聯儲局放任通脹。債息曲線變斜。金融股金價升。通脹係咪有利經濟股市？ (Patreon)

今日只講一個故事：通脹

聯儲局擺明對通脹放軟手腳

美金轉弱，債息曲線變斜

不投資，向下流

銀行股保險股金價升

通脹係咪有利經濟股市？

預告：下次講388

版務—新搞作，Facebook Post Summary

Facebook Post Summary

1. 話過呢個newsletter係想一篇講幾個故事。但今日主要講一個大故事，我相信有機會係個大trend。

2. 係講通脹。

3. 今日只講一個故事：通脹

4. 不厭其煩講多次，埃汾唔係個太陰謀論嘅人，但總覺得官方嘅「通脹」係呃人的。你睇官方CPI（事實上冇人話CPI係通脹，no I in inflation），真係冇乜通脹。但街頭智慧都話你知，太古城賣幾錢，麥當勞貴咗幾多，到你請鐘點，嫖妓（sorry但呢個係好好嘅指標！），你咪知有冇通脹。

5. 另一個理解，係Milton Freidman嘅名句（此人死得合時，死後佢啲理論就受唔少人鞭屍，但不包括呢句）：Inflation is always and everywhere a monetary phenomenon。換言之，你根本唔使睇咩CPI，甚至睇咩麥當勞，錢多咗，就係通脹。

6. 所以你話金融海嘯後嘅量化寬鬆冇導致通脹？我係唔信的。請參考麥當勞太古城。但提返你地，我呢種觀點絶對唔係主流。

聯儲局擺明對通脹放軟手腳

7. 一大輪想講乜？想講，聯儲局主席最近嘅講話，當時我都冇太留意，諗真啲影響幾深遠。

8. 講咗乜？新花臣，樓上嘅嘢，average inflation targeting。即係乜？用人話講就係第二段：即係容許通脹升到更高都唔加息住。而家目標2%，但唔好以為去到2%就會加息。

9. 再用白啲嘅人話講：即係可以容忍通脹升，唔會阻佢。而利息會繼續低迷，長期。嘩！

10. 股市其實唔算反應好大，但總有其他嘢睇到市場覺得係幾重要嘅事

美金轉弱，債息曲線變斜

11. 首先你見到，美匯指數即時散，跌到一年低位。正如舊文講過，冇得去旅行，唔使去日本唔使去歐洲，你唔多覺。不過仔女在外國留學嘅應該好覺。

12. 另外留意，市場嘅通脹預期，呢排都係咁升。留意返，呢個係由市場數據拎出嚟。因為美國有TIPS，Treasury Inflation-Protected Securities。回報同官方CPI掛勾，有啲香港嘅iBond（BTW，記住抽，政府派錢）。因為呢啲東西有市場炒，你睇啲價，再同返普通嘅美國國債相比，咪知市場預期緊幾多通脹。記住，信市場，唔好信咩學者經濟學家。嗰啲人講錯冇後果，冇skin in the game，冇意思。

13. 亦都見到，美國嘅yield curve（孳息曲線），即時再變斜咗。Yield curve就係比較不同年期債券息率嘅一條線

不投資，向下流

14. 好啦，講咗咁多理論嘢，你話，咁關我乜事？有乜炒？

15. 首先，重覆第N次，不投資，向下流。投資本質係想累積財富，但點解要累積財富？因為有通脹。通脹勁嘅，你啲錢就更唔見洗。投資投機有時唔係咁易分，埃汾反而會睇：你訓幾多身家落去。埃汾除咗在台灣嘅600萬台幣因為技術原因放在銀行生草外（慘，錯過台股升浪），幾時都係fully invested．你3月沽咗貨嗰啲，心理應該好唔平衡，而家追返又唔肯，只會日日鬧股市脫離實體經濟，同埋話好快股災。Be my guest，但我講過，埃汾嘅股票總值，由今年低位（當然係3月）計，已升近六成—其實唔係好難，咪同標普指數差不多。好難咩？但好多人連呢樣都做唔到。我講計成副身家喎，唔係你拎兩皮嘢去買。

銀行股保險股金價升

16. 再講實際啲，你睇星期五，恒指走勢麻麻，因為騰訊700急回。但匯控5同友邦1299十分強。 你見友邦又上返一個月新高，之前因為友邦業績差又去沽嘅，又係走寶，由當時低位已彈返一成。固然兩隻嘢咁強，部份因為之前好殘。亦都未必代表未來金融股就翻生，至少我唔會叫你而家買匯控（但友邦應可以）。重要嘅係知道個世界點運作：銀行就係借短錢（某啲人嘅存款），放長錢（你供30年樓）嘅工具。對銀行股嚟講，當然係Yield curve越斜越好。美國銀行股都強。但再講一次：冇叫你而家買銀行股。

