ivanliresearch

螞蟻爆孖展。睇阿里巴巴。騰訊六舊。匯控一個月高。LVMH Tiffany傾掂數。限聚令放鬆大興升味千跌。David Webb入股鄭若驊 (Patreon)

Published:

2020-10-27 20:22:07

Edited:

2020-11-01 06:39:22

Imported:

2021-07

Content

螞蟻話咁快就爆孖展

可以睇埋阿里巴巴

騰訊六舊水？

匯豐獅子重出江湖後，1個月新高

LVMH同Tiffany卒之講掂數

限聚令放鬆，太興升味千跌？

David Webb入股安樂工程，搞乜？

今日夠晒豐富，但短打多。

螞蟻話咁快就爆孖展

應該寫螞蟻都寫得七七八八。最先係先過篇估值，之後有篇好詳細地分析過公司做乜同埋收入來源，然後昨日出完招股書整篇號外畀你，我都乾晒塘了。下星期仲要玩美國大選，仲好可能會寫下iBond，仲有十一月啲新搞作。忙到一個點。

Anyway，講返隻螞蟻，抽都係必要的。正路地應該升到40%（號外寫咗），成為全世界最大金融股。但當然留意返招股橫跨咗美國大選，咁正路地……冇事嘅。

唯一要update嘅係，反應似乎比我想像中仲要好。話咁快就2000億孖展，亦即係必定做到最盡嘅回撥，由2.5%（of 新H股）去到10%分畀散戶。

剛剛話反應比我想像好，因為我身邊嘅人就普通，見呢度啲讀者都係。有啲雞肋。因為大家明知唔會分得多，孖展嘅，一樣分唔到多。亦都唔見得會第一日升幾倍。唯一支持孖展嘅理由係隻嘢冇乜downside，股價應該唔會有得點輸，但夠唔夠冚息就你自己計掂數了—再強調一次，分得好少。

原本，玩天津飯一分四一個人用全家戶口抽就最好。但因為4000蚊一手，就真係冇乜意思了。重覆講多次，我四個中晒都只係16000蚊，一個開都只係16000蚊。咁當然都係不錯，但真係唔係嗰回事。所以再重覆一次，入場費低先難玩。

可以睇下阿里巴巴

反而我覺得，可以留意下阿里巴巴。當然亦都偷步炒咗一輪。你見美股阿里巴巴升3%，又破頂了。呢度317蚊美金，一股美股對八股港股，所以等於307蚊港紙了，香港又會跟。

介紹返，螞蟻上市後，阿里巴巴應該持有螞蟻31.8%股權。咁你自己可以計數。個關鍵係，螞蟻上市後大家未必會高追（升五成你仲追唔追？），但的確有overshoot嘅可能，特別係A股嗰部份—咁有機會在阿里巴股價度反映。

唔知有冇計錯，但好粗略計，螞蟻招股市值3200億美金，阿里巴巴渣住嗰份，即係1000億美金左右。阿里自己就8500億美金市值，即係螞蟻佔佢12%左右。「理論上螞蟻升12%阿里就升1%」，大約咁。到時自己睇。

騰訊六舊水？

騰訊今日在港股時段又升，不經不覺3年新高，原因我都唔知。有人話因為美國法官唔禁WeChat住，但未必關事？我甚至覺得係拜登Trade，賭侵侵落台。

留意返右邊圖，係ADR，一股對一股。ADR繼續升，一度見過77蚊美金，即係597蚊了。600蚊在望。

匯豐獅子重出江湖後，1個月新高

唔知迷信定乜，定真係殘無可殘，呢排匯控股價相當唔錯。咁當然亦同有機會派返息有關。但，其實一路都估2021年會有得派架啦。至於2020？討論都冇意思，因為就算派都係好少（街估派1蚊港紙唔夠）。

但之後呢？呢一刻，分析員就估緊2021年派2.3港紙息。7厘息，其實麻麻地，因為波動太大，你話領展7厘息我就仆到去。2022呢？2.75港紙息，似返啲樣，8厘左右。好抵？都唔算。都係唔好買。

LVMH同Tiffany卒之講掂數

極短打，之前都寫過LVMH買Tiffany，但傾嗰時係肺炎前。後來LVMH想反口，又好似想壓價，法國總統都出埋。之後仲兇Tiffany話要告佢，有錢就是任性。

嗰時我記得講過，照計傾得掂數。而家真係話傾掂。咪Tiffany收順啲。但原來只係由原本135蚊，降到去130-133蚊！真係買百幾蚊嘢兩蚊都講價！到底係「有錢人一個仙都唔益你」，定只係為啖氣？

另外，你見到Tiffany股價係升嘅。有冇違反你直覺？減價都仲要升？答案好簡單：原本驚賣唔成，而家應該賣得成，反正而家股價仲係低過130。

限聚令放鬆，太興升味千跌？

極短打幾句，你見放寬限聚食飯之類，啲餐飲股又有反應。再講一次，如果有內幕消息（政府朋友？），幾好炒。但犯唔犯法就唔知，貴客自理。純技術討論。

今日朋友講開呢兩隻，點解放寬限聚太興6811就升，但味千拉麵538要跌（仲要三年新低）？莫非食燒味要六個人，拉麵就味集中？

諗多咗，味千中國嘛，唔關香港事。又，個股票冧把，538呀下。知係乜？早排成日講喎，Nate Silver FiveThirtyEight.com．點解叫538？因為美國總統大選係538張選舉人票。知唔知有乜特別？係雙數！咁有乜後果？你問，會唔會打和？答案係，會的！打和點算？當然有機制，你可以自己Google下