［生意淡薄不如賭博］孫正義Softbank 私有化？信住一半先 (Patreon)

埃汾按：新搞作，原本答應大家二四六各一篇，信守承諾冇甩稿。話一兩千字結果次次寫到三四千。今次呢個，就係Extra嘅東西。Patreon現有讀者當然唔使額外加錢，一樣睇到，仲係即時。同時我用嚟引 Facebook Page啲友嚟訂的，佢地就睇唔到全文，畢竟好文唔應該免費。

TLDR：孫正義Softbank畀人話不務正業只係掛住炒股票　—嘈乜嘢呢嘈？索性私有化咪專心炒，唔使理你啲小股東。

1. Financial Times周末嘅爆炸料，我就半夜已經寫好篇3000字文仲配晒圖。唔知香港啲傳媒有冇寫，但就算有，都只係搬字過紙。Add唔到Value嘅，我甚至唔明居然有人就咁匯集啲新聞都可以搞檔Patreon，仲有人科水，錢真易賺。但當然，whatever it works，有人訂咪即係有市場。

2. 一係呢，就嘩眾取寵，見到條毛就估有長毛象，咩都無限放大。咁當然多人睇，但冇益。因為根本寫嗰個自己都唔識，得罪講句，讀過大學未？考過CFA未？做過分析員未？炒過股票未？

3. 講返正題，Financial Times篇文，差不多咩內容都冇，好可能係好初步階段。可能或不可能發生，亦都咩terms都冇，但我相信會炒起Softbank嘅股價。香港時間8點鐘開市，自己睇。記住係9984（老母），唔係9434（佢個仔）

4. 要講一講嘅係，個私有化應該會係MBO，Management Buyout，即係而家啲管理層買起（當然可以係其他人借錢畀佢地）。不過在Softbank 嘅情況分別不太大，反正孫正義又係大股東又係CEO。

5. 點解私有化？十單有十單都係Finance 101嘢，上市同唔同上市好壞，股價太低殘，擺明大股東收返有著數。今次都係咁上下。

6. Softbank 做乜生意？最出名當然係流動電話網絡，仲有eCommerce，仲有Yahoo日本。但更主要嘅：係周圍投資，N咁多，數都數唔晒。最出名係阿里巴巴渣住一大舊（廿幾%），仲有WeWork（嘢已瀨），Uber，滴滴，Grab（三間買晒想點？），Slack，眾安在線（係呀），仲有美國嘅 Sprint（美國第四大電訊商，已賣）。一大堆

7. 其實好多都中招，total loss都有，但佢中嗰一兩單就已經夠冚晒其他，原理同李嘉誠買Zoom一樣，呢啲就唔係啲走去數人地燈幾多次嘅網友理解到的。

8. 問題係，李嘉誠買Zoom係私人錢，唔在上市公司入面。但你上市公司咁玩呢，冇話唔得，但就會有一個好大嘅問題：股價會大折讓

9. 呢個問題存在咗好耐，孫正義都知，聽聞佢都好不滿（或者其他股東畀壓力佢）。亦係舊文寫過，孫正義話25-4=9？點計都唔啱數。講公司25T（Trillion，日圓啦當然）資產，4T負債，淨資產21T，點會市值得9T？

10. 實情呢啲嘢好平常，舊文都講過，A公司市值10億 B公市司市值20億，C公司渣住A同B各10%，咁C公司市值一定冇3億。Holding company/Conglomerate Discount。因為套餐bundle上一定係平啲，否則我散叫得了。

11. Softbank 嘅discount to NAV，一度去到七成幾，即係100蚊NAV股價得25蚊。不過而家已收窄到45%左右。係咪合理，就唔知了，但明顯收窄咗。

12. 點解？咁當然係因為股價今年升得幾好，年頭4700，三月低位2700，而家5900，還不錯。上月見過7000添。呢個亦幫到日本股市，皆因Softbank係日經指數重磅股（下面解）

13. 點解股價好返？除咗因為全球科技股都好外，亦因為Softbank做一樣最簡嘅嘢：回購。唔多唔少都係受其他股東壓力，你與其拎埋咁多錢周圍fing，不如回購啦。

14. 之前Softbank就「引狼入室」，有對沖基金Elliot （搞東亞銀行嗰間）盯上，但當然日本麻煩又過撚嘅法例，外資想狙擊成間買起就難啲。你睇書睇華麗一族睇半澤直樹都大約會知。

