習近平南巡買港交所。蘋果發佈會後要買。BlackRock業績後又新高。市場幾歡迎迪士尼重組 (Patreon)

習近平南巡買港交所

蘋果發佈會後股價跌，買入機會？

BlackRock業績後又創新高

迪士尼重組，市場幾歡迎

每日一圖—結咗婚而冇小朋友最富貴。結咗婚嘅白人男性人工最高。股市製造貧富不均？

Good Read —Stephen King 講MMT。諾貝爾經濟學奬得主講通脹失控。社會醜化啲成日訓嘅人，極不健康。

FB Post summary—柏林租金管制有乜後果？日本戲院股一支獨秀

打風，港股休息一天，但埃汾當然繼續寫。不過港股休市變咗唔係太多嘢寫，主要寫美股，或者星期一嘅嘢。另外，因為港股休市，「大師冇點你」暫停一次。

但留意返，今日嘅Good Read非常好睇，兩篇金融文都係重量級人馬寫，亦寫得不錯，唔太難明，又唔長。仲有，今日嘅每日一圖，三個圖都幾有趣，都係講社會經濟地位，貧富不均，種族性別之類嘅東西。

最後，原本埃汾今日公司有個Seminar，講美國大選。當然因為打風取消咗，不日再做。但我諗部份圖表可以畀大家的

去片。

習近平南巡買港交所

習近平南巡，但我最關心當然係買乜股。上次原本都想寫，但又冇寫，後悔中，雖然開市追入去都未必有幾多水位。深圳國際152同深圳控股604呢啲，每次有乜深圳故事就必炒。固然冇乜基本因素可言，但亦未係炒到極貴，所以或者有機會升多一兩日。

同時間，上次寫過招商房託1503，結果星期一母公司招商都升咗啲，反而1503自己冇升，但繼續可以留意

講咁多，話習近平南巡，可能有嘢益香港。正路都係同港交所有關嘅嘢，股價都未破頂，應該有機會升穿400蚊。

蘋果發佈會後股價跌，買入機會？

蘋果發佈會，我係冇睇嘅。唔知而家仲係咪不停有人講「冇創意蘋果已死Steve Job激到翻生」之類嘅廢話。事實係蘋果靜俏俏地又上返2萬億市值，發佈會之前（星期一晚）已經炒上，咁而家跌返冇乜出奇。

況且，例牌蘋果股價在發佈會之後，都會跌，平均都係嗰日會跌少少的。但之後就有力了。

而又同樣地，見到基本上發佈新產品後，6個月內蘋果係必然跑贏大市的。所以而家應該係買入機會。不過其實過去N年，你任何時間買蘋果，都好大機會係跑贏大市。

BlackRock業績後又創新高

呢段大可以寫落「大師冇點你」，但大家知一般嚟講「大師冇點你」我只係貼戰績，而今次我係想講多啲嘅。

早兩日先寫過BlackRock，都冇留意今日就出業績，有啲大意。但，業績係勝預期嘅，股價逆市升4%，再創新高。

業績，都冇乜好大特別，反而大陸網起個題最好。想睇英文嘅亦得，呢度有。

BlackRock呢種模式，極其簡單。咪在啲基金（好多係低收費嘅被動ETF）度收管理費。咁兩樣嘢，係價同量。量嘅，大家聽過啦，AUM，asset under management，升咗12%。點解？都係嗰句，啲基金經理失敗嘛，跑輸大市，投資者咪用腳投票，去晒買指數ETF

價呢？除咗管理費，亦都睇埋個成本。公司今季嘅operating margin（operating profit / 收入）去到47%，史上新高，亦高過其他同業，我相信都係因為規模效應。留意股價一路都跑贏同業添。不過CEO都話你知，唔認為個margin會繼續咁高，公司會加大投資，主要係IT

留意返，今季淨流入係130億美金，上一季只係100億。超過一半係歐洲同亞洲。

最後真係要講返，真係之前HomeBlogger收費短片講的，你可以睇返日期，7月24號。當時576蚊，而家641。咁三個月11%，pretty good 啦，仲要係訓得好，冇乜大上落的。標普指數？都升，但9%。Nasdaq就升到14%，但早排又跌到你驚啫。

都係嗰句，呢類公司基本上Size is everything，細公司難以競爭。但又好在Black Rock之類暫時都未夠1000億市值，未咁快會引起監管機構關注

咁你話，自吹自擂一輪後，都創新高啦，有冇第隻？有的，Moody’s 嘛．都係嗰次收費片推嘅，有機會再解。定其實都唔使解，睇上面明了？

你見嗰期我特登寫啲non tech股票。唔係tech唔好，但見啲讀者渣到成手都係FAAMG，應該分散下的。況且Tech股講咗咁耐，都應該留意下其他嘢。

迪士尼重組，市場幾歡迎

實情舊年年尾（肺炎前）有推過隻迪士尼，當時當然不能預計之後嘅事。係因為票房收入好，最好收嘅戲套套有佢份。事後諗返，都係有啲輕率，肺炎就冇計，但估值明顯係貴，反映咗好多樂觀因素，而嗰堆咩票房好，都大部份反映在股價上

