美股軟件股Snowflake IPO。輝瑞雷神離開道指就升。香港疫情炒都都有。領展5日新高。匯控新低。TVB大跌HKTV大升。李嘉誠又增持長實。金管局又撞錢 (Patreon)

美國軟件股IPO狂潮—Snowflake 及其他

踢出道指嘅輝瑞雷神，果然好表現

香港疫情受控炒極都有

領展5日新高

港股強弱股分野好大- 匯控新低

TVB大跌，HKTV大升

In KS we trust（again）

金管局又接錢

Good Read —天才就係有obsessive interest。政府識乜春？

Facebook Post Summary　—列斯值幾錢？數碼驗孕棒。廣東話字幕Startup。幾時取消壓力測試？A股散戶買基金多過自己炒

［新環節］每日一圖—「劣等民族先用Android」。識英文好重要。丹麥股市勁得有理

版務—　一個月感言（長而不太重要，可快睇，所以放最尾）

1. 係咪好豐富呢。今日其他部份寫得好長（都兩千字！），市況又冇乜特別，加上埃汾部埃瘋update咗iOS後個相簿神神地，所以正文寫得散啲，多故事，但短評。

美國軟件股IPO狂潮—Snowflake 及其他

2. 今日單主菜（其他極短），今個星期美股新股上市共集資68億美金，舊年5月UBER上市以嚟嘅一星期新高（UBER集資時機真係好），亦係唔計嗰星期外嘅N年一星期新高。

3. 呢68億，有一半係嚟自三間公司， Snowflake（雲軟件），Unity（電腦遊戲），Sumo Logic（數據軟件平台）。有乜共通點？都係軟件股。事實上Snowflake係美國史上最大嘅軟件IPO（上次紀錄係2007年，VMware），Unity會係第三大

4. 應該大家都知，今年軟件股勁中之勁。雖然電腦嘅嘢我唔識，但最大幾間科企，差不多冇一間係做硬件嘅。一係平台，一係軟件。最大嘅蘋果算係主力硬件，異數，但近年啲增長都係嚟自軟件。只做硬件而最大嘅，可能係剛轉手嘅Nvidia（NVDA），升到癲，但都不過係3000億美金市值，同萬億市值嘅巨頭比仲有啲距離。

5. 正係食正呢條水，Snowflake直頭斬多幾兩，加價。又同時間有畢菲特同埋SalesForce入股，風頭一時無兩。

6. 公司做乜？我完全唔知，實際上三間公司我之前都冇聽過，所以唔好評論咁多。但當然佢地係蝕錢嘅，而講風頭都係Snowflake最勁。三選一，甚至加埋Planatir四選一，都似乎係揀呢間

7. 但你真係問我，我覺得可能係一間都唔揀，風險甚高，反正有其他嘢買。

踢出道指嘅輝瑞雷神，果然好表現

8. 呢個認下叻。之前講過可以留意啲被踢出道指嘅公司，往往表現都好。樓上就係寫完嗰篇之後嘅表現。

9. 舊文寫到明：叫我揀，就似乎都係輝瑞＞雷神＞埃克森美孚。結果都係咁上下。特別係輝瑞同雷神本身都係幾好嘅公司，之前股價表現唔差。

香港疫情受控炒極都有

10. 之前講過唔止一次，香港放寬堂食呀，逐步開關呀，健康碼呀之類，無論你認唔認同，都係相當好炒嘅主題—特別係如果你有內幕的話（不過小心犯法）

11. 不過而家都放到餐廳開到十二點，再放就係人數，當然都幫到餐廳同餐飲股，例如太興6811。但真係炒到水尾了

12. 我反而睇遠啲，都係睇到甚麼開關，健康碼，重新放人入嚟。之前都提過收租股九倉1997，呢排表現都幾好。

13. 其他莎莎178卓悅653大家樂341，就不了。今日（星期二）股價都唔靚仔。酒店股旅遊股之類都冇反應，當然想睇返名單就搵下舊文。

領展5日新高

14. 反而更放心嘅，係呢隻，領展。故事不再重覆講，租金硬淨，會做回購，而仲派到有4厘幾息—望過街估打後一兩年都派到的。之前寫過，今日（星期二）升到5日新高。因為市場上真係冇幾多可以穩陣派到息嘅股票，之前買咗咩匯控嗰啲，總有一日要搵個新歡代替。

