5個買金方法嘅優劣：實金，金幣，紙黃金，ETF，金礦股 (Patreon)

金價跟進-繼續買

金礦股？不了

實金—放邊？

紀念幣—考眼光，難急急套現

紙黃金—還不錯，不過存款保障唔保的

下回預告：比較所有黃金ETF。不過有圖睇住先

小版務-抽獎

小小抱歉，今篇有小部份內容，同Homeblogger收費短片覆咗。問題係嗰邊一早拍咗，但我又覺得要同你地講下到底點樣買金。當然只係小小重覆，我強項亦係同一個課題寫幾篇文可以寫到唔同嘅嘢。呢度你可以問嘢，你留意或PM我都答晒。況且呢度仲寫夠3000字，仲有我八號風球在公司寫埋文先放工。算謝咗罪。

金價跟進-繼續買

呢篇寫金，但講實戰，點樣買。想睇點解買嘅新讀者，睇舊文，兩篇。

最初呢度寫金嗰時，正係金價急跌落嚟，但冇有怕，照買。近期果然金價又反彈，上返2000美金樓上。但我地當然有大志啲，唔係睇嗰幾十蚊美金，睇到上3000啦（但未必係好短期）。

點解金價急彈？都好簡單，因為美金太弱。美匯指數跌到今年低位了。WSJ有篇文，新手101，講黃金市場點運作。我未必會再寫，但入面有題Q&A好好：Is gold a commodity or a currency？答案係Both，呢個亦解答咗讀者問，點解唔買其他商品。黃金既係商品，但亦係所有貨幣（特別係美金，唔止係因為狂印，而係因為黃金多數都用美金報價）嘅鏡子。有讀者話當係買保險，十分正確。投資嘅嘢唔使咁複雜，simplicity beats complexity. 

金礦股？不了

講返，點買金。五個方法：實金，金幣，紙黃金，ETF，金礦股。頭四樣各有各好，冇話邊種一定最好，睇你個人情況。金礦股就係我絶不推薦嘅。

你話，喂，買金礦股都賺好多錢喎。我知。喂今年我隻乜乜乜跑贏金價喎。我都知。但討論緊唔同嘅嘢，金價同金礦股真係唔係同一樣嘢，你要用唔同嘅分析。粗略講，金價升嗰時金礦股多數升得仲多。但跌嗰時亦都跌更多。一來一回拉勻？當然係金礦股跑輸黃金。睇上面個圖咪知。而且，個drawdown先勁，買完高位跌七成幾，我估好多人「止蝕」。當然你炒兩日就冇所謂。

好，剩返四種方法，先講實金同金幣。

實金—放邊？

埃汾主要用恒生（我係冇匯豐戶口的）同中銀，但中銀冇黃金戶口，所以主要講恒生，當然其他銀行都差不多。你學到大原則就得。

原則一：寧願買貴。我指係單價。低入場門檻嘅嘢好多時都伏。呢個係埃汾投資哲學。例如乜？電單車位，劏舖，輪，牛熊證。難聽啲講句，「大戶」就係賺呢啲幾皮嘢都冇或唔捨得嘅人錢。況且有錢人有巴京拎包華，正如劏房尺租高過豪宅，同一道理。

所以你睇上圖果啲幾百幾千蚊嘅，可以不理。真係冇錢？咁儲下先，或者問老母借住先，再唔係同老母夾份。驚老母走你數？咁你檢討。冇錢就最好孝順啲。

原則二，任何開單邊價嘅嘢，唔使掂。不過留意上圖「買入」「賣出」係銀行角度。Bank Buy Bank Sell，所以你買得嘅，只係得九九金條同九九九九金條。留意個spread大約0.5%，公道，銀行唔使賺咩。但唔代表第日唔會改。不過目測個spread好似大過中銀（下面有圖），幫唔幫襯中資行，就你諗你。

原則三，流通性。你咩恒生自己嘅東西，拎去中銀應該冇人理你。特別係真係諗住移民著草嘅嗰啲呢，就真係買啲國際有認可嘅嘢。部份金幣OK，咩鷹揚，富格林，楓葉之類，著草去第度都賣到。真係金條嘅，瑞信Credit Suisse嘅有保證，世界通行，瑞士人N年嘅榮譽。寫文提過幾次，亦因為咁，瑞信呢間公司，行家俗稱叫金牌。（正如法興叫「傻珍」或「喪珍」，Soc Gen是也）

剛剛望埋，中銀啲價，全部開兩邊，好似好啲。但不代表本人背書。留意你啲恒生財神金牌中銀當然冇價開。另外，中銀個spread，望落係窄過恒生添，0.2%都有。幾抵

其他？都冇乜好講。睇bid ask咯，但隨時可以改。所以都係睇流通性好。

實金其實就最簡單直接。但有乜問題？你估到啦，放邊？放在家？一個唔該畀人爆格呀，或者屋企唔知邊個偷咗呀，或者搬屋唔記得咗呀，就煩。況且上所有咩意外保都唔會保你放幾十萬金條在屋企。

