ivanliresearch

香港收租股，道指執位，蘋果Tesla拆股，星期五有港版納指ETF，同王維基對話，誠哥又增持長實 (Patreon)

Published:

2020-08-25 16:05:57

Edited:

2020-08-25 16:07:05

Imported:

2021-07

Content

果然放鬆晚市堂食，之後留意收租股

蘋果一拆四，所以道指比重大跌

Tesla就一拆五添，但係咪有利股價？

歷史上蘋果拆過四次股，兩星期內一定跌

與神對話—香港電視1137業績

星期五有港版納指ETF！

In KS We trust

版務

今日嘅題目多而散，又有啲時限性。每樣快講幾句，有機會之後深入講。

又，呢排寫啲嘢都OK中，都真係有讀者贏到錢多謝我。香港電視HKTVMall 1137呀（講足半年），藥明生物2269呀，中銀飛機租賃2558呀，甚至新創建659都有人買（安全貨倉237就冇人買了，齋花生）。

先小人後君子。首先，呢啲市況，贏錢不難。而我多數都睇中長線，所以你短炒獲利，係你自己叻。其實任何情況，你贏錢都係自己叻—所以你輸錢亦係你問題，唔使返嚟投訴我。因為，包生仔咩，實中我發咗達啦。又冇人拎支槍迫你買。

你畀一個月一舊水（拉勻都唔使十蚊一份）呢份東西，作用就好似馬經波經咁。我做所謂投行分析員時，其實都係咁上下玩法。份嘢係畀你參考，多啲角度思考。甚至有時你自己都有啲想法，然後發現有人同意你。當然更好係有時你有想法，然後發現有人唔同意你！而當然，寫波經嘅次次中，就發達啦。

好，正題

果然放鬆晚市堂食，之後留意收租股

如無意外，星期我就可以同返埃汾太出街打邊爐。上次篇文講過叫大家留意啦，結果堆嘢都升咗，一兩日咁咯，星期一開市你追入去都搵到啲嘅。但我估重頭戲始終係個健康碼，餐廳始終做唔大（又要講護城河）。睇返啲收租佬最好，太古地產1972，九倉1997，或者係踢出恒指嘅信和83。留意下星期五（9月4）恒指收市後執位，應該有異動。之前嘅文都講過信和。

道指執位，蘋果比重大跌，十分低能

講開指數，美股道琼斯指數都執位。留意8月31號開市就生效，即係今個星期五（27號）晚執位。道指一向都係30隻，三隻加入嘅係SalesForce CRM，Amgen AMGN，同埋Honeywell HON．踢走嗰三隻就有啲名氣：埃克森美孚ExxonMobil XOM，輝瑞Pfizer PFE（說好了的藥廠今年好好賺），同埋雷神Raytheon RTX（說好了的炒軍工股）。

本身唔係太特別，因為舊文都講過道指係一個過時嘅指數，專業投資者唔多理，只係因為歷史原因傳媒先報。而道指執位本身，亦唔太重要，甚至唔比恒指執位重要。

如果想知道指每隻股票比重嘅，自己睇維基百科。自己計亦唔難，因為道指計法好原始：係price weighted，十分混帳。100蚊嘅股票，比重比起10蚊嘅就係十倍。所以你想知每隻嘢權重？隻嘢自己嘅股價做分子，分母係三十隻嘢嘅股價加埋，一除就係。有冇咁低能？就係咁低能。因為個指數135年歷史，當年未有電腦甚至計數機。

蘋果一拆四，所以道指比重大跌

道指過時，咁點解仲要講？因為，蘋果AAPL。蘋果會一拆四，其實已經除咗權，同道指執位一樣，都係8月31號會生效。

原本，係完全無關嘅。我實在好怕見到啲人講「煤氣年年送紅股」，甚至有人當係派息。大佬呀，你送紅股咪即係拆細！David Webb一早講過，呢啲同基本因素完全無關，你切開個Pizza多幾塊唔會多咗（煩膠可以話少咗啲餅碎添）。「但唔關基本因素事都可以升」，可能係，下一節講

而家呢刻，股價500蚊嘅蘋果，當然係道指最重磅嘅股票，佔比大約12%。咁正常嘅指數（例如恒指），係market cap weighted，唔係price weighted，你隻嘢股價本身唔決定個比重，所以點拆都冇影響比重（騰訊700之前咪拆過）。

