ivanliresearch

金融潮語＋101文—美股SPAC上市，Q&A16條 (Patreon)

Published:

2020-10-03 23:42:46

Edited:

2020-10-05 11:06:14

Imported:

2021-07

Content

SPAC關我乜事？股票嚟的？成日聽人講

用人話講，SPAC即係乜？

點解呢期SPAC上市咁潮？

點解呢期咁多公司用SPAC上市？

有乜出名嘅SPAC公司？

SPAC公司上市後表現點？

香港有乜人搞SPAC ？

Tech Start up點解要用SPAC ？

實際上SPAC係點搞到間公司上市？

用SPAC對公司有乜著數？

邊有免費午餐？SPAC有乜唔好處？

SPAC同公司點配對？會唔會出問題？會唔會空殼公司多過Start up？

我唔用傳統IPO，可以直接上市啫，點解要用SPAC？

點解美股先有SPAC？

如果想買SPAC上市嘅公司，可以點玩？

我仲係唔明，都唔知你寫乜，仲想睇多啲。咁點？

版務—各項10月新搞作

每日一圖—群眾係咪太低估拜登勝算？中國經濟靠出口？

Good read — 做總統邊有咁易死。重點唔係你做乜，而係你唔做乜。

FB Post summary—侵侵確診跌幾百都賭？勞斯萊斯供股

1. 又新一個月，歡迎新讀者。留意星期六多數係專題文，冇咁重時間性，一個課題深入講。星期二四就大雜會，貼市啲，一篇幾個故事。

2. 再預告畀大家知，今個月又有新搞作。詳情放最尾，唔阻大家睇正文。

3. 另外你見昨日又出咗篇號外，講Palantir直接上市。同之前講恒大唔會死，或者里數計劃值錢過航空公司本身。都係番外篇，金融嘢，有意慾寫。又覺得多人關心，可以放上Facebook Page吸新讀者（可能你都係咁樣吸咗上嚟），將來都會繼續，效果不錯的。

4. 但重點係，本人唔會overpromise，只會over-deliver．你訂嗰時我只係保證二四六每篇千幾字。出到嚟往往係一星期五篇幾千字！仲加埋一堆咩　每日一圖， Good Read， FB Post Summary．我就係每日都諗下點做好啲。

5. 太長氣，講正題。講過幾次寫SPAC，special purpose acquisition company。今日寫。講明先，三千字，只能講皮毛，有興趣將來再update，或者你自己再搵資料，但畀咗個入門概念你先。

SPAC關我乜事？股票嚟的？成日聽人講

6. SPAC，special purpose acquisition company（拿，識全寫又可以扮嘢），又名Black—check company．呢味嘢，真係今年嘅金融潮語。就算唔關你事，都至少聽下，吹得兩嘴扮下嘢又好，唔好人地講乜都唔知都好。

用人話講，SPAC即係乜？

7. 用最簡單嘅文字講，SPAC就好似「借殼上市」，或者深少少嘅，佢類似reverse merger反向收購。咁即係乜？「借殼上市」或「反向收購」有乜特別？就梗係有啲公司有啲情況，佢地做唔到，或者唔想做正正常常嘅上市，要用啲其他方法。留意，呢個同上篇講「直接上市」係另一樣嘢，唔好撈亂。SPAC絶大多數情況下都會集資，過程亦同「直接上市」完全唔同。

8. 「借殼上市」，咪一間現存嘅公司洗得乾乾淨淨，有人注啲新資產入去，好似變咗新公司咁。原本香港人做飲食，變咗大陸佬做區塊鏈咁。收購你知係乜啦，「反向收購」大約估到，同「借殼上市」差不多，你間公司本身冇乜嘢，但收購啲嘢返嚟—其實係佢反吞你，因為佢會做主人，「好似幽遊白書美食家食咗戶愚呂兄但最後畀人取代咗咁」（唔知讀者夠老明我講乜）

點解呢期SPAC上市咁潮？

SPAC至少出現咗廿年，但做乜呢期咁紅？好簡單，因為今年做咗好多單，集咗好多錢。睇圖，今年SPAC嘅IPO，已經集咗超過400億美金，係過去N年加埋。佔總集資額，亦越嚟越重（未有2020數）