港股強弱股分野好大- 匯控新低

15. 強弱懸殊呢個趨勢在美股都見到，你見Tesla話咁快反彈，NVIDIA都係越升越有。但香港更加明顯。呢個主題對大家部署都應該有啲幫助。

16. 強嗰啲都未算最明顯，你見騰訊700美團3690之類唔係特別癲，但啲二線科技股或者生化製藥保健就勁。另外，在弱勢股上更明顯，你睇住匯豐跌到3年近低了。點玩？至於國泰嘛，其實慢開返旅遊（開大陸線先？），應該幫到。但，大把其他嘢買啦。

TVB大跌，HKTV大升

 17. Er…….其實只係應景，冇乜好講。當然都係叫電視，但冇可比性。舊文寫過，如果王維基真係做電視，可能好過TVB，但照計冇而家咁風騷。

18. 至於王維基升乜？唔知，但見啲資金係返返啲科技股度，雖然香港唔係極明顯，二三線科技股升得仲勁（王維基咪三線）。

19. TVB呢？唔知喎，可能因為差佬去搜？如是我聞

In KS we trust（again）

 20. 我都冇逐次講，但其實呢度第一篇文已經係講長和系。出完業績就增持，已經一個月，最新又嚟過，但股價都只係持平。定係應該睇Zoom好啲？呢排走勢幾好，但唔係我首選。

金管局又接錢

21. 係喎，港紙一路都頂在強方，唔好信啲網友講話咩港紙爆煲（事實就算去到7.85亦唔代表咩爆煲，正如去到7.75唔代表股樓皆升）。費事重覆多次個機制了，要睇就睇舊文。另外，都話鍾意經濟日報個表，有列晒咁多次入市。咁對股市有乜影響？其實冇乜直接影響，但肯定係供樓嘅供得少咗。

Good Read —天才就係有obsessive interest。政府識乜春？

22. The Bus Ticket Theory of Genius—長長地。係人都知做大事，除咗銀紙銀紙銀紙，就係能力同埋決心。不過仲有一樣嘢漏咗：an obsessive interest in a particular topic。作者甚至認為，An obsessive interest in a topic is both a proxy for ability and a substitute for determination。因為如果你冇能力，根本冇法有obsessive interest。而只要你有obsessive interest，自然有決心。

23. The Hayek Question —篇文幾好，唔長，講英國政府打算「扶持」本土big tech 云云（Guardian呢篇亦好睇）。咁你估到了，又係講足幾十年嘅國家扶持產業辯論，大政府小政府，政府冇市場咁有遠見，the state cannot pick winners.。作者當然認為政府knows nothing．你可以不同意（睇下韓國？），但值得睇下。

Facebook Post Summary　—列斯值幾錢？數碼驗孕棒。廣東話字幕Startup。幾時取消壓力測試？A股散戶買基金多過自己炒

24. 列斯聯值幾錢？—講球會根本唔多值錢。全世界冇一間足球會值錢過維他奶，因為全世界冇一間足球會收入多過維他奶，更唔好講純利。

25. 數碼驗孕棒 —就係傳統驗孕紙，加個photo sensor去睇一劃定兩劃，然後加個LCD顯示，就賣貴幾十倍

26. 廣東話字幕 Startup —Facebook Page我寫得客氣啲，實則，個語音辨識技術就人地嘅，咁你有乜value add呢？ 

27. 幾時取消壓力測試？—明報文。壓力測試係指「假設加3厘息你供款都仲唔會佔收入太多」，2013年嘅產物，當年估加息。結果真係加咗，但而家減落嚟減到零好耐了，仲唔檢討下？
 

28. A股投資者買基金多過自己炒 —唔多唔少因為基金近年跑贏大市，加上政策扶持，唔想散戶主導，費事又搞到好似2015年

［新環節］每日一圖　—「劣等民族先用Android」。識英文好重要。丹麥股市勁得有理

 29. 「劣等民族先用Android」—其實呢個表都估到，唔使民族主義。好簡單：人均GDP—而蘋果用家當然係平均富有過Android

30. 識英文好重要—原文係咁，自己睇。但重點唔係我挑錯處，否則我就貼上Facebook Page．而係，我睇到已經好快覺得違反常識，然後去Fact Check，仲估到九成係英文source．大家又學到嘢。

