ivanliresearch

九月很難受十月更難受．基金經理又跑輸．Nike業績看中國．玖紙的教訓．東亞病夫！幾個圖睇匯控 (Patreon)

Published:

2020-09-24 19:47:45

Edited:

2020-09-28 17:07:53

Imported:

2021-07

Content

九月很難受，十月更難受

基金經理又跑輸喎

Nike業績看中國

玖龍紙業的教訓

東亞病夫！

幾個圖睇匯控

每日一圖—歐洲科技股市值超越銀行股。意大利疫情受控，原因係……？

Good read — 教你如何Say No。教父級人馬質疑ESG投資

FB Post summary—Bankers Club搬遷

1. 事忙，上咗城寨做節目。另外市況亦麻麻，冇乜大故事寫。就寫幾個小故事。多圖少字，除咗匯豐。（按：卒之寫完—話事忙結果又係寫3000字，呼）

九月很難受，十月更難受

2. 提過的，9月就例牌都係差，大選年就更差。當然數據只供參考，否則個個9月頭沽空發晒達，但真係有啲嘢。

3. 一般嘅9月，就係咁嘅樣，相當難捱，特別係去到月尾呢浸，唔知點解傳統上係好差嘅。留意係所有9月

4. 你可以睇下，呢個世界上幾多又得閒又無聊又有諗頭嘅人。呢個係標普500每一日嘅回報，讀Stat嘅可以拎去玩。又係唔知點解，見到呢幾日係傳統上最差嘅。

5. 至於大選年，就更不用講啦。留意一般係9月中就見頂，今年就更早。

6. 呢個圖畀你睇返，開始有啲reality check嘅味道，股價可以脫離經濟，但一般唔會脫離企業盈利太遠。慢慢地，啲股價就跟返佢地嘅預計盈利咁行。當然留意有個別行業唔係太跟，例如科技股，可能個argument係疫情永久咁改變咗社會，呢堆科企公司有結構性嘅得益，大約係咁。

7. 咁市況可以點？其實冇乜點。「如無意外，十月更難受」。但亦係嗰句，今年我從來冇減過任何倉位，亦不打算咁做。彈出彈入徒傷神。

基金經理又跑輸喎

8. 短寫，但睇圖睇標題應該明。我就唔知有乜好講了，一般唔好阻人發達，但之前都寫過基金經理長期跑輸大市。另外彭博都寫過，今年係基金經理證明自己嘅最後機會—大牛市，佢地又話雞犬皆升，或者自己受制於每隻不能渣超過10%，冇得買晒騰訊Tesla．市差呢？又話乜都隊，不能倖免。好啦，今年咁大嘅上落市，照計揀股呀，timing呀，絶對分到高下。但結果……

9. 不過，未完嘅，以上只係截到6月尾為止。繼續努力

Nike業績看中國

10. 剛好一年前寫過！又係業績。上年出完業績創新高，都只係90幾蚊。今年出完個業績？130蚊都見過。呢隻係真係走寶的，之前諗過推，唉。

11. 其實6月尾時，出上一季業績，意外蝕錢[IL1] 。當時股價都大跌，就係嗰時想推。不過世事沒有如果

12. 但仲有乜睇到？上一季業績時，已經見到大中華地區係唯一亮點，支持住成盤數。今次亦都係咁！（上面個圖）。

13. 另外留意，歐洲中東非洲，雖則收入差不多係大中華嘅double，但利潤係差不多的。

14. 亦畀你睇到兩樣嘢：對於外資嚟講，中國嘅營商環境，仲係相當好（當然你不能踩過紅線）。另外，你睇到中國嘅經濟復蘇。呢啲係冇得呃的。

玖龍紙業的教訓

15. 亦只係快寫兩句，上篇文講咗，我話估業績不錯。結果第二日（星期三）股價勁升。我知，星期四跌返啲—但兩日夾埋都仲升，仲要個市係咁跌。況且，你星期三朝早開市飛入去，都仲有水位的。

16. 不過個重點都唔只係賺錢。嚟緊你都可能會見我估下出完啲消息，股價會點。真係未必幫你賺到錢的—你早一日知就好有用啦！

17. 點解仲要寫？我甚至建議你都練習下，睇下啲業績或其他消息，估下會對股價乜影響—冇錯第二日可能一開市已經即升，或即跌，即係賺唔到錢—但至少你可以練習，知道自己係咪識分咩叫好消息咩叫壞消息。唔好走去以為「玖紙純利升7.5%麻麻地」。

18. 呢個係好好實驗。有人以為股票唔係升就跌，都係亂咁。咁可以測試下，畀一百個業績，我去估之後升定跌，同你叫個阿毛去估。如果有分別嘅，證明係有技術含量，冇嘅，咪證明係估大細咁。

19. 你可以睇下你係咩水平。

東亞病夫！

20. 呢隻仲好笑，一跌就10%。咩事？因為賣資產，賣人壽。咁都要跌？因為市場以為有更大動作。故事就由最初Activist fund Elliot狙擊東亞講起，話咁快就6年，差不多得個桔。冇東亞當然係經營不善，睇股價就知。原本以為佢會賣走東亞中國（都幾大舊），甚至成間賣盤。結果只係賣人壽，大家就當然失望了。睇下股價，離52週低位差不多—呢個亦係史上低位。如果冇睇錯，Elliot買嗰時差不多30蚊，坐咗6年，輸一半。你估狙擊手咁易做咩。