咁就要講，我舊東家星展，最馳名嘅服務—保險箱。（唔識笑嘅，睇呢度）

保險箱嘅嘢？我勸你，死咗條心。真的，我都有做過實地考察。結論？應該拎保險箱耐過拎靈位。好多行都冇，或者要你排唔知幾耐，甚至要你係乜乜尊貴客戶先有。其實早幾年新聞已講，而家應該仲難。

況且，保險箱亦都係要年費。就真係睇你買幾多，計落可能買紙黃金或者ETF好過。

但實金仲有個好處，就係綁住咗你，你唔會半夜失驚無神走去沽。好多人投資嘅問題係冇耐性，而家科技先進，更加容易，你去咗旅行都可以在富士山頂賣股票。亦因為咁嘅原因，你見多人買樓儲到第一桶金，但買股極少，因為好少有咁嘅耐性。

紀念幣—考眼光

金幣，都冇乜特別好講。頭先富格林，楓葉，鷹揚之類，其實等同實金。基本上個一安士金幣，就大約值一安士黃金咁嘅錢（當然扣咗啲），但如果係紀念金幣，就另一樣嘢。

紀念金幣我都有唔少，好多係2010年前後嗰時買，主要係嗰時多錢，又未結婚又未買樓。好似有套畀我整唔見咗添（買實金嘅壞處）。照計呢堆嘢升值唔少

但，紀念金幣，就會變到好似收藏品咁，買郵票買紅酒咁，考眼光啦。有價值嘅（例如龍年生肖紀念人人都知好炒）又好難訂到。同埋，套現都幾難，咩生肖嗰啲還好，再偏門啲嘅，任啲舖頭開你價，可以十分之辣。你等錢救命就死得。當然仲有就係放邊嘅問題，同實金一樣。

紙黃金—還不錯，不過存款保障唔保的，留意返

紙黃金，有啲銀行叫黃金存摺，易玩。如果恒生直頭一開普通戶口有埋（我有啦）。我中銀戶口就冇。

有啲人唔係好熟紙黃金，其實都真係同買實金差不多，不過大家講個信字，佢幫你記數。咁放心啦，咁大間銀行真係唔會呃你。但留意返，銀行執笠呢，普通存款有存保障，呢啲紙黃金就不受存款保障。咁自己衡量風險啦。我就冇驚過的

紙黃金，你見好易玩，分分鐘易過你網上轉美金。Ebanking襟個制就得，都話黃金又係商品又係貨幣。但，有人見到mace，問我mace係乜？其實我特登玩嘢用英文版。中文叫做「錢」。仲唔知？中藥金銀花呀人參呀幾多錢（讀「前」，唔係「淺」）同一回事。但，真係留意返，唔好走去買一錢中藥同一錢黃金去磅，係唔同重的！正如一安士黃金同一安士奶粉唔同重！唔好走去金舖同你理論話呃你秤，畀人笑你呀。呢類東西，可以扮下嘢，自己睇維基。 

咁留意返，紙黃金就可以一錢一錢咁買，兩千蚊港紙有找。因為唔使玩實物，bid ask應該一定低過實金，例如恒生呢個紙黃金講緊0.2%，實金講緊0.4%。

所以紙黃金其實都係好東西，又唔會個保險箱畀人掉咗（但會唔會電腦畀人hack？），又唔使放在屋企。不過就真係，存款保障唔包。同埋 bid ask都係任銀行開。

下回預告：比較所有黃金ETF。不過有圖睇住先

仲有最後一種。黃金ETF，其實好東西，又多人問。就係太多人問，開多新一篇講，比較晒咁多隻。星期四或most likely 星期六（因為唔想連續兩期講金）

冇耐性嘅你，比個表你自己睇住先。順便有錯指正我，因為有啲ETF都係讀者講我先知。你最關心當然係回報，開支之類。另外市值呀，bid ask spread呀，volatility 我都有擺。至於咩Sharpe Ratio，唔明嘅Google（幫你做埋了），或者等我再解，但其實唔多重要。唔清嘅，Attachment 有張高清版（應該）

400個讀者，有人叻過我絶對唔奇，如果只計某方面，更加好多人都叻過我。今次寫金讀者都畀咗好多意見，例如有啲ETF我之前都唔識。冇所謂，集思廣益下，反正我又可以用公司Bloomberg

最後畀多兩個表你，左邊表係9年前（2011）你100蚊放落每隻嘢度。右邊表係2年前（2018）你100蚊放落兩隻嘢度。點解分兩個表？因為GLDM係呢2年先出現，左邊表冇，右邊表先有。

 XAU就係期金，你平時睇到嘅「金價」。咁當然XAU係跑贏晒，因為其他東西有儲存費有開支。但在不同ETF中，可以見到分別嘅。其實建議你睇長少少。因為當中仲涉及啲時差呀之類嘅麻煩問題。

小版務-抽獎：

其實埃汾自己科水訂咁多嘢，有時又有啲免費嘢，例如1個月免費嘅Wall Street Journal戶口，或者Washington Post，或者係The Athletic（體育嘢，唔係金融，但順手講埋），甚至好似連EverNote Gift Account我都有。咁點計都係畀呢度讀者，好過拎去引新客咁衰（雖然國際慣例新客先多人出力拉）。但，點送咗佢？點抽獎？可以PM畀啲意見我