拜登九成做總統。識睇睇Florida。卓越6989可現水抽。王維基升，收租股跌，都係睇住確診數字嚟炒。美圖上返10日高位 (Patreon)

拜登九成做總統！

識睇就睇Florida

卓越6989可抽，現水好啦

王維基升，收租股跌，都係睇住確診數字嚟炒

美圖1357上返10日高位

大師冇點你—新創建升到10日高。新意網升到3年高位。

每日一圖—木材價格高位跌一半。中國酒店入住率超過舊年同期。

Good Read —公司應該畀返錢WFH嘅人買咖啡買廁紙。冇人話你知揀乜，學嘢就會快啲

Facebook Post Summary —　和民變平價燒肉店。JR東日本史上最大虧損

1. 都循例介紹返，開咗instagram，@ ivanliresearch。最初係話應酬潛在廣告客戶，但玩落我覺得都有用。例如一啲極短嘅嘢我會嗰度貼，仲有可能幫到你多啲idea，例如隻新意網雖然今日我都寫（見「大師冇點你」），但昨日已經升，我都有貼，咁你有睇ig可以早一日留意到

2. 好，去片。

拜登九成做總統！

3. 睇埃汾字裏行間都知道我唔鍾意侵侵，但再講一次，呢個唔係政治newsletter，我自問可以好抽離，唔好將自己喜好同個世界嘅喜好混為一談。天地良心，侵侵任內我重倉美股，執唔少，拜登上場有冇咁好都未知—當然侵侵做多屆係咪有咁好亦係未知—而奧巴馬任內美股表現更好，唔信你可以Fact Check下。

4. 「侵侵任內股市好過奧巴馬」實在係一個極多人受騙嘅urban legend，唔信你問下身邊嘅人。但數字不講大話。況且，你肯定「股市表現好」係政績？冇股票嘅人多，定有股票嘅人多？

5. 都係政治嘢講得太多，講返數字。侵侵10月1日「奪冠」，然後話咁快出院。我見身邊港人朋友（不一定係侵粉），絶大多數當係佢嘅好消息。有話佢特登拎同情票，有話話咁快出院鞏固強人形象，更加君臨天下之勢擊倒拜登喎。好不熱鬧。我朋友當然不代表所有香港人，但你留意下身邊，係咪認為侵侵連任嘅人，遠多過認為佢冇得做？不過，有幾多係自己想像出嚟？

6. 未睇嘅睇多次，怕我到時唔得閒再寫。你睇返538（左邊）同Economist（右邊）嘅預測，都見到拜登優勢甚至係擴大咗。538認為拜登有85%機會選到，Economist甚至認為係91%—歷嚟最高

7. 再講一次，人地預測唔係「民調」！雖然我覺得因為上次民調「錯咗」然後今次話「民調都好信？」嘅相當搞笑，好似上次天文台話打風冇打，於是今次十號風球你就出海咁，「天文台都好信？」

8. 不過留意下，GoodJudgement就見到拜登優勢輕微收窄，唔通因為副總統辯論？但點都仲係81%，亦係歷嚟最高。

9. 順帶一提，你會見到有民調話確診後，侵侵民望領先。啲侵粉又唔見出嚟講「民調都好信？」。無論如何，呢個只係某一個民調，而Economist 538 Good Judgment 等等係睇幾十個民調，再加其他嘢。至於呢個Democracy Institute，不知何解好似Economist 538都冇放入去，不過聲稱「曾正確預測特朗普在2016年當選總統及英國脫歐」。睇下係咪今次又獨具慧眼

10. 另外，唔止民調，唔止modelling，似乎「市場」都賭拜登羸。當然市場有好多種，你見啲prediction market （即係，賭盤）都仲好似咬得幾緊，可能拜登六侵侵四，甚至更少。但，留意下啲新能源股呢排不停跑出，呢個幾明顯係估拜登贏。上次篇文寫過，美股長升長有，邊個黨上場都升，當然真係要揀就民主黨下升得仲多，但分野未必咁明顯。但，真係睇行業嘅，新能源就係個幾明顯嘅拜登bet，因為侵侵係唔信唔理亦唔care氣候變化的。

