6隻港美黃金ETF比較。開晚市堂食，推健康碼，炒乜好？ (Patreon)

教你揀黃金ETF（其實係所有ETF）（其實強積金都係）

黃金ETF回報大比較

Bonus—放返晚市堂食，甚至搞埋大陸通關，有乜好炒？

小版務：埃汾承諾唔會有植入廣告（直到另行通知）

1. 呢篇應會係短期最後一篇講金，股票幾千隻，金得一種，亦唔會日日有新聞，亦都難短炒。

2. 講開金再跟進少少，首先係埃汾已經買咗啲金。當然計埋以前嘅，總值未到總身家5%，所以應該會繼續買。

3. 另外，有間香港上市公司，市值先12億，走去買咗2億幾金，FB Page有寫。其實冇乜特別，唔及之前畢菲特買金礦公司咁有趣

4. 今次疫情下，各國政府嘅財政政策，非常誇張，影響遠比2008深遠。直頭係另一個時代嘅開始。早幾期嘅Economist 就有講，Free money，比凱恩斯派更加大政府，列根戴卓爾Milton Freidman 芝加哥嗰套海耶克一仔經濟學，應該冇乜運行。詳情我應該會在Facebook再寫。自己睇原文嘅，呢度（可能有幾篇免費）。

5. 唔係話歷史冇用，但未來十幾廿年，應該又進入呢一個世界。會點？唔係好知（知就發達）。但currency debasement，應該只會越嚟越多人講。甚至未講通脹重臨，我到而家都覺得官方啲通脹係搵你笨的。

6. 詳情可以睇Bloomberg嘅文。一樣，好文多數要科水。或者等我遲下講

教你揀黃金ETF（其實係所有ETF）（其實強積金都係）

7. 個表同上篇文其實一樣，只係我重新排過

8. 上回講到黃金ETF，其實個表都話咗大半你知。今日細解。兩隻香港，四隻美國。至於有啲槓杆嗰啲就唔放了（香港南方東英有隻），因為我認為金係長渣，當買保險，金礦ETF亦唔討論，原因上篇講咗。當然冇人可以阻止你自己買。

9. 呢6隻ETF，分別不太大。如果冇睇錯，全部都渣實金。至於你話可以換實物之類就算吧啦，理論上可以，但我估你唔會渣到幾千萬掛？

10. 咁可以話你知，只睇一樣嘢，就係睇收費。唔止係黃金ETF，多數ETF，甚至主動基金，MPF最主要都係睇收費。詳情下面講。

11. 同主動基金唔同，被動基金個基金經理近乎不能自主，所以只係鬥平。而往住公司大，隻ETF規模大，收費就會平。因為基金（特別係ETF）係一門極之能scalable嘅生意，我黃金ETF，管理1億資產，成本係咁多。管理100億資產，成本可能都只係多少少，可能請多幾件打雜，出多啲廣告，整好啲IT，但肯定唔會係100倍。所以大公司可以將個收費比率壓到極低。你見啲指數基金都係咁玩法。甚至玩到零管理費都有，我懷疑遲下有負管理費，即係ETF發行商每季派返幾張百佳coupon畀你咁。You heard if first from Ivan

12. （順帶一提，我在HomeBlogger係有推貝萊德Black Rock （BLK）的，全球最大ETF管理人，想知詳情去睇收費片）

13. 而ETF發行商都唔笨，所有行業都係，為咗想Differentiate，唔想玩到價格戰，最好就大家出幾多味指數，大家追蹤唔同嘢。「唔係你以為恒指公司搞個港版納指嚟做乜？」。炒A股嘅，有上證，有A50，有滬深三百。咁齊齊搵食，唔好拍埋比較嘛。

14. 但黃金呢，quite simply，咪黃金，人人都係嗰個金價。頂多有啲係追蹤上午，有啲下午。但整體係差不多嘅嘢。所以，就只係睇收費。

15. 順帶一提，其實揀MPF都係差不多．除非五十歲快退休，否則？100%股票，分幾個地域，然後揀管理費最低嘅指數基金。唔好信啲咩過往表現。舊文寫過。

16. 介紹返，最低管理費嘅（expense ratio），係SGOL同GLDM。如果冇搞錯，GLDM係GLD搞出嚟自己打自己嘅東西。咩玩法？咪又係self destruction，唔使快過隻熊，快過你隔離嗰個就得。應該係因為IAU同SGOL減價打佢，GDL再出呢隻GLDM嚟打佢地。所以正路就SGOL同GLDM二選一。

17. 其他嘅，快講。第一係港股美股嘅分別，驚港紙爆煲呀，政府或銀行充公你嗰啲，就自己諗，可以買美股。當然可能交易費用會唔同。但埃汾就唔會考慮香港嗰兩隻嘅。反正唔會短炒，唔介意交易費用呀，或者時差問題

18. 隔離兩個column，INAV，intra day net assets value．由於可以套戥，股價同呢個東西唔會爭太遠。本身冇乜特別，但就影響隔離嘅fund percent premium（%），其實都係同買賣差價有關。你見明顯美股係低啲。