幾個圖睇匯控

21. 留返最後先講，因為上次篇文已講咗啲。冇睇城寨節目嘅可以重溫，唔想聽我把嘅嘅，呢度簡介幾張圖就得了

22. 上次都有講，匯控今年嘅股價，係差，但要更差嘅都有。銀行股不濟，歐洲更差，英國更係差上差（因為脫歐）

23. 然後你睇估值（標題錯咗，應係「市帳率」），絶大多數都低過1倍book。100蚊淨資產，市值得幾十蚊。亦係見到英國嘅特別差。匯控？其實已經係中規中矩。所以，鬧還鬧，但都要知道個世界發生緊乜。唔好成日將問題歸究於某班人。

24. 啲友最關心嘅派息。08同09年因為雷曼爆煲，之前話年年唔減派息，被迫放棄，仲要供股。但當時係reset過，由嗰年開始再年年加派息—都保持咗10年—但你見派息仲係未去返2008年（更唔好講2007）水平！然後2020嘅派息將會大減（分析員估，但大約有個譜），6毫幾子，2007年講緊6蚊息。咁成日話下年派返息股價會好嘅，計下個派息得返十份一，股價應該點咯。未來幾年，個派息甚至都唔會返到2019水平—更加唔好講2007。

25. 點解派息唔得？因為冇錢賺！就係咁簡單。08環球金融大災難，匯控都中招，盈利大跌情有可原（不過當年去買美國Household就……）—至少仲有盈利！大把銀行連生死成問題。所以打後先係重點。你見打後咁多年，啲盈利上上落落，但都過唔到2007嘅水平，近5年甚至係低過2005水平。你可以睇下咩騰訊港交所嗰啲盈利同當年爭幾遠。

26. 仲有，今年（2020）當然情況嚴峻，但有幾大劑？發現個預測盈利仲低過2008年！真正嘅大鑊過海嘯。

27. 點解會咁？原因好多，但我都唔同你計畀人罰錢呀，政治上變三文治呀呢啲。實情由2008年開始，啲利潤就冇好過。原因？睇下圖。

28. 銀行就係賺息差嘅，拎平錢返嚟（你啲存款），放數出街。當然仲有其他業務，但呢個基本嘅存貸業務係核心。粗略講，放出去嘅利率水平，同拎返嚟嘅成本相減，就係淨息差net interest margin。

29. 咁你見個淨息差，差不多年年都跌。原因？除咗競爭，最重要係，雷曼爆煲後，美國聯儲局嘅量化寬鬆，短息固然壓低，長債債息都壓到好低。銀行至怕呢啲環境，因為存款利率只能減到零（好難同個客收負利息），但貸款息仲係不停跌。

30. 呢啲係宏觀啲嘅嘢，間間銀行都有份，就唔止係只講咩中美關係呀，洗黑錢呀之類了。當然上篇文都話「環球銀行」呢樣嘢似乎冇得玩，今篇係補充。

31. 所以你見金融海嘯後，股價十年有咁七年都係跑輸大市，仲要係贏就少少，輸就多多。即使甚至北水在買都係冇用的。

每日一圖—歐洲科技股市值超越銀行股。意大利疫情受控，原因係……？

33. 歐洲科技股市值超越銀行股—如圖，是真的。但與其話係科技股做得好（還好，返返年頭嘅位），不如話銀行股死晒，市值今年高位冇咗三份一。仲要多得德意志銀行今年冇乜跌—因為之前幾年已跌晒。

34. 意大利疫情受控，原因係……？—如左圖。原因？就係右圖，因為意大利人好早戴口罩。但點解？真正嘅原因大家都知，因為最早大爆發，死好多人。死過人就會有教訓。

Good read — 教你如何Say No。教父級人馬質疑ESG投資

36. 教你如何Say No -好短，就係話畀啲好好先生小姐聽，點樣適當地say no．首先留意下自己嘅習慣，有幾多情況會say no。然後了解自己嘅極限，睇下呢啲勉強答應嘅嘢佔咗你幾多時間。下次答應前諗一諗，諗下真係想做，定只係因為罪惡感或者責任感—當你唔情願咁去做一件事，而見到對方求其，你就會扯火。最後係學會講soft no—「今晚唔得，下次飲茶丫」。

37. 教父級人馬質疑ESG投資—以前嘅文提過Aswath Damodaran，真正神級學者。今次佢質疑近年煩到嘔，個個老細都講嘅ESG投資。ESG者，Environmental, Social and Governance。如果大家有睇我FB Page或Personal FB應該知我對呢樣嘢好skeptic 亦cynic．個大橋係話，ESG對個世界好—但未夠的，仲要話畀公司聽，ESG可以幫到盈利。仲要投資者都信，ESG好嘅公司，股價會跑出。有好多偽（我覺得偽）研究去講呢啲東西，但作者同我一樣，懷疑根本呢條大橋係有矛盾嘅。篇文相當長下，其實我見人地外國啲文都係長，係香港人先一千字文都話長，抵佢地冇腦—當然我嘅讀者唔會咁。