美圖1357鹹魚翻生。香港財赤有利港交所388？新創健659異動 (Patreon)

美圖1357鹹魚翻生？—居然轉虧為盈喎

香港財赤，有利港交所388？—財赤就更加唔減印花稅

新創建659成交有異動　—呢排成交大增

Good Read -黃國英叫你睇少啲KOL，安倍經濟學

Facebook Post Summary

今日晏咗，但絶不脫期。亦都多謝9月新加入嘅讀者。留意有人話整summary，樓上分題就係了，再每隻故事寫一段仔就好長。

美圖1357鹹魚翻生？

1. 呢輪狂炒科技股，大家都知。但呢隻美圖1357，真係被大多數人遺忘咗。事實呢隻亦係妖股一隻，2016年尾上市。留意啲人講「香港冇科技股」，騰訊700之外，會數聯想992，甚至金蝶268金山3888，講埋啲手機設備股，都唔會講呢隻。

2. 美圖上市之後，整體都係令人失望。睇個股價圖就明。8/9蚊上市，炒到見20蚊，之後都係一浪低於一浪，而家係個幾。市值100億唔夠，作為大陸都有啲名氣嘅科技公司，都幾水皮。

3. 當時我甚至在01寫過篇文，睇死隻嘢上市一年後就潛水。留意返嗰個年代仲未係咁熱捧啲蝕錢嘅科技公司（無論真科技定假科技都好）。結果一年後，未潛水，但再多半年左右就一路跌跌跌。

4. 但呢期公司股價唔錯，我又留意下。你見我當年踩到間公司咁盡，但而家打倒昨日之我。嘻，但大佬，4年啦，世界都同咗。仲有，成日都講嘅一句金句：最好嘅公司都總有個價，再垃圾嘅公司都總有個價。前者而家大家難啲接受，但始終，Tesla再勁都好，咁總有個價。2000蚊一股你買，OK，咁20000蚊呢？20萬呢？總有個位係唔值。當然係咩位冇人知。

5. 後半句應該易理解啲，再垃圾嘅嘢，去到一個位就抵啦。雖然今年個市，完全唔同情 value stock，亦對小型股極不友善。但，假假地美圖都仲叫做科技公司，亦都仲有近80億市值。王維基都係小型股，都炒到甩碌，美圖都有機會吧？

6. 你見股價，呢幾日$1.5左右升上嚟而家差不多$1.9，升乜？就係份業績。我原本以為呢間公司永世都唔會賺到錢。但真係世事無絶對，大家遺忘呢隻嘢後，最近業績居然轉虧為盈！嘩！

7. 雖然，只係「非國際財務報告準則（Non-IFRS）計扭虧為盈」，但夠了，殘到不堪。至於點解會賺錢？估佢唔到，居然係in app purchase 同埋subscription帶動。仲有，我01篇文有提到，美圖上市嗰時，97%收入嚟自硬件，美圖手機。傻的嗎？但而家已經斬咗纜。

8. 有圖有真相，而呢位朋友都係呢度訂閱者。我係出業績之後嗰日同佢講，自己睇日期，當然都升咗第一浸，但追入去仲有得升，夠佢畀好多個月訂閱費了。其實我上一期都想講，但永遠係idea太多時間太少，所以你得閒PM我吹下水可能都有用的。當然唔好預PM我一定好快覆。同埋吹水就一定表面了。

9. 而家仲買唔買得？我覺得都OK，特別係如果唔鍾意大價股，見到咩Amazon Apple Google 嗰堆隻隻都新高追唔落手嘅，可以諗下。呢隻嘢如果鹹魚翻生，升一兩倍唔係夢　—但當然，風險都大好多，貴客自理。

香港財赤，有利港交所388 

10. 一般我都唔講政治嘢。唔係我冇睇法（再廢嘅睇法都係睇法），而係好多時浪費時間（可以留意下面黃國英篇文）。畀你四年前趴逆水估中侵侵當選又點？嗰時你會估到美股咁強？

11. 但，今次呢個有趣啲。香港財赤，應該大家都知。原因亦係因為又派錢又保就業又乜。當然你話咩大危機就係假嘅，但，總要搞搞佢。而香港又唔係美國甚至唔係英國中國，照計唔會玩咩發主權債。點收科？

12. 好可能大家熟過我，但我講我嘅睇法。首先如果係公務員嘅，我估加人工應該難啲了。但大家都知，政府嘅嘢，要節流唔係咁易，頂多減慢個開支增長。開源呢？加利得稅銷售稅？唔多可行下話。

13. 所以你估到了，我無啦啦講公共財政，當然係扯返去：印花稅同土地收入。

14. 請睇，預算嘅唔好理，睇實數（19-20）。利得稅薪俸稅我認為好難郁，況且呢類東西被視為係「唔好」嘅稅。點唔好？易走數，監察成本大。有錢人或大企業可以走嚟走去，亦大把方法避稅。至於銷售稅？我仍然相信係更加難。

15. 香港之所以話「高地價政策」咁多年，因為呢個收入係「好稅」。唔係講對社會影響，係只講技術上，易收。你見地價收入佔25%，最大來源，走數機會極低，亦唔使咩行政成本。

