［甜品］新創建3個月新高。Zoom大過Exxon Mobil。美國供樓利息創新低。Slack傾計請用標點同全寫。疫情下呢隻顏色最好賣。綠色的狗。理性邊緣的哲學。哲學是愛智慧 (Patreon)

大師冇點你—仲係新創建659

每日一圖—Zoom大過Exxon Mobil。美國供樓利息創新低

Good Read—Slack傾計請用標點同全寫，email都係。疫情下呢隻顏色最好賣。綠色的狗。

FB Post Summary—理性邊緣的哲學。哲學是愛智慧

1. 上次篇文又唔記得貼Good Read嘅Link，都係嗰句，咁大件事記得PM我。提埋你，就算冇我電話（但其實全部人都應該有），都可以在Patreon PM我，我會睇email見到。至於你在篇文下面留言，可能就隔幾日我先見到。

大師冇點你—仲係新創建659

2. 仲係新創建659—呢隻值得認叻，極少人寫，而我就白紙黑字有寫，亦有讀者買咗，而家3個月新高。都係嗰句，公司管理層好有信心，業務改善中。但主要都係因為高息吸引，而係派到嘅高息。另外，美股港股都見到價值股細價股發威，之前寫嘅招商房託1503同AEON信貸900睇下有冇反應。

每日一圖—Zoom大過Exxon Mobil。美國供樓利息創新低

4. Zoom大過Exxon Mobil —唔好話十年前，一年前你都想像唔到呀（一年前我連咩係Zoom都唔識）。有趣係世界係一雞死一雞鳴，你估中贏家固然好，但買ETF一樣係升，因為人類係進步嘅（同埋，銀紙係不停印嘅）

5. 美國供樓利息創新低—唔止因為減息，仲因為聯儲局直接買債。留意返，美國話低息都仲要近3厘。同香港冇得比。但當然佢地壞帳率高好多。而近期美國啲樓價亦都創晒新高。鬧樓價貴嘅，應該知道罪魁禍首在邊。

Good Read—Slack傾計請用標點同全寫，email都係。疫情下呢隻顏色最好賣。綠色的狗。

6. 長周末輕鬆啲，三篇都同金融無關

7. Slack傾計請用標點同全寫，email都係—短文，但幾正。唔係文法塔利班，而係講啲人唔用標點唔用全寫，係會浪費全世界時間的。你同朋友可以咁做，但工作唔好。

8. 疫情下呢隻顏色最好賣—疫情下，好多人隔離在家，或者失業，或者在家工作，就好有閒情同需要油油，油漆銷售都好好。但，油咩色？篇文話你知咩色令人最舒服。

9. 綠色的狗—唔係染，係真係綠色毛嘅狗，名叫「開心果」。兄弟姐妹都係白色，佢係綠色，因為在子宮內接觸咗膽綠素（亦係你撞瘀時嘅顏色）。但大個就會慢慢冇咁綠了。

FB Post Summary—理性邊緣的哲學。哲學是愛智慧

10. 一系列兩篇文，其實係上下集，原本一篇，但太長，拆開兩篇。

11. 理性邊緣的哲學—講些少哲學嘢，如何求真，辯論點解浪費時間，點解要搞清楚定義等等。好睇的。

12. 哲學是愛智慧—上集係為咗講呢篇，「近9成港人相信愈富有愈快樂　惟近8成人缺乏理財規劃」，咩叫「愈富有愈快樂」？總有啲人鍾意搵「個別例子」嚟否定一般觀察。但咩係「理財規劃」？你幫襯佢先係。正如咩係「缺乏」？你永遠都「缺乏」的