［主菜］螞蟻會成為全球最大金融股，信唔信？ Tesla連續五季有錢賺，好似係， SnapChat業績遠超預期，買乜好？ (Patreon)

Published:

2020-10-22 19:41:37

Edited:

2020-11-01 06:44:58

Imported:

2021-07

Content

螞蟻會成為全球最大金融股，信唔信？

Tesla連續五季有錢賺，好似係

SnapChat業績遠超預期，買乜好？

今日簡簡單單，三味，但應該第一味人人關心，第二味都好多人關心，最後送多味畀你做飯後甜品。仲有，記得抽iBond（未必得閒再寫）

1. 小小標題黨，但其實唔難。升一個開已經夠，甚至唔使。

2. 當然一切等最終出招股書同定價，但快寫咗先，以免之後唔得閒或唔記得。簡單嚟講，就合埋眼抽都得，當然我唔太建議人借孖展（但亦唔會阻止你）。但呢隻有機會係可以長期持有嘅。冇錯連招股價都好似未有，但睇嘅，就係市值。

3. 暫時傳，螞蟻估值應該係2500-3000億美金（呢部份全部用美金，除非另外講明）。貴唔貴？仲有幾多空間？可以quick and dirty咁睇下

4. 留意呢個圖，7月嘅，所以只係畀你參考下。當時螞蟻傳嘅估值大約係2000億。Quartz嘅頭條係，市值大過高盛同摩根士丹利加埋，直迫美銀。冇錯，但，so what？即係平定貴？

5. 十分粗略地睇，上面嗰堆嘢去到而家，市值都同7月唔爭太遠。唯獨係螞蟻拎嘅估值貴咗。當時2000億，而家拎到2500-3000億。咁市況唔差，當然可以盡取。

6. 條數點計？有機會慢慢介紹，但螞蟻，基本上就係大陸嘅PayPal，甚至有人話係PayPal同VISA/MasterCard 加埋（但當然市值唔係加埋，唔好咁痴線）

7. FYI，VISA暫時仲係全世界最大市值金融股，而家市值4200億。PayPal呢，早兩日先創新高（埃汾一早叫你買喎），2400億。螞蟻拎嘅估值，就在呢兩者之間。

8. 但你可以話，中國公同同美國公司，冇可比性。PayPal VISA近乎全球通行，螞蟻唔係。咁係咪即係螞蟻市值應該低過佢地？又唔係。

9. 事情唔係咁簡單，睇返銀行。全世界最大市值嘅銀行，JP Morgan，而家差不多3100億美金市值—但中國最大嘅銀行，工行，亦係差不多市值。但明明JP Morgan做全球生意喎。工行只得大陸。點解會差不多大？原因係競爭，大陸銀行間嘅競爭雖然大，但銀行業本身受保護，好賺。

10. 結論：既然VISA可以大過美國最大嘅銀行，我認為螞蟻市值可以大過工行。VISA 4200億，螞蟻應該都可以—唔好忘記，螞蟻在大陸嘅壟斷地位，比起工行在銀行界更加勁。

11. 留意呢個「螞蟻可以去到VISA咁大」，4200億市值，亦係瑞銀嘅估值範圍（張圖我貼多次方便你）。當然投行寫嘢，只供參考。

12. 咁其實，2500-3000億，升到上4200億市值，都唔係真係升好多，唔好諗住好似當年舊阿里巴巴咁一日升幾倍咯。所以抽OK，但唔使孖展。

13. 補多句，如果只用傳統甚麼市盈率，公司半年純利200億人仔，增長幾高速，下年全年照計點都有600億人仔？4200億美金市值，對600億人仔，預期市盈率大約47倍左右，以一隻高增長科技巨頭，應唔算太過份。

14. 另外一個方法睇：工行上半年嘅純利，都仲有1500億人仔。螞蟻係200億人仔。但，美國呢？JP Morgan純利係230億美金，VISA差不多120億，係佢一半。亦即係，你可以預螞蟻大約至少增長到工行純利嘅一半，750億人仔，仲有幾倍上。

15. 當然，最大隱憂係政治。即使美國亦都係，公司去到咁上下大就會畀人搞。咁但呢啲嘢點量化，就另一樣嘢。

16. 終極cult股Tesla。鍾意嘅當係邪教咁，勁過當年Steve Jobs嘅蘋果。唔鍾意嘅都唔敢恥笑，因為股價升得太癲，沽空嘅死晒。

17. 今次業績後，股價反應相對係冷靜啲。業績係好過預期的，連續五季盈利添。

18. 當然，同估值相比，啲盈利都係得啖笑。一季幾億盈利，但市值4000億。但認為公司最後一統天下嘅，當然又唔使理呢啲。

19. 其中Charlie Bilello就最為潑冷水，首先係質疑Tesla嘅盈利質素相當低（唔係話假），根本賣車過去幾季都冇賺錢，只係賣碳排放額度。當然賣賣碳排放額度都係盈利，唔係假的，但同大家想像話佢賣車有錢賺就有啲距離

20. 然後就講到，一年前，同一間公司，同樣咁嘅技術。一年前只係2倍市銷率（市值除收入，都唔好講利潤），但而家係16倍。有乜忽然唔同咗？

21. 所謂電動車好賣得，有幾賣得？一年銷售增長只係15%—但股價升咗8倍。

22. 當然，照舊，信嘅照舊信，唔信嘅照舊唔信。Cult嘛。

23. 快講一下，Snap Chat（其實係母企 SNAP）上季業績極之勁，收入遠勝預期。原本預佢蝕錢點知賺錢。結果股價兩日升咗40%，去到歷史新高。

24. 如果睇咗埃汾嘅文好耐，應該知我一路唔睇好呢隻嘢，證明我當然係會錯，不過反正我冇叫你去沽空。但重點係，有乜啟示？

25. 固然看點係因為佢嘅活躍用家數字畀市場預期好好多，但用家本身唔會畀錢。大家都知SnapChat一樣係靠廣告。而廣告收入係按年升咗50%，呢度先堅。

26. 換言之，其他類似嘅社交媒體，應該都係咁上下情況。大家好可能低估咗啲廣告收入增長。咁想業績前買嘅，一大堆，Twitter，Pinterest，仲有我最鍾意，萬惡嘅Facebook

27. 不過，想冷門少少，可以諗Google（即係Alphabet），公司固然唔止靠廣告，模式亦同另外幾間有啲唔同。但一個好重要嘅重點：佢畀美國司法部搞緊，其他未搞。呢個負面消息係消化晒的（事實對股價影響不大）