必抽ibond，人民幣仲有得升，王維基數字麻麻，Logitech同Sonos 得罪蘋果冇運行 (Patreon)

政府出ibond，必抽

人民幣應該仲有得升

王維基HKTVMALL 1137  9月數字幾難睇

Logitech同Sonos 大插，得罪蘋果冇運行呀

大師冇點你—高盛都講里數計劃。新創建績後果然靚仔。碧咸電競股果然唔掂

每日一圖—Apple Watch 好賣過所有瑞士錶夾埋。歐洲股市邊個9月最強？美股盈利由收入定利錢帶動？

Good Read—自動售賣機好唔好搵？奴隸咪即係機械人。聽聲睇病。盈利由價定量帶動？

FB Post Summary —做富國窮學生好過做窮國富學生。在貧富懸殊嘅地方，錢更加幫到成績。1000蚊美金雪糕點解咁好食。Excel 嘅嘢十分化學

1. 埃汾開咗Instagram！@ivanliresearch，請大家follow下。只貼金融商業之類嘅嘢，唔會貼旅行相或嘢食。有乜特別？係冇的，得閒無聊有啲圖有啲嘢，唔想打長文，快評兩句咪貼上去，同我Personal FB差不多。咁開嚟做乜？有時有啲廣告客戶想話多個channel，即係畀一舊錢呀埃汾又可以FB Page 又可以 medium 又ig 老細就好歡喜啦，只係咁。

呀仲有，有時啲Good Read呀  FB Post Summary 之類會漏咗貼link，呢啲情況你直接PM我都得！因為到我check 留言時可能會係幾日後（不過而家會check得密啲，因為之前有啲多多批評嘅讀者走咗）。但普通打錯字之類就唔使話我知了，"成日都有"。

2. 廢話少講，去片。

政府出ibond，必抽

3. 算係攻略，打長少少，但我未無恥到咁樣開篇號外。

4. 政府出ibond，一個字，抽。唔使講一大輪咩低通脹之類嘅廢話，第一日就沽咗佢，基本上就係政府派錢。你親政府嘅當係獎金，你反政府嘅更加要食窮佢拎返自己交嘅稅，仲要好多券商都會免晒啲各種交易費。冇錯，係一皮嘢執幾舊水架咋。但幾舊水就係幾舊水，拎嚟幫朋友訂埃汾Patreon都好。真正零風險（除非忽然核戰），你要做嘅只係上網按幾個掣，應該幾分鐘搞掂。

5. 天地良心，幾分鐘執到幾舊水，好多人成世都冇幾多分鐘有咁高生產力。同理，我好難理解啲唔打上台waive 信用卡年費嘅人。打一打就慳返一千幾百，好多人成世冇做過畀呢個更有效率嘅事情。

6. 詳細背景，可以自己睇文，出面整理得好好了。我得幾點補充：

7. 保底利率係2%，比想像中高，真正維穩賣大包。太遠嘅唔講，大家都亂估，但照計頭一兩次，即係一年內，官方通脹唔會超過2%，亦即係實收呢個2%保底。

8. 留意呢隻嘢有＂波粒二象性＂（唔知係乜嘅唔使理），正如光又係wave 又係particle，ibond既係股票，亦係債券。你可以當佢係新股咁，去券商度抽。亦可以當係債券（例如人民幣債）咁，在銀行認購（更煩嘅係：香港差不多所有銀行都有做埋股票，亦有好多券商做埋債券，即係麥當勞又賣炸雞，但KFC又賣漢堡咁）。

9. 你當股票咁抽嘅，到期抽中就有隻新股咁，有個冧把在你股票戶口，同平時股票一樣咁玩。

10. 當債券咁玩呢，有啲人未買過就深啲。你會見到一個類似樓上咁嘅圖（埃汾冇投資戶口，冇得貼出嚟），最重要係買入同賣出價—原理上就好似你買賣金，或者買賣外匯咁。銀行當然就係賺你個差價。幾濶？就任佢玩，但因為有競爭，唔會太離譜……掛

