［前菜］騰訊六舊，安樂工程1977。大選四個結局。乜黨利好股市？英國三十年第一次貿易順差。咖啡在中國。三星在四國。萬物皆數。到底癡情原是老人的意外 (Patreon)

大師冇點你—騰訊600蚊。安樂工程1977有得升

每日一圖—大選的四個結局。乜黨對股市有利？

Good Read—英國三十年嚟第一次貿易順差！咖啡在中國

FB Post Summary—三星手機四國投產！萬物皆數。到底癡情原是老人的意外。

1. 美股急跌中，但應該之前都寫過下，大選前多數都弱，特別係如果現任總統連任失敗（當然老豆有鬚唔等於有鬚就老豆）。正路選完，邊個上都好，十一十二月會強返，特別係如果由同一黨做總統同控制參議院（即係上議院），可以睇今日嘅每日一圖。

2. 又，如無意外，埃汾12月真係會去台灣了，應該早過陳同佳。慎防有人唔知前因後果，我去搞居留證啫，唔係一去不返。但嗰邊隔離十四日，返嚟再隔離十四日。同老細口頭講過，應冇乜問題，95%會去了（正如拜登都95%做總統）。

大師冇點你—騰訊600蚊。安樂工程1977有得升

3. 騰訊600蚊—冇乜咩好特別，之前都寫咗，ADR都升到近600，咁香港升穿好易。但升乜？之前我見有人話美國法官未肯執行WeChat禁令，我認為呢個理由冇乜說服力。今日有個新講法，首先係麥格理升到目標價815全城最高，但講真，冇乜影響力。有趣啲係佢嘅理由，都有人講，話螞蟻上市亦令微信支付水漲船高。段新聞有寫，微信支付估值3460億美金，但講緊2022。但關鍵係：而家騰訊渣晒100%微信支付，而阿里巴巴只係渣33%螞蟻。所以微信支付對騰訊個影響，大過螞蟻對阿里巴巴好多。有趣，當然好多時股價可以無緣無故咁升，所以唔使太認真鑽牛角尖。

4. 安樂工程1977有得升—昨日寫咗，David Webb入股嘛，但高開低收的，開市追全部輸錢，所以冇乜用。不過照計仲有其他嘢跟尾吧？

每日一圖—大選的四個結局。乜黨對股市有利？

5. 大選的四個結局—最底嘅四個情況我未必同意，但幾肯定嘅係，只要係同一黨做總統同參議院（即係上議院），必定有勁量刺激方案，股市應會有一浸升。

6. 乜黨對股市有利？—咁多年以嚟嘅總統四年任期美股美現。類似嘅東西寫過幾次，都介紹返，民主黨上台對股市好過共和黨，都幾明顯。永遠可以質疑拜登/侵侵係咪典型嘅民主黨/共和黨，數字亦只供參考。但幾明顯嘅係—根本乜黨做，美股都係升嘅。另外，似乎第一任期表現係明顯好過第二任期，但當然只計連任到嘅總統（咁史上多數競續連任嘅都成功）

Good Read—英國三十年嚟第一次貿易順差！咖啡在中國

7. 英國三十年嚟第一次貿易順差！—Frances Coppola（唔係導演），之前都引過佢嘅blog。呢篇唔算太長，不過有啲technical，但只睇開頭都得。冇錯英國咁多年都係貿赤字，呢排就順差—但經濟點？大家心照。講到尾就係好簡單嘅嘢：冇人話過貿易順差代表經濟強，亦不代表經濟唔強，係另一樣嘢。

8. 咖啡在中國—呢篇淺啲，有啲似大學生做功課（非貶義）。中國仲係主要飲茶嘅社會，而在咖啡市場呢，即溶咖啡佔咗七八成市場。即係非洲賣鞋，有人看到中國人冇品味，但亦有人看到市場潛力。

FB Post Summary—三星手機四國投產！萬物皆數。到底癡情原是老人的意外。

9. 事忙中，冇乜好文寫到，全無公共性，但最尾嗰篇唔少人鍾意。

10. 三星手機四國投產！—我以為係日本嘅四國，證明我太耐冇去了。順手雜談四國各種東西，包括《東京愛的故事》

11. 萬物皆數—無聊塞車出嘅post，講數學之美，如何簡單地解題

12. 到底癡情原是老人的意外—原本係睇報紙老嘢廣告，點知變咗講自己。嗯。