結果肺炎一嚟，真係禍不單行。迪士尼三瓣業務一齊出事！夠晒不幸。電影固然戲院冇入入去，仲要個個習慣睇串流，啲大片不停延期。主題樂園又係關閉埋。然後ESPN亦都因為冇波打而冇嘢播

但你睇股價，又唔係咁慘。而家居然係年頭咁嘅位！離高位亦只係兩成唔夠，完全唔似係一間咁受打擊嘅公司。投資者對公司管理層都仲係有信心，相信公司祖先積落大把。

之前有個activist investor，叫迪士尼不如唔好派息，專心搞好個串流平台。

結果迪士尼就真係重組業務，將個媒體業務獨立成為一個部門。擺明就係專心做串流。而見到股價反應係幾正面嘅。

當然，你可以話已經遲咗好多拍，Netflix市值甚至而家大過迪士尼。但又冇話一定係行先嘅必勝。而我覺得以迪士尼一間咁大又歷史咁耐嘅公司，轉身已經算好快。又睇下點。

每日一圖—結咗婚而冇小朋友最富貴。結咗婚嘅白人男性人工最高。股市製造貧富不均？

結咗婚而冇小朋友最富貴—而結咗婚有小朋友嘅，亦普遍有錢過未結婚嘅人。當然好可能唔係結咗緍就富貴，而係窮嘅娶唔到老婆。最大鑊就當然係單親但有小朋友嘅家庭。

結咗婚嘅白人男性人工最高　—留意個差別好明顯，不過好合理，白人人工高高過黑人，男人又高過女人，咁你兩樣有晒當然最勁。仲有，你見結咗婚嘅黑人力性人工亦高過其他組別。但一樣，好可能係因為高人工嘅男人在求偶市場咪有競爭力。

股市製造貧富不均？—特別留意7/80年代之後兩者走勢。美中不足係股市指數唔用log scale。但好合理，最窮嘅根本冇閒錢剩，唔會有股票。股市一路升，應該貧富懸殊一路惡化。所以我好懷疑，到底「任內股市好好」係咪對連任有利（但，以前講過，侵侵任內股市表現根本不及奧巴馬）。因為窮人同富人都係一票。

Good Read —Stephen King 講MMT。諾貝爾經濟學奬得主講通脹失控。社會醜化啲成日訓嘅人，極不健康。

Stephen King 講MMT—唔係作家，係匯控經濟師（呢條友玩咗好多年）。MMT，Modern Monetary Theory，我唔止一次寫過。唔少支持者，但本人認為係金融巫術，King似乎都係咁諗。支持者認為國家可以不停印錢唔會有後果。你話呢？如果係咁使乜仲收稅？份報告唔太長，亦唔算深。

諾貝爾經濟學奬得主講通脹失控—同上一篇有啲似，亦係講近期宏觀嘅話題，作者名氣更大。Eugene Fama，2013年諾貝爾經濟學奬得主。埃汾Master論文最初想寫Efficient Market，睇咗唔少佢嘅文，但最後寫咗第樣。呢篇佢講唔認為股市有泡沫，但反而擔心政府債務，同埋通脹失控。此人亦真係教父級，唔止係Efficient Market，基本上所有商學院讀嘅Finance都必然有佢份。一樣，篇文唔太長，唔算深。

社會醜化啲成日訓嘅人，極不健康—極短嘅文，但有其他延伸閱讀。似乎我地嘅社會仲係美化啲勤力唔使訓嘅人，令到啲日日訓八個鐘嘅人好有罪惡感，畀人覺得係懶X，係豬。呢種文化極不健康。

FB Post summary—柏林租金管制有乜後果？日本戲院股一支獨秀

柏林租金管制有乜後果？—呢篇我幾鍾意，就係講柏林租金管制，唔畀加租。咁你估會點？就係租盤大跌，索性唔租出去。仲有房東要你簽多份合約，如果法庭判租管違憲（而家打緊），之前嘅差價全部要你畀返晒。當然仲有啲就「平租」，但要你幾萬蚊買個雪櫃咁。非常好嘅社會實驗，你可以驗證到經濟學「理論」係咪預測到現實。

日本戲院股一支獨秀—咁嘅環境，外國啲戲院股跌七八成係常態，但點解日本嘅東寶同年頭差唔多價，同歷史新高相差不遠？當然係國情不同。東寶自己拍埋片，戲又係佢戲院又係佢，外國就會有anti trust禁止。另外，好多大片都遲上，外國戲院根本冇大片吸引人入場。但東寶啲戲院就索性播自己嘅戲。而日本人近十年係支持返本土片，本土片收入係多過外國片的（但2008年前唔係咁）