點解呢期咁多公司用SPAC上市？

9. 你問我，因為錢多，人傻。聯儲局印咗幾多錢不用講，利息低投資者焗買股票，疫情下金融市場受嘅打擊不大。而今年科技股亦好強勢（但SPAC唔一定要係科技股），很多很奇怪嘅公司，唔好話冇錢賺，連收入都未有，都有人買，仲升唔少。

有乜出名嘅SPAC公司？

10. 就多咯。我第一間見到嘅SPAC公司，正係Richard Branson嘅Virgin Galactic，太空旅遊嗰間。當時都知係類似借殼，但未知一年後去到咁潮（又，勁人如Richard Branson就係行先你好多步）。

11. 另外，美國嘅體育fantasy league 兼賭波app，DraftKings

12. 仲有？就係新聞多多，炒到痴線，勁升勁跌嘅電動貨車公司Nikola。公司唔好話盈利，就連收入都係冇嘅！

13. 最新嘅？唔使以為好高科技。之前寫過，Playboy都想再上市。點上？又係用SPAC，真係high tech 揩嘢，low tech撈嘢。唔止，連HIMS都玩埋一份。

SPAC公司上市後表現點？

14. 睇下係幾時上嘅SPAC。For some reason，SPAC絶大多數都10蚊上市。咁你睇到了，多數SPAC都潛水，但近兩年上嘅比較好。係錢多人傻定乜就唔知。但留意SPAC至少有咗廿年，之前好多都輸錢，所以冇乜人講。我鍾意FT評論：The poor investment record of many Spacs is a reminder that when Wall Street pushes a new product, clever financiers invariably find a way to shift the most risk on to ordinary investors - even if a new generation of Spac founders believes they will avoid the problems of the past.

香港有乜人搞SPAC ？

15. 呢啲咁嘅東西，點小得永遠郁得快過其他地產家族嘅，李嘉誠三位一體？仲要拍Peter Thiel．而其他本地報導多數都講李澤楷先，唯獨信報最尾一句輕輕帶過，十分此地無銀。留意，當然係在美股，香港應該係冇SPAC嘅。點解？下面答

16. 仲有乜水？Antony Leung，仲早過李澤楷，唔知乜水？梁錦松。

Tech Start up點解要用SPAC ？

17. 再講一次，SPAC同直接上市係完全唔同嘅嘢，但兩者都係「非傳統」嘅上市方法。咁要用呢啲方法上市嘅，一係不能用傳統方法，一係唔想。

18. 不能嘅簡單啲，例如有啲好似Virgin Galactic 或Nikola咁嘅，收入都未有，傳統IPO好似唔得的（香港就唔得，美國唔肯定）。下面講並不能，實不為嘅。

19. SPAC同直接上市出現，都係因為有公司對傳統上市方法不滿。以前嘅公司唔夠牙力，但而家矽谷嘅公司夠惡。錢都事少（又，美國投資銀行上市斬你集資額7%做收費，香港嘅投資銀行不知幾咁有良心）。更重要係定價權，你見唔少新股第一日升一倍甚至幾倍，抽嘅開心，但公司（矽谷嘅小朋友）覺得被昆—咁你即係定錯價啦，做乜唔定高啲？點解會咁？舊文講直接上市解過，投資銀行要顧及客。所以文可以唔即時睇，但要篇篇睇。

實際上SPAC係點搞到間公司上市？

20. 以上係DraftKings SPAC上市圖解。用最簡單嘅語言講，會有人（大公司或出名嘅投資人）整定間冇實則業務嘅空殼公司，但入面有錢，好重要。然後就用傳統方法搞上市（美國可以咁做，香港好似唔會畀你冇業務咁上市的）。然後呢檔已上市但冇實際業務嘅空殼公司，就會搵間私人公司（十居其九係去到好尾段嘅 Start Up），買起佢。錢從何來？咪話間公司自己一早有錢。然後被收購間私人公司嘅一啲股東就會套現走人，兩間公司合併，間私人公司咪上咗市。多數會名都改埋。

