美股連跌三日，但唔覺係泡沫。留意道指踢走嘅輝瑞雷神埃克森美孚。香港開關，睇酒店。 (Patreon)

美股連續三日大跌，但我唔信係泡沫

繼續睇啲價值股，例如被道指踢走嘅輝瑞，雷神，埃克森美孚

香港開關未？集思廣益有乜受惠股

Facebook Post Summary —經濟學人封面燈神？歷史媽媽智破AI改卷。抽新股抽到出通告。一個星期三間A股公司股東「錯手」減持。日本黑社會過半會員50歲以上

Good Read—燕麥奶公司引黑石做股東畀人狂鬧。Netflix創辦人新書訪問

1. 朋友早前實現夢想，自己做基金經理。佢話好多坐盤嘅覺得自己似球員，但佢覺得自己似教練（佢係籃球迷）。我呢？我寫呢份嘢，你估下我覺得自己似乜？係似廚師。真的，日本Omakase廚師發辦（其實老母屋企煮飯咪就係Omakase，連你會唔會敏感都唔理）。每次我都睇晒有咩料，然後諗，再整出嚟。諗嘅過程反而最耐，煮嘅過程，打兩三千字，一個鐘唔使。

2. 今日多圖少字（三千字咁啦），去片。另外，買定星期四嘅餸，應該會講美國大選。邊個贏會對股市有利之類。或者簡單啲，到底邊個會贏？其實睇股市往往睇到邊個會當選。

美股連續三日大跌，但我唔信係泡沫

3. 香港時間星期二晚十一點半，仲大跌緊。其實都預咗，雖然上次篇文都叫大家唔使驚，但亦知道唔會係跌一兩日。「至少都三日」。真的，有個咁嘅不成文嘅Three Day rule．跌返三日，殺晒啲太勇猛太大槓杆嘅人先。而我真係冇驚過，你睇其他資產市場（美債呀，拆息呀，外匯呀），相當鎮定，唔係咩系統性問題—當然都可以跌你兩成。但股市就係咁。

4. 以上呢個圖我幾鍾意，比較史上嘅幾次mania（留意未必係泡沫）。好似都係差不多位要調整。但正如Facebook Page講經濟學人封面燈神一樣（最底會再解），呢類東西參考下好，但永遠唔好只信一個圖。特別留意講CPI，而我一路覺得而家嘅CPI失真。況且而家嘅息口同當年好難比較。

5. 想正面啲嘅，畀兩個圖你睇。上面呢個我明明好似貼過但又搵唔返，是但。非常靚仔，你見幾次都係去到半年左右就調整　—然後再上路。所以我唔信係泡沫。但當然冇兩次股市係完全一樣。

6. 再壯下膽嘅，呢個圖更有意義，留意y軸，log scale呀下。極長期睇，你見標普指數都係一條直線咁上，大過離晒罩就會返返去。而家呢？仲未離開好多。所以我唔信係大泡沫。

7. 呢兩個圖遲下我好可能會再用。但想講一樣嘢，以前Facebook Page可能都講過。睇PE（市盈率）然後同歷史比較有一個好大嘅問題，即使你睇預期市盈率都會有問題，因為忽略咗息口環境。我買美債都有10厘息，使乜買股票？除非好平好好增長。但買美債都零息，係兩個世界。實務上係用earnings yield gap，有機會詳解，或者睇住舊post先。簡單嚟講咪係要計埋個美債息落去PE。同樓上個圖做嘅，差不多。你要計及埋市場多咗幾多游資，先可以比較

8. “If the money is anywhere, it has to be somewhere”。以上兩個圖，睇返有幾多錢在股市，同返全世界有幾多錢比。咁，又似乎根本唔係好多錢在股市喎—因為世界實在太多錢。

9. 寫到呢度先醒起，原文好似係免費的。

繼續睇啲價值股，例如被道指踢走嘅輝瑞，雷神，埃克森美孚

10. 好啦，一街話股市同實體經濟脫離，講過N次呢句嘢含糊之極，我甚至懷疑講嗰個都唔知自己想表達乜。請睇，五六七八月，美國嘅職位復蘇緊，雖然好似減慢咗，但未見停。請問，點解話股市反彈唔係反映經濟？經濟唔係好返？  

11. 另外，留意埋。當然今次職位跌得極快，但反彈亦都好快。唔敢話幾時返返3月前嘅水平，但你睇個軌跡，都見到係暫時係近10次衰退之中，回復得最快嘅。請問點解話之前股票升得冇理呢？市場比較少死錯人，當時強勢咪話畀你知今日有呢個圖。到之前不停話脫節嗰啲見到呢個圖先走去買，就遲咗十萬步啦。

12. 既然利息依然低，股市整體又唔係貴到離晒譜，經濟活動又反彈中。頂多係啲科技股估值過貴。咁如果唔想買科技股住嘅，上次已經講可以留意啲價值股，

13. 之前有同大家提過啲美國銀行股，因為債息曲線斜，加上其實疫情間trading income相當好，又多公司發債，銀行做到手軟。早兩日都表現不錯，但今日就回返，所以唔特別講。今日（星期二）港股恒生（11）中銀（2388）之類都唔錯。更值睇係之前提過友邦（1299），星期一勁升但星期二回返。內銀股都OK，不過長線我都係唔睇好。

