希望有得炒多次旅遊股。科技股果然跌三日就定，之後又會點？美股9月驚奇。新地16業績極速評 (Patreon)

  （9月11日上午更新：結果美股尾市又跌過）

小小回顧—科技股真係跌三日就停。港股捉到鹿唔識脫角，慘

回顧完，就前瞻科技股，清洗完再上路

史上咁急跌法，之後會點？

美股9月驚奇—再刺激經濟？

新地16業績極速評—好似不錯

Good Read—基金經理都係買FAANG，點解收咁貴管理費？有人反駁。Amazon唔賺錢？你肯定？

Facebook Post Summary —牧羊少年騰訊之旅，CLSA變成大陸國企，LVMH彈弓手唔買Tiffany，讀大學唔會令你叻啲但令你人工高啲

節目調動，星期六先講美國大選。大課題呀。

小小回顧—科技股真係跌三日就停。港股捉到鹿唔識脫角，慘

1. 今次可以快手回顧下上次篇文，正值美股大跌時。但有提到「Three Day rule．跌返三日，殺晒啲太勇猛太大槓杆嘅人先。而我真係冇驚過」（原文照錄）。結果真係跌三日就跌，傳統智慧嘅嘢。留意當中真係冇乜咩特別事發生。

2. 而其實我都有加大倉位，小小咁大把。不過唔係講自己成功撈底或乜，都話只係小小，況且其實大跌前我都有加，嗰啲就潛緊水。但你笑都好，我係睇長線的。

3. 不過，港股本人真係捉到鹿唔識脫角。一般我係長線，但我唔係本質上排斥短線—我最關心只係提高個總回報，而覺得長線比較容易咁解（至少對我係）。有短線機會我一樣都會寫。一來，呢份嘢服務你地嘛，唔係我自high，我唔鍾意短炒，你地可以嘛。二來，揀個股炒，係過癮好多的。三來，我不拘泥於意識形態，捉到老鼠就好貓（所以以前在星展我份嘢叫Good Cat Weekly，另外仲有份Monthly，有機會解）。覺得有短炒機會嘅，當然分享。

4. 睇圖，真係捉到鹿唔識脫角，抵打。但失敗經驗都同大家分享。上次又係寫到明，「香港開關未？集思廣益有乜受惠股」。真係集思廣益好，我一個人點都係計短，甚至呢鑊嘢都係朋友提我我先有反應。雖則我自己唔炒，但正職做股票，又日日睇咁多嘢，係會對啲新聞麻木的。我見到單新聞，係冇任何感覺。到朋友同我講，喂，邱騰華講嘢喎，嚟真喎，有冇嘢有得炒？先覺得，係喎，嚟真咁喎。

5. 可惜係，上次份嘢我只係諗啲酒店股，失敗！有旅行社股嘛！仲要係你嗰朝開市飛入去都仲有得執些少。都唔好講莎莎卓悅了。當然今日（星期四）跌返落嚟。但呢個theme我估仲有得玩，建議大家真係留意住。特別係啲比較親建制嘅媒體，往往最先會吹風講。

6. 不過都同時間，有讀者PM我話佢有買到樓上堆嘢（費事講明邊隻）。其實唔出奇，咁多讀者。但呢個都要講：我嘅作用就係有時同你地互補，即使有時我唔會畀埋冧把你（因為我都諗唔到！），但我講到呢樣嘢，然後讀者自己醒起有其他嘢，兩者夾埋，咪掂！就係呢啲嘢可以幫到大家。我寫A，未必直接埋到門。你有B，但可能醒唔起．但A+B，就掂。

回顧完，就前瞻科技股

7. 呢部份會寫快啲。科技股之後點？係咪跌定咗？點知。但似乎之前啲觀察（包括Three Day rule）都係啱嘅

8. 之前猜測，都係估係啲期權（option）出事，矛頭直指孫正義嘅Softbank。有人唔同意，覺得佢冇唔係隻手遮天，但大升大跌因為期權引起，就多數人都同意。

 9. 睇圖，大家知VIX（唔知係乜就睇舊post），波幅指數，恐慌指數。多數股災時狂抽（例如3月頭），平時升市就VIX跌。但今次得意，睇下一路升，VIX係咁上，之前都有人提過有啲奇怪。然後就忽然大跌，但正面嘅係，科技股跌嗰時，反而個VIX跌落嚟喎。

10. 呢個怪怪嘅VIX走勢，睇埋上面兩個圖就明，似乎就係見到啲期權拆倉（或曰打靶，抬離場）。

11. 實在唔多鍾用呢個比喻，但屙清屙淨後，洗一洗牌，市場咪正常返。你睇，Nasdaq100之前升到離晒條50天線，3日大跌後，落返50天線左右，就見到支持。一般我唔多信啲咩技術分析，唯一就係平均線呢啲會睇下。

