔只係為食飯呢啲嘛！係為支持我嘛！

另外，8蚊會員，係近乎完全冇人訂嘅，似乎冇人貪平。或者全部decoy晒上去12蚊（都話人人都點第二平嘅紅酒）。遲下我應該會取消佢，現有啲8蚊讀者（得幾丁）應該會退錢。但其他嘢唔會變，都係二四六，三五日，一星期六篇。

禮多人不怪，再次多謝大家。呢個Patreon去到第三個月，帶畀我好多嘢。有機會出篇文講下。

冒死推介，我朋友新田飛地嘅地主，開咗個Patreon，我不認同佢觀點，但誓死（？）悍衞佢講嘢權利。我一向幫朋友，大家可以去睇下。我估女讀者就唔好去了。

快評兩句—小心見光死

你見我近日真係比較小心嘅，當然幾時都係唔高追都唔好沽。但呢啲位先去忽然押注股市，就自己控制風險了。雖然上篇講過，正路地都係年尾都係升嘅，但可能跌返10%先升呢？呢啲位我寧願睇返中資股，或者大麻新能源之類。

今年嘅投資其實唔算太難玩，只要大約有一半買美股甚至A股，唔係全部香港，今年都贏錢。最難就係唔好3月畀人震走。

大師冇點你 —大麻股

其實上篇講過了，慎防有人miss咗。固然共和黨會拖後腳，但大麻呢啲唔係大議題（當然有啲洲十分保守），有妥協空間。

每日一圖—全球半導體公司戰力圖。新車嚟嚟去去嗰幾隻色

全球半導體公司戰力圖—實情唔係戰力（點分？計幾多nm咁？），係收入，但作為一個咁大嘅工業，收入就代表戰力了。我就好多時唔知邊樣打邊樣，上面個圖都sum up晒話畀你知有乜玩家，在個行業嘅唔同位置。當中NVIDIA同ASML都係我推得比較多嘅，當然大家都識台積電（美股都買到，走寶了）。

新車嚟嚟去去嗰幾隻色—咁都有圖。仲要有篇文！見到而家啲車，越嚟越悶，嚟嚟去去嗰幾隻色。黑白銀灰佔咗六七成。不過藍色有後來居上之勢。留意綠色車由一度多過藍色或紅色，變到而家絶種。黃色就從來唔係主流

Good Read—見工必問呢個問題。2020年啦，點解printer 仲係咁垃圾？

如果有時貼咗啲link要畀錢……就抱歉。有啲係一個月有幾篇免費，有啲手機睇免費Desktop唔係。有啲你可以另外搵到方法睇，好多人貼去其他地方。但我就費事貼出嚟畀你了。

見工必問呢個問題—CNBC嘅職場文，唔少文都寫過，去到最尾，長著獠牙嘅煙他了牙必會問你：有冇問題想問？（如果佢冇問嘅，呢間公司未必做得過！）。篇文就教你最好問呢個問題：點解會有呢個位。問呢條都幾大路，不過小心，有機會係煙他了牙一早已經話咗你知，所以準備多一題。（同埋可能佢有睇呢篇文）

2020年啦，點解printer 仲係咁垃圾？-埃汾深有同感，已經2020年，好多產品都比十年廿年前進步N咁多—但printer呢味嘢，好似咁多年都冇乜進步。永遠都係JAM紙，同埋墨水貴到high high（好多人都知printer部機根本蝕畀你，係靠墨水搵錢，但聰明嘅我地當然發明咗代用墨）。呢篇文有講。但既然好似少咗人印嘢出嚟，只怕冇乜人會研發改善printer 了。

FB Post Summary—拜登當選。麗晶大賓館

事忙就唔多得閒理Facebook，一定係你地為優先

拜登當選—冇乜特別，香港時間星期日00:30左右，各大外媒宣佈拜登已經騰選。固然唔少人質疑做乜都未點晒就宣佈，但傳媒一向在某個位就會講。但咩位就考功夫了，太早會炒車，太遲會輸畀對手。不過畢竟呢啲傳媒有頭有面，仲要出嚟行，衰咗有排畀人唱。唔同你啲網友錯晒又扮冇嘢

麗晶大賓館—真係人衰行路打倒褪。侵侵團隊想訂賓洲四季酒店開記者會話上訴，結果錯手訂錯咗Four Seasons Landscaping…….但都係照開記者會嘅.