歐美再炒封關？匯控廿蚊不是夢。Comcast都畀人狙擊。ASM太平洋私有化？玖紙業績似乎不錯 (Patreon)

大市，其實唔係好識睇

匯控如辰衝，廿蚊不是夢

Comcast都畀人狙擊？有趣。

ASM太平洋522私有化？寧可信其有

玖紙2689業績似乎不錯

每日一圖—Contrarian今年唔work。侵侵任內股市好過奧巴馬好多？中國出口崩潰？

Good read — 美國大選精讀。創辦人可唔可以講大話？

FB Post summary—香港人真係好有錢。歐州太多銀行。Playboy再上市。《麥路人》影評。「墨斗先生」出醜記。如何不miss post

1. 搬咗新Office後第一篇。開頭好焦慮，驚影響工作效率（主要係寫Patreon嘅效率），結果比想像中好。都話埃汾係悲觀嘅樂觀者。

2. 另外，又回咗留言。不幸地我有時有啲惰性唔想去睇，問心主因都唔係忙，而係怕—怕畀讀者恥笑或攻擊，影響心情，不過暫時又係過慮。

3. 廢話少講，去片。

大市，其實唔係好識睇

4. 今晚（星期二）就好似跌定啦，科技股又強勢，不用我講。但我想講昨日（星期一），下面啲圖都係之前一晚。　（再提多次，以後「今日」「今晚」係二四六，之後唔會再解）

5. 快講兩句，講過唔止一次，選舉年九月十月傳統都差。昨日美股港股都大跌，其實都唔係好知跌乜。你話因為匯豐咩？歐洲美國一樣勁跌。

6. 你話因為科技股估值太貴咩？但啲科技股又彈返上嚟。特別係蘋果，由跌變升3%，好誇。

7. 反而有個講法，話係擔心疫情第N波，有啲似。你見美國都係炒啲「封關股」，「WFH股」。Zoom同Neflix就固然，遊戲機股，網絡保安股（上面隻CRWD）都升。而同時見啲航空股勁跌。似似地，所以可以睇返3月嗰浸有乜跑出。

8. 香港啦喎，冇乜特別，你扣除匯豐，其實唔係跌好多，亦見啲科技股未死得晒。另外，見到有啲偏門啲嘅股，例如上面呢兩隻（以前提過），呢啲時間就跑出。買呢啲股就係用嚟戥勻返，佢地往往同大市唔同走向。當然仲有隻ASM 太平洋522，下面會講。

9. 後市點睇？都係預呢排會弱啲，大選前往往係咁。但亦唔好等到十一月先買，去到十月中應該可以入定啲。然後如果大選出嚟有乜震憾嘢，可以再買。

匯控如辰衝，廿蚊不是夢

10. 都冇乜好講，梗係唔好買。舊文提過，唔止一次，都話見廿蚊不是夢。不過驚大家冇話題，又同你講兩句。唔好下下都只係搵返肥青出嚟講，我亦唔明做乜要同當年供股價比。

11. 我覺得要均真啲，冤有頭債有主。你話管理層好差咩？冇誠信咩？仲嘈緊你啲派息？秋分都過埋啦老細。但，兩間英資銀行渣打同巴克萊，年內咪又係跌一半。係咪真係關匯豐管理事？佢估值好似係幾間歐洲行中已經最高喎！固然係五十步笑百步，但亦見到真係行業問題。

12. 至於咩ICIJ爆大鑊，話咩洗錢呀，龐氏騙局呀之類，當然唔似生安白造，但亦唔少灰色地帶。但最重要係，匯豐係咪真係重災區？唔使搵實數，你睇上面個表，adjusted for 每間銀行嘅規模，匯豐都叫不知所謂嘅，渣打應該係佢幾十倍（渣打細好多喎），德意志更加係成百倍。事實呢兩間嘅股價亦勁插（德意志之後彈返後話），只係冇乜香港人關心。

13. 當然我唔係為匯豐開脫，叫咗你唔好買。但你見歐資銀行差不多全部股價都死晒，係有行業嘅原因（美資略為好少少，早排咪反彈過些少，但長遠都係冇乜運行）。

14. 比較值得講嘅，的確係政治。但你睇圖亦見到，其實匯豐積弱多年，亦唔係呢一兩年先差。想講嘅係，「環球銀行」呢味嘢，已經不合時宜。舉個例子，你見匯豐，英國又話佢掛住賺大陸錢不負責任，但大陸一樣鬧佢！你話幾大鑊。