16. 同樣地，印花稅亦係「好稅」，佔11%，話多唔多話少唔少，但真係「好稅」。因為你根本冇得走。樓宇同股票買賣，佢就從中拎一舊，港交所又係佢嘅，田土廳又係佢嘅，你點走？

17. 我唔覺得會加印花稅，以國際標準比，已經都幾高。但相信要減就冇乜可能。

18. 樓方面，任你演繹，固然明顯地因為啲特別印花稅，限制咗好多大陸人買樓，否則樓價更加高。呢個亦係我心目中政府托樓市嘅終極武器：樓價跌得多嘅，開放返大陸人買樓，應該好大機會托得住。

19. 咁如果唔減印花稅，就唔會有更多大陸人買樓咁咯。但係咪利淡樓市？又未必。首先高印花稅，其實亦令到交易少咗—同好多人理解唔同，呢樣嘢本身未必會托高或質低樓市，但會令個過程減慢。另外，唔好忘記，地價收入佔25%，相信呢個「高地價政策」，都會繼續行。

20. 股票呢？之前在明報寫過。有冇諗過Robin Hood 之類嘅外國零佣券商，賺乜？答案係佢地將你啲盤射畀高頻交易商。咁點解香港冇乜高頻交易？因為交易費貴，印花稅重。留意交易費係港交所收，印花稅係政府收。正因為政府要靠印花稅，港交所又係一家獨大，所以當然唔會減畀你。

21. 結論就係你唔會有零佣券商，但不妨買返手港交所388補償下自己嘅損失。5000億市值喎！全球最大，但你睇香港嘅成交額明明唔會多過美國。點解388市值仲大過Nasdaq（間上市公司，唔係個市場市值）仲大過NYSE嘅大股東ICE（同上，間上市公司，唔係紐約市場嘅市值）？正係因為食水深，估值貴（壟斷喎）。

22. 當然，其實交易徵費同印花稅係兩樣嘢，冇話要一齊郁。但觀乎咁多年，兩者都係企硬。都係嗰句，只得一間交易所，點會肯減交易費用？

新創建659成交有異動

23. 呢度冇寫，但舊嘅收費專欄寫過，Facebook Page又有寫，都居然唔少讀者留意隻新創建659。唔知咩事嘅睇返 Facebook Page 篇文。　其實一個字就係重組，私有化，有動作。留意呢排啲成交多返好多（下圖），昨日又升返6%．

24. 當然呢啲係冷門嘢，日日寫Facebook Amazon都悶，同埋可能你成手都係科技股搵呢啲嘢平衡下。不過提返你：今年科技股真係極屈機，升市時固然升得多過人，但3月大跌市市又跌得少過人！好過份。傳說中嘅跌市低beta，升市高beta．

Good Read

25. 一個新嘅session，未必常設，但我之前提過想做。睇到真係值得大家睇嘅文，會分享下。唔會太多，否則我份嘢又變成三四千字。

26. 黃國英今日（星期二）在信報寫嘅文，非常之好。佢一路恥笑啲口水put，日日都話爆煲嘅人，我都係。佢呢個主題經常重覆，但今篇係寫得最好嘅一篇。必睇。

27. 呢個仲有趣，日本官方嘢。一個Infographic+Factsheet，講安倍經濟學，溫故知新。早兩日我Facebook Page講畢菲特入股日本五大商社，都有提過再high level 啲嘅睇法，我估日本股市直頭會re-rate．  

Facebook Post Summary

28. 呢個環節推出後幾多好評。讀者提出意見，我又覺得對全部人好，又唔花我太多時間嘅，我都會去做。有啲廣告文就唔在呢度貼了，除非廣告得嚟都好有意義。但其實，最好都係你set see first，同埋每日走入去睇。遲下呢部份我會寫短啲。

29. Faecbook 挑戰10000萬億市值　—呢篇我幾鍾意，講Facebook個核心競爭力在邊（中小企）。同埋隱憂，分別係同股不同權，小朱係咪仲有心機幫股東爭取權益。以及同其他科企嘅衝突，特別呢排同蘋果

30. 畢菲特入股日本五大商社—亦係得意之作，講畢菲特最新投資。因為單嘢亞洲時間早上出，鬼媒普遍訓緊覺，冇乜有深度嘅評論，我食頭啖湯。仲有講到去日本股市有機會re rate，日本人買起咗鬼媒，日吹夜吹潛移默化

31. 王維基on 「不可能」—好多人睇，但冇乜講財經金融知識，倒係我自己想法。心靈雞湯。Self improvement。大量粗口慎入。

32. 中銀香港業績—呢篇都係好睇，中銀香港本身未必重要，但教你睇銀行股。又，呢度讀者獨有，我個Excel畀埋你，睇樓下attachment．其實好簡單嘅嘢，亦唔係我以前在所謂「大行」嘅東西（公司知識產權嘛）。但至少你下次業績可以自己拎嚟玩，或者了解下啲數點計，亦唔使做多次data entry

33. 王維基市值超過網龍—寫親王維基實有收視，甚至未開Patreon已經推緊隻嘢，我都大言不慚咁講自己係相當早又相當落力地講。市值超過網龍，初步已經夠入「港版納指」。另外留意，公司市值已經超過所有香港傳媒股……加埋！