［前菜］車廠品牌一覽。中國對美國出口創新高。侵侵勝算得返5%。索羅斯哲學及其缺陷。UBER模式收檔我好開心。選舉人票決策樹。獨角獸1000蚊賣盤。爆冷點解莊家都頭痕。韓國首富先200億美金身家？ (Patreon)

每日一圖—車廠品牌一覽。中國對美國出口創新高。侵侵勝算得返5%

Good Read—索羅斯哲學及其缺陷。UBER模式收檔我好開心。選舉人票決策樹

FB Post Summary—獨角獸1000蚊賣盤。爆冷點解莊家都頭痕。韓國首富先200億美金身家？

忙到七彩，但之前寫咗螞蟻新股，自己去睇。應該仲會整多篇短嘅，同埋再寫iBond．

另外你見到叫做「前菜」，唔係叫「甜品」，「甜品」呢個字好似有啲罪惡，或者可有可無。可能之後再改名。但呢一篇叫「主菜」無誤。

都係嗰句，11月頭會有啲新搞作。舊讀者唔會有影響，但可能加個Tier係「同我食飯」。上次提過下後，就唔少讀者即時搵我食飯，好事。

另外，可能搞referral program。你介紹個新朋友嚟，我免你一個月月費咁。詳情仲諗緊，但未必係11月頭即推。

大師冇點你放假從缺。

每日一圖—車廠品牌一覽。中國對美國出口創新高。侵侵勝算得返5%

車廠品牌一覽—同投資冇乜直接關係，但品牌眾多都幾亂。例如唔少人唔知勞斯萊斯而家係寶馬的。

中國對美國出口創新高—留意埋對美國嘅貿易順差亦係新高。但冇乜特別，唔代表中國經濟好強（但其實係不錯）。根本唔係順差搵人著數逆差蝕底，你見好多人都搞亂晒。仲有，出口根本貢獻中國GDP甚少。全部你都可以Fact Check。亦唔好以為咩美國人唔買中國貨，加關稅係中國畀錢。一個小小貿易戰，畀你見到好多人真係唔識又要扮識的。

侵侵勝算得返5%—新低嚟的。當然只係Economist嘅Model（再講一次，唔係民調！），你睇538就有13%。今次如果再「錯」，啲學者應該好難再出嚟搵食。

Good Read—索羅斯哲學及其缺陷。UBER模式收檔我好開心。選舉人票決策樹

索羅斯哲學及其缺陷—In case有人知，索羅斯除咗係炒家，富豪，仲係哲學家。佢有好強嘅諗法。呢篇舊文，相當長，但解釋佢嘅哲學，同埋（作者認為）當中有乜問題。

UBER模式收檔我好開心—唔係我好開心，係作者好開心。但我係同意的。UBER之類，美其名係共享經濟，其實係剝削，司機人工低過麥當勞。仲要冇保險冇福利。呢類模式收檔，可能係人類福氣。

選舉人票決策樹—好玩！到時開票可以睇住玩。票倉佢冇計（當然可以票倉被攻破），只睇啲搖擺洲，到時你跟返結果入落去—或者事前入都得。正如我之前講，佛羅里達洲好重要。侵侵贏唔到嘅，基本上收得工，要差不多剩低嘅搖擺洲全勝。但即使侵侵贏到，都只係五五波，甚至更少。

FB Post Summary—獨角獸1000蚊賣盤。爆冷點解莊家都頭痕。韓國首富先200億美金身家？

獨角獸也會找得到 只不過兜兜轉才碰見吧—講大陸嘅「人人車」，二手車平台。幾年前都仲係「獨角獸」，估值10億美金。而家1000蚊美金賣盤。

爆冷點解都頭痕？—講博彩莊家William Hill，話業績唔得，因為足球賽事爆冷好多。一般而言，其實莊家係鍾意爆冷，買冷門嘅人少，金額亦細。但今次有啲唔同，因為唔係一兩場，而係疫情下主場優勢冇晒，莊家以前計落啲模型唔掂。

韓國首富先200億美金身家？—三星第二代話事人過身，韓國首富。但，先200億美金身家？同Dyson位仁兄差不多。有啲問題喎，韓國係第十大經濟體，而三星咁大勢力，但話事人先得200億美金身家？甚至窮過墨西哥西班牙首富？因為只係持股唔夠5%，但好可能另外枱底拎住唔少。