11. 你問我有乜分別？分別就係，當股票咁抽，你賣出街，或者上市後上追，就係放出大海，或在大海度撈，唔知邊個同你配對咗。債券咁玩呢？就係間銀行（或券商）同你交易了。就係買賣股票同外匯嘅分別

12. 邊樣好啲？Short Answer：當股票抽好啲。原因？差價一定會窄啲。當然理論上賣賣股票要佣金，債券唔使—但其實幫你計埋入去啦（正如所謂無佣金兌外匯）。反正好多行都會免晒各樣費，正路應該當股票抽

13. 點抽？又係玩新股咁，一家大細人人一手咁玩。自己幾個戶口得唔得？聽聞會對身份證，況且犯法嘅嘢（咁最多DQ你啫，唔會坐監掛，但坐咗唔使寫信畀我）大家唔好做。借孖展？好似冇乜著數，自己計數

14. 幾時放？睇人。但我就第一日放。第一日會升到幾多？唔知，以往見到103-107蚊左右，但過去表現唔等於將來，通脹率唔同咗，保證息率又唔同，難比較。你問我就唔好諗咁多，第一日103-104蚊沽咗佢。無謂爭幾十蚊全日望住，你啲時間唔值錢？

15. 你話，唔係喎，渣到尾回報可能唔止喎，況且有保證2厘，即係渣到尾我至少拎佢600蚊啦，做乜第一日蝕畀佢？係，但有機會成本嘛。所以睇你等唔等錢使。我就幾時都等錢洗。3年後畀600蚊我？我今日拎你400蚊好過。但呢個真係好主觀，自己判斷。

人民幣應該仲有得升

16. 快手跟進下，人民幣依然強勢。原因？同上次講嘅差不多，美債同人民幣息差，經濟強，同埋外資不停買大陸股票同債券。

17. 可惜之前估嘅航空股冇乜反應，造紙又一早炒咗，今日到啲內房股跑出。馬後炮諗幾合理，恒大都死唔去，當然有助成個行業估值，加上一路都係人民幣升值受惠股

18. 不過我估人民幣嘅升勢應該仲有得去，因為估美元就快再跌。原因？因為亦估美國好快再出刺激措施，搞左一輪仲未傾掂，但仲有機會。況且聯儲局主席鮑威爾都開晒口（留意時間，新鮮），話冇事嘅，寧願做多唔好做少。

19. 所以正路地，差不多會見到美金有新一輪跌浪，之前買落啲金應該可以返家鄉（係喎，寫完冇耐就潛水，但陪大家一齊潛）

王維基HKTVMALL 1137  9月數字幾難睇

20. 係喎，愛股。今日又升5%，上返11蚊樓上。原因？唔知，不過剛剛出咗佢嘅外賣自取平台。屯門元朗天水圍試先，我未玩過，但有啲懷疑個吸引力大唔大，或者有幾多錢賺。但，唔好話不可能嘛

21. 不過我覺得HKTVMall都係醒的，佢只玩自取，唔做送外賣。送外賣就煩好多，況且係同UBEREAT 之類鬥，紅海嚟的，人人蝕錢，鬥傷錢，睇下邊個頂唔住抬走離場，但人地實多錢過你。而家只做自取，咁個對手就係OpenRice之類（雖然其實螞蟻集團都渣住OpenRice 20%）。長遠個玩法，可能想利用HKTV Mall個app，搞到變super app咁。微信做得好成功，UBER都係類似咁玩

22. 不過唔好講咁多天花龍鳳先，股價嘅嘢，未必睇到咁遠。剛剛公司出咗9月嘅數，就認真麻麻地了。大家應該知道啦，梗係睇按月比較。咁你話好差，又唔係嘅，但股價回一回十分合理。真係睇好嘅又有機會買。