17. 仲有當然係金價亦都彈返。點解？好簡單啫，通脹期望升，加埋美金轉弱。呢度咪話過黃金係終極貨幣，所有法幣（fiat currency）嘅照妖鏡。美金跌，金價點會唔升？當然之前叫大家買金，我亦買咗，跌些少又有人出嚟抽水了。我就真係冇乜所謂，都話睇長線，況月就算長線都仲係輸錢，都仲輸得起嘛。我買幾皮嘢之嘛，又唔係幾百萬。

通脹係咪有利股市同經濟？

18. 仲有一個遠古問題：到底通脹係咪有利股市同經濟？（留意股市脫離實體經濟呀下）。

19. 答案都好簡單：人類歷史就係長期通脹，錢越印越多，易放難數，好少見通縮。而經濟增長係常態，少見衰退。股市又係升多過跌。咁仲未答到你問題？

20. 當然仲有啲智障，會同你講津巴布韋韋內瑞拉甚至國民政府納粹德國，as if 佢地好似識好多嘢。即係你同佢講可樂好飲，佢話你知一日飲五十支會死。最好遠離呢類包拗頸嘅人。而老實，如果係津巴布韋，我更加建議你買金。

21. 正經啲答，好簡單，通脹當然有利股市。睇數字咪知。通脹升，咪企業盈利升。實情都好簡單，因為corporate profit，股價，都係nominal嘅。但好多人連呢句都唔明。咁再解：同樣係賣100個包，如果純利10蚊個我咪賺1000蚊，但如果有通脹，我賣到12蚊個，我咪賺1200蚊。呢個咪profit growth ！

22. 不過，留心少少，近年嘅股市強勢，當然好大程度多得低息環境。但通脹預期高咗，你見美國債息已經低位升返唔少。當然個債息水平仲係好低，但既然埃汾一路話債息極低有利股市，咁似乎冇理由話債息反彈唔係壞消息。應該真係有啲壞，但市場唔只係由一樣嘢去決定。

預告：下次講388

23. 預告埋，未來幾次應該會講港交所388。股價絶對唔平（我指計估值，唔係話380蚊就貴，建行6蚊有找就平，我啲讀者應該冇咁低質），但可能仲有得上。兩樣嘢，一樣係IPO（唔好以為係靠個上市費，上市之後先係大茶飯），第二樣係ETF互通。

版務—新搞作，Facebook Post Summary

24. 之前收到唔只一個讀者講，希望我可以在呢邊都包埋Facebook Page嘅Post。有啲話有時miss咗—其實應該唔會，你去設定see first 咪得，或者日日自己走入去睇—我睇開嘅Page我都會咁做。

25. 如果想每篇在呢邊重貼，花我嘅時間不多，但會令呢邊太多文，你又會收到好多通知。除非好多人堅持想我咁，否則唔會。

26. 我決定做嘅，就係以後每篇文加個list，話你知過去幾日我在Facebook Page出過乜文，同埋導言兩句。即日開始。金融文或非金融文我都會放，因為界線未必清晰，但純廣告文就唔放。暫定係星期二四六每篇都會，如果集埋一星期先又太多了，況且有啲亦過咗時限。

27. 咁我希望大家做嘅，就係照舊幫我Facebook Page谷下人氣，照舊嘅comment like and share，雖然老套又煩氣，但真係十分有用。基本上你咩都唔睇就comment 兩隻字 畀個like 兼share 就夠，講真分你幾十秒，但好幫到我的。

28. 當然，更好就係介紹朋友嚟訂Patreon。有人同我講搞referral program，原則可以，但我諗唔到點執行。諗到嘅提議我。

Facebook Post Summary

芬蘭航空炒人　—　講芬蘭航空炒人，但差不多炒晒本土芬蘭人。仲要係國企。但股價反應相當正面。兼雜談芬蘭其他嘢

領航Vanguard ETF撤出香港—幾受歡迎嘅一篇文。講領航撤出香港，但居然係搬去上海，相當有趣。兼講不少政治同埋ETF行業嘅嘢

香港電視1137主席報告　—講1137業績個主席報告，值得一睇。吹脹地好多討論去咗討論我本人嘅文章排版。

香港電視內部projection　—　其實數學文。都係講1137業績有個圖，佢用linear，我覺得可能用指數曲線更好。