科技股未玩完。買Palantir不如買Paypal，新意網業績速評 (Patreon)

快講市況—唔使驚，科技股未玩完

「反恐大數據股」Palantir – 那萬人迷，包裝多過一切

講開Peter Thiel，留意埋PayPal—同Square 

新意網1686業經超短評—核心業務冇受影響，派息升

Good Read—孫正義係股災元兇？Peter Thiel Zero to One

Facebook Post Summary —牧羊少年騰訊賺13倍嘅啟示，王維基8月數據

快講市況—唔使驚，科技股未玩完

1. 簡單跟進，上篇寫嗰時正係美股科技股小股災。當中有提過美國銀行股，睇上圖，見到星期五表現不錯。但始終唔係長玩長有，我另願買科技股，或者VISA PayPal（下面會約講）。

2. 右下角，友邦同騰訊在恒指權重減低而跌，本身 nothing to do with fundamentals．特別係友邦，應同啲美資銀行股一樣，受惠於債息曲線傾斜嘅。想買嘅就有機會。

3. 右上角，星期五啲恒指成份股新貴表現。留意啲新貴低位彈唔少，嗰日Day Trade都有啲進帳。仲有嗰日科技股普遍還好，所以我估環球科技股只係調一調整。星期四五晚美國科技股大洗倉，好大機會係啲炒期權嘅友仔打靶（其實期權咪即係槓杆）。有散戶（睇樓下張圖），亦有大戶—邊個大戶？孫正義嘅軟銀Soft Bank．

「反恐大數據股」Palantir – 那萬人迷，包裝多過一切

4. 之前個人Facebook提過隻Palantir（留意下公司名點嚟），話未必有機會解，但必買。然後唔止一個讀者想我寫。睇真啲後我對間公司有啲遲疑。都係必定留意，但記住風險好大。

5. 冇跟開嘅，留意公司未上市，但應該9月尾上。唔熟公司唔奇，因為你唔會見到佢嘅產品。公司係911後嘅產物，號稱美國第一反恐科技公司，嘩。情報大數據分析，得意之作包括幫CIA捉到拉登。公司客仔就係政府，情報部門，軍方。亦唔止美國，但講明冇做亦唔會做中國生意。否則仲畀佢美國上市？

6. 我睇呢間公司，只係一個原因。公司創辦人係Peter Thiel，矽谷神級人物。Contrarian之王。佢得意之作？三單，一單比一單堅。第一單，佢係PayPal創始人之一（PayPal亦係我留意嘅股票，下面講）。第二單，佢係最早期入股Facebook嘅人之一。但最勁係第三單：佢係當撈侵忠實支持者！

7. 要知道，矽谷文化，基本上係左傾（美國嘅左），因為多移民多高學歷精英多LGBT。所以普遍都係反侵，侵侵亦相當唔鍾意呢班人。Peter Thiel作為一個基佬去支持侵侵己經夠神，佢仲要係好早已經站台，唔係侵侵贏咗先埋堆。一貫佢Contrarian嘅精神。

8. 同時Peter Thiel亦都質疑啲普世價值，膽敢挑戰主流，例如佢唔認為「民主」同「自由」相容，亦唔Buy咩多元文化。簡單嚟講，奇人一個，夠膽行窄嘅路。就連Palantir總部都唔在矽谷，要去Denver，擺明同主流科企畫清界線。公司仲狠批矽谷賣用家私隱同埋導你上癮賺錢嘅文化，講明自己公司係為人類安全著想，保護軍人，打擊恐怖份子。型嗎？

9. 但即係，呢度唔係教會唔係選總統。講上市下話？咁當然係講錢。唔計Peter Thiel，只睇間嘢，好似係麻麻地。WSJ嘅評論好到肉：

Palantir Technologies isn’t a Silicon Valley startup. It only burns money like one.

10. 公司燒錢，唔緊要，但燒足17年，點信你？以Peter Thiel嘅天才都搞唔掂喎。

11. 或者，你可以睇下，Tech Crunch呢位讀者嘅comment（究竟埃汾一日睇幾多嘢？呢啲咪就係你畀月費我幫你睇文嘅理由）。

12. 公司成立17年，都冇賺過錢。然後三個大客佔咗三份一收入，大家心照都估到係美國政府/軍方/CIA相關嘅嘢。唔講太多政治，但，你估政府會唔會容許呢間公司搵好多錢？公司，就只係一間政府contractor，當然話打算搵企業客，但，17年都未搵到？拉登都搵到啦。

13. 當然，Peter Thiel嘅往績同魅力，肯定吸到一班人捧場。仲有，公司話應該今年可以轉虧為盈，咁你睇Tesla睇王維基都知，蝕錢轉賺錢嗰下，股價就升得最勁。但就只係呢兩樣嘢。

14. 結論？真係獨一無二嘅公司，業務仲要好神秘。呢樣嘢好重要，冇peer 冇comparable，炒到飛天都得。等於螞蟻嚟香港，或者王維基隻1137，香港都冇同業比較，估值好大想像空間。但如果你一間內銀一間內房嚟上市呢？現有幾十間上緊，你個range點都不能偏離太遠。