用SPAC對公司有乜著數？

21. 除咗上面講，慳返錢（唔多，下一段解），同埋定價權外，仲有四個。一，唔使搞一大輪嘅 Roadshow應酬啲基金佬，甚至財演，記者，散戶，因為佢地好多都問廢問題，搞搞震冇幫襯。二，因為係收購，唔係傳統上市，限制少好多，可以話埋比買家知自己嘅預測（傳統上市管得好緊）。第三，頭先講過，可以直接同個買家傾價，唔使經投行益佢地啲客。同埋，啲錢已經到晒位（在間已上市公司入面），唔怕走數。第四，唔使怕股市忽然間變好變壞，亦唔使畀啲投行最後一分鐘想你益佢啲大客。

邊有免費午餐？SPAC有乜唔好處？

22. 冇錯，如果咁著數就人人都做啦。首先，你都係唔會完全甩起投資銀行，只係用唔同方式。好多時安排你上市嘅，會拎你間公司20%股權當報酬—咁到底畀錢，定畀股權邊樣「貴」啲？都未知。當然有得傾，例如你做到某啲target就唔使拎你20%。另外有時細公司，就反而靠中介人嘅名氣。但留意，投資銀行on top of 呢啲嘢，可以再收你錢。畢竟都係嗰句：唔想畀錢嘅，自己搞咯。

SPAC同公司點配對？會唔會出問題？會唔會空殼公司多過Start up？

23. 係會嘅。你見我寫到好簡單咁，好似每間Start up 可以馬住一間SPAC。實際上同其他配對一樣，總有亂子出。你見例如Peter Thiel同李澤楷間嘢，都未知會買乜，呢個先係常態，目標係之後先出現。

24. 呢期見到好多人都啤SPAC出嚟，你當好似好多吉舖等人租咁。咁而家好景就好景，但世事嘅嘢邊個知？況且，啤SPAC呢啲，同大陸佬在香港啤殼咁（拿，會改例架！），門檻唔高，主要係要有錢，同出名，可以啤好多隻—有冇咁多間有質素嘅Start up？唔好忘記，UBER，Lyft，Palantir，Slack，全部潛緊水（四間都唔係SPAC，但我意思係好多大名上市後都係跌的）。

25. 樓上嘅圖，講2015-2019嘅SPAC空殼公司，都有三成仲未搵到目標。

26. 如果遲下供應失衡，好多SPAC空殼公司搵唔到嘢買，咁點？冇事嘅，回水咯，係蝕利息同少少雜費，但唔會話輸死人。

27. 留意Richard Branson最近都搞咗間SPAC，但講明未有收購目標的。

我唔用傳統IPO，可以直接上市啫，點解要用SPAC？

28. 都話係兩樣唔同嘅嘢，兩樣都係取代傳統IPO，但做法唔同。好簡單答：直接上市，公司唔會籌到錢。SPAC就集到資。不過好似紐約交易所研究緊可唔可以直接上市都集到資，到時可能就兩樣撈埋變悟天格斯。Another Story，再寫

點解美國先有SPAC？

29. 其實唔係美國先有，但其他地方唔多做得起，香港好似冇。四個原因，法規，錢，公司本身牙力，同埋……師爺蘇。法規最簡單，香港呢，應該唔畀啲冇業務嘅空殼公司招股上市的。錢呢？美國投資銀行收你5-7%集資額做費用好閒，但中港絶對冇收咁多。極端起上嚟？收1%都得，你間嘢夠大的話。所以中港啲公司冇咁不滿投資銀行。牙力呢？你係阿里巴巴騰訊之類，我估真係唔使理投行。但好多中港公司名不見經傳，就要靠投行sell了。師爺蘇？上篇文有寫，我估中港公司，事前事後其他嘢要投行幫手嘅機會，多好多。

如果想買SPAC上市嘅公司，可以點玩？

30. 留意，一般人係冇得玩美股抽新股嘅。只能上市後買。最簡單咪Nikola 呀 Playboy呀上市後你追。又或者，買ETF。美國真係甚麼ETF都有，亦係上篇文提過嘅，SPAC ETF。

31. 編號係SPAK，就係買返啲經SPAC上市嘅公司。詳情我不再講，你自己睇舊文。但補返個表畀你，呢隻嘢嘅持股。我絶無任何金錢非金錢利益，我自己亦唔會買。貴客風險自負。

我仲係唔明，仲想睇多啲。咁點？

32. 咁我都寫得幾差，或者你幾得閒，或者你一開始跳嚟呢度。OK的，睇Matt Levine寫，好長氣，但寫咗好多篇。仲有，美國連登，reddit，有成個版講SPAC。