19. 再隔離，bid ask spread，睇數字冇意思，睇%先有用。一樣，美股就普遍都窄啲。

20. 另外，市值market cap 同90日平均成交（全部計美金），當然大越好。市值大嘅，多數自然成交就大。另外市值大嘅亦有潛力壓低expense ratio．不過留意最大嘅GLM應該係不停咁流緊血，資金走緊的。至於成交，不用講，梗係越多越好。但講真美股嗰幾隻，至少都幾億港紙成交一日，大家唔係買幾千萬嘅，我唔覺得有乜好大分別。

21. 至於回報，咪就係歷史回報。留意應該係睇長線嘅好啲，但有啲中間改過開支比率，同埋GLDM未夠5年歷史。無論如何，呢個就係最終埋單你嘅回報。睇1年3年5年，都好似冇乜好大分別。

黃金ETF回報大比較

22. 再遠啲又點？睇埋下面幾張圖你應該明。就係不同年尾下，你投資100蚊渣到而家，每隻ETF會變幾錢？嫌太細嘅，我會文尾attach埋原圖，或者你只係睇個box入面數字已經夠。

23. 第一張兩年，有晒6隻。當然全部都比唔上真實金價（XAU），有管理費，但GLDM表現最好，2840最差

24. 第二張九年，冇咗GLDM，未出世。居然係2840最好，GLD最差

25. 第三張10年，冇GLDM，冇3061，未出世。IAU最好，GLD最差

26. 第四張12年，冇GLDM，冇3061，冇SGOL。IAU最好，2840最差

27. 最後一張，13年，冇GLDM，冇3061，冇SGOL，冇2840。只有歷史最長嘅GLD同IAU鬥，IAU跑贏，但同金價比都爭咁一啲，管理費嘛。

28. 即係點？最後一個大圖，明晒。紅色好，藍色唔好。留意綠色日期

29. 你見最後兩個column 仲有30日波幅，理論上低好。但唔短炒嘅，其實冇乜分別。最後Sharpe ratio，學術嘢。Risk-adjusted return，每一個單位嘅風險，你有幾多excess回報（同美債比）。越高越好，唔知係乜可以不理。

30. 結論？首先港股嗰兩隻應該剔除先。然後揀費用最平嘅。所以都係SGOL同GLDM二選一。當然費用可以郁，但市場競爭太激烈，做黃金ETF又唔使咩好高技術門檻。真係怕加價嘅，咪兩隻都買啲。

Bonus—放返晚市堂食，甚至搞埋大陸通關，有乜好炒？

31. 原本呢篇只講黃金ETF，但首先我係唔鍾意一篇只講一樣嘢，二來因為遲出文（其實以後星期六好多時都半夜三四點先出），三來真係好想講，四來都緊緊地急。所以整多段。講港股

32. 我就唔講政治，所以唔使討論以下呢堆嘢正唔正確，有冇用，有乜後果。我只係睇有乜機會。見到幾明顯，香港啲疫情數字高位回落少少後，政府又想放返鬆。首先係本地，開始又講開返戲院，同埋畀返晚市堂食。勢在必行。

33. 但更大盤棋，當然係推返大陸同香港往來，至少都推返大灣區之類。話搞健康碼嘛，亦係勢在必行。

34. 鬧還鬧，不如諗下，有乜好炒？前車可鑑，你見澳門放返大陸通關，啲澳門股炒到飛起。正路就在香港重演多次。

35. 先講頭半，開返晚市堂食之類，當然幫到啲快餐股之類。但已經炒起咗啲，當然你短炒下可能都OK。詳情睇明報。

36. 但更大盤棋，梗係推返大陸人，至少廣東人來港。咁，就當然係睇啲殘到不堪嘅股票。除咗樓上堆飲食，仲有啲珠寶呀，咩莎莎呀（178）嗰類。但我其實會想玩大啲，睇收租佬，九龍倉。之前時代廣場海港城等等真係重災區。留意唔好買錯，係1997，唔係4號仔。唔玩咁盡嘅，太古地產1972亦可以。但講明有啲風險，陣間疫情再爆再封就GG

37. 想穩陣啲？至少第三次講，咪In KS We Trust，長實1113幫到你。

小版務：埃汾承諾唔會有植入廣告（直到另行通知）

38. 加返晒大家最喜愛嘅段落號碼了，其實大家refer時有用

39. 順手講埋，兩星期有超過400人，暫時都超過我目標。相信9月底前500人應唔係問題。當然大家介紹埋畀朋友更好。

40. 咁讀者支持我，我寫好文，就好基本。順手畀多個承諾大家：就係，呢度嘅文章，係唔會有植入廣告，或打手文。

41. 呢個世界好多呢啲文，我都寫過（當然）。但既然大家畀咗錢訂，人數又OK地夠，似乎我就唔應該用呢度再搵植入廣告嘅錢，其他非金錢利益都唔會

42. 當然，唔係唔賣廣告。只係唔做「植入廣告」，唔會暗地收錢。如果他日真係有人贊助，why not？但我會寫明。唏，Matt Levine啲Newsletter都有贊助的。我覺得廣告唔係問題（當然太多唔好），但讀者唔知先係問題。

43. 而仲有，凡事留一手，講明，日後可能反悔。「可能人地真係畀好多好多好多錢呢」。但至少我廢除呢個policy嗰時，會通知大家，唔會唔多覺咁暗地做。咁至少到時你就知會有植入內容，你自己再衡量，甚至唔訂。