ivanliresearch

空置稅。內銀勁升。王維基入指數啦掛？新世界深圳項目。卓越6989上市後可留意。造紙股加價 (Patreon)

Published:

2020-10-17 23:44:40

Edited:

2020-11-01 06:49:45

Imported:

2021-07

Content

停推空置稅，地產股有運行？

內銀股勁升，大師老點你

王維基HKTV Mall又破頂，入指數啦啩？

新世界17新項目在招商房託1503隔離！

卓越商企6989暗盤麻麻，上市後可留意

造紙股又炒過

1. 應該見到分開咗兩份嘢，係為分拆開做準備。再講一次，目的主要係吸啲一舊水都嫌貴嘅人，加上如果分開兩份寫，可能正文（我啲評論）二四六，「大師冇點你＋每日一圖＋Good Read＋FB Post Summary」一三五咁。咁我就可以輕鬆啲，攤開嚟寫（實情就連一三五休息都冇埋）。

2. 再次強調，現有讀者唔會受任何影響，你呢刻畀呢個價錢睇到嘅嘢，只會多唔會少。頂多係你會分開兩日收到（日日有文收，仲開心？）。呢個十分重要。似乎我嘅Patreon嘅取消訂閱率係偏低的，很好。

3. 另外，星期六反正無聊，同大家更新下少少埃汾近況。第四季應該會幾忙。首先係美國大選—我唔係美國人，唔關我事，但大把嘢寫，亦係搶收視搶訂戶嘅好時機。第二係之前講過，年尾要去台灣，嗰邊隔離十四日，返嚟又隔離十四日，可能有時間同大家做個視像直播或你問我答。仲有，都好似講過，要寫書。Patreon讀者……係會有折嘅（免費？唔好咁啦大佬）

停推空置稅，地產股有運行？

4. 政府話經濟唔好，應該唔會再推「一手樓空置稅」立法。當然坊間都有人鬧，但聲音似乎唔太大，停推機會應該好大。

5. 理論上，就應該有利地產股。但邊間囤地囤單位最多？其實幾難去計。以前一路以為恒隆係惜售之王，全部啲樓都養草慢慢賣。更經典當然係華懋，賣到2047都未賣完，不過冇上市。而就上面個表睇嚟，可能最多未賣嘅，係鷹君41同新地16

6. 問題係，我相信由始至終，都冇乜人當呢個空置稅係咩一回事，當年話收呢個稅，發展商股價都冇乜反應，不見得會好大影響，亦不見得取消咗會即時幫到樓價。所以頂多係搵個理由炒下。反正近期樓市利好理由唔少，息又唔加，大圍站又咁多人搶。

7. 另外，偏門就睇隻美聯1200，殘到不能。

內銀股勁升，大師老點你

8. 呢個就唔係大師冇點你，係大師老點你。陰功，我發毒誓，原本星期四係想寫的！！！！但最後冇寫。點知星期五工行建行都升到你唔信，成個星期升10%，幾少見

9. 搞乜？係因為之前政府講到明，內銀要「讓利」。聽落好奇怪，但中國國情係咁，「日本都迫Docomo減價啦」。一大堆其他公司唔掂，但間間內銀賺過千億純利，點啱數？幫下其他兄弟好合理，反正大家都係阿爺嘅。

10. 不過，星期二（打風日）就已經傳話可以放寬呢樣嘢。但我見星期三開返市，啲股價都冇反應，就算了，唔寫，點知星期五先嚟料。唉。

11. 但，正面啲，首先留意返，記得follow埋instagram，有啲簡單嘢我可能嗰邊貼算，呢邊未必寫，但可能後來先見到係好重要。

12. 第二，咁到底啲內銀股點？睇法依然同以往差不多：買咗嘅，坐下收下息還可以。未買嘅唔使買。長遠都係冇乜運行，而市場有更好嘅選擇。

王維基HKTV Mall又破頂，入指數啦啩？

13. 係喎，1137又破頂。但本人唔會就咁日日話破頂就算數（instagram就可能會，記得科勞），即使係「大師冇點你」都盡量畀啲新嘢大家。

14. 今次有乜新嘢？登登，睇個題都估到。寫過好多次有機會入港版納指，而家應該realistically 評估一下個可能性有幾大

15. 答案就在呢個表，明嘅自然明，都講得好白。另外，下次恒指季檢係11月13號，應該到時我會在Facebook出篇文講。但留意返，固然而家1137市值122億，超過3隻榜尾嘅，但，不代表即時入到。其中一個最簡單原因就係，佢不一定係睇你月尾個市值，可能睇平均。等我慢慢再研究下先。

新世界17新項目在招商房託1503隔離！

16. 講開地產股，呢單新聞都值得留意。

17. 第一個解讀，之前都寫過幾次，當然睇新世界17。鄭志剛上場後，公司真係改變好多，亦都預繼續有重組。加上佢地似乎同中港政府關係都好，但又冇得罪其他人，手段不錯。相信今次呢單深圳Victoria Dockside 2.0，就係最好證明（又，Victoria Dockside1.0，就係以前嘅新世界中心，而家K11 MUSEA 同埋 Rosewood Hotel嗰堆嘢）

18. 不過更有趣嘅係，深圳好大的。有冇留意到Victoria Dockside 2.0在邊？就係在蛇口，太子灣。

19. 覺唔覺得熟面口？上次講招商房託1503，話注入母公司資產，就係在太子灣。又睇下星期一新世界或者招商房託有冇反應。