［點解騰訊值800蚊］阿里巴巴vs 騰訊，螞蟻vs微信支付。又有Excel 玩 (Patreon)

微信支付對騰訊嘅影響，大過螞蟻對阿里巴巴

螞蟻vs微信支付

阿里巴巴只係渣住螞蟻33%，但到微信支付上市時，騰訊又會渣剩幾多？

Duopoly：阿里巴巴vs 騰訊，螞蟻vs微信支付，VISA vs Mastercard

今日呢篇專講阿里巴巴&螞蟻（支付寶），vs騰訊&微信支付。應該都係101文，新手可讀。有讀者想我比較下，就有呢篇文。再提你，個Excel可以download嚟自己玩

順手提定你，今日中午截螞蟻IPO，未抽嘅都仲可以趕尾班車。

講明先，除非另外有注明，否則單位全部係美金。原因兩個：啲數字冇咁大，同埋等你容易同外國同業比較。

微信支付對騰訊嘅影響，大過螞蟻對阿里巴巴

事緣係早兩日篇文，講開騰訊勁升。當時有人講嘅理由係螞蟻上市，體現到個價值。咁當然幫到阿里巴巴，但關騰訊乜事？因為騰訊下面有微信支付。阿里巴巴因為螞蟻升，咁騰訊都應該因為微信支付。故事係咁

螞蟻水漲船高，估值拎高咗唔少：舊年拎1500億估值，而家拎3000億，仲似乎有得再上—記住，涘汾rule of thumb估上市升四成，去到4400億市值，會超越VISA成為全世界最大金融股，而升四成後嘅市值都仲在券商嘅估值範圍上限入面。應該OK，甚至可能唔止四成，overshoot嘅機會大

咁既然對手水漲船高，微信支付嘅價值亦體現出嚟。但我當初都有啲懷疑呢個講法。首先微信支付一路都存在，你個估值唔會忽然間先因為螞蟻拎高咗而升。而就當真係升都好，人地上咗市，你未上，咁個價值體現都唔同，否則阿里巴巴唔會呢排先嚟升。

但仲有一樣嘢，就係我最初嘅想法—最後證明係錯咗，但同大家分享下個歷程，你諗下我錯咗乜？之後會開估。

早兩日篇文都有寫，阿里巴巴8500億市值。螞蟻招股市值3100億。留意阿巴巴巴渣住33%，即係佢渣嗰份佔1000億左右。1000/8500，12%。亦係早兩日篇文寫嘅嘢，螞蟻值佔阿里巴巴市值12%左右。「理論上螞蟻升12%阿里就升1%」，呢Part應該冇乜錯

咁騰訊呢？我當時心算好快嘅諗法係咁：騰訊市值大過阿里巴巴（係錯的，但對結論影響不大）。但，微信支付明顯細過螞蟻（是真的）。咁，微信支付佔騰訊，當然少過螞蟻佔阿里巴巴啦，仲要微信支付都未上市。咁即係微信支付對騰訊嘅影響，細過螞蟻對阿里巴巴啦。當時係咁諗，但錯咗！

錯在邊？唔係錯在「騰訊市值大過阿里巴巴」呢句（呢個係搞錯咗，但同結論無關），亦唔係「微信支付明顯細過螞蟻」。

咁錯乜？錯在，阿里渣住螞蟻33%，但騰訊渣住微信支付100%！計出嚟就兩回事。

所以結論係，微信支付佔騰訊好大，講緊係3成至4成。而螞蟻佔阿里巴巴只係一成幾。咁唔怪得螞蟻估值升，帶動微信支付估值都升，再帶動騰訊升得咁勁。

螞蟻vs微信支付

以上呢堆嘢，其實你睇個表就已經明。不過我會再解。

有讀者想我比較微信支付同過螞蟻，呢度就會。不過首先返返去，「微信支付明顯細過螞蟻」，呢個係冇錯的。一來未上市，二來都真係細啲，麥格里篇報告話分析員之前多數係假設1000-2000億估值。而螞蟻招股都3100億，升四成會去到4400億。當然麥格里調高左微信支付嘅估值（亦係佢將個目標價提到800蚊以上嘅原因），但你見佢都係寫微信支付估值2600-3500億，仲要係去到2022年，咁明顯細過螞蟻。

點解？好簡單，因為微信支付規模就係細過螞蟻！

睇表睇到，螞蟻（支付寶）market share 大一截，用嘅商戶亦都多好多。留意微信支付個交易量大好多，但明顯係小額多。原因？我估因為好多係啲咩微信搶紅包或者夾錢食飯。螞蟻就交易量冇咁誇（但已經多過VISA MasterCard PayPal加埋！），但額一定大好多

