畢菲特買金。點炒恒指季檢？留意信和。飛機租賃業績 (Patreon)

畢菲特都跟我買金！

恒指季檢炒法（有埋Excel 玩）

恒指踢走信和，可以留意下

中國飛機租賃1848業績不錯，睇埋中銀航空租賃2588先

小廣告（非球迷可skip）

答應過星期二四六出，但起身時都天黑，又唔想求其寫，所以拖到星期日淩晨出。結果寫夠三千幾字。以後都係星期二四六晚，仲有機會有號外。即係至少三篇，甚至更多。記得推介畀朋友。

好，正題。

畢菲特都跟我買金！

上篇講黃金嘅文，你地評價不錯。原本話星期二或者四先再講實際點買，因為唔想連續兩篇寫同一樣嘢。但明顯地，韋拿踢法似我，連畢菲特都睇我嘅文，今次我地行在股神之前。

講嘅當然係佢披露買咗金礦股Barrick Gold，總部加拿大，多倫多同紐約上市，紐約冧把正係GOLD。畢菲特明明咁多年恥笑買黃金，而家打倒昨日之我。但未必係壞事，股東利益重要過自己嘅ego。你要明白佢大半生人都係高息年代，冇而家嘅無限印錢金融妖術。當然金額對巴郡嚟講唔大，仲有，無意對股神不敬，但佢嘅戰績今非昔比。但有乜重要？重要係佢會影響到更多人留意黃金同相關嘅嘢。派對而家先開始。

下篇先會詳細講買金應該點買—但預告你知，就係唔好買金礦股。無意質疑股神智慧，你見順周期（金價升，或者股票狂升）時，金礦股往往跑贏金價。但記住埃汾金句：「萬一你錯呢？」。跌又如何？跌當然更金。而拉勻長線睇。我諗上面個圖解釋晒一切。隻嘢股價係十年前一半，實金升咗幾多？

有機會想寫Charlie Bilello 嘅投資二十法則，但記住，第十二點，simplicity beats complexity。睇好金價，買金，唔使搞咁多嘢。啲咩loop loop loop 大法多數係把托收場。使乜咁複雜？

恒指季檢炒法（有埋Excel 玩）

恒指季檢結果出咗，明報同經濟嘅報導都不錯，兩個記者我都識。詳細分析我會遲下放上 Facebook，但簡單版畀咗你地先，仲有畀埋我個Excel你玩（睇本文attachment），FB讀者就唔會有．想自己研究或者入行嘅可能有用。

坊間嘅討論多數在美團（3690）大熱倒灶，或者小米（1810）係咪因為林鄭個仔（？）做過所以有得入（未免太睇得起佢？），或者係金融股同騰訊（700）權重大降有沽壓之類。

但，世界並唔係咁運作嘅（否則我仲使搵食？）。

先講美團，情況比較簡單。冇錯，股價呢排好強，亦係大熱倒灶。但係咪代表之後就急跌？未必。記住股票嘅邏輯同日常生活唔多同，好多時唔係直線邏輯，唔係教科書識嘅夠熱就著火，凡爾賽和約太辣就所以導致再一次大戰，唔好以為有咩必然。邊個話美團炒起，就係「因為」估入恒指？未必。可能有少係因為近期嘅乜鬼「內循環」（習近評的潮語）。幾大中資科技股中，就係美團近乎零海外業務，其他都或多或少會畀人搞，所以資金入晒去。

就算美團大跌，就好老套咁講：同基本因素無關，正係買入嘅機會。因為真係同基本因素無關嘛！平唔買，唔通貴先買？而慎防有人唔知，呢度講啲投資，多數都係中長期少少—中長期即係幾個月至幾年啦（有啲人過夜就中線，三日就係長期）。

仲有，炒入恒指，最好嘅機會，係在生效前。9月7號星期一生效，即係9月4號星期五執位，多數星期四五就有異動。我建議你唔炒都睇下，幾次都係咁。點解會咁？因為有堆「被動基金」，例如出名嘅盈富基金（2800），要跟返恒指調整。但因為不能偏離恒指太多，例如未有小米嘅星期三佢不能去買小米，所以就往往係星期四五先「可以」去買，自然成為其他人「打劫」嘅機會。

「打劫」嘅詳情，Facebook Page應會講，嚟緊本書都應該會（＊）。呢度快講。之前我講「港版納指」都講過類似嘅嘢。其實恒指公司有講（明報個圖都有），大約有幾多被動基金嘅錢追蹤恒指。咁所以，你睇下個權重變動，咪知有幾多資金要追入同沽出。

但，呢度都唔係完結。你權重變得最多，或者資金變得最多，不代表最好炒。例如阿里巴巴（9988）呢啲，扯，日日都N咁多人炒架啦，你權重由0%變5%，咩77億流入，係多但唔係痴線地多？

所以重點，係明報張圖最後一個 column—你隻嘢平時幾多成交？你阿里巴巴77億追貨，但平時一日都近60億成交架啦！（我用3個月平均，明報只用星期五）。但你睇隻藥明（2269）先甘！係只佔1.75%，但27億流入，隻嘢平時幾億成交架咋！就係炒啲資金進出相對平時成交極多嘅。

明白個道理後，詳情我不細解。睇圖。中間一大堆我hide咗，鍾意嘅自己拎個Excel玩，但中間嗰啲變動不大。係啲新貴同被踢嘅比較大。例如藥明，個資金流入等於平日成交3倍，到臨入前應該最好炒。重災區？信和，同埋旺旺。你睇信和平時幾千萬成交，你個資金流出幾億，真係有排沽。但，呢啲又係機會！下一節（唔係下一篇）寫！

