王維基1137業績直擊，金管局又接錢，港版納指ETF登場 (Patreon)

王維基HKTV Mall 香港電視　1137業績

金管局第36次接錢，但港紙強勢應該差不多終結了

「港版納指」ETF登場！

版務

王維基HKTV Mall 香港電視　1137業績

1. 一句：業績勁，應該仲有得升。而我估冇咁快集資住，「至少九月先」。

2. 之後可能Facebook Page會詳細講，但呢度讀者食頭啖湯先。另外，上次篇文講咗啦，我有出席佢地個web presentation．拿，Patreon讀者獨家呀，我放埋佢地份presentation上嚟，篇文最底attachment有。雖則佢地平時都會放，但今次未放，好似有嘢會改，所以唔好周圍傳。如果有人投訴就下架，齊齊冇得玩。

3. 業績在此，賺1.1億嘛，當中1600萬係政府津貼。公司一早出咗盈喜啦，講話唔計政府津貼，係賺9000萬左右。所以呢條數本身應該冇乜特別，睇其他嘢。

4. 咁睇乜？睇Balance Sheet，之前咪話必然配股嘅，而家又睇下係咪？留意舊年年尾（右邊），1.5億現金，3億貸款，淨負債1.5億。同14.5億嘅book value 比唔算多，一成多啲。但今年半年仲勁，差不多7億現水，而貸款已經還晒（長期都冇，查咗）。即係7億net cash．咁固然因為之前高位籌咗4億幾現金（所以幾咁重要），但我估整體都令人幾鼓舞。

5. 咁但，邊個話淨現金嘅公司唔可以集資？花無百日紅，你點知下年個市仲好唔好？但當然7億net cash仲要拎錢，就要搵個好啲嘅理由。上次話還錢兼擴張業務，大家（除咗你啲網友）易接受。而家就要有個更大嘅理由。

6. 半講笑，王維基昨日塊面其實黑得好緊要。因為開頭短短半個鐘嘅直播，已經四次出現技術問題。相信好多人老母被問好。可能「改善IT」係個好嘅集資理由。呢啲內幕花生嘢就你地先知了

7. 正經地講，呢啲就係佢地未來三年嘅資本開支（capex）。又似乎唔使集資呀可？但我都係覺得會集，但未必咁快。

8. 我自已感覺，王維基而家諗嘢做嘢，係好有針對性的。你諗到嘅問題，佢一早聽過亦諗到，知道點去應對。

9. 例如你講話，佢係時來運到，疫情時勢造英雄。咁回復至常後點算？佢一早諗到點答你，佢話根本疫情冇改變消費者習慣，只係加速。成個過程係唔會逆轉嘅

10. 仲有，你地話香港市場細，王維基一早諗到你會咁，所以已經講海外大計。有講未來6個月會設立兩三個海外據點。不過講真，我係唔多睇好嘅。又睇下佢點殺出新血路。記住，股市又好，生意又好，你睇中冇用，要人地睇錯你睇啱而佢地之後轉軚先有用。人地唔睇好，而佢可以令你跌眼鏡，先會有大錢賺。

11. GMV（Gross Merchandise Value）方面，最初全年目標係34億港紙。而家半年已經做到28億—咁但設舊目標時估唔到肺炎嘛。下半年公司都保守，都係預同上半年差不多。咁公司一般都唔會訂個自己做唔到嘅目標，我相信內部捽數嘅目標遠高於此

12. 仲有乜？就係外賣，好似之前都漏過風聲。我亦都係覺得麻麻地。唔好以為疫情人人叫外賣就外賣平台好好賺，你見UBEREAT有錢賺未？一樣都係做一單蝕一單。但又睇下邊個燒晒錢離場先。呀，呢個會唔會係一個好嘅集資原因？送UBEREAT一程，如何？

13. 講到尾，即係升定跌？我估升，仲有一浸升。錢？都係要cap，但應該唔會好短期，「至少都九月先」。

金管局第36次接錢，但港紙強勢應該差不多終結了

14. 以前在Homebloggr收費專欄成日講呢個，Patreon未講過，快講，唔會太長氣。賣返自己廣告，想了解香港聯繫匯率前世今生嘅，可以睇返Homebloggr收費片（留意，成粒鐘的，兩舊水）。唔想睇收費片嘅？咁等我整理埋Homeblogger啲舊文，你自己去搵（請參考今日「版務」）

15. Quite simply，金管局又入市。向市場沽港紙，接咗美金。即係港紙供應又會多咗。一地都係水，小心地滑。今年第36次，留意經濟個報導有埋每一次嘅詳情，十分詳細。

16. 點解？好簡單，因為港紙繼續頂在7.75嘅強方位。嗰啲不停話港紙受壓爆煲嘅，其實唔知生存在邊個星球的（倒係之前一年港紙就掂過7.85弱方保證）

17. 然後會點？其實經濟篇文都寫明，「銀行體系結餘將增至1919.05億港元」。不過你睇我樓上呢個表咪好似型啲。上面有寫3488（million），35億港外匯交易，所以個銀行體系結餘兩日後會升（T+2交收嘛）．呢個表在彭博有，或者金管局網站都有。

18. 做乜多咗咁多錢？有話係因為新股，哦，農夫乜乜嘛。都係，但你見之前每次啲人都咁講，但新股過後，個銀行體系結餘都係水浸嘅（一樣，呢個圖彭博有，金管網站都有，自己搵了）

