ivanliresearch

［點止支付寶］螞蟻全攻略（有Excel畀你玩）：估值幾多？到底係做乜？有乜風險？ (Patreon)

Published:

2020-10-24 23:54:40

Edited:

2020-11-01 06:42:51

Imported:

2021-07

Downloads

Download ANT_Pat.xlsx

Content

螞蟻招股基本嘢

螞蟻唔止係中國嘅PayPal+VISA，係中國嘅金融Amazon

螞蟻嘅業務—點止支付寶？

螞蟻嘅風險—會唔會畀人冚檔？

財務數據及估值—券商目標市值

財務數據及估值—支付業務佔比根本越嚟越細

1. 週末專題回來了。今次都係講全城最關注嘅，螞蟻集團招股，雖然我感覺好似冇當年萬人空巷咁誇，可能係好事。

2. 上篇已經同大家講咗，我話螞蟻會成為全球最大嘅金融股。十分之quick and dirty地，列咗其他一啲公司嘅市值同估值，包括全世界而家最大嘅金融股VISA，全世界最大嘅銀行JP Morgan，中國最大嘅銀行工行，以及最大嘅支付平台Paypal．文中寫到，螞蟻上市後，好可能會大過晒佢地。

3. 今篇唔會重覆講上一篇嘅嘢，但會講下，到底螞蟻係乜東東。上次講話當係「中國嘅PayPal」甚至「中國嘅PayPay+VISA」，都不恰當。會講下螞蟻點賺錢，收入包括乜。基本嘅財務資料。當然仲有最重要，有乜風險。

4. 去片。又，記住個Excel可以download 自己玩！

招股基本嘢

5. 我寫文時（星期六），公司係仲未出招股書嘅。星期二先出。但我已經急不及待。況且除咗估值外，其他嘢（生意模式，歷史財務數據等）唔會點變。有可能出招股書再寫，但我估應該唔會。呢篇就最終

6. 關於招股基本嘢，你上網都搵到，我循例貼個圖。不過留意返幾點。

第一，呢個會係人類史上最大嘅IPO。對上紀錄保持者，係沙特阿拉伯嘅沙特阿美。有人話見證由石油時代進入數據年代，但沙地阿美招股時石油已經好頹下。

第二，如無意外，螞蟻會係10月27號（星期二）招股，11月5號（星期四）上市。有乜特別？留意橫跨咗美國大選。多一個變數，但亦可以話公司充滿信心。

7. 最後留意返，應該會寫iBond。咁關螞蟻乜事？若果螞蟻真係11月5號上市，咁11月4號就回水，而iBond 11月5日中午先截止，你有機會可以最後一日抽iBond．一注錢玩晒兩味。當然時間表可變，自己小心，唔好到時抽唔切返嚟鬧。

螞蟻唔止係中國嘅PayPal+VISA，係中國嘅金融Amazon

8. 好多人會將螞蟻同PayPal比較，「支付寶」嘛，對香港人螞蟻最出名嘅業務就係呢瓣。況且對PayPal又熟悉，我上篇文都咁寫。但後來再睇多啲資料，再諗下，錯到不能。螞蟻何止係「中國嘅PayPal」？

9. 之後會講，螞蟻唔止支付，仲有好多業務—支付甚至唔係最大業務。但即使只係講支付，螞蟻都比PayPal大好多，好多。處理嘅交易數量，係PayPal嘅25倍

10. 但當然，講量，唔係講金額。好合理地，螞蟻啲交易嘅金額未必大，但個量實在過驚人。以前寫過，VISA都係每單交易舔你少少（留意利息唔係佢收，係銀行收你），但個量太驚人，積少成多。事實係，支付寶處理嘅交易數目，等於VISA+MasterCard+Paypal

螞蟻嘅業務—點止支付寶？

11. 但以上講嘅，只係支付寶。咁到底螞蟻係乜？有鬼佬話，螞蟻就係Amazon of money—Amazon係乜？唔係網上書店，而係The everything store．螞蟻乜？係金融嘅Everything Store

12. 公司其實四瓣業務，官方名稱係「數字支付及商家服務」「微貸科技」「理財科技」「保險科技」。第一味，就主要係支付寶之類，應該大家熟。留意公司以呢樣嘢起家，但而家重要性已減低。

13. 「微貸科技」先係而家核心業務，主要就包括「花唄」同「借唄」，（「唄」係助語詞，花吧！借吧！）。都係手機借錢畀用家，但有乜分別？「花唄」，類似分期付款，例如你買電腦唔夠錢，佢就幫你畀商戶先，然後你慢慢還。重點係：錢唔會去到你手！有乜分別？分別就大，風險低一截（唔怕你拎去賭錢），利息又低啲。「借唄」，就真係私人貸款了，任你拎啲錢去做乜，當然息口高啲。但你還得到後，信用評級（惡名昭彰嘅「芝麻信用」）升，就借到多啲，息口又低啲。

14. 「理財科技」，主要就係餘額寶，你啲錢可以放去餘額寶，好過你放銀行。類似Money market fund．「保險科技」云云，就係賣保險，暫時係好新嘅業務，佔比唔大。

15. 好啦，你睇到其實螞蟻係乜了。佢就係蘋果（線下支付）＋PayPal（線上支付）+Visa Master（信用卡）+JP Morgan（個人貸款）+iShares（投資）+ 賣保險.