國企指數嗰堆？悶得很。解都費事。但話你知原因：追蹤國企指數嘅被動基金，金額係少過恒指好多嘅。鍾意就拎個Excel玩下。

（＊）係喎，埃汾出書呀，其實傾咗一排，但懶。但今次應該冇走雞了。未咁快，你預年尾甚至下年。到時再話你知。金融書啦，支持下，可以搵我簽名影相。講真賺錢（如有）極少，但叫做圓個心願。

恒指踢走信和，可以留意下

世事嘅嘢，真係環環相扣。所以點解專欄係要期期睇（但反而你儲埋三篇先睇都得），因為好多嘢都各自有關。你學嘅係心法同知識，唔係貼士（雖然有時都有）

貼多次個圖。上一段講過，恒指執位，信和被踢走其實唔算好意外。但因為平時成交太少，所以資金流出等於8.5日嘅平時成交，執位前應該沽到傻。

但呢個真係好機會！如果我有錢又買得，我都會買返啲玩。除咗係「基本因素冇變」外，仲有係我本身都鍾意信和，之前都寫過！呢啲情況我幾鍾意，隻嘢有event，而如果本身都鍾意，買落去冇乜得點輸。正如之前呢度都講過，搏平價吞併抖音，可以買微軟，反正微軟都係好公司。

信和情況一樣。之前Homeblogger嗰邊都推介過（樓上個圖），因為夠殘，同埋搏私有化。當然唔係我獨家發現，高盛都有報告講，可以睇報導。

在家搵唔到數據，但信和嘅估值（以Price to Book計），應該殘過金融海嘯。而家大唔大鑊過金融海嘯？都一半半，對收租佬可能都係，因為都唔知幾時先疫情過。但好在信和而家係冇借貸嘅，net cash（其實幾吹脹，信和當年以取進見稱，而家低息反而唔敢借錢）。

至於你講咩疫情打擊租金呀之類，人人皆知，現價點都反映晒。到被踢出恒指前，一大輪沽壓，有機會可以去執下平貨。

不過，就真係小注怡情好了。我對以上寫嘅嘢都好有信心，但搏私有化最難係乜？係唔知等幾耐。要無比嘅時間。我師傅老馮有啲人聽過，我寫職場文有提佢，但佢師傅（即係我師公）霍生先係傳奇。霍生一生人從來唔信大陸嘢，最鍾意買啲老牌香港企業，放落床下底等私有化，一等十年廿年都有，國浩亦係佢代表作，以前耐唔耐都見報。

當然佢本身係有錢人，玩呢啲只係證明人生。你睇咩大新2356，亞洲金融662，AEON信貸900（呢隻有讀者點唱！我會寫），全世界都知係等賣盤等私有化，但等足幾多年？我話你知由我入行開始已經聽，即係16年。好彩嘅，搏升幾倍咯。唔好彩嘅，真係搞咁多年都未必跑得贏通脹。但私有化就係咁，十年八年唔出現，忽然間一日搞掂升幾倍。所以真係玩眼光多過搵到快錢。你又諗下，對某啲人（霍生？）嚟講，扑中一隻私有化賺5倍，係威過跟人買科技股賺10倍。因為佢本身有錢，同大家追求嘅不同。

中國飛機租賃1848業績不錯，睇埋中銀航空租賃2588先

之前寫過隻中銀航空租賃（2588），不再重覆。簡單嚟講呢類公司等同當舖，航空公司受難，佢地反而受惠。因為航空公司冇錢，就玩sales and lease back，賣飛機，再租返，套現。但呢啲行業門檻當然極高，技術唔難，但要有好大條水喉。2588就中國銀行做大股東，1848就冇，所以一路都鍾意2588

結果係1848出業績先，午飯出，出完股價勁升，市場似乎幾受落。未細睇，但見按年盈利仲有增長，似乎我個假設係啱的。航空公司死晒，蝕到趴，但飛機租賃公司盈利仲有增長。

當然，同真當舖一樣，如果航空公司只係少少短期財困，咁飛機租賃公司梗係爽。但如果玩到破產，又唔同玩法。但而家呢刻見到，各地政府似乎都唔想航空公司爆煲。所以我估啲飛機租賃公司OK。

但講真2588亦唔係極平，而呢啲公司仲有個風險 -畀美國制裁。你唔使好政治，都諗到問題：美國就用納稅人嘅錢（或印出嚟嘅錢），各式方法幫啲航空公司—但航空公司就幫襯大陸嘅國有飛機租賃公司（理論上2588係新加坡公司，但大股東係中國銀行嘛），個個月交租畀大陸政府，你話政治正唔正確？

無論如何，敢搏嘅咪買。唔敢嘅，當知多啲個行業。

小廣告（非球迷可skip）

之前講過，呢度收咗大家月費，冇理由再賣廣告，或者有植入內容。但今次小例外。一句，球迷請去subscribe「體嘢」Patreon。我絶無收接直接簡接利益或回佣，只係支持朋友。首先體嘢高生Eric係我近年識嘅朋友，相當有趣嘅人，亦唔止只係識波，我亦有在佢地度寫文（稿費欠奉，頂多得餐飯）。第二佢都有在嗰邊幫我推呢邊，我就回禮。第三？高生係我呢度嘅第一個Patreon！開咗幾分鐘佢就訂。所以球迷支持下佢（非球迷都可以嘅）