ivanliresearch

國泰單嘢有春江鴨下話？海通隻ESG ETF 3031。三星隻REIT ETF 3187。 (Patreon)

Published:

2020-10-15 20:40:14

Imported:

2021-07

Content

國泰單嘢有春江鴨下話？

海通隻ESG ETF 3031

三星隻REIT ETF 3187

大師冇點你—BlackRock又再逆市創新高

每日一圖—中國股市突破10億美金市值。2月19日同而家比較。

Good Read-淫魔Jeffrey Edward Epstein的電話薄。Patreon成為獨角獸

FB Post Summary – 理想和現實。WeWork又改名

國泰單嘢有春江鴨下話？

香港同新加坡啟動旅遊氣泡，很好，可以同埃汾太去。但我最關心當然係股票。國泰升，預咗，雖則你可以質疑一條坡線點會貢獻到佢6%盈利，但唔係咁計啦，「唔通盈利跌九成股價又跌九成咩，蝕錢就變負市值咩」。

有冇留意我貼個圖有乜特別？係即日圖，我好少會咁貼。留意下，明顯係去到十一點幾先有春江鴨飛入去。

邱騰華應該係2點半出嚟講嘢，但講到明係講Travel bubble，咁梗係即炒上去啦，唔使等佢企出嚟講（當然如果佢宣佈係日本我諗升兩成都可以）。但我最想大家留意，到底邊度最早報呢度嘢？

報邱騰華出嚟講嘢，好多間都有報。但再早少少，南早已經報咗係呢單料，講埋係新加坡，明顯有內線。留意時間係1點左右，佢地Twitter亦都1點08分鐘有出。如果係newswire（例如彭博）可能再早啲，但我今日冇返工，聽日再睇。

咁1點飛入去，都唔係好著數。「但如果有方法12點前知就好了」。正如我一路講，疫情呢堆新聞，唔受咩港交所啲條例規管，但又會郁到股價。你有內線嘅，大把有得玩。

順手講埋，東瀛遊6882都升5%。下一個玩法？就係睇日本。OK，我知東瀛遊唔止日本。但認真的，新加坡其實之前打晒開口牌話要開關，真係只係時間問題。同樣地，日本亦講明希望會開關，仲要預東京奧運下年有人去。識日文嘅建議你留意定啲日本新聞source．正如我Personal FB寫，邱騰華搞得掂日本嘅，特首都有得做呀（但，會唔會因為咁就有人阻佢？just saying）

但戀日還戀日，如果我冇理解錯，對國泰股價影響最大嘅，應該係開返大陸。亦似乎係可以預期嘅嘢（雖然都等咗幾個月）。亦係可以留意住。

海通隻ESG ETF 3031

ESG嘛，大勢所趨，我當然係十分cynic，覺得無聊兼搵笨。但幾時都教大家，唔好用自己嘅意願判斷世界。雖然ESG十分無聊，但肯定係大勢所趨。本人就無力回天。

ESG甚麼東西？如果你真係聽都冇聽過，要加把勁。即使唔係做金融都要識，是無聊的，但人人講，你唔識就畀人覺得冇料到，當然學到我咁可以串返人就會變得好……反社會咯．ESG嘛，Environmental, social and corporate governance。投資要有良心，要可持續咁話。即係石油煤炭公司呀，軍火商呀，刻薄員工呀（亞馬遜呢？）就唔好買啦。另外有利誘啲投資者，話買ESG好嘅公司，投資回報更好喎—本人好懷疑。如果真係咁，就人人走咗去買啦，使鬼你推。最正仲要搵啲公司做ESG rating，典型嘅rent seeking 同埋大把古惑嘢，呢類搞笑嘢搵日出長文講。

但無論如何，ESG investing，大勢所趨。海通出咗隻ESG ETF，3031，幾合時。又係利申，我有唔少朋友做過海通，而家走咗唔少，但都仲有啲。但當然我同佢地冇任何合作，冇收取任何金錢或非金錢利益推佢啲產品。所以只係技術討論。

詳情睇返新聞，隻嘢係「首隻在港上市的寬基ESG ETF」，乜鬼寬基？即係broad-based, 相反就係narrow based．即係乜？可以睇英文。但簡單嚟講，寬基窄基講佢追蹤隻指數。你平時見嗰啲恒指道指咪寬基，但如果去到咩「恒生地產指數」果類就係窄基

另外，寫明個名叫做海通「MSCI中國A股ESG ETF」。就係買A股的，唔好搞錯。同埋，係MSCI嘅ESG指數

好啦，戲肉嚟啦喎。首先講過去表現，但應該唔會差的，否則佢地就唔會推出嚟。產品當然冇往績，但隻指數有嘛。幾時都係先有指數再有產品，正如「港版納指」果時都係咁玩

咁我地睇佢追蹤返隻指數，「MSCI 中國 A股 ESG 通用指數」，表現話差，當然唔差，但又唔見得好過MSCI自己嘅Ａ股指數喎，不過反正ESG係大勢所趨，「遲下就跑贏」

