Elon Musk 千億身家。誠哥增持長實。王維基好快集資。Income fund 好好賣。中銀航空租賃業績麻麻 (Patreon)

彭博富豪榜執位的啟示

In KS We Trust

王維基香港電視1137破頂，好快配股

亞洲Income Fund相當好賣

中銀航空租賃2588，業績普通咋喎

上次講買金方法嗰篇，評價幾兩極，有人覺得好有用，有人覺得麻麻。幾時都係眾口難調，讀者有唔同喜好有唔同程度。但放心，幾隻黃金ETF比較，必定會寫，應該星期六。

其實我心目中嘅玩法，係想一篇文寫幾個topic，短打，唔係幾篇文寫一個課題。原意係類似Financial Times 嘅Lex，或者WSJ 嘅Heard on the Street，又或者係Bloomberg嘅 Matt Levine．以前收費專欄都提過此人，十分長氣，有我作風。仲有佢newsletter 最後仲有個環節，Things happen，只貼一堆link，有時大路嘢，有時好古怪嘅，遲下我都會試。

BTW，而家每篇文最底我會upload返啲圖，可能睇得清楚啲。

Anyway，去片。今日主要講港股，不過第一單係美股。

彭博富豪榜執位的啟示

Tesla今年升到癲，Elon Musk好快可以加入傳說中嘅1000億美金身家俱樂部（100 billion USD），現任嘅有亞馬遜嘅光頭佬，仲有微軟嘅標基。Facebook嘅小朱，同埋LV嘅法國佬都先後上過。Elon Musk會係史上第五人。但真係時勢造英雄

吾友（其實都有一排冇乜聯絡，但真係睇住佢出道到而家獨當一面）盧志威William Lo，今日在信報寫得很好，可以畀大家睇下。

其中一個重點，係債務。Tesla同Netflix呢類公司，長期燒錢，負債極重。如果唔係咁低息，未必生存到。但結果畀佢地搏到，低息一路維持，亦都獎勵咗敢借錢嘅公司。唔借就笨。所以你見啲科企，梗係勁發債。唔借就笨。回購又好，收購又好，投資又好，咩都好。資金成本太低，而投資者樂於借息借錢畀佢地—因為至少好過國債。甚至有人估，會唔會有一日蘋果發債平過美國政府。所以唔好講升市driven by liquidity, not fundamentals. 因為Liquidity is fundamentals. 

另外，貼多次，都係要講下光頭佬。真係More money than God．你睇佢今年身家進帳，就已經近80 billion USD—等於生多一個小朱或者Elon Musk出嚟。佢應該好快變成史上第一個200 billion USD 富豪。甚至去到1 Trillion，都未必不能想像。反正佢先56歲，而畢菲特99.7%嘅財富，係52歲後先搵到嘅。

In KS We Trust

明個題嘅，睇舊文。十分簡單，李嘉誠同李澤鉅又再增持長實了（呢個網好用）。留意佢地只係買長實，冇買長和（1）。另外今次增持，望落唔多，但唔係因為冇信心，係因為到咗上限。舊文有講點解。幾時都話環環相扣。李嘉誠都放心買，你驚乜？

王維基香港電視1137破頂，好快配股

費事我唔記得寫，寫定先。本人吹奏王維基隻香港電視1137好一排，應該係全香港第一個講佢入會入科技指數。

咁呢排股價不停破頂，固然因為之前出啲數字好靚。但，有冇留意我張圖個日期？上次頂位，香港疫情爆，生意好到停不了，好多連登仔講，我都識唔少人買。炒到上近7蚊。然後過兩日就配新股！仲要都配得幾狠，10%股本。

記住，上市公司CEO嘅任務，係shareholder wealth maximization。股價咁強，公司又生意好到做唔晒，要擴張要改善全部要錢。唔集資先係對唔住股東。至於6.7去追嘅，自己問題啫—況且之後都返晒家鄉啦。

咁常識嚟啦喎，6.7都集資，而家8.4點會唔集？當時要錢，而家更加要錢！咁點解仲唔集？因為唔集得！因為出業績之前唔做得。咁幾時出業績？記低啦，下星期四（27號）。唔好畀我估中，應該等到9月頭，出埋8月嘅數，可能再炒一轉，就集資了。畀我估中你就記住，you heard it first from Ivan

亞洲Income Fund相當好賣

彭博嘅故事，聽講亞洲區啲Income Fund 幾好賣。（照舊，要訂，但有免費幾篇，或者你Google搵啲偷文網）。特別係香港同新加坡

原因好簡單，Aging Asia Investors Turn to Income Funds to Preserve Nest Eggs。老人家怕輸，穩穩陣陣收幾厘息咪算。丫哈，覺唔覺得句嘢好熟面口？

埃汾公司都有同事賣基金（但我冇，本人唔係sales，唔同部門，佢地賣成點完全唔影響我。當然極端下佢地乜生意都冇我咪會失業），所以唔會阻人發達。但：

6-7.5%？咁你諗下佢買啲乜，又或者會唔會係在個本金派畀你。即係，呢個世界上點會有穩穩陣陣6厘息？10年美債都1%唔夠，任何高過呢個水平嘅，當然有風險。有風險冇問題，至怕係你唔知有風險。好心，畀啲常識啦。點會有冇風險而有6%股息嘅嘢？買美債嗰啲傻仔？

中銀航空租賃2588，業績普通咋喎

中銀航空租賃2588出咗業績，只睇大數，其實係史上最高嘅半年純利。如果計經調整純利（唔計一次性嘅嘢），大約3.4億美金，都係史上最高半年。咁嘅環境下，半年純利都可以新高，算係咁。另外派息都象徵式加咗少少。不過記住，業績好多時唔係睇「好唔好」，而係「合唔合預期」。我見分析員都估得幾進取，估到一年賺7億咁。所以股價可能係有啲壓力。

點解成日講呢隻？因為真係有興趣，特別係成個行業。2588中行做水喉應冇得點輸，問題係雖然話係新加坡公司，但大股東都係中國銀行，會唔會捲人中美紛爭呢？

順手一講，聽日我會去見隻中國飛機租賃1848，都係例牌出完業績佢地想見下人咁。光大系嘅嘢。以前都寫過下，呢隻唔多鍾意。特別係個CEO，又渣住差不多30%（人頭？），之前好多古古怪怪新聞。聽日我就見佢。