另外，留意埋，兩檔嘢唔止得支付，仲有資產管理（小微貨款呀，花唄買員暫時不討論住）。呢方面亦見到，螞蟻比微信支付大好多

最後，睇2022收入同純利，當然係麥格里估嘅。但就咁望落去，都係靠譜嘅，至少同其他行嘅唔爭得極遠，「錯就一齊錯」（二流分析員嘅做法，我講我，唔係麥格里條友，而真正夠膽嘅分析員應該同主流唱反調）。咁你見到，去到2022，微信支付收入同利潤先係螞蟻一半左右。而我有啲懷疑麥格里畀微信支付嘅估值係偏高的，可以睇返之前個表。

BTW，medium舊文講過，分析員要上位，最緊要出位。但如何出位又唔膠唔太嘩眾取寵就藝術。例如麥格里呢份嘢，個理由幾正路，但佢將個目標價整到800蚊樓上，加埋時間好，就出咗位了。就係「人地個target price 呢度（放在枱面），你個target price 高好多（放上頭上）」（其實都唔係高好多，但800蚊呢個心理位好緊要）

阿里巴巴只係渣住螞蟻33%，但到微信支付上市時，騰訊又會渣剩幾多？

最後又返返呢個表，應該好易明，你自己可以玩一次。再提你，個Excel可以download嚟自己玩。補充點幾個：

第一，阿里巴巴市值係大過騰訊嘅，已計埋美股（實情香港係第二上市）。

第二，麥格里畀微信支付嘅估值都算係合理嘅，細過螞蟻。但既然微信支付去到2022年收入純利都只係螞蟻一半，咁佢畀微信支付嘅估值好啲高？仲有留意返，一日未上市，一日都會有折讓。況且佢係講2022嘅估值，合理的，而家都2020年尾。但到時螞蟻好可能唔止係「招股升四成」嘅4400億了。

第三，明明螞蟻原本係支付寶，係阿里巴巴一部份。阿里巴巴點解而家「只係」渣住螞蟻33%，係好長篇嘅故事。但，幾肯定係，到微信支付上得市，騰訊唔會係渣住100%—頂多去到75%？照計要滿足公眾持股量（當然咁大間嘅公司可以唔足75%交易所都批）

最後，點計都好，微信支付對騰訊嘅影響，大過螞蟻對阿里巴巴

Duopoly：阿里巴巴vs 騰訊，螞蟻vs微信支付，VISA vs Mastercard

FT有提過，螞蟻嘅估值，似乎係唔貴的。但叫你諗下點解。當然唔係話「平嘢實有伏」，但亦叫你諗係，有冇咁大隻嘢隨街跳。

咁FT篇文有提，最大嘅風險係競爭同埋監管。在中國嘅國情係，係同一回事。的確，如果螞蟻呢套玩法唔受任何制約，潛力好驚人，應該會將啲銀行打殘晒—未必打死，但半死都夠。問題係大家都知，唔受任何制約嘅擴張，即使在鬼佬國家都唔會發生（你睇呢排啲科技公司？）。在中國，仲要係金融領域，當然就會睇得你極緊

但我並唔係睇到咁悲觀。正如呢段嘅副題所講，冇錯，螞蟻好似前面有政府望住，後面有微信支付追住。但呢個正係最好嘅環境，Duopoly！

一家獨大，的確好多問題。首先絶對權力令人絶對腐化，再好嘅公司都會自我出問題。另外，中國國情嘛，全部放晒落你一間民企，仲得掂？即係一個唔該馬雲係間諜，或者佢走去投靠美國whatever，你咪好大鑊？

所以，two is the loneliest number，亦都幾乎合中國國情，唔止金融，政治都係。我唔會比好多間，因為想有要做大做強。但亦不可能得一間，上面解咗。最好就兩間，好似選接班人咁，兩個跑馬仔，基本嘅權術。等你唔好以為自己巴之閉鐵定接班，我冇咗你唔得，乜都要靠你。邊個聽話我咪幫邊個，但照樣搵一個人在後面啄住你。唔聽話嘅，我咪扶第二個打壓你。

所以正路生生性性嘅，應該會見到係呢兩間公司玩晒，其實兩間玩好過一間玩晒，有錢齊齊搵，Duopoly會令到大家都搵到錢的。之後你就知。