15. 正路，美股係冇得抽新股嘅，只能上市後追，而公司亦都直接上市，唔集資。unique play，順勢可以大炒特炒，但基本因素真係冇乜。仲有，雖然Palantir成立咗十幾年，經歷不同總統。但Peter Thiel係高調侵粉。我相信，如果侵侵連任，公司有運行。相反嘅，應該冇運行。所以大選可以留意下。

講開Peter Thiel，留意埋PayPal—同Square

16. 另外，講開Peter Thiel，不妨留意下PayPal。後知後覺，但seeing is believing，我點體會到公司嘅強大？其實就係因為你地。

17. 詳情有機會寫多篇文，但簡單講，你地有冇諗過，你地嘅月費，有幾多去左我袋？答案係你畀100蚊，大約85蚊去我袋入面，乜都計晒。當然Patreon就袋咗8蚊，但仲有7蚊呢？就係各式Payment fee，Patreon轉介落我身上。主要就係PayPal。唔止，更精彩係，當我由Paypay將美金轉做港紙，佢係用7.5換畀我。幾咁屈機！

18. 諗下，Patreon搞個平台出嚟，大量競爭，只係拎我8%。但PayPal，某程度上坐定定收錢。幾惡！

19. 本人向來無意討論呢啲「公唔公平」，我就覺得，if you can’t beat them, join them．Paypal有幾多挑戰者，留畀大家討論。但我眼見佢地咁多年都屹立不倒。情況同VISA其實差不多（呢隻亦係HomeBlogger收費片推介嘅股票，早排先創新高，所以都值得訂的）。

20. 記住，全世界最大市值嘅金融公司，唔係中資銀行，唔係美資行，唔係高盛，唔係咩Start up，唔係交易所，而係VISA。每單交易舔少少，就夠佢發達。所以，不如買埋PayPal．

21. 另外都有讀者講過Square旗下嘅Cash App，Square 今年升到癲，聽聞都同疫情有關。但我唔熟Cash App，再望下先。

22. 幾肯定嘅係，銀行冇乜運行。唔使好high tech，但你睇VISA或者PayPal嘅股價圖？而如無意外，如果市場氣氛頂得住，螞蟻集團嚟上市，都係必抽。當然隨機應變，到上市時可能我唔係咁諗，記得又得閒就話多次你知（不過呢隻咁大隻應該總會寫幾句）。

新意網1686業經超短評—核心業務冇受影響，派息升

23. 睇唔到圖唔緊要，最底又係成個Excel畀埋你。呢度讀者先有。

24. 真係快評，一來篇幅關係，二來Facebook Page應會再寫。之前都寫過下，自己睇業務做乜，但基本上係收租佬，數據中心。亦都可能因為咁，所以140億市值都入唔到「港版納指」。

25. 今次業績，只講幾個重點。

26. 識睇當然睇半年同半年比（HoH），公司收入，毛利，持續業務純利都升嘅，完全唔受咩肺炎或政治影響，呢個係一個賣點。

27. 大數純利係跌，但只係因為有業務賣走咗，所以睇持續純利。

28. 大數純利跌，但派息仲有得升（唔派中期息的）。不過留意派息比率都好高，冇得再高，我估亦係公司想吸引投資者。但現價大約3%股息左右，只能講好過冇。

29. 最後，睇返負債比率幾重，但因為有一大舊貸款係大股東新地嘅。唔計嗰舊嘢就126%，都重重地—但公司堅持派息，應該都係想留投資者。

30. Facebook Page應會之後再講

Good Read—孫正義係股災元兇？Peter Thiel Zero to One

31. 孫正義係股災元兇？—樓上貼咗，貼多次。CNBC都係執Financial Times二手，但CNBC免費所以我貼畀你地。講有人爆料話，孫正義嘅軟銀買咗好多大科技股嘅option，升嗰時當然就positive feedback，但一拆倉震落嚟就見到係星期四晚咁了。

32. Zero to One - 講開Peter Thiel，當然睇佢神級著作。講Start Up。我有買，但未睇晒，所以之前書單冇放呢本（我只放自己睇晒嘅書）。呢度有免費PDF，就費事貼出Facebook Page了。因為侵權係唔啱的。

Facebook Post Summary —牧羊少年騰訊賺13倍嘅啟示，王維基8月數據

33. 比悲傷更悲傷的故事 – 牧羊少年個Post網上瘋傳，自己去睇。有位仁兄08年9.5買騰訊，15年歡天喜地130沽咗，仲好有型咁寫信。5年後收返封信，唔知咩感受。個Post有我評論。簡單講，冇得事後睇返嘅，佢坐到13倍已經好叻，相信之後投資都會成功

34. 1137 八月數據—冇乜特別，繼續玩上次嘅指數增長vs線性增長。留意8月嘅數全面回落晒。