11. 不過留意啦喎，一早呢啲股已經升晒，到拜登真上場時，可能就反高潮。幾時都話股市係炒預期，又一例子。

12. 順手講埋，真係同我個人偏好冇乜關係。有碗話碗。但如果真係侵侵連任咁點？冇乜點。係喎，我係上篇文寫拜登8成做總統，今次寫夠9成—咁但，1%嘅嘢都會出現啦，何況10%？冇人話一定架喎，極權國家都唔係一定啦。

識睇就睇Florida

13. 又係慎防到時唔得閒講，而家講定。如果只睇一個州，就睇Florida．原因好簡單：29張選舉人票，全國第三多，只係少過California（55） 同 Texas（38）．但California近N年都係民主黨票倉，Texas就近N年都係投親共和黨。

14. Florida係最大嘅搖擺州，真正兵家必爭，近12次選舉得一次佢地投輸家。Economist 嘅model認為，如果侵侵贏到Florida，就有一半機會做到總統。輸埋呢？就可以收檔。你睇上面個圖大約都明。

15. 咁而家嘅形勢如何？Economist同538，都估拜登七成幾機會拎到。可勝，不穩。Florida應該會相當早點完票，所以睇完應該差不多收得工。

卓越6989可抽，現水好啦

16. 提多你一次，記得抽iBond，咩都唔好問，抽。唔抽嘅真係以後點抬起頭做人？真係想知點解抽嘅，睇舊文。

17. 呢排仲有隻新股，我都覺得不錯。係隻卓越（唔係香港賣化妝品嗰隻），做商企服務，6989，招股反應相當好。當然反應好不一定升，但大約都有個正相關。建議你現金抽，但唔好孖展，第一日走（有本事就暗盤走）

18. 研究？坦白講，新股嘅嘢，特別係第一日走嘅，就唔使點分析點理基本因素。上次篇文都寫過，招股價上下限咁濶，龍門任佢射，幾搵笨，點分析？隻嘢1 蚊我就買啫，2蚊我就梗係唔買，但你要收咗我2蚊先，然後到時話我知睇你心情收我幾錢，有多退返畀你。香港新股機制簡直荒謬之極。但可愛在邊？佢地要長玩長有，就不能一次劏死你，否則下次仲有人玩？好多時都會慈悲為懷，留小小水位—直到留唔到（下面再解）。

19. 好，正經，除咗反應好，點解抽？你睇啲基石投資者，騰訊京東，已經唔使點討論。買啦。做物業管理，不過係寫字樓，in case 你care

20. 但，又真係，現水認購好了。我以前都抽過新股，孖展都用過。如果講現金抽嘅，當然係贏多輸少，埋單有錢賺，原因上面講咗，投行一般都慈悲，畀啲水位你賺（佢係關心自己啲基金客，你咪坐順風車）。

21. 但孖展呢？我抽過幾次，夾埋一定係輸錢，因為輸過一鑊好甘嘅。

22. 情況係點？就係香港抽新股，個定價期太長了，呢段時間好多嘢可以發生，但佢定價呀，分配呀，睇住你嚟食。

23. 另外，個遊戲你諗真啲好有問題，有機會我再寫長文講。但以剛剛想嘅上和（6998）為例。暗盤升32%，pretty good la，但頭槌飛（最大嗰張）仲要輸錢喎！結果到第一日上，「只係」升17%，我抽一手嘅，執2000蚊，還好。但做孖展頭槌飛呢？要蝕幾皮嘢。

24. 實情，要唔蝕，第一日個打和點，要升48%。你唔覺得something is wrong？

25. 問題就係，因為太多人爭，你頭槌飛，抽600萬股（1.4億$），先中得7500股（18萬$左右），但你計息就計晒1.4億嘛！

26. 今次已經好彩，至少隻嘢仲有得升，至少定價期大市都係好。你想像下如果定價期忽然股票會有乜後果？你隻嘢大插就固然，但最大劑係，你仲要分到一手都係！！！

27. 見到個難度未？市況熱嘅，必然多人抽，只能分到少少，你要升好多好多先有錢賺。但到市況一逆轉，你就會分到成手都係，輸死你。

28. 事實往往亦係有一隻咁嘅嘢，做Widow Maker，輸到啲人死，咁個新股市場就會靜一排。然後啲嘢就會低啲估值上市，就係咁循環。所以你係應該在個市開始熱，但未係好熱時去抽。但實際冇人話你知幾時