15. 所以，不如諗下，分拆開兩間嘢？即係所羅門王咁，一舊匯豐中港，一舊匯豐英歐美，開心晒啦？就好似下面呢間公司咁

Comcast都畀人狙擊？有趣。

16. 狙擊云云，好快解，就係啲管理層辦事不力（例如中巴，東亞，或者匯控），股價未反映真實價值，就會有人走去買返啲貨，有一定數目，然後試圖迫管理層改革（例如派特別息，或者賣咁啲業務），唔改就踢走（管理層係打工仔，可以投票換走）。最常見就係啲家族公司成班友入去出糧，大把錢又唔派息。另外亦有啲好似匯控咁，畀人覺得分拆業務可以釋放價值—即係所羅門王咁，一舊匯豐中港，一舊匯豐英歐美，開心晒啦？

17. Comcast呢？業務多，但似乎係有一定Synergy的。Comcast係乜東西？唔係住美國可能冇咁熟，入面都幾多嘢，以前在GoBear居然提過。有電話，有線電視，固網同流動上網業務。仲有Sky Group，以前係梅鐸嘅，最出名應該係英國播足球。仲有NBCUniversal，旗下有電視，有CNBC，仲有Dreamworks同埋Universal Pictures—亦包埋環球影城

18. 今次狙擊，都係叫佢分拆或重組業務，又睇下點。股價反應就幾正面。不過位仁兄只係渣咗0.4%，要號召好多其他人一齊玩了。

19. Trian Fund Management玩呢類東西，都相當熟手。但今次狙擊嘅係2000億美金市值嘅公司，難度又高好多。況且，Comcast嘅股價，並唔係特別差，疫情前先創過歷史新高，而家都距離不遠。

ASM太平洋522私有化？寧可信其有

20. 嗰時寫港版納指，寫過下ASM太平洋522。結果股價不如預期，100蚊跌到80蚊都冇埋。但今日又忽然翻生，你見午飯後升一成，收市都仲升6%。當然係有啲特別嘢

21. 就係話傳私有化。公司否認咗。當然上市公司文書不可能公然講大話，但好多灰色空間。我就信空穴來風，未必無因。因為成個故事都make sense

22. 留意返，552大股東係荷蘭上市公司，ASM International。不過唔係光刻機嗰間ASML，源頭有關，但股權上無關。ASM International而家渣25%，施羅德基金渣11%，東京三菱UFJ銀行渣住5.9%．

23. 點解要私有化？嚟嚟去去嗰啲理由，就係大股東收返更大價值。但522唔係極殘嗰種，更加唔係咩below book（當然半導體公司唔係銀行地產）。

24. 故事話解私有化？傳係推去上海科創板上市喎。個故事make sense的，估值高好多，公司只關心呢樣嘢。同一舊嘢，呢邊市場市值1億，我可以2億收返，然後去第二度上市值4億嘅，當然要做—中間仲可以集多啲資添。

25. 是真的，當年啲新加坡上市嘅中資股，咪嚟晒香港上。其中一隻係隻旺旺151，96年已經在新加坡上，但成交冇乜估值又低，咪07年私有化，08年拎嚟香港上，身價N倍。

26. 又學到嘢啦

27. 不過單嘢揚咗，仲係咪照做？可能就唔會了，點都過一過冷河。剛剛出完上市公司通告，你下個月就私有化？當證監死的？

玖紙2689業績似乎不錯

28. 呢段真係我自堀墳墓，原本冇諗住寫，但見出咗業績，上次又提過下，咪諗住快手入個Excel寫幾句。點知因為眼訓，搞到都入錯唔少嘢，搞咗一輪。有錯請諒。

29. 大家有福啦，可以扮下分析員101。最偉大嘅係，我畀埋個Excel 你download，所以唔使問我邊個邊個比率點計。自己睇。甚至下次你自己入都仲得。

30. 業績呢度，你見佢重點嘅嘢，我下面張圖都有晒。留意6月尾年結，至憎。搞到我入嘢時都亂。

31. 首先，最重要嗰樣，唔記得整！失敗，聽朝返工記得補返。洗你腦都講多幾次：業績冇話好定差，只有合唔合預期。唔明嘅諗到明，一路都唔明嘅……就月供或者買ETF算。而我不幸地，唔記得睇市場預期估幾多。

32. 但感覺個業績不錯。點睇？當然唔只睇按年（左邊），而係睇半年比半年（右邊）。當然係跌，咁環境都唔跌咩！，但似乎唔係太差。純利半年只跌5%（但，都係要睇預期）。

33. 仲有，見到個純利率同毛利率按半年都升咗，難得。亦因為咁，佢收入半年跌兩成幾，但純利只跌5%

34. 睇返左邊，末期息，係多咗嘅。留意今年全年係0.10+0.22，舊年係0.10+0.18。好嘢，咁都仲加到派息。但，唔好咁開心住，公司要夾硬派息冇話唔得，等於你減咗人工都可以加大開支，不過會有壓力。