15. 所以我個問題就嚟啦，既然做得好地地，低位回升咁多，而家先忽然私有化？做乜唔3月時做？同埋，其他股東係咪贊成（當然報導話都有同其他股東打招呼）？

16. 我相信如果係而家做，亦同近排兩件事有關，FT都有講。第一樣，大家可能都有聽到，Softbank疑似買咗大量美國科技期權，搞到大市大起大落，仲好似高位打靶。拿，舊文有講的。

17. 咁見到Softbank之後股價都大跌咗幾日，聽講啲普通投資者好不滿，你做電訊都算啦，你去做創投基金派錢畀Startup都算啦。但，你走去自己買option炒Amazon？咁你咪變咗對沖基金？咁我自己買option都得啦，使鬼投資你公司咩。

18. 聽聞孫正義就覺得好煩，嘈嘈嘈，嘈乜春？索性買返起間公司，耳根清淨。唔好笑呀，私人公司煩少好多嘢，你鍾意點玩都得。

19. 另一單，亦係近期 Softbank見報嘅新聞，賣arm。英國半導體公司，賣畀 Nvidia。雖則之前傳英國當局想阻，但最新都話應該搞掂，呢兩日就公佈完成

20. 咁，其實又多咗舊錢啦喎，又剝離咗啲資產喎，朝正確方向發展啦，再回購咯，再賣緊啲唔等使業務。做乜好地地忽然私有化？

21. 所以，結論都係信住一半先。

22. 另外，比較日本國情嘅一樣嘢，報導講有人都勸孫正義唔好私有化。因為在日本呢，上市公司地位，十分崇高，仲要係入到日經指數喎。任天堂搞咗咁多年都未入到呀！！！ （有機會寫下）

23. 仲有，側聞日本銀行咁放心借錢畀公司同埋孫生，都係因為佢係大上市公司，日經指數第二大權重股喎，6%，225隻喎。再加上，亦係因為日經225成份股嘅身份，先吸引到好多畢業生嚟喎　—　雖則我懷疑，孫正義未必care呢啲咁old school嘅嘢，我又唔係好信佢唔係上市公司，學生就唔嚟　—不過銀行就可能難搞啲，你知幾咁古板架啦

24. 所以，如果私有化，最大打擊係……東京交易所，同埋日本股市。甚麼搶走香港國際金融中心地位，又一挫折。點解？不幸地，日本股市呢，同德國差不多，都係冇乜tech股嘅。我知，Sony都好high tech 東芝都好high tech整車都好high tech，但唔係講嗰回事。

25. 我地講蘋果Facebook 嗰啲big tech。一大堆咩獨角獸，美國大量，大陸有啲，歐洲少量，日本？仲少過香港。呢個another story了，但暫時日本股市，最「似樣」嘅，就係Softbank。冇埋Softbank，仲有乜？Toyota？

26. 最後補多兩點。首先，Softbank 賣arm，作價係400億美金，好似幾好？但有成本嘛。四年前買的，用咗320億美金。四年執25%，還好。不過，留意一樣嘢。買家Nvidia，四年前就係差不多300億美金市值，而家？係3000億。十倍。而arm只係320億買，400億賣，雖然不能蘋果同橙比，但可見arm在Softbank呢四年，認真麻麻。你個買家股價升咗十倍喎！而仲要有部份係印公仔紙畀Softbank—拿，見到上市公司有乜好處啦！

27. 另外，日經指數。講過，Softbank係日經指數第二重磅股，權重6%。第一呢？間公司你都識，Fast Retailing，迅銷，UNIQLO同GU嘛，權重10%，「等於香港嘅騰訊」。

28. 發唔發現something wrong？Softbank雖則大折讓，但而家市值都12T（日圓），Fast Retailing呢？7T，只係Softbank一半多啲，但點解在指數係10%，Softbank得6%？

29. 仲有，全日本最賺錢嘅公司，亦應該係市值最大嘅公司（22T），係邊間？Toyota是也，但在日經指數，只係佔1%。搞乜春？

30. 仲仲有，樓上都提過，無人唔識嘅任天堂，明明係東證上市公司（7974），市值仲大過Fast Retailing，但居然唔在日經225入面，又搞乜春？

31. 呢啲，就下次有機會再講。希望大家鍾意今次嘅特別號。但話明特別號就唔會成日有啦，如果遲下整個新東西先再通知大家。你最初訂嘅二四六newsletter，係唔會變唔會加價的，直到另行通知（例如我畀人炒咗）