版務—各項十月新搞作

33. 首先會加個「大師冇點你」環節（最終名稱待定），靈感係抄WSJ Heard on the Street Newsletter嘅 “You Heard it Here First＂，就係認叻，「老師又中」，「一早話咗」嘅環節。其實一向有做，只係將佢放咗一個固定位，亦慳返正文位置。

34. 另外，「大師冇點你」，每日一圖，Good Read，加埋FB Post summary，就會夾埋整舊新嘅嘢。獨立收費，當lite版，但最最重要當然你地唔會要加錢都有齊所有嘢。只係我仲未決定係照返而家咁廿四六出呢個lite，定會一三五出。

35. 仲有，會啟用個instagram，其實無聊之極，但有時啲廣告客戶想多個channel．開咗話你知，鍾意嘅去睇下，唔鍾意亦冇乜損失。志在有舊嘢交代下。

36. 最後，會整理埋Homeblogger嘅文，會放返上網。

37. 呢堆嘢就係全部用嚟谷新讀者的，「因為我成日型住我就快畀人炒」。

38. 仲有諗緊嘅搞作？有，可能係Whatsapp 或Telegram Group，但等我研究下。應該會整到有我講冇你講（當然你地可以PM我），亦都唔會你地私下傾計（否則極煩），似廣播多啲。可能有啲我平時睇到嘅嘢，圖，諗到嘅嘢去分享咁。但呢個就可能VIP先做了，因為會用多咗一定嘅時間，再諗。

每日一圖—群眾係咪太低估拜登勝算？中國經濟靠出口？

群眾係咪太低估拜登勝算？

39. 今日呢個圖就緊要啦。9月尾，但分別不大。重點唔係邊個贏，而係你見賭盤就估五五波，但人地統計model或者super forecasting（再講一次！唔係民調）就估拜登七八成機會起碼。點解會唔同？點解「群眾智慧」唔work？因為冇insider．記得以前都講過，如果係賭奧斯卡賭諾貝爾獎，會有人有內幕，就會自然推郁個熱門。點解群眾高估侵侵勝算？我估係因為上次「民調失效」，個個就反而進入另一個「民調都好信嘅？」「model都好信嘅？」嘅偏見。一定會Facebook 出文講

40. （Prediction market 同Bookmaker有啲唔同，前者你可以買賣，例如上屆世界盃我早早買克羅地亞冠軍，去到決賽前可以沽走佢，唔使等到尾。後者你買咗只能等收錢，等於馬會）

中國經濟靠出口？

41. 中國經濟嘛，好似鬼咁，信則有不信則無。你要話所有數都係假嘅都隨便你。但至少早排我見有人質疑點解中國經濟第二季領放全球（答案：因為最早爆鑊最早封城！），有人話「中國好靠出口外國」，就肯定錯得很了。自己睇圖。留意一個關鍵：中國出口數字雖然大，但「附加值」低，而GDP係睇呢樣嘢嘅。你部埃瘋成皮嘢，中國佔嘅 Value added，有冇幾舊水？所以個「貢獻」冇你想像中咁大。

Good read — 做總統邊有咁易死。重點唔係你做乜，而係你唔做乜。

42. 做總統邊有咁易死—Nate Silver FiveThirtyEight.com嘅文。留意侵侵確診後，好多人分析佢年紀大風險高，或者肥胖風險高—但好多都忽略咗，做總統，點同？最一流嘅團隊，錢多多都有，風險點會同其他肥老人一樣？留意除咗生物因素，仲有社經因素：白人，有錢人，有大學學位，冇咁易死。照計以上講嘅大家都知，但留意下人地寫文表達得幾好。

43. 重點唔係你做乜，而係你唔做乜—心靈雞湯勵志Brain Cha文，畢菲特成功智慧。但我覺得值得讀。講點取捨，人人都係得廿四小時，點解有啲人好似時間多過你？因為佢地專注，唔做某啲無聊嘢。睇文就明，學會say no．當然有時你係小薯就冇咁嘅luxury，所以係埃汾常講嘅，搏佢老味幾年，捱到上啲可以分餅仔，或至少睇人分餅仔嘅位。然後條路就易行。「其實唔難」