16. 所以，外國根本係冇咁嘅東西。而呢點係好重要的，亦即係根本冇一間公司同佢完全可比，外國投資者應該對呢間嘢幾有興趣。

17. 有冇留意外國嘅科企巨頭都唔多搞金融？唔係因為唔好搵，而係因為科企結合埋金融，必定令人擔心，政府必然搞你。

18. 點解中國可以有咁嘅公司？主要就係兩樣嘢，首先，中國係由零開始。由傳統銀行嘅年代，一下對到去而家FinTech．呢個所謂嘅Late-mover advantage，唔少地方都見到。例如中國一開始就已經係DVD年代，並無LD之類。

19. 另外，當然因為中國保護大公司，而同時間大家對私隱似乎唔多重視。有乜影響？就係螞蟻可以收集到大量嘅數據，你幾時買嘢，幾時去邊，幾時出糧，佢全部知。呢個對借錢畀你嘅人嚟講，十分重要。你走數？咁你可能以後都用唔到支付寶喎，點掂？

螞蟻嘅風險—會唔會畀人冚檔？

20. 最後講埋風險。主要係兩個，第一個嚟自對手。螞蟻招股價上限嘅估值，已經去到3000億美金，已經大過中國所有金融機構。上面都講，你原本做支付寶都算啦，而家你做埋分期款付，做埋財務，做埋信用卡，做埋基金，賣埋保險。你估其他公司點諗？坐定定等死？當然會使橫手投訴你。特別係內銀，大部份都係國企。

21. 但當然又係國情不同，講到尾，內銀可以點投訴？告上法庭？最後其實亦係睇政府取態。所以螞蟻最大嘅風險當然係政策。講得白啲，公司一大，就樹大招風，易畀人搞。外國都係咁，中國更加。

22. 問題係，由第一日開始，政府就已經知道螞蟻會打殘銀行架啦。如果係唔容許呢樣嘢，根本螞蟻唔會出現，就算出現都會中途畀人搞。但結果冇喎。

23. 我嘅睇法，好簡單，政府根本係樂於見到呢啲嘢。內銀盈利受壓？冇所謂。唔好爆煲就得。股價長期不振，你地輸錢之嘛，佢又唔使同任何人交代。但容許螞蟻呢個模式，有一個好大嘅好處：就係監控。你諗下，越嚟越難用現金，又所有交易都有記低。你有咩唔見得嘅勾當，都好難做。

24. 螞蟻雖然好大機會成為全球最大金融股，但佢嘅利潤一年「只係」幾百億人仔，和工行建行嘅嘅幾千億比，仲有相當距離。短期內應該算幾安全嘅。

25. 下面會講啲數字嘢，悶悶地。唔想睇落去嘅，呢度都可以停了。

財務數據及估值—券商目標市值

26. 首先重覆多次，睇上圖都知，以3000億美金估值嚟講（而家傳係2500-3000億美金招股），螞蟻應該好難算做貴，甚至算幾平。

27. 另外留意，公司處理嘅交易量極多，如果以呢個做估值標準，螞蟻亦都係平。當然仲有，睇返上面嘅圖，螞蟻平台上嘅活躍用家亦都極多，比得上啲社交軟件。

28. 好啦，真係講財務數據，悶嘢。留意呢個Excel我會送埋畀大家。先講估值。

29. 呢個表，就係上篇文講嘅嘢。但今次整埋個表畀你，全部係美金，可比較。3000億美金應該係螞蟻招股上限嘅估值。留意已經高過工行，而上市只要升返50%，就會大過VISA，成為最大金融股。你睇蟻螞嘅盈利能力，係幾好的，而估值（市盈率）亦唔係十分離地。

30. 留意幾點：工行純利仲係螞蟻好多倍。另外，螞蟻7月時先講話用2000億美金估值上市，如果係就大家發，但事隔3個月公司已經將估值上調50%—呢啲就係原本你抽新股有機會賺嘅錢。舊文講過，投行當然唔介意客仔賺，但公司本身當然係想拎得高啲。明顯螞蟻冇做到傻仔。仲有留意，PayPal啲估值好貴下，Square更加係天價，反映咗極大嘅增長期望。買PayPal都唔驚，照計唔會怕買螞蟻

31. 到呢度，就係出面投行畀嘅目標估值。當然係會唱好，否則啲客唔使抽。但我相信都有一定參考價值。

32. 另外留意，螞蟻舊年12月先講緊拎1500億美金估值，而家差不多一個開。你見幾間大行畀嘅估值上限，都去到4500億美金樓上，正如我講，會超越VISA，成為全世界最大金融股。

33. 不過提返，即使係最進取嘅估值，中金估到去4600億美金市值，同3000億比，都只係升55%。當然都相當好，但，就唔好以為可以重演當年（2007）初代阿里巴巴網絡（1688，唔係而家嘅9988）嘅第一日升幾倍了

財務數據及估值—支付業務佔比根本越嚟越細

34. 基本上，睇我樓上呢個圖就已經知道晒四瓣業務各自佔幾多，同埋個增長係點。當然想要Fancy啲可以睇下面嘅圖。

35. 想講嘅係，好多人認識螞蟻都係因為「支付寶」，而佢本身係淘寶/天貓　嘅支付工具。但馬雲後來將佢拆出嚟，十分明智，因為拆出嚟間公司先會搞其他嘢，唔係依賴淘寶/天貓。

36. 貼多次，事隔多年，你見而家支付已經唔係佔比最重嘅業務。由早幾年佔收入超過一半，到而家三份一左右。但唔係冇增長，只係其他業務更快。頭先都有寫，而家主角係「花唄」「借唄」之類，由幾年前佔四份一收入，到而家四成。另外，其他兩瓣業務（投資，主要係餘額寶。同埋保險）增長都仲好快，但暫時貢獻未算好大。