29. 又，以上種種，同我工作有衝突。我公司有做新股孖展，如果我公開寫即係幫公司倒米，所以只能在呢度寫，你地有福了。

王維基升，收租股跌，都係睇住確診數字嚟炒

30. 前日寫過王維基隻香港電視1137數字麻麻地，昨日急跌，但今日已經即時升返突！但原因係咪應該咩HKTV Pay電子錢包？

31. 未必，可能只係因為，確診人數又反彈，說好了的第四波係咪又嚟？

32. 但唔止一次講過，呢個疫情真係可以幾好炒，特別係如果你一早有資料（犯唔犯法？你問律師了），可以連玩幾次。真的，見到差不多一定係王維基就升，本地餐飲股，或者啲收租股就跌，長玩長有。

33. 領展都要跌，但呢啲位我就真係非常放心買，當然係長線。4厘幾息（仲要係可持續嘅），邊有得輸？

美圖1357上返10日高位

34. 快講兩句，呢隻之前提過，燒咗鬚。包生仔隻隻中咩，我寫完後都跌唔少，所以我都冇睇。但我學生（真係以前教書嘅學生！）話我知呢幾日反彈幾勁，不經不覺上到10日高，有興趣自己留意下。我就一半半。

大師冇點你—新創建升到10日高。新意網升到3年高位。

35. 下次希望係啲大事，未必只係個別股票。當然未必可以每次兩三單，神仙咩。夾硬話自己中又冇意思。

36. 新創建升到10日高—應該仲有一浸吧，你睇而家股價係高位一半左右咋。又，食飯單嘢結果冇咗下文！

37. 新意網升到3年高位—都係今年留意嘅股票，之前寫過下，業績都評過。

每日一圖—木材價格高位跌一半。中國酒店入住率超過舊年同期。

38. 木材價格高位跌一半—之前FB Page寫過木材價格今年升過一個開，但嗰時都話係短暫失衡，話咁快就高位跌一半，返返年頭嘅位。

39. 中國酒店入住率超過舊年同期 —但當然因為人人冇得出國被迫國內遊

Good Read —公司應該畀返錢WFH嘅人買咖啡買廁紙。冇人話你知揀乜，學嘢就會快啲

40. 公司應該畀返錢WFH嘅人買咖啡買廁紙—有冇諗過，Work from home你會冇咗唔少福利？例如公司啲咖啡，例如公司嘅廁紙。講真的，荷蘭政府就話，公司要畀返每日畀返廿蚊你買咖啡買廁紙，仲有電費呀之類。當然有啲公司就唔多同意，話你WFH已經多咗好多自己時間，又唔使坐車返工。

41. 冇人話你知揀乜，學嘢就會快啲—篇文不長，但有啲深。但如果我冇理解錯，就係講自己選擇下，人學嘢就會快啲。人地話畀你知揀乜，學習就會慢。

Facebook Post Summary —　和民變平價燒肉店。JR東日本史上最大虧損

42. 連寫兩篇日本，冇乜特別，純粹因為收視保證

43. 和民變平價燒肉店　—　和民都仲可以再平價版？又，呢間公司，客又鬧，員工又鬧，股價又唔得，相當極品

44. JR東日本史上最大虧損 —呢篇有趣啲，日本7間JR，4間上市，當中3間係日經指數成份股。今年情況當然惡劣了，因為冇人搭，即使政府補貼國內遊都唔掂。有趣係日經指數有8隻鐵路股。剩返5隻？係私鐵，最大嗰隻小田急，市值拍得住JR西日本，而當然大過JR九州同JR北海道。