畢菲特點解買日本五大商社？疫情下狗價狂升！狗股都狂升。越有錢就越信科學，但越有錢就越唔信疫苗，咩玩法？ (Patreon)

畢菲特點解買日本五大商社？

每日一圖—越有錢越信科學。但越有錢越唔信疫苗

Good read — 疫情下狗價狂升。狗股都狂升！

FB Post summary—首期一炮過都有得見報？

版務—10月新搞作

1. 繼續都係星期二四會係講貼市啲，有時間性嘅嘢，一日幾個故事。星期六就盡量隻中，只講一或兩個故事，同埋係冇咁貼市嘅，深入啲。

2. 下次可能會講人人都提嘅SPAC（Special-purpose acquisition company），唔少嘢要消化，希望下星期長假期睇得晒又寫得出。但，埃汾慶祝結婚8週年呀，噢耶。

3. 仲有，下星期四雖然係紅日，但文係照寫的。又，埃汾慶祝結婚8週年呀，噢耶！（冇錯我係10月1號結婚的）

4. 可能將來週末寫嘅，包括PayPal/Square，或者微軟。不過今次寫嘅，之前都唔少人話有興趣，就係畢菲特入股日本五大商社嘅啟示。

畢菲特點解買日本五大商社？

5. TLDR：Economist 認為畢菲特睇中日本商社會更加重視股東權益。彭博就認為睇中佢地嘅現金流，Cash Cow

6. 畢菲特入股日本五大商社，至今差不多一個月。當時即時寫過文，只係表面嘢。然後我見後續嘅分析，普遍都唔到肉，真係冇乜邊篇寫得好。鬼媒好多嘅分析，甚至以為呢啲商社係commodity trading house，實在亂嚟。冇好嘅文，我寧願唔分享。等咗一排，彭博當日有一篇唔錯（要科水），Economist 早幾日都有篇幾好（也是要科水），就等我sum up 下，加埋自己見解。

7. 背景同Factual嘢不再重覆，自己睇舊報導或者當時我FB Post．問題係，做乜畢菲特睇中呢堆公司？仲一次買5間（三菱　三井　住友　伊藤忠　丸紅），全部都買到超過5%？留意雖然「只係」60億美金，同巴郡嘅1300億相比唔係乜，但已經係佢最大嘅海外投資（當年入股比亞迪先3億美金咋）

8. 除咗因為之前發咗日圓債手頭好多Yen（都係原因之一），應該仲有其他原因—至少都要諗下咁多公司唔買，買呢五間。

9. 先講Economist篇文，首先講，睇表面成件事真係唔多make sense，難免令人覺得股神係咪又變燈神（我在Facebook都有提畢菲特近年戰績麻麻）。Economist就當然係拎返股神自己嘅投資標準出嚟，話日本商社，好似完全違反佢投資哲學喎。至少表面係咁（埃汾按：人會變嘅，股神以前唔玩新股添，而家都買Snowflake，仲執咗唔少錢）

10. 股神話鍾意公司業務夠簡單，另外最好平得嚟又有可靠嘅回報（其實呢句廢廢地），仲有，要有「護城河」，獨特嘅競爭優勢云云。Economist就認為，商社完全冇呢啲東西！

11. 先講簡單，日本嘅公司好多都不務正業，Sony又有旅行社（應該係），彈珠機公司又搞即溶咖啡。仲有最鍾意搞交叉持股，令到外人狙擊唔到，十分神化，絶對唔係英美嗰套。而商社就係雜中之雜，好多人都知最初日本七大商社歷史悠久，由財閥年代開始。戰後就幫日本入口能源，金屬，搞搞下就變到乜都做，三菱又做KFC，伊藤忠又做便利店（全家），仲周圍在亞洲入股其他公司。

12. 至於平？的確係算平，只有伊藤忠係一倍Price to book 樓上，其他全部都Below book（埃汾按：但而家好多公司都below book）．不過你睇啲盈利能力實在麻麻，主要因為好多咸豐（其實係幕府？）年代積落嘅資產，經常要減值。