但，道指因為係price weighted，所以蘋果一拆四後，股價得返4份1，比重會去到得返3%。由最重磅，變到排第16左右。係咪夠晒低能？原本道指因為蘋果而節節向上，之後蘋果影響力就會細好多

唔止，仲有其他影響。因為蘋果嘅比重冇咗一大截，亦令到道指入面科技股（本身已經唔多）比重進一步降低。聽聞亦係因為咁，所以加咗Salesforce入去。

Tesla就一拆五添，但係咪有利股價？

好啦，除咗蘋果一拆四，仲會有Tesla一拆五，日子同蘋果一樣。Tesla之前股價一度升到2100美金，一拆五後即係420—正係兩年前Elon Musk疑似high咗嘢（420亦係大麻嘅別名）在twitter話私有化嘅作價。後來當然畀證監查，但叫做冇事。而重點係—兩年間，股價升咗五倍！

留意，Tesla雖然而家係美國第十大市值公司。但並唔係道指成份股（否則2000蚊股個比重就係蘋果四倍！），甚至唔係標普500指數成份股。

之前有一浸一路估佢會入到標普500，因為滿足咗要求：市值夠大，成交夠多，仲有連續四季度盈利（之前一路估係呢部份阻住）—但依然未入到。原因可以下篇文講，亦會講入到有咩影響。

想講係，講完一拆五，股價就飛天。蘋果亦係講完一拆四，股價就升。但，明明話同基本因素無關，咁即係點？

可以有兩個演繹。首先，蘋果同Tesla宣佈完拆股就升，唔等於「因為」拆股所以升。反正兩隻嘢係咪都日日升架啦！當然可以用量化一點嘅方法，但似乎冇好足夠證據話，「因為」拆股，「所以」升。

另外，講「非基本因素」。拆股，有啲人話利好股價，因為降低入場費，令到散戶易啲入場。呢個係舊式投資書嘅講法。但我有幾個質疑：首先，你肯定「多啲散戶入場」代表股價會正面？股票冇錯係positive sum game（好多人都唔知或唔信），但，全世界嚟講，贏錢係少數人，貧富懸殊係一路拉闊嘅。

另外，你拎港股講都仲可能有道理。但美股，喂，美股唔使一手一手咁買嘛，一股一股咁買都得，甚至可以唔夠一股咁買！半股都得！十份一股都好似得。變相好似香港碎股咁咯。當然應唔應該咁做，係另一個課題。

我係同意彭博個題的，fractional share呢啲，完全係人性嘅貪婪，大行要搵到盡。我唔係講香港啲股票十幾萬一手嗰啲喎。蘋果先500蚊美金一股。容許我好不客氣講句：4000蚊港紙都冇，就咪撚學人買股票啦小朋友（呢個欄好似未講過粗口）！

歷史上蘋果拆過四次股，兩星期內一定跌

Anyway，再去盡啲，當然會有人講，美股有啲係跟股數收佣呀，或者期權果啲會同股價拆唔拆細有關。好似係。但我地睇一睇實證：

蘋果其實已經拆過五次股，當年一股，等於而家56股，咁睇下歷史係點？

根據Kensho（CNBC有同佢地合作）嘅所謂嘅AI同大數據（笑下好，不過可能背後堅嘅嘢又唔會免費畀你睇），拆完股嘅蘋果，兩個星期後，四次都跌！平均跌幅6%。而大市呢？平均係升嘅。計次數就兩次升兩次跌。

咁當然，歷史唔會簡單重覆，蘋果亦唔等於係Tesla，但似乎都係一貫股票嘅玩法，「好消息出貨」。真係等到入場費平先買嗰啲？接火棒啦（當然頂得住一陣熱嘅，之後都係長升長有）

與神對話—香港電視1137業績

係喎，王維基隻香港電視HKTVMall 1137星期四出業績嘛。之前講過，正路好大機會集資。今日見到股價已經先沽為敬啦。但同時間，我膽粗粗咁打去公司，問佢地業績有冇簡報會（其實多數上市公司都會有），結果係有嘅。睇下到時有乜第一手資料。當然我係以公司工作身份，唔係「狼耳街華人」或「君子馬蘭頭」主編號身份。