Logitech同Sonos 大插，得罪蘋果冇運行呀

23. Logitech？我知，做Mouse同Keyboard，Sonos？其實我聽都未聽過。但故事就係因為蘋果，靜俏俏咁將呢兩間嘢（仲有Bose，但冇上市）嘅貨品下架了，九成九係自己出headphone同Speaker吧，「然後又可以賣到貴一貴」。 Logitech同Sonos 呢啲畀蘋果勒住條頸，好難玩的，話下架就下架。Bose好似仲大鑊，早排先摺咗一大堆舖頭！不過冇上市就唔寫

24. 講呢單嘢，都係想講Big Tech如蘋果點解咁惡。同埋，做硬件真係冇乜前途，除非你做到ASML Nvidia咁高端（但都做唔到1萬億市值）。以前都寫過，咩GoPro Fitbit嗰啲真係死路一條，我任你啲Gadget達人點吹奏，有冇一間做得大？冇的，你Designer 工程師梗係以為創意，設計，技術取勝。但個世界唔係咁運作。Facebook Google Amazon之類有平台，而蘋果有強勁嘅品牌忠誠（呢啲先叫品牌）。呢啲先係護城河。

25. 蘋果係最特別嘅一間，因為Big Tech中得佢係硬件為主—但佢有啲唔同，做到強勁嘅品牌，做科技嘢做到LV咁。另外，亦都有服務收入支持—未係主要收入（但都佔兩三成了），而佢嘅服務收入係建基於佢封閉嘅生態系統，同埋again，超強嘅忠誠度。

26. 比多個例子你，埃汾用埃瘋，但冇用過 AirPod，我電話唔會用嚟聽歌的。但記得當初出嚟，劣評如潮，牙簽呀，邊有人幾舊水買？Steve Jobs激到翻生呀，我街邊買個耳機好過佢啦。

27. AND？你啲網友最醒？呢個圖我可能會再寫文，但，蘋果只係賣Airpod，收入已經等於成間UBER咁滯。驚未？（雖然有人話個圖唔準，但即使最保守估計，Airpod收入都至少多過成間Spotify）

28. 你在每日一圖仲會睇到，Apple Watch賣嘅錶，多過所有瑞士錶夾埋。你以前點諗得到

29. 唔係本人吹捧AirPod同 Apple Watch，我兩樣都冇。但你不妨諗下，點解會係咁，點解係蘋果做2萬億美金嘅公司，而唔係某啲工程師設計師心中嘅技術創意。技術/創意有好多種，我地細細個只係睇啲咩發明家，巧手工匠，或者電燈膽一著有條好橋，但Big Tech嘅技術同創意，在啲你未必咁易睇到嘅地方。

大師冇點你—高盛都講里數計劃。新創建績後果然靚仔。碧咸電競股果然唔掂

30. 新環節，顧名思義係中咗認叻，唔中嘅當然扮睇唔到（但有機會正文會講）。其實一路都有在正文做呢啲，而家拆開佢，正文更集中講正題。

31. 高盛都講里數計劃　—拿，我地號外提過，值幾錢我都寫埋

32. 新創建績後果然靚仔—留意係昨日，唔係今日嘅股價。但的確之前寫過估市場對個業績應滿意。插曲係寫完篇明報文，新創建打嚟（證明老細或者啲公關睇明報，或者電子剪報）。開頭以為鬧我寫錯嘢，原來係請食飯。睇下有冇嘢問到。