12. 因為，真係邪門喎，你見其他嘢，標普500又好，Tesla又好，金價又好，都係去到個50天線左右就有支持

史上咁急跌法，之後會點？

13. 其實你個倉位仲生存緊，已經不錯，因為你經歷咗10年以嚟最差嘅月份開局

14. 同以往嘅大升大跌比，今年嘅特點，似乎係上落更快。3月嗰浸固然可能因為史無前例嘅疫情，封城，又預計經濟數據會史無前例的差（後來證明係），但聯儲局又史無前例咁上市兼放水，OK。但去到而家都仲係咁快上快落，應該同資訊流通，或者交易科技有關吧。今次係史上最快Nasdaq由高位跌10%，只係用咗3日。以往至少都6日

15. 不過，你估到了，梗係否極泰來。當然呢啲數字唔係一切，但有一定意義。你見史上Nasdaq咁樣急跌後，3個月後平均（或中位數）回報都不錯。咦？其實講過多數大選年都係9月10月差，11月12月反彈的。所以可以睇定啲。

16. 最後多一個歷史數據畀你壯下膽，如果計Nasdaq100，史上得7次會3日跌到10%。而呢7次平均嚟講，平均3個月後都升到9%。（但留意：因為美股過去N咁多年都係長升長有）

17. 所以，現在有持貨嘅應唔使驚。但如果有閒錢嘅，可能可以等多一陣先。不過有人估9月尾會有爆炸好消息，係乜？下段講

美股9月驚奇—再刺激經濟？

18. 真的，篇幅關係，同埋驚冇貨賣，原本想星期六先講。但呢排已經試過捉到鹿唔識脫角，而家我有FOMO（Fear of Missing Out），如果真係星期五六日爆出嚟，對唔住讀者嘛，所以，快寫兩句。信嘅，你可以聽日（星期五）買定股票—但我冇話一定要信呀下。

19. 咩東西？好簡單，摩根史丹利嘅大猜想。估美國國會9月就會通過1萬5千億至到2萬億美金嘅刺激經濟方案。

20. 咁錢從何來？你話呢？In other words，繼續印錢派錢，後果係乜相信大家都估到。但呢個唔係街嘅共識—分析員當然要切法脫離consensus，而人人都知人人都信嘅嘢，係冇乜價值嘅。係要而家人人唔信但你信，然後最後佢地都信，先有機會。

21. 正因為咁，摩根史丹利而家估嘅失業率遠比街低，估嘅通脹比街高，估嘅經濟增長亦比街估嘅高。

22. 由於好大部份係直接派錢，所以當然係利好消費。大家又係可以集思廣益下估有乜股份受惠。但留意今次未必再係啲科技股，反而係啲舊經濟股有機會反彈。應該睇消費股幾穩陣，有冇提議？Nike？迪士尼？戲院股？

23. 都幾明顯地，呢個方案會令美金再弱，所以金價應該有得受惠。仲有就係新興市場，同埋啲商品。

新地16業績極速評—好似不錯

24. 講明先，真係極速，因為冇篇幅，亦都冇時間細睇。我只係用咗唔夠一分鐘望，甚至冇望分析員估咩數，就算開出嚟大瀉分析員個個調低都唔好鬧我，亦唔係叫你買。

25. 但望落，好似不錯。自己計下數（我入Excel都未得閒），但兩個提示：第一，新地係6月尾年結。咁你可以比較下calendar year 2020上半年，2019年下半年，同2019上半年．第二，睇物業租賃，即係收租，唔好睇物業銷售。賣樓呢啲，好睇你幾時賣，收租先係最recurrent

26. 如果我冇睇錯，啲收租收入，算係幾硬淨嘅。估唔到呢？

Good Read—基金經理都係買FAANG，點解收咁貴管理費？有人反駁。Amazon唔賺錢？你肯定？

27. Tech = unoriginal, lazy, consensus, etc　—「啲基金咪又係走去買蘋果Facebook 亞馬遜！咁使鬼畀咁高管理費你咩！」。呢個係幾常見嘅論調，本文就反駁呢種講法。

28. Amazon唔賺錢？你肯定？—好睇，靚圖靚表，深入淺出，普通人可明。呢位仁兄寫嘅嘢幾好睇，可以跟進下。講好多人以為Amazon唔賺錢，或者以為只係AWS賺錢，係錯的。

Facebook Post Summary —牧羊少年騰訊之旅，CLSA變成大陸國企，LVMH彈弓手唔買Tiffany，讀大學唔會令你叻啲但令你人工高啲

29. 牧羊少年騰訊之旅—明報專欄導讀。升市當然多股神，李嘉誠買Zoom買到佔自己三份一身家，果粉買實體股票1000變11萬—但其實都唔及牧羊少年9.5騰訊130蚊沽咁叻—即使後來隻嘢升到500蚊都好。文中話你知點解。

30. CLSA變成一間大陸國企—CLSA企業文化就係同其他行有啲唔同，但賣畀中資後當然保留唔到呢種文化了。其實而家先大執已經比想像中遲

31. LVMH彈弓手唔買Tiffany—講LVMH用乜理由去彈弓手，仲講埋咁啱Pandora又要升

32. 識人好過識字 – 印度經驗，見到入唔入到名牌大學，對你畢業試成績影響不大（印度有呢回事），但對人工影響就大！證明名牌大學唔會令你叻咗，但會令你搵份好工。可能係因為其他非考試嘅嘢，或者品牌效應，或者係舊生網絡