13. 競爭力云云，呢啲公司點睇都唔會死。但只係生存係不足夠的，唔死唔代表係好投資（埃汾按：中國銀行都冇死呀，花旗都冇死，匯豐都冇死）。甚麼護城河，其實冇乜—呢五間咪各自係對手。但又唔會做合併提高回報的。

14. 以上係表面嘢。Economist講咗一樣嘢，就係我都有講嘅。畢菲特自己在1998年被問到投資日本，佢當年都係冇乜興趣，但提過如果日本公司更重視股東嘅，就會改觀。

15. 日本公司的確唔多重視股東回報，頭先講不務正業　交叉持股　難以狙擊呢啲已證明到。但近年係有改善嘅，亦多得安倍晉三。首先，好多時而家管理層薪金都同股價掛勾（以前係唔會嘅！），咁就同股東回報一致。否則如果股價升跌我都照出大份糧，咁股價關我鬼事，理得你。另外，亦都係多咗派息嘅，以前係鍾意周圍走去投資其他廢拉柴嘢。正如我Facebook Post都有講，日本似乎係繼續想改革股市，對外國投資者友善啲。

16. 好啦，概念野講完，但彭博分析，就比較多講數字。所以我兩篇都睇兩篇都講。

17. 彭博呢篇，就唔同你講咁多意識形態，一句：Cash Cow

18. 相當有趣，彭博半講笑話，會唔會畢菲特都用stock screening tool（埃汾按：彭博終博機就正有一個，好強大的說）？因為只要一用，就可以睇到呢五間公司係呼之欲出—當然事後先知

19. 畢菲特經常強調現金流，同埋平。以巴郡嘅規模，亦都冇乜可能投資太細嘅公司。用呢啲準則，其實可以back test 返五間商社，係符合呢啲條件嘅。

20. 點screen出嚟？set一堆條件，然後睇篩剩的。首先要平，below book．另外要現金流勁，free cash flow yield 大過10%（FCF yield呢樣嘢有啲深，唔係派息，詳情自己睇，或者有機會我再解），仲要不能太細，一年free cash flow 至少有20億美金。

21. 彭博嘅分析亦都篩走咗汽車同能源公司，因為情況太嚴峻，亦都篩走埋電訊公司（股神傳統上都唔買），金融公司（股神已經渣好多）（埃汾按：其實幾矛，冇買過嘅又話唔計，但買得多嘅又唔計，Anyway唔好駁故）

 22. 結果，不計汽車能源電訊金融，而符合晒三個條件嘅，只得10間公司。有三間就係日本商社，三菱，丸紅同住友！（留意伊藤忠above book，而三井嘅free cash flow yield 不足10%，只係放埋入嚟比較）

23. 順手睇埋，仲有不少大家熟悉嘅公司，包括英美煙草（仲敢買煙仔股），香港嘅長和（1），郭台銘嘅鴻海精密科技，韓國嘅浦項制鐵，香港上市嘅大陸公司網易（9999）（埃汾按：計錯數呀？），加拿大嘅化肥公司Nutrien，同埋美國/以色列藥廠Teva Pharmaceuticals

 24. 呢幅圖亦都見到，近年呢五大商社嘅free cash flow 改善不少，留意係近年嘅事咋。

25. 因為free cash flow 強，所以負債比率降低咗好多。留意十年前，間間net debt to equity 都仲係超過100%

26. 既然估值唔高，現金流又強，又肯派息，咁當然股息率又高返了

27. 而呢啲東西，正如上面講，同安倍晉三嘅政策好有關係。好多人只集中於「安倍經濟學」加消費稅，印銀紙，幫女性就業等等。但就忽略咗佢對股市嘅改革，成功將日本股市由圍內人圍威喂嘅遊戲，叫做吸引到更多國際投資者參加