35. 然後睇返個Balance Sheet，右邊，媽媽咪亞。淨負債（貸款減現水）只係略升，而個負債比率（淨負債除以上面個帳面值），仲要跌少少。所以唔係夾硬借錢嚟派息—借錢派息絶對合法，亦成日有人做，不過有時反效果咁解。正如你想像下個老公減咗人工但仲加家用，短期梗係好，但萬一佢係借錢呢？咁你同佢兩公婆一條船計埋一齊嘅，咪又係蝕（可能唔係太好嘅比喻，但明個精神啦）

36. 股價？出業績前係大跌嘅（記住睇返業績係中午定收市出，你先知個股價反映咗業績未）。原因？一來近來市況差，二來之前升唔少，三來人民幣忽然走弱。但我估業績後應該反彈。又睇下真唔真

37. 講明，寫呢隻，純粹係以為得閒（結果自己玩自己），加上之前提過下，又見出業績，純係教學用途。冇叫你買。不過呢間公司都好嘢，一路以為佢會死，幾次都死唔去，越做越大。

每日一圖—Contrarian今年唔work。侵侵任內股市好過奧巴馬好多？中國出口崩潰？

38. Contrarian今年唔work—所謂眾地莫企，crowded trade，群眾多數係錯嘅，即使係基金經理。人人都睇好人人都買晒嘅嘢，必定貴，同埋仲邊有力上？應該人棄我取。理論係咁，以往都得。黃色係基金經理最重倉嘅10隻股票，藍色係最輕倉嘅。見到真係燈燈地，你同佢對著幹，沽空黃色嘅，同時買藍色—多數年份都賺到錢—但今年就完全失敗。個市場真係唔同咗

39. 侵侵任內股市好過奧巴馬好多？—我發現好多人都有呢個印象，但，睇圖咪明。根本冇咁嘅事。

40. 中國出口崩潰？—另一myth，好多人以為美國加中國關稅，中國貨出口就冇競爭力，加上好多人罷用中國貨—但現實係中國佔全球入口嘅份額在疫情直頭跳升。主要係電子產品同醫療設備

Good read 　— 美國大選精讀。創辦人可唔可以講大話？

41. 今日兩個都非常精彩

42. What to Expect in the 2020 Elections—好好嘅PowerPoint．唔使問，睇。得少部份關金融事，但睇完包你嚟緊個幾月都比別人知得多。至於同金融股市有關嘅，睇我舊文（兩 篇）得了

43. Are Founders Allowed to Lie?—作者話呢個係矽谷嘅禁忌問題，表面上人人都答「梗係唔得」，實際上好多灰色地帶。只要你唔係好似 Theranos咁離譜，其實好多時矽谷文化都係隻眼開隻眼閉。作者舉咗例子，講微軟最初都係講大話呃咗單生意返嚟。正如大家都聽過Steve Jobs當年發佈會造假，話128但拎部512去行。呢類”pre-tell”好常見，「唔係冇，只係未整好」。然後講到venture capital 同創辧人嘅關係，唔止係畀錢畀建議幫公司敲門。關係其實似祭司同皇帝—佢話你係，你就係。你就無上權力。創辦人先係神，CEO可以有好多個，理論上個個都可以升到上去—但創辦人只有一個。

FB Post summary—香港人真係好有錢。歐州太多銀行。Playboy再上市。《麥路人》影評。「墨斗先生」出醜記。如何不miss post

44. 香港人，真係好有錢— OCED調查，冇咗主要收入下，超過一半香港人仲可以頂半年而唔使借錢或搬走，比例全球至高。得6%話捱唔到一個星期，比例全球最低。

45. 歐洲仲係太多銀行，央行鼓勵合併—西班牙兩間銀行合併後，會出現一間最大嘅銀行。瑞銀UBS同瑞信 Credit Suisse又傾合併。因為政治原因，歐洲傳統上太多銀行太多分行，盈利能力低。歐洲央行推出negative good will，鼓勵佢地合併—但就肯定炒人閂分行了。

46. Playboy再上市—唔多關財經事，老嘢想當年。但檔嘢out咗好耐，紙媒都受困好耐，仲要係成人雜誌？邊有得玩。而家趁錢多人傻又出嚟搏大霧圈下錢

47. 《麥路人》影評　—又係唔關財經事，有人叫我寫Patreon但費事失焦。套戲就係有心無能，劇情推砌，認真麻麻。全文見medium

48. 「墨斗先生」出醜記—都係唔關財經事，全無公共性，講埃汾冇帶錢食早餐點收科。不過幾多人讚好。

49. 如何不miss post —半自己廣告文，有諗過唔放呢度，但可能呢度有啲人都未記得mark “see first” 或者 standard notification．另外有講可以點樣不同方法幫埃汾，但大家訂咗呢度已經最幫到我。