［妹仔大過主人婆，一命救全家］里數計劃非常值錢，甚至值錢過航空公司本身。但點解？ (Patreon)

1. TLDR：小小咁多嘩眾取寵，但都冇呃你。相對於航空公司「本業」，里數（或飛行常客）計劃非常之咁值錢，亦非常之咁好賺，特別係美國—有幾誇張？就係啲里數計劃嘅估值仲高過航空公司本身—亦即係，航空公司嘅「本業」，係negative value嘅。

2. 係，呢篇文係放上Facebook 吸新讀者嘅，試下呢個模式。原有讀者咪當 bonus

3. 其實一路知道里數計劃相當好賺，只係唔知「有幾好賺」。因為絶大多數航空公司都係將里數計劃放在自己附屬公司，或者同人地JV（都少了，反正可以經alliance 大家互通），極少會分拆上市，亦唔會公開帳目。

4. 但，就真係多得情先知道有幾好賺。點解？因為冇錢，冇錢就要借錢，但航空公司啲股價潛晒水，發新股唔著數，亦未必有人要。反而利息始終低，企業債息好多都好低，航空公司發債或借銀行錢，當然冇可能好似蘋果亞馬遜咁平。但，似乎都係著數過發新股—呢啲其實corporate finance 101，cost of debt vs cost of equity—掉轉你見，NVIDA同Softbank買ARM，就發新股了，印公仔紙佔大份。點解？因為股價勁嘛，估值高，攤薄效應好低。試下30蚊時發丫，發幾多先夠？

5. 講返，航空公司借錢，唔係篤手指咁借。要抵押。用乜抵押？你以為飛機？錯（有冇諗過你還唔到錢銀行點算？銀主盤就話易搞啫，收咗你架飛機有乜用？拎去打？）。品牌？唔好信啲網友講，冇一舊資產叫「品牌」（當然你可以grant right of use，但另一樣嘢）。咁仲有咩值錢？原來就係呢啲里數計劃，最值錢，拎去抵押。亦都因為咁要做埋估股，就知道有幾值錢

6. 再講一次，唔止國泰，其實美國啲航空公司都係。你見啲里數計劃嘅估值，係仲大過航空公司自己嘅市值—亦即係話「本業」唔止零價值，直頭係negative value—　當然嚴格不能咁講，首先嚴格你不能兩舊嘢分開計，有仙甩治嘛。二來，航空公司即使「本業」，好多都仲係positive book，咁一間公司，係不能負市值嘅。（其實negative book 都不能負市值，你有見負市值嘅上市公司？）。三來，借錢用嘅估值，同你真係上市，亦未必一樣。正如你買樓叫銀行估價，同市價，都有啲落差。

7. 原本你可以睇Financial Times，要科水。但等我做個簡單嘅撮要（樓上都講咗唔少） 

8. 上面講，近期幾間美國航空公司都有發債或借錢，就係用呢啲里數計劃做抵押。American Airlines, United, Sprints, Delta 都有做．意外收獲就係，大家就卒之知道啲數字了。正如分析員講，唔係有呢啲里數計劃？早就破產。睇啲里數計劃借錢估值同航空公司市值就知

9. 唔知里數計劃點賺錢嘅，好簡單話你知。其實係80年代出現嘅嘢，但除咗係好似普通常客儲分外—更重要係，航空公司會賣里數畀銀行或其他商戶，然後銀行會用嚟做信用卡獎勵，相信香港人都玩過。

10. 呢個賣里數嘅收入，對航空公司都相當重要，最重要係幫到現金流—同餅卡或或Facial 券一樣，預繳消費，今日收咗你錢先—至於你第時book唔book到Facial，或者過期唔記得換呀，拎住幾廿萬里數忽然死咗呀，或者放在褲袋洗衫洗爛咗餅卡，就貴客自理。

11. 睇數字，United嘅里數計劃，估價去到220億（美金，下同），而公司市值先得106億—即係「本業」價值係負114億。

12. American Airlines呢？里數計劃估值180-300億，公司市值先得70億

13. 大家最關心嘅因航呢？文冇寫，但我幫你計。市值47億（美金）左右，里數計劃估值係新50億美金。一樣，「本業」一文不值

14. 好啦，示範完里數計劃值錢過航空公司本身就要講埋，點解里數計劃咁值錢。

15. 商業世界，好簡單，一個字：好賺

16. 有幾好賺？例如Delta嘅里數計劃，一年收入57億，純利有25億！42% net margin。United里數計劃都有34% net margin。「本業」？出晒名低，例如國泰2018都只係2%，甚至有時係唔使蝕都偷笑。咁你知點解里數計劃咁值錢了。

17. 仲有兩樣嘢要講，首先，債權人當然比較樂意接受呢啲做抵抽品，因為現金流強勁。上面都有講，你拎飛機嚟抵押，係值錢呀，但年年貶值。仲有我做銀行嘅，或者普通基金，你拎層樓嚟抵抽我可以賣咗佢。但拎住架飛機點搞？唔係咁易甩手。

18. 第二，美國嘅里數計劃，係特別值錢嘅。睇上面啲數都見到，佢地估值遠比航空公司市值高（國泰嘅情況就差不多）。點解？當然又係因為好賺。但又點解好賺？因為美國唔同歐洲，美國係冇乜限信用卡收費上限或息口上限嘅（香港好似冇？），但歐盟同台灣有限，所以美國嘅銀行發卡利錢幾好，咪有多啲水腳去買里數。

19. 呢類里數計劃在美國亦都增長好快，香港唔知，但Delta由American Express收到嘅收入，預期2023年去到70億美金。係而家嘅一個開。有啲細嘅航空公司，一年收入都未有70億美金，文中舉例係英國嘅廉航easyJet

20. 呢啲里數計劃，在美國，疫情前，已經貢獻航空公司三至五成盈利。而家？更不用講，本業全部燒緊錢，但里數計劃仲有收入，吊住公司條命，仲可以拎嚟做抵抽發債救公司

21. 當然亦有人唔同意，論點我上面都講咗。發債嘅估值，同你真實拎去上市，兩回事。「咁好賺就拆出嚟上市啦」。同埋，亦係我都講過，呢啲業務不能就咁拆開嘅。你航空公司收左皮，或咗長期冇得飛，我要啲里數嚟把托？

22. 如果航空公司執笠，咁里數計劃點算？睇彩數，但以往係凶多吉小，同餅卡差不多。如果成間爆咗煲，自然係消失。如果係有人買嘅，新東家好心情又有財力，咪畀你換，即係超群執咗，啲餅卡好似都換到美心（好似係）。而快運畀國泰買起時，啲里數都可以換得返—　但點換就任佢講了，施捨施捨，意思意思。

23. 仲有，到如果飛得返時，可能呢啲里數計劃就唔值錢了。Risk Appetite嘅問題，航空公司fixed cost大，到飛得返時轉虧為盈，股價可以升一截，但穩定現金流嘅里數計數，就似收租股咁，或且似公用股