14. 咁仲有乜玩？就係道指成份股。上次講過執位，但唔係叫你買新入嗰啲，係買被踢出嗰啲。上圖見到，多數踢出嗰啲，之前就急跌，之後就升返，表現仲要好過新貴。

15. 三隻踢出去嘅，輝瑞Pfizer，雷神Raytheon，埃克森美孚Exxon Mobil．叫我揀，就似乎都係輝瑞＞雷神＞埃克森美孚。今年股價表現都係咁。

香港開關未？集思廣益有乜受惠股

16. 之前都提過，香港開關其實係個相當好炒嘅題材，你睇今日一講放鬆，成堆嘢又炒晒上去。如果你有內幕消息就更好（不過好似犯法的）。

 17. 好啦，最新玩法，除咗本地同大陸，當然大家最關心幾時有得去日本。今日邱騰華就走出嚟正式講，政府去信11國洽建旅遊氣泡　日本泰國已有雙邊接觸

18. 。「係咪即係其他人唔理佢」？

19. 但唔緊要，有得去日本，貴一貴都去。講真的，遲下出個poll，睇下幾多錢機票你會去。我估5000大把人肯去，但1萬呢？2萬呢？總有個價。

20. 邪惡嘅我除咗諗去日本外，仲會諗，喂，真係開返，有咩股票受惠？要知真係大嘢嚟喎。會唔會係Airline？國泰293？定去買 Donki（上市公司嚟的說）？可以集思廣益下

21. 我就都係冇乜大志，都係諗返本地股。酒店點都穩陣過Airline，就算唔開關而家都有Staycation頂住，拿，有圖為證，有讀者睇完呢度有錢贏就有得爆房（反正public，我估佢唔介意我公開的，已盡力打格仔，但反正一google就搵到）

22. 想講唔係讀者有房爆我有功勞（輸錢唔好嚟小我），而係，酒店真係有呢啲嘢頂住。我同埃汾嫂原本都想去半島慶祝結婚七周年（好痕！），結果發現個promotion完咗。咦？見底先兆？

23. 所以不妨睇下啲酒店股，甚麼大酒店（45），香格里拉（69），美麗華（71），，甚至富豪產業信托（1881），朗廷（1270），中旅（308）。

24. 另外信和（83）踢出恒指後都連升兩日，早就話係好東西，可惜上星期五踢出恒指時，5億$成交居然都冇踢低隻嘢畀大家買。有機會同大家講解。

25. 「又要信和又要酒店？就有隻信和酒店（1221）」。曲線要講明，冇成交的，唔好買。

Good Read—燕麥奶公司引黑石做股東畀人狂鬧

26. 暫時都希望keep到每次至少兩篇。但其實最難係乜？最難唔係冇好文，而係要搵免費文，不幸地好文多數唔免費（例如你訂我嘅Patreon）。所以偶然會有啲未必直接同金融有關嘅文，例如上次貼過Michael Sandel。另外留意啲文我有機會Facebook 再寫

27. How Oatly chose cash over brand -  Sifted嘅文，留意背後係Financial Times，專講歐洲嘅Start Up。Oatly係瑞典公司，燕麥奶，各式素食者至愛，做得幾成功。最近畀人狂鬧，又話杯葛。點解？因為最新入股嘅股東，係萬惡嘅私募基金黑石BlackStone。好短嘅故事但幾多嘢可以思考。

28. Reed Hastings on New Book, Netflix’s Future — and Why He Fired His Last CFO—NetFlix創辦人，呢排好多訪問，因為有新書出。上星期都有Lunch with FT，不過要科水先睇到。Variety另外仲有篇文只講佢本書，想扮睇過本書嘅，睇文當睇咗。想買嘅，呢度（我絶無回佣的）。我都會買。Netflix係一間企業文化好奇特嘅公司，值得睇。

29. 孫正義Softbank嘅期權交易—Twitter上面某人（衍生工具專家）解釋，算解得清楚。同埋免費。 

Facebook Post Summary —經濟學人封面燈神？歷史媽媽智破AI改卷。抽新股抽到出通告。一個星期三間A股公司股東「錯手」減持。日本黑社會過半會員50歲以上

30. 將來呢部份同埋good read可能寫短啲，因為而家只係呢兩部份都成千字。又，記住幫我FB Page 嘅post comment like and share，有用的

31. 經濟學人封面燈神？—呢篇值得睇，講話啲人認為某啲嘢係燈神，笑下好，但唔好太認真。成個諗法係有問題的，事後fit落去就易，反正咁多期封面你實有得揀。況且人地啲封面都冇叫你沽定買。

32. 歷史媽媽智破廢柴AI改卷—同金融無關，不過幾有趣。教歷史嘅媽媽發現個仔個網上學習系統係電腦改essay，但套所謂「AI」流到不堪。結果媽媽走去答題，啲答案寫兩句廢話，然後亂咁寫晒啲有關嘅key word落去大包圍，就拎滿分。明顯嗰套「AI」只係一個word count

33. 抽新股抽到出通告　—冇乜特別，一齊笑下，有間公司（當然係創業板），抽農夫新泉抽到要出通告！仲要只係中咗800股，價值皮幾嘢！咁都要出通告？咁因為之前佢係650萬去抽—雖然都好少錢，但對公司嚟講唔少啦。

34. 一個星期三間A股公司股東「錯手」減持—明顯係試水溫吧

35. 日本黑社會過半數會員50歲以上，史上首次—人口老化，同埋年青人唔肯入行。風險大，回報低，睇唔到將來。其實係社會縮影