拜登優勢冇乜變．共和黨定民主黨有利股市？拜登上場買乜？侵侵連任又買乜？ (Patreon)

美國大選最新跟進—拜登優勢冇乜變

Myth Buster：共和黨定民主黨有利股市？

拜登上台，就買大企業，潔淨能源，環保股，short vol，但如果有人唔認輸就買定金

侵侵贏，就買傳統股，國防，石油。科技都OK。仲有媒體股。

每日一圖—What we talk about when we talk about 通脹。中國嘅基督徒，多過德國法國

Good read 　— 點解末日博士好似咁型？ 　Facts v feelings: how to stop our emotions misleading us

FB Post summary—挑戰Excel Google Shit？日本郊區鐵路買少見少

1. 埃汾下星期一（20號）返新Office，我估會唔多慣，環境麻麻地，甚至影響生產力。脫稿就唔會嘅，死都死出嚟，但可能寫短啲。（雖則講咗咁多次都係越寫越長）

2. 另外，溫馨提示，二四六出文。所以我文中嘅「今日」「今晚」全部指二四六晚，雖則好多時你睇到時係星期三五日。澄清返，免生混淆，亦令我打少幾隻字，唔使講明「昨日」係星期幾，幾多號。

美國大選最新跟進—拜登優勢冇乜變

3. 呢篇係上一篇嘅延續，當然獨立睇都可以。上一篇其實講基本嘢，估邊個贏，睇啲乜，點解唔好睇民調唔好睇賠率，之前會有乜預兆，同埋話你知今屆市場十分擔心（驚侵侵輸咗唔肯走）。

4. 快手跟進，Economist個model，暫時仲係拜登86%，侵侵13%，冇乜大變。

5. 另外，有人講Nate Silver，2008年50個州佢估中49個，聲名大噪。上屆都係估希拉莉，當然有啲無知嘅事後抽水，但講過了，唔好用outcome去完全判斷人地套嘢。佢當時畀出嚟侵侵嘅機會30%，已係眾多人之中最高—雖然都細過50%—但人地冇話唔會發生

6. Nate Silver檔嘢538，都係估拜登選到，但贏面得77%，細過Economist嘅model。鍾意可以上去日日睇。

7. 我特別想講嘅係，趨勢。出面嘅賠率，或者民調，見到侵侵好似後勁好勁，甚至追過拜登（上篇文有講）。但你睇Economist嘅model，只係好微弱咁低位反彈。如果睇538，今個月侵侵直頭越嚟越差。邊個準？又可以睇下

Myth Buster：共和黨定民主黨有利股市？

8. 好多人問「共和黨定民主黨有利股市」呢個好基本嘅問題。好似好簡單，但殊不簡單，訓練你思維。

9. 嚟緊你會見到好多傳媒都講，引用唔同嘅圖。咁簡單嘅數據，照計一搵就知，但你都會見到有唔同結論！有啲話共和黨有利，有啲話民主黨有利。

10. 埃汾短答你：答案，其實唔太明顯，差不多。不過真係要揀，就似乎係民主黨較有利嘅。上面兩個圖見到。

11. 坊問啲數字出現咩問題？我地可以睇下上面呢個圖。做得好的，不過冇計埋唔同黨之下總數，你可以自己計。但睇唔睇到最大問題在邊？在於，唔少人係用道琼斯指數！咁就死得人了，因為已經寫文講過道指唔科學。但因為夠耐，如果你要睇到N年前就會用道指。但我覺得完全唔科學。

12. 另外，好多人忽略咗，特別係講侵侵任內股市—美國總統，係1月先上任嘅。多數呢啲計算都係計上任。但股市往往炒預期，例如侵侵都未上任股市已炒到飛天。咁點計？

13. 所以，short answer，其實民主黨任內股市似乎好啲。但，why bother？

14. 到今日嘅戲肉。頭先講咗，唔好因為邊個黨上場而去估個市。但的確有機會見到唔同黨嘅政策，對唔同行業有影響。正如上次講：邊個黨上台對成個股市唔係咁大影響，但對邊啲贏家邊啲輸家就大影響。特別留意三個行業：能源，醫療保健，同埋科技

拜登上台，就買大企業，潔淨能源，環保股，short vol，但如果有人唔認輸就買定金

15. 首先係，比較大機會嘅情況，拜登上台。暫時呢個都係市場普遍相信嘅劇本，咁你見到了，股市炒將來嘛，由拜登勝出初選到而家，股市表現相當不錯。

16. 冇錯，有人話擔心佢加稅，好大可能會，呢個係佢最主要嘅政綱之一。但至少佢冇侵侵咁不可預測，唔會忽然搞下呢間公司，之後又益下第間公司，投資者最怕係不確定性。

17. 無論如何，加稅對啲高估值公司不利，好可能會見到科企同醫療保健股受壓，近期科企弱勢，可能亦反映拜登大機會當選（醫療保健就企得硬啲，不停炒疫苗消息）。但照計拜登任內，長渣大企冇乜輸。亦都預期大市會冇咁波動，早兩年風行一時嘅short vol（主要係VIX）應該有得繼續玩。

18. 仲有，相比於侵侵，拜登係比較會推動潔淨能源，甚至Tesla都有利，不過堆嘢已經升定先，亦可能係反映拜登會贏。都話股票幾時都炒預期，等到拜登當選然後好似你啲網友咁先去慢慢諗有乜受惠，遲咗幾十拍了。咁當然，石油股怕且冇乜運行。

19. 銀行股呢？就可能不利了，至少冇咁易做回購。

20. 當然，仲有個小小黑天鵝灰犀牛長尾風險，就係如果侵侵唔認輸，咁點算？多數都估股市會大跌（2000 小布殊對戈爾嗰次都係），同埋就要買定黃金了。一早叫咗你啦

侵侵贏，就買傳統股，國防，石油。科技都OK。仲有媒體股。

21. 如果侵侵贏呢？我覺得機會不大，但講過，唔好用你自己嘅意願同口味推測全世界，中二病嘅人好易出事。所以都要照分析

22. 侵侵任內，股市好似表現不錯。但正如上面講，好多係佢未上任已升定先，點計就隨便你。仲有，股市表現咁好（例如今年），亦好大程度多得聯儲局極寬鬆嘅政策。所以之前講，邊個做總統實在未必係關鍵。

23. 幾肯定嘅係，拜登上場會加稅。所以掉轉諗，侵侵連任到嘅，老牌大企業，例如國防（Lockheed Martin LMT），石油能源（Exxon Mobil XOM）會利好—唔好忘記侵侵係climate change denier

24. 仲有，科技股都可能OK（即係，無論邊個上台都要買）。雖然矽谷差不多一面倒係反侵嘅（睇上面嘅圖，另外，知道點解係Oracle買TikTok唔係微軟啦），同樣地，侵侵好似好反對啲科技股，但你見佢任內，把口就鬧得多，真係做到針對科企嘅嘢，冇乜。

25. 但當然了，如果侵侵連任，中國生意多嘅美國公司，就小心啲了。好可能包括迪士尼，蘋果，仲有Tesla

26. 好得意地，有人估侵侵連任，媒體股最開心。諗下都係，雖然佢日日鬧人fake news，又話要拉人封艇，但佢任內一樣冇做過啲乜。反而多得佢，媒體日日有話題，Twitter Facebook固然多謝晒，但連擺明唔妥佢嘅 NewYork Times，在佢任內都升幾倍！所以睇嘢唔好咁表面。

每日一圖—What we talk about when we talk about 通脹。中國嘅基督徒，多過德國法國

27. What we talk about when we talk about 通脹—我作的題。主要留意打棟嘅y軸，美國不同東西，20年貴咗幾多，官方數字。官方CPI大約係2%一年，所以廿年就差不多升50%—你見好多都係嗰個水平上下。但留意啲outlier，貴得最多嘅，全部係服務。讀書，住屋，醫療保健，護老。升得少嘅，係實物，特別係電子產品（睇下電視機幾咁平）。問題係，冇好嘅大學就更難脫貧，冇錢搵人照顧老人家小朋友之類，亦更加難搵到好工。所以都係貧者越貧

28. 中國嘅基督徒，多過德國法國—你試下同人講，應該好多人唔信。少講政治宗教，但是真的，中國嘅基督徒（廣義，包埋天主教徒），應該有4000至7000萬—肯定多過德國或法國。固然呢個係因為中國好多人，但亦見到普通人諗嘢嘅盲點。正如印度嘅回教徒，人數多過伊朗同土耳其夾埋！

Good read 　—點解末日博士好似咁型？Facts v feelings: how to stop our emotions misleading us

29. 點解末日博士好似咁型？—你發現日日講爆煲嘅人好多Fans，人人好鍾意，因為好型。點解型？文中有講。其中一個原因係，樂觀者總係好似Sales或者Brian Cha，一定係有陰謀，梗係想呃你錢。悲觀者就好似為你好咁。呢系列嘅文都好好，將來會再貼。但我避免在Good read 不停咁貼同一個人或同一個網嘅嘢，免得你以為我偷懶。

30. Facts v feelings: how to stop our emotions misleading us—睇題知講乜， Guardian嘅文．作者Tim Harford 大有來頭，我以前寫Book List時推介過佢本The Undercover Economist，有中文版的。篇文係佢新書How to make the world add up嘅摘錄。講人人有認知誤差，本能抗拒違反自己觀點嘅證據，同埋認為自己好清醒其他人低能，呢啲都老生常談。但佢提到一樣幾有趣：好多人並唔係咁白痴，正經做實驗佢地好多都識分Fake News，但點解平時照樣都係share？因為做實驗時佢地腦，平時唔用。平時情緒為先，就唔會諗，判斷力就低。作者話唔係教我地要完全冇感情，而係應該停低，諗一諗。

FB Post summary—挑戰Excel Google Shit？日本郊區鐵路買少見少

31. 挑戰Excel Google Shit？得唔得架？—AirTable又新一輪融資。居然有唔少讀者用過呢個東西。但問返行內人，應該都係搏賣盤。在辦公室軟件市場要挑戰老大哥，太難了。

32. 日本郊區鐵路買少見少—好簡單，人口收縮，仲要老化，而後生仔都去晒大城市搵機會。呢類全國湧晒入大城市嘅情況，全世界或多或少都有，亞洲國家特別勁。交通便利，起鐵路起公路，原本係想收窄城鄉差距，結果反而令問題惡化！