31. 丹麥股市勁得有理—（舊文寫過），其中一個原因係睇下個指數：醫療保健股同科技股佔得多，金融同能源（石油）就少。

版務—　一個月感言（長而不太重要，可快睇，所以放最尾）

32. Patreon開咗一個月，540個讀者，算係相當不錯。當然亦多得我極厚面皮地在Facebook叫人訂。厚面皮是優點嚟的，我恨自己過去四十年都太薄。因為面皮薄往往即係Ego太大，多數都係障礙。

33. 上一篇講Softbank 私有化，你地反應似乎相當好，嚟緊其實好可能會講日經指數點計。但呢類唔係平時二四六嘅文，題材都唔同。平時二四六嘅文我多數係一篇文寫幾個故事，同埋比較有時間性。呢個風格好大程度係抄Matt Levine，或者係類似Financial Times嘅LEX，或者係WSJ嘅Heard on the Street —佢地嘅Newsletter都會係一日幾個故事。

34. 坦白講，寫Softbank嗰類，一個故事過，我用嘅時間應該仲少，仲可以一早儲定稿。就我所知暫時大家都係好信任我，隨我發揮（很好）。所以大約方向係星期二四都係寫啲貼市啲嘅嘢，星期六就比較專題（例如以往寫過Palantir，美國大選，通脹，黃金ETF）。

35. 另外，又加個新環節，每日一圖（即係，一篇文會有兩三個圖）。舉手之勞，唔會用多我幾多時間。但我想帶出嘅係：精益求精，讀者信任我，但我唔係個個月袋錢訓低等讀者養，然後貼新聞交行貨，或者分享我去邊食飯。因為呢檔真係親生仔，我當自己生意咁run。每一日我都諗，在唔花我極多時間嘅前題下，點幫讀者add value加新嘢—又或者，點樣將之前嘅嘢做得順啲快啲，咁咪有多啲時間做新嘢。

36. 你諗下，開檔只係一個月，但Good read，FB Post Summary，每日一圖，全部都係最初冇的。有啲讀者提議，有啲我諗。將來可能仲有更多。當然去到一個位就可能出個新的東西，

37. 例如Facebook啲商業Post（數碼驗孕棒就唔使啦，雖然可能多人睇），日本罐裝咖啡搶攻美國失敗，或者101文（例如領航ETF）。我有諗過整一個新的東西，去吸一啲唔多主動投資，但想睇金融商業文嘅讀者。

38. 呢個模式都好多Patreon作者做，例如賴叔（利申：算同佢係朋友）。可能我都係搞二合一或三合一，但例如每舊12蚊美金（即係，唔加價），二合一就15甚至更少—擺明係買一送一咁滯，不為加價，只為擴大個讀者群。

39. 又或者，將「每日一圖」「Good Read」同「FB Post Summary」分拆開去。你地而家睇嘅嘢不變，但新讀者唔想睇我打一大段嘢，只係要呢三味嘅，可能收你5或8蚊咁，整個Lite版。

40. 當中嘅計算，亦都係我經常講：Content Creator係可以幾Scalable嘅一門生意，多一個讀者嘅Marginal Cost極低，所以當然係擴大個量。

41. 但大原則：你地睇緊嘅嘢，正路唔會受影響，唔加價，唔偷工減料，只有多唔會少。

42. Anyway，以上種種，分享我心路歷程，亦同時分享小小所謂生意經。但最重要都係：多謝大家。

43. 大家最幫到我嘅，除咗繼續訂，就係叫多啲朋友訂—或者，報料畀我。唔好介意有時你報咗料我未必寫，你諗下我都500+讀者，仲有本身識嘅行家，記者，FB嘅版友。但，唔少好嘅故事都係嚟自你地的，例如Softbank私有化，例如邱騰華Travel Bubble，例如Palantir．當然你唔報我都會知呢啲故事（否則我就失職啦），但，你唔報我未必覺得係咩一回事（Travel Bubble），或者唔知咁多人有興趣（Palantir同Softbank）。

44. 多謝大家。下篇真係唔寫咁長，特別係Good read，FB Post Summary，每日一圖，否則會搞到份嘢好長。又或者真係好快可以拆多舊出去叫啲懶人訂（當然唔係大家）