19. 睇到啦，舊年12月至到今年3月，銀行體系結餘都只係540億上下，冇乜變。「果時冇新股咩？」。到4月尾開始就暴升，而家升到近2000億，差不多四倍。

20. 當中發生咩事？估唔估到4月尾咩事？冇錯，之唔係美國聯儲局嘅無限QE，不停印錢咯。壇嘢係3月中定尾開始做，咁傳到嚟香港，咪幾個星期。

21. 並不是我老作，你睇，其實去到2007年，個銀行體系結餘都只係100億上下。但忽然去到2008年尾，就爆10倍去咗1000億。咁你應該知道2008年秋天發生咩事啦？雷曼爆煲，政府救市，第一次QE嘛，就係咁簡單。

22. BTW，冇錯而家銀行體系結餘係2000億左右（3月時得540億添），但唔該，千萬唔好以為2000億除750萬人，咁每人去銀行拎三皮嘢（3月時一皮唔使添），個銀行體系咪玩完咯！

23. 你每個月畀一舊水訂呢度，就係提升自己水平嘛，就係唔好咁諗嘢嘛。點解唔係提爆？好簡單，幾時話你知呢舊嘢係畀你提嘅「存款」？如果講「存款」，就大約係14萬億。

24. 銀行體系結餘爆升，咁有乜影響？其實唔一定代表個市實升。不過，至少係會壓低個利率，反正「利率就係金錢嘅價格」（抄低啦），錢多，咪錢唔值錢。

25. 所以你見到，啲同業拆息壓到好低好低。呢，我朋友（真係我朋友！呢度讀者），高收入人士（高過我啦）。供樓原本一個月供兩萬，而家一個月供萬七。咁又多咗三千蚊使。「拿，都話每次危機都令富者越富架啦」。

26. 不過我有啲懷疑，港紙仲會留在7.75幾耐。同咩政唔政治中唔中美無關，即係除非忽然脫勾，否則港紙匯率，就主要因為港美息差套戥帶動。詳情唔講太多，但邊面高息，啲錢咪流去邊一面。

27. 咁請睇樓上個圖，一個月HIBOR（港紙拆息）0.26%，一個月美金LIBOR（美金拆息）0.17%，其實已經只係爭0.09%。Practically，呢啲位已經係 equilibrium 了。但你見早幾個月唔係咁的，三四月時，香港拆息差不多高出一厘！咁就大把套戥活動，最後咪會金管局接錢接到手軟，然後銀行體系越嚟越多港紙，港紙拆息咪越嚟越低。好似恒溫器咁，係咪好偉大呢！

28. 嫌第一個圖太花嘅，咁呢個應該明白晒。Bonus，留意美金拆息（黃色）條線，係平滑好多嘅，因為市場大。港紙拆息就好chok的

29. 實情我覺得只係呢篇掃盲文都值回你幾個月嘅訂閱費了

「港版納指」ETF登場！

30. 另外快手講講，聽日（星期五朝早）會有隻新嘅ETF上場，南方東英嘅3033，全球第一隻追蹤「港版納指」（恒生科技指數）嘅ETF。

31. 廣告就唔賣啦，講咗呢度唔做植入廣告，況且Facebook Page你會見到，詳情慢慢睇。但我想講返隻指數

32. 官方文宣當然會講，年初至今個「港版納指」升五成幾，跑贏埋正版納指，更加遠遠跑贏美股標普指數同道指，或者香港恒指國企指數。

33. 但，其實隻指數7月27號先出世，唔係話做假，但係可以睇住嚟食，揀個好嘅日子先出世，或者揀啲好啲嘅公司。所以，7月27日之前嘅嘢，參考價值唔大。之後先見真章，不如睇下出世之下到而家又點？剛好一個月多一日，其實都係OK的

34. 你見隻嘢其實面世一個月，升7%左右，只係略為跑輸正版納指，但跑贏香港或美股其他指數的，算係咁啦。

35. 當然，入面30隻，你就要買豬肉搭豬骨買其他嘢。同埋全部都同一個sector，其實冇乜得點分散風險。但真係可以幫你慳到下入場費，因為好似頭五隻你買晒，都要十幾萬了。ETF嗰啲，睇唔同發行業，但佢地一般都做到幾千蚊一手的。但其實我唔鼓勵你買一手，蝕交易費都幾係嘢。講真，一兩皮嘢都冇嘅，就唔好炒股票啦，做好你份工先啦。

版務

36. 其實都有人話好似我Facebook Page啲免費文好睇過呢度，so sad．正如多次講，嗰啲係金融薯片，好過癮但冇益。天地良心我寫呢份東西嘅時間，連埋準備（好多時準備先最多時間），往往都要兩三粒鐘，夠我出幾個Facebook Post。

37. 無論如何，精益求精。Update 下大家一啲新搞作

I. 之前講話有免費好康抽獎，我決定唔好咁煩，一係在某一日嘅文入面貼，睇下邊個最快上去reg．一係就Patreon PM Broadcast，又係鬥快。總之呢度讀者限定

II. 我整理緊以前Homeblogger啲文，由於佢地已經冇再玩呢樣嘢，我估唔會反對我去結集放返晒上嚟。貼文就唔會了，但我會將佢地zip埋一個file．另外，當然首先係用嚟吸新訂戶。好多人都鍾意免費嘢。

III. 埃汾會開個instagram。冇乜特別，唔會再得閒特別搞，頂多得閒有過癮嘅圖貼下，只會寫幾隻字。冇錯係為搞而搞，因為好多時啲廣告客戶都想一雞幾味，最好你有好多個平台。

祝大家週末愉快，其實我話寫千幾至兩千字，但次次都寫到三千。