但，畀你估下，真係估下先。咁到底佢買嘅ESG A股，係咩良心公司？估下？

開估，笑咗未？ESG就係買茅台五糧液。咩呀！人地ESG 評分好高架！咁寧德時代做電動車鋰電池就合理得多。但仲有平保，招行，浦發銀行。哈哈哈。

但最撚最撚好笑（唔好意思又要講粗口），都係隻海康威視。Google下間公司做乜嘅？笑死無命賠。

但你話，係咪中國公司太差，間間都咁差，所以搵唔到十間，廖化作先鋒？亦唔係，我亦唔使爭論。可以話你知，外國啲ESG投資，入面都係渣埋啲極其搞笑嘅公司。例如……Facebook。有機會寫

三星隻REIT ETF 3187

再利申，原諒我對呢樣嘢有病態嘅堅持，因為見到太多所謂KOL收錢寫文又唔講。三星ETF嘅人，我就係識嘅，兼且算朋友，亦都曾經有合作過。不過，你今次睇到呢段嘢，亦完全同佢地無關。話咗唔會賣植入廣告，Facebook Page免費睇文當然要睇廣告，但大家係Patreon者就Ad Free，純技術討論。

佢地出隻嘢，3187。三星亞太高息房地產信託（新西蘭除外）。我都未得閒睇或問點解新西蘭除外（似乎新西蘭股市冇REIT，但澳洲有，而我估新西蘭公司都去澳洲上市啦）。顧名思義就話你知係REIT嘅ETF，亞太區。

REIT是甚麼不用多介紹啦，即係做收租佬。但有樣嘢好過你買收租股：例如你買希慎14或太古地產1972之類，咁佢收到租可以唔派息出嚟嘛，保留發展，或者收購，或者唔益你，咩都好。但REIT可分配收入就要派九成出嚟。真係變相同做收租佬差不多

點解買REIT都仲要買ETF？當然係因為分散。否則你大可以買隻823算數，大陸就加隻1503（招商房託，之前寫過啦）。咁而家幫你分散晒，地區又係（但都只係亞太），類型又係，睇你覺得值唔值畀管理費人賺咯（係畀三星賺，唔係物業啲管理費）

的確見到，講類型，都算分得散，雖然四成係商場，但都有其他，唔止寫字樓酒店，連貨倉老人院都有。另外，地區就日本澳洲新加坡香港。但冇三星祖家韓國。留意韓國是有REIT的，可能因為息率太低冇入到指數，再研究。同埋留意，「香港」嘅，有可能係在香港上市嘅大陸REIT

隻嘢嘅出現，好簡單。低息時代，人人想要啲派到息嘅嘢，但談何容易。講過好多次，你不能就咁開個股票機睇邊隻高息買邊隻。9厘息？你收得到就係。舊年派到，今年呢？下年呢？下下年呢？

相對（只係相對）之下，REIT好似比較穩陣。特別係大城市啲甲級商場寫字樓，照計租金都唔會因為網購呀Work from home咁一路受壓（短期當然會，但我講係結構性—相比之下你對比下大陸三線城市，或者美國細城市嗰啲場，真係可以變吉場）。

現價講緊5厘息左右，pretty good，風險當然幾時都有，匯率亦係個小小問題。管理費0.65%，開支1.5%咁咯。

最後，又係睇追蹤乜指數，同埋渣住乜。隻指數叫S&P High Yield Asia Pacific-Ex New Zealand REITs Select Index。至於渣住乜？似乎冇講！雖然我有機會返公司搵得到，或者估得到。

入面講嘅，同上面中文個表冇乜分別。睇到原來香港只係得一隻！16億美金市值，778定405定87001？不過我估係778

再講一次，非廣告。到真係廣告你會在FB見到。亦唔係叫你即時買，我都再研究多啲先。但天地良心，暫時望落，我自己都覺得買得過。

大師冇點你—BlackRock又再逆市創新高

BlackRock又再逆市創新高—上篇先寫過，冇老點你啦？仲要市況呢排幾差的，都仲可以逆市連創幾日新高。

每日一圖—中國股市突破10億美金市值。2月19日同而家比較。

中國股市突破10億美金市值—剛升穿咗2015年嘅新高。但留意返，股市市值同埋指數水平，短期同上同落，但長期唔係同一樣嘢。唔明？咁你諗下，A股高位見過6000點添，但當年市值當然冇而家咁高。仲唔明？咁想像下如果聽日螞蟻集資加埋字節跳動（抖音母公司）齊齊嚟香港上市，咁港股市值咪會大升，但個指數不變的（無論佢地入唔入恒指）。又，呢個10萬億市值，冇計香港。香港幾多？費事查，但大約5-6萬億美金左右。

2月19日同而家比較—點解係2月19日？因為標普指數嗰日創新高。而呢張圖嘅”today”係10月5日，但分別不太大。留意下標普指數在10月5號返返去高位，但睇下其他嘢變咗幾咁多。

Good Read-淫魔Jeffrey Edward Epstein的電話薄。Patreon成為獨角獸

淫魔Jeffrey Edward Epstein的電話薄-冇法，唔講淫魔怕讀者唔知愛潑斯坦乜水。死咗了，十分可疑，似被自殺。但後續係佢有本電話薄，2000個電話，本文嘅作者走去遂個打晒去問！極長文。

Patreon成為獨角獸—慎防讀者唔知，獨角獸係指估值10億美金嘅初創。Patreon最新籌咗9000萬美金，而家都達到呢個地位了！某程度上多得疫情，仲有你地，同埋……我。遲下會寫篇大文講Patreon as a company/business model。目測香港都係大市場，今年增長好快。