33. 碧咸電競股果然唔掂—寫明咪搞我。結果上市一路都潛水

每日一圖—Apple Watch 好賣過所有瑞士錶夾埋。歐洲股市邊個9月最強？美股盈利由收入定利錢帶動？

34. Apple Watch 好賣過所有瑞士錶，夾埋—真誇張，而聞說Apple Watch好多人當係「唔成功」嘅產品。當然呢個只係計數量，未計售價同利錢。但唔好忘記Apple Watch仲帶嚟好多service income

35. 歐洲股市邊個9月最強？—成個歐洲股市，9月近乎原地踏步，但個別發展好唔同。最勁德國，最差英國。睇埋其他股市表現，似乎同抗疫能力有相當大關係。

36. 美股盈利由收入定利錢帶動？—極有趣嘅圖，講美股標普500指數每股盈利。用最淺嘅用語講，你當賣衫或者開快餐店，咁公司賺多咗錢，不外乎兩個原因。一係收入多咗，一係利錢深咗，即係利潤率高左（可以係食水深咗，或者減到成本）。以上為你拆開晒每一年。留意似乎係利潤率影響大一截，可能因為做到標普500咁大，你啲收入唔會年年升一倍。另外，留意多數都係利錢同收入增長同一方向—好景時兩樣升，逆境時兩樣都跌。成個指數層面就見唔到咩犧牲利錢搶多啲生意。又，仲有個share count，因為係計每股盈利，所以股數有影響。但見一般個影響好細，整體嚟講並唔係咁多公司發新股（攤薄每股盈利）或做回購（拉高每股盈利）—又或者係兩樣嘢抵銷咗。

Good Read—自動售賣機好唔好搵？奴隸咪即係機械人。聽聲睇病。

38. The economics of vending machines　—　顧名思義啦，自動售賣機好唔好搵，同你分析成個生態。我好似早排見Facebook都有人搵／昆人投資。又，作者幾時寫埋夾公仔機？

39. A Financial View of Labour Markets—好睇。作者Frances Coppola，我幾乎以為係導演（定其實係親戚？）。由最簡單嘅理論開始：好多分析會當勞工好似買賣貨物咁，佢地開價，僱主又會出價，市價在兩者之間。但佢話其實好唔同，勞工拎到嘅係一連串嘅收入，但僱主買嘅係 capital asset。然後講到奴隸市場，純技術分析，「分別係一筆過之前買斷，未必一定對勞動者不利」。當然奴隸有其文化問題，而家在主流社會已消失—但，其實，咪即係「機械人」—經濟原理一樣。一筆過買斷，唔使每個月出糧。

40. 聽聲睇病—大數據＋醫療。而家研究點樣聽你把聲就知有冇中肺炎，腦退化，或者抑鬱症前期。不過當然技術仲係好步，同埋諗都諗到大量私隱問題—仲有人肯公開講嘢？

FB Post Summary —做富國窮學生好過做窮國富學生。在貧富懸殊嘅地方，錢更加幫到成績。1000蚊美金雪糕點解咁好食。Excel 嘅嘢十分化學

42. 做富國窮學生，好過做窮國富學生—呢篇幾受歡迎。富有家庭嘅學生高分啲就度度都係，而富國嘅學生在國際試又比窮國高分。但如果夾埋兩個效應呢？富國嘅窮學生高分啲，定窮國嘅富學生高分啲？答案係：俄羅斯最窮嘅學生，都高分過摩洛哥最富貴嘅學生一大截。雖然家庭收入只係人地一半。

43. 同樣係屋企收入多一千蚊，在貧富懸殊嘅地方，更加幫到成績—上面嗰篇嘅下集。都係嗰句，富有家庭嘅學生成績就好啲，但呢個現象在貧富懸殊嘅國家特別明顯。可能因為個社會階層分野明顯，富人就讀名校，窮人讀雞校。

44.  1000蚊美金雪糕點解咁好食—唔止係因為用料靚，而係因為你自製浪漫，食嗰時好專注，唔會諗住其他嘢。但埃汾話，其實可能因為平價嘢唔好食，你先會諗咁多嘢。

45. Excel 嘅嘢，十分化學—講英國報少咗1.6萬宗確診，因為用舊版Excel。有人覺得好化學，的確係咁。好多論文都係因為咁而錯，重災區係基因組生物學，因為啲基因名（SEPT2）會畀Excel當係日期，最後搞到基因命名都要改返做SEPTIN2