28. 由安倍第二次上任起計，日本股市表現相當出色，差不多跑贏晒全球市場，就只係僅輸畀美股標普500指數，同埋大陸嘅滬深300指數。

29. 正如之前講，相信日本股市會有更多人關心，識日文又開到戶買到日本股票嘅嘅，實在可以留意下。

每日一圖—越有錢越信科學。但越有錢越唔信疫苗。

越有錢越唔信疫苗

30. 呢個圖真係挑戰你常識。打橫係有幾信疫苗係安全，打棟係有幾信疫苗係有效。留意，信佢係安全，同有效係兩回事。分成四格，右上角就係覺得又安全又有效，左下就覺得又唔安全又冇效。見到右上角最出係咩國家？印度，烏干達，well．左下呢？日本，韓國，法國。係咪同你估嘅有啲唔同？實情係落後窮國，啲人可能目不識丁，又唔識上Facebook睇素人父母，咪聽政府點聽醫生點。等於我阿麻阿爺嗰代，未必好科學，但佢地覺覺讀書唔多，服從權威。拿，到啲日本仔韓仔，識嘢嘅，就唔同咁諗。

31. 值得一提係，呢個調查2019年做，未反映今年。FT呢篇文有講，到爆肺炎，就好多富有國都由唔信變信。果然針拮到肉就知痛。

越有錢越信科學

 32. 不過埃汾成日提大家唔好簡化問題。乜圖都未睇時，有人可能以為富國嗰啲就資訊多冇咁笨會信疫苗，睇完第一個圖，答案似乎相反。但，係咪又只係因為富國啲友唔信權威（正如我上一段講）唔信醫生反科學？又唔係喎！。你睇今次呢個圖，上半截，有幾信科學同有幾信醫生，的確同人均GDP成正比的。但睇埋下半截，就似乎相反（呢個亦係同上一段個圖差不多結論）。越富有嘅，越唔信疫苗。即係話，富有國嘅人，信科學信醫生但唔信疫苗。相當奇怪。但明明主流科學家同醫生都係信疫苗的。唔知點解釋呢種精神分裂。你問我？就係其實啲友根本唔信科學！只係答「唔信科學」好似顯得自己好廢。但「唔信疫苗」好似型啲。

33. 照舊，留意個統計係2018做，未爆肺炎。爆咗相信又好唔同了。同埋留意下半截個圖，個trend line唔係fit得咁強的，啲點好散下。同上半截嘅圖幾唔同。似乎信科學信醫生一回事，但畀人打支針落自己度又另一回事，打落個B度更加另一回事。

Good read — 疫情下狗價狂升。狗股都狂升！

34. 疫情令狗價狂升—是真的，升咗一個開，BBC的報導，相信其他地方都係。多得lockdown，啲人多咗時間在屋企，又要搵啲嘢陪。

35. 唔止狗價，連「狗股」都升！—英國有隻股票Pets at Home，今年都升得好勁！亦因為啲人洗錢落貓狗度。年初至今升四成，低位到而家更加升一個開！

FB Post summary—首期一炮過都有得見報？

又係只係得一個 post，仲係特登在呢篇文之前出，費事吉咗呢部份咁怪。但下星期會密返啲。

36. 首期一炮過都有得見報？—林作嘅最新搞作。但想講重點，對任何靠名氣搵食嘅人嚟講，冇CLS（comment, like, share）慘過畀人鬧。所以唔好走去回，唔好share。要鬧要恥笑就cap圖得了．你去鬧佢即係幫佢搵錢。

版務—10月新搞作

37. 10月應該有新搞作。應該會將「每日一圖＋Good Read＋FB Post Summary」分拆出去做一個平價版，吸多啲讀者。當然大前提係現有讀者唔需要畀多一個仙！但有可能我會將個「每日一圖＋Good Read＋FB Post Summary」拆去星期二四出（你地照舊會睇到，不用擔心），咁我星期一三五就冇咁忙（唔好忘記仲要整份「每日一圖＋Good Read＋FB Post Summary」畀平價版）。

38. 仲有，應該10月會將以前Homeblogger嘅文全部整理兼放出嚟，亦係吸下新讀者。當然現有讀者自動會睇到。但我應該唔